هذا وانا ماعندي ارادة نزل وزني

حبيت أشارككم بتجربتي مع نزول الوزن وتمنيت اقدر انزل جدول الوزن الخاص بي لكن للأسف ما أمكن يالله مو مشكلة المهم أنا كان وزني 75 ولا فخر بعد الولادة طبعا والان 61 يعني ولله الحمد 14 ك راحوا لكن خلال فترة 6 شهور يعني 2 ك في الشهر هذا وانا ماعندي ارادة يعني لو التزمت مزبوط كان الحال بيكون غير ولس عندي زيادة يمكن 5 ك رح اقضي عليهم قبل عيد الأ ضحى انشالله
مع العلم اني اموت في الحلويات والمكسرات والأشياء اللي تسمن كلها طيب ايش سويت يالله نبدأ :
أولا :
اتخذت القرار اني اعود رشيقة لأن السمنة تعطي زيادة في العمر بشكل فضيع غير تأثيرها على الصحة وتحرمك من الملابس الجميلة وغيرها الكثير اضافة الى ان الشخص السمين يبدو قليل ارادة وضعيف فما حبيت هذا الشعور ابدا .
ثانيا :
عملت جدول باليوم والتاريخ والوزن ونوعية الطعام والرياضة الممارسة ومدتها وسجلت فيه الوزن كل يوم او كل رأس اسبوع .وفي الصباح بعد الخروج من دورة المياة .
ثالثا :
اشتريت جهاز رياضي (اوربت ترك ) وحطيته في وجهي في الغرفة صحيح اني ما استخدمة يوميا لكن وجوده امامي يذكرني دائما بالهدف الذي اسعى لتحقيقه فلا افرط في الطعام او الحلويات ولا تنسوا التعليقات اللي سمعتها لما اشتريت الجهاز كانت حافز لي والان كلهم يسألوني كيف نحفت والجهاز افضل من الدراجة كثير وصوته هادي والمفروض يستخدم 30 دقيقة ثلاث مرات في الاسبوع ولكن انا استخدمة يوم ورا يوم مدة 15 د وهو متعب جدا يعني تحسين فعلا انك بذلت مجهود
حاولت امشي لكن الجو مرة ما يساعد حر موت .
رابعا : هذي لا تضحكون عليها
نزلت السوق واشتريت اجمل البلايز والتنانير من اغلى الماركات بمقاسي قبل الزواج وعلقتها قدام عيوني ووالله بدأت الان البس بعضها وشكلها معقول بس باقي الخمسة كيلو تروح . وأصير اخر تمام .
خامسا:
والمفروض هذي كانت ثانيا دخولي المنتدى كان يرفع معنوياتي بشكل كبير وكل ما احس اني افرطت في الاكل ادخل المنتدى واخذ جرعة منشطة واطلع .

سادسا :
كوني موظفة ساعدني بشكل كبير لأني الاحظ ايام الخميس والجمعة تزداد الشراهة ودخول المطبخ.وفي العمل الغيت الفطور من زمان واكتفي بشرب الماء مع انه خطأ لكن شهيتي في الصباح مسدودة عالاخر فأستغليت الفرصة .
سابعا :
خصصت أيام السبت والاحد والاثنين من كل اسبوع لتطبيق ريجيم معين وكثير ما ابطل واكثر ريجيم تعبني الكيميائي مع ان الوزن نزل بشكل كبير بس حسيت بصداع ودوخه غير شكل وكذلك ريجيم الشوربة مرة متعب .طبعا البركة في المنتدى فيه كثير ريجيمات طبقت معظمها اخرها كان الحليب والتمر بس التخفيف افضل كلي كل شيء بس ربع الكمية المعتادة .
ثامنا :
استخدمت شاي جامو يوميا وبدون سكر (كوبين) أما وصفات الاعشاب فأتكاسل ان اعملها لأن حوستها كثير وغير متوفرة دائما .
تاسعا :
مارست الرياضة نصف ساعة يوميا وخصصتها للبطن والأرداف, وللصدر اشتريت اله صغيرة للضغط تقريبا 50 ضغطة في كل تمرين لكن تجي ايام اتكاسل فيها عن الرياضة تماما فأضطر اخفف الأكل .ولا زلت خايفة من الترهل احس جسمي ما رح يرجع متماسك زي اول .
عاشرا :
أهم شيء لا تخلين احد يحس انك عاملة ريجيم لأنهم بيجلسون يترحمون عليك في كل مناسبة وينظرون لك بشفقة مم قد يؤثر عليك . تصرفي بذكاء اذا فيه مناسبة او حلا حاولي ما تاكلي قبلها بفترة عشان تتركي مجال للاكل وبدون محد يلاحظ وافضل من الريجيم التخفيف عشان الحرمان من اكلات معينة يسبب اكتئاب واحباط .
ملاحظة مهمة : لا تدخلي منتدى الأطباق المتنوعة ابدا على الأقل لحد ما ينزل وزنك وتأكدي مجرد ماينزل الوزن كم كيلو ما حتقدري تتراجعي وحتحسي بشعور بالثقة بالنفس ماله حدود وهذا اروع شي في الموضوع اتمنى كل وحدة تجرب ولما تحس بالملل تحاول تغير من الجو يعني ممكن تخرج مشوار او تدخل منتدى الريجيم والحمية او ترتب دولاب الملابس والتسريحة او أي نشاط يصرف طاقتها .
تحياتي