السلام عليكم ورحمة الله وبركاته
هذا اخر موضوع بيكون لي في قسم " الحمل والولاده "لاني يوم كنت حامل كانت اهتماماتي في القسم بس يوم ولدت بصراحه كرهت كل شي عن الحمل والولاده وغير هذا احس اني اهملت حيل قسم " التصاميم " اللي كان سبب لاشتراكي في المنتدى عشان جذي بيكون هذا اخر موضوع لاني بتفرغ لقسم "التصاميم"
بس قبل لااكتب الموضوع بجاوب على اكثر الاسئله اللي سالتني عن نتيجة نظام فيافي واللي وعدت قبل اني انزل نظامي بالكامل بس ماقدرت لظروف خاصه
نظامي كان عباره عن نظام فيافي و الترديد و الطابوقه الحاره و المكروشه وربط البطن وطبعا المحافظه على نفسي وان كنت خربطت في اخر 20 يوم
التحسن بالنسبه لي ماكان كبير حيل لاني مثل ماقلت خربطت خصوصا بعد الكبو كنت اتحرك ولا انام وعقب الترديد والمكروشه كنت انام بالمكيف
بالنسبه للتوسع خف عن قبل لكن ماصار ضيق حيل وهالشي يعتمد على مدى التوسع اصلا قبل الولاده .. بالنسبه لي كان التوسع كبير لاني اجهضت واجد وولدت يعني زين مني اني تحسنت شوي
بالنسبه للهوا لازال موجود لكن على أخف,, لكن اهم شي ان الهوا اللي كان يطلع اثناء (...) اختفى تماما وهذا اهم شي عندي لانه كان يسببلي الاحراج وخصوصا بالحمل زادت علي هالاعراض وبالنفاس بتلاقين الهوا يطلع من كل مكان
بالنسبه للرطوبه والماي التحسن كان بسيط لان يمكن فيني قرحه والله اعلم
انا مااخجل من هالكلام لاني ابي لكم الفايده وناويه باذن الله لما اوقف حمل اسوي خياط تجميلي وارتاح
اعتقد اني جاوبت على نتيجة النظام واللي بتستعمله كيفها واللي ماتبي هم كيفها لكني اقول ان النظام للمراه الخربانه مو للبكريه او اللي مافيها شي
نرد لموضوعنا الاصلي وهو " التحاميل "
ملاحظة :
صورت التحاميل بجهاز التلفون عشان جذي مو واضحه حيل بس لونهم افتح من الصوره يعني بني فاتح
سبق ونزلتهم في موضوع فيافي بعد التعديل بس برد انزلهم لاني كنت حاطتهم في احد الردود ومحد كان منتبه لها
وانا سويتهم من دخلت الشهر التاسع وخليتهم بالثلاجه
نتيجة التحاميل :
لاحظت بعد ماحطيت اول تحميله بنص ساعه كأن حنفيه انفتحت تحت ويوم قمت من النوم لقيت متروس افرازات ووصخ وماي صافي كان موجود على ملابسي الداخليه واستغربت من وجود هالماي بس الظاهر رحمي كان متروس ماي
وبعد كذا استعمال ماراح تحسين باحساس الحنفيه بس التحاميل هي السبب في الضيق والتنظيف لان المره تعتبر مضاد حيوي وتضيق من تحت والملح يمتص السوائل ويعقم والعسل معروف انه يضيق ومفيد للالتهابات حتى لو استخدمتيه بروحه والمحلب ينظف بس مايستخدم اول 20 يوم واذا كنتي بتسخدمين التحاميل اول 20 يوم قللي نسبة المحلب مع اني ماانصح باستخدامهم اول 20 يوم والافضل اخر 20 او 10 ايام مع ان فيافي تقول انها تستخدمهم من اول يوم بالنفاس
واذا لاحظتي ان اخر ايام تنزل التحميله متكسره يعني نظفتي
* انا مالاحظت هالشي لان حالتي تحتاج فترة طويله والمفروض التزم بالنظام لمدة 6 دورات عالاقل
وقت استخدام التحاميل :
- اخر 20 يوم او 10 ايام اذا كنتي متخوفه من المبالغه
- اخر يومين بالدوره الشهريه
- قبل النوم
طبعا بما انج نفاس مستحيل ماتقومين بالليل عشان البيبي واذا قمتي احتمال تنزل وماتستفيدين منها
بالنسبه لي كنت اسهر واذا جه الصبح اعطي البيبي للخدامه واحطها وانام
طريقة الاستخدام :
تلبسين حفاظة وتطلعين التحاميل من الثلاجه قبل نص ساعه او ساعه اذا كانت الغرفه بارده واذا كان شتا مافي داعي للثلاجه
بالنسبه لي كان الجو معتدل وكنت اخليها بره الثلاجه عندي بالغرفه
المهم وانتي بالفراش تجيبين قفازات نايلون ملوت الطبخ وتاخذين تحميله وتدعسينها داخل لأبعد مكان وانتي قاعده في وضع اللي يكون بين السجدتين بس تكون رافعه جسمج يعني تكون الساقين والركبتين على الارض وهذا افضل من انج تنسحدين وتحطينها لان وضع الانسداح يدخل هوا وعلى طول افصخي القفازات بشكل مقلوب وارميهم والبسي ونامي
المقادير :
- 3 فناجيل قهوه ممسوحه ملح فارسي مطحون
- 3 ملعقه كبيره ونص مره مطحونه
- 3 ملعقه كبيره محلب مطحون
- من 3 ونص الى 4 ملاعق كبيره عسل نحل طبيعي ( لازم طبيعي مو من السوبر ماركت ) لان الصناعي فيه سكر والسكر يخرب المره
ملاحظه : ممكن تخلين مقدار المره 4 ملاعق كبيره والمحلب 2 ونص ملعقة كبيره محلب بيكون افضل لاني المره الجايه بقلل نسبة المحلب
الطريقة :
1- نغسل المره ونتركها في مصفاة وبعدين نحطها في صحن ونخليها تنشف وبعدين نطحنها
2- نغسل المحلب بنفس طريقة المره ونطحنه
3-نغسل الملح الفارسي ونتركه في مصفاة لين ينشف ( اذا مانشف ننشفه بحذر بكلنكس ) بعدين نكسره بالهاون الحديد الى قطع صغيره وبعدين نطحنه ناعم
4- نغسل الايد عدل عشان ماتتلوث التحاميل او ممكن نستعمل القفازات النايلون بعد مانغسلهم طبعا ( لان ريحة المره على الايد ماتروح بسهوله ) او ممكن نستعمل الملعقة بالتحريك
4- في صحن عميق نحط المره والمحلب والملح ونضيف 3 ملاعق عسل ونحرك وبعدين نضيف الملعقه الرابعه تدريجيا ( يمكن يكفي 3 ملاعق ونص او 4 ) المهم تحسين ان الخلطه صارت ثقيله وماتلزق ( بالنسبه لي انا ضفت 4 ملاعق عسل ) ونخلطهم عدل
5- نبلل سبابة الايد اليمين بشوية ماي ( موتكثرين ) وتاخذين كثر حبة النوى وتسوينهم نفس حبة النوى بس لاتسوين اطرافها حاده وصفيها في صحن كبير مغسول عدل من الصابون ومنشف من الماي
6- حطيهم في مكان فيه تيار هوا لمدة يومين وشمس او لين ينشفون وطبعا لازم تغطينهم بمشخاله كبيره او خام تورعشان الحشرات وممكن تحطينهم في غرفه عن الدريشه والشمس وتشغلين المروحه على العالي
7- بعدين حطيهم بعلبه زجاجيه وحطينهم بالثلاجه اذا كان الجو حار بس اذا كان شتا خليهم بره وعلى فكره التحاميل ماتخترب اذا حافظتي عليهم
ملاحظات :
- من 80 الى 100 حبة حسب الحجم اللي بتسوينه
- حاولي تخلين كل التحاميل نفس الحجم تقريبا
واسمحولي على القصور :26:
جزاك الله خير:26: :26: :26: