عاطلة ؟؟ تبحثين عن عمل ؟؟ الموضوع لك ,, اقبلي يامال العرس والوظيفة وكل شي زين/قديم

.



بعد فترة ,, جتني وظيفه في مكان " الله يستر علينا وعليهم " مشهووووور ومعرووووف ... الله من الدعااااية اللي مسوينها لهالمكان .... و رحت وسويت المقابله .. وتمت على خير

نقطة مهمة : في المقابلة .. اولا لازم توصلين على الموعد .. ثانيا خليك واثقه من نفسك ولا تكثرين اسئله .... هم بيعلمونك كل شششي ... عن دوامك وعن الراتب .... انتي بس سوي نفسك فاهمه وقولي : ممكن اعرف وش طبيعة عملي ؟

وخليك رسمية وواثقه من نفسك .. صوتك هادي ومسموع في نفس الوقت .... جلستك مرتبة ومتسنده بكل اريحية .... لبسك رسمي .. واهتمي بالششكل كثييير ترى المظهر له دور .. ابتسمي واعطيهم انطباع انك متحمسه للعمل ..... وحسسيهم انك مميزة من خلال اجاباتك

راح احط لنك لمنتدى كاتبين فيه عن المقابلات ووش المفروض تسوين وماتسوين .. ووش الاسئله اللي ممكن تنسئلين عنها ... وكيف تجاوبين

يعني جهزي نفسك واجاباتك

طبعا المقابلات متشااااابهه .... يمكن اللي بيختلف ... احيانا يعطونك ورقه تجاوبين عليها ... اسئله عن شخصيتك وانفعالاتك وعصبيتك ومشاعرك

واحيانا يحددون لك موعد لاختبار انجليزي ... وغالبا الاختبارات تكون عاااااامة .. استماع وقراءه وقواعد ومفردات ..... يعني مو صعبه ... والاجوبه اختياري .. حتى انك ممكن تحضرين نفسك في البيت قبل الاختبار او تسئلين وحده اختبرت قبلك

" مثل مره اختبرت بنت عمتي قبلي في مكان وسئلتها عن الاسئله :42: "

يعني استفيدي من كل الفرص اللي حولك ,, حتى في النت بتلاقين ناس كاتبين تجاربهم

نرجع للوظيفه اللي تمت على خير ,, طبعا الراتب كان 2500 ... بس انا قلت في قريح مو مهم .. بعدين اكبر واتشرط عليهم :biggrin: وقلت على الاقل اخذ خبرة .... لان الخبرة مهمة مرررة في سيرتك الذاتية وتعطيك مميزات في عقود العمل اللي بتوقعينها بعدين

وكان فيها دوام خميس وقلت يابنت .. وماله داومي خميس

الدوام كان شفت واحد ... عادي من 8 الى 2

بس مع الاسسسسسسف ,, انصدمت بالوظيفه

وخااااااصة على سمعة هالمكان ...!!

اولا تخيلوا جايين حنا يالموظفات الجدد مالنا مكاتب خخخخخخخخ كنا تقريبا 4 موظفات

ثانيا ماعندهم امكانياااااااات .. اجهزة كمبيوتر قديمه ومافيه الا 2 وبالسرا عليهم

ومديرنا بس يآمرنا سووا وحطووا وجيبوا ... وهو مايقدم لنا اي مساعدات ...!!

مثلا .. انا قالوا امسكي شؤون التوظيف والتدريب

التارقت حقك توظفين 20 بنت وتدربين 30 بنت في الشهر ..!!

قلت طيب عطوني ارقام المعاهد والشركات اللي انتم متعاقدين معهم وانا انسق بينهم وبين البنات

قاموا عطوني دليل التلفونات ذاك الاصفر ماغيره .... وقالوا انتي دقي على الشركات ودوريلهم وظايف

ههههههههههههههههه انا مالقيت لنفسي القى لهم ..!! لا ويبون 30 وحده بالشهر

يسولفووووووون ههههههههههه

ويوم قمت اهاوش وعصبت .... جابوا لي جريدة الوسيله كمساعده :icon31:

لا ودقي على البنات او الشركات من جوالك ..!!

قلت اقول فمان الله ,, الوجه من الوجه كحلي ..

وهنا نستخلص نقاط مهمه : اولا لايغرك سمعة المكان .. الا لين تجربين بنفسك ,, ثانيا اذا حسيتي ان هالوظيفه ماتجيب همها وجالسين يستغلونك .. حطي رجلك ولا يشوفون الا غبرتك ... ثالثا وهو الاهم ... هالنوعية من الشركان ماينفع معهم تمشين لهم وتقولين طيب وان شاء الله .. انفخي عليهم وخذي حقك كااااااامل ولاتخلينهم يقطون كل الشغل عليك ويشغلونك بألف شغله من تخصصك ومن غير تخصصك


واذا انفصلتي ترى مالي دخل :icon30:


يتبع ... وقسمن اخر شي

.




وبالنسبه للشهادات .. لاااازم يصير معك شهاده على اي شي تعرفينه ... مايعترفون بمدحك لنفسك

" لانه مرة بمقابله في معهد كمبيوتر وانجليزي ,, يبون اداريه ومدرسة انجليزي.. سئلتني عن خبرتي بالكمبيوتر .. قلتلها منتازة .. قالت وش شهادتك؟؟ قلت اسبوع بس ماعليك تراني اعرف احسن منك :biggrin: قالت لا لازم شهاده ..!!! قلت لها الحين افتحي جهازك واطلبي مني ايييي شي واذا ماسويته عشاك علي .. قالت اها بس ... اصلا انا ابي اوظفك مدرسه ...!! قلت لها مااحب التدريس انا ابي اداريه ..... قالت حتى لو تتوظفين ادارية بنخليك تدرسين احيانا لو غابت وحده من المدرسات ..!! ياسلام ههههههههههههههههه .. همن قالت بعدين ليش حاطة في سسيرتك ( جهات الاتصال " ابوك واخوك" ؟) قلت من تبين احط ياعمتي؟ قالت حطي ارقام مدرساتك بالكلية عشان نسئلهم عنك وعن سلوكك ؟؟!! ليش بترشحيني لرئاسة دولة انتي؟؟ ,, عاد هي اجنبيه مو عربيه وتتكلم انجليزي ... قلت لها هذاك في امريكا ياحبيبتي ... هنا نحط ارقام اخوانا وابوانا عشان اذا مارديت عليك انا يردون عليك هم بس :biggrin: بلا سلوك بلا فتاق ... لاحظتها حاقدة وتتلقط علي .. في الاخير اكتشفت ان صديقتي اللي تدّرس عندهم متهاوشه معها هع هع "

*الخلاصة لازم شهادة تطسين بها عيونهم

مالكم بالطويله <<<< احلفي

نهاية مشواري .. لقيت وظايف بالهبل ... يدقون علي وظفتين بنفس الاسبوع ...!! هذا غير الخطاب هههههههههههههههههه

كلكم بتسئلون وش السر

منيب قايله :icon30: <<< بتنجلدين

السر يااخواتي متضمن في عدة نقاط

تعالوا وراااااايااااا

اول شي ..اسباب دينيه.. التوكل على الله .. والايمان به .... ولازم تكونين متيقنه في قرارة نفسك ان الوظيفه هذي رزق بيده سبحانه وحـــده ,, واذا الله كتب لك رزق مافيه احد من خلقه يقدر يمنعك منه

لاتقولين واسطات وخرابيط ,, انا عمي توسط لي في بنك وماوظفوني .. اصلا مانادوني لمقابله ولا شي ... مع ان واسطته قوية وموظف ناس قبلي ... بس شوفوا سبحان الله

وبيني وبينكم حمدت ربي انهم ماوظفوني لاني ماكنت ابيه يتوسط لي ... ابي وظيفتي تكون رزق من ربي و بجهدي انا وبس

وبعدين .. اكثرررررري استغفاااااااار .... مو مرة ومرتين ولا مية وميتين .. اذا تقدرين الف والفين

هي اصلا لاخرتك قبل دنياااااك وبتشوفين من ورا الاستغفار خيييييير كثييييييير

و الدعااااااء ..... مو بس في اخر الليل ... لا في كل وقت وبين الاذان والاقامة ..... وقبل الافطار وعند سماع صوت الديك .. وفي السجود ... وقبل السلام من الصلاة

وركززززززي على اخر وحدة ...... قبل ماتسلمين من الصلاة قولي (( اللهم يارزاق ياوهاب يافتاح ياكريم ياجواد ياغني يامغني ياباسط يانافع .. يامن بيده ملكوت السموات والارض .. ارزقني بالوظيفة الصالحة التي ترضاها لي ,,يامسبب الاسباب ومفتح الابواب وسامع الاصوات ومجيب الدعوات اللهم اكفني بطيب حلالك عن حرامك واغنني بفضلك عمن سواك ))

لاتتشرطين في دعائك ولا تطلبين شي معين .. خليها تجي من ربك هو اعلم بالاصلح والانفع لك

وتخيلي انك تصلين 5 مرات باليوم وكل مرة تدعين قبل ماتسلمين

هل تتوقعين ان القريب المجيب الرحمن الرحيم بيرد دعوتك؟

فأدعي وانتي وااااااثقه بالاجااااابه وكأنهم الحين بيدقون عليك يوظفونك

و ادعي بأي شي ثاني تبينه و للمسلمين والمسلمات

و الصدقه ,, ويفضل انك تحطين عندك علبه تحطين فيها كل يوم بيومه .. واخر الشهر تودينها للجمعيات الخيريه

لاني اكتشفت ان التصدق يوميا له اثر عظييييييم ... في نظري ان اثره اعظم من انك تطلعين صدقتك مجموعه مرة وحده في يوم واحد

وطبعا كلنا عارفين الحديث " اللهم اعطي منفقا خلفا , اللهم اعطي ممسكا تلفا"

تخيلي ان الملك كل يووووم يدعي لك بهالدعاء العظيم

طبعا وحاولي تغيرين من نفسك للافضل واكثري من النوافل ... وارضي بكل مايكتبه الله لك ... و احمدي الله على نعمه حمدا كثيرا .... صومي نوافل ... سابقي في الخيرات .... امتنعي عن المعاصي قدر استطاعتك .. و اسعي لغيرك في وظايف وفرجي كرب اخواتك واخوانك قد ماتقدرين عشان ربي يفتح عليك .... اكثري من ترديد اسماء الله الحسنى ... الفتاح الوهاب الرزاق الكريم الغني النافع الباسط

لازم تتغيرين للافضل

والاهم من كل هذا النيـــــــه .. احسني نيتك .... وانوي في قلبك ان وظيفتك تكون عون لك على الخير وانك تساعدين فيها اهلك وانك تكونين باب للخير لزميلاتك الموظفات .....


نجي للاسباب الدنيوية

مثل ماقلت لكم في البداية ,, لازم تراعين النقاط المهمه في البحث وفي التقديم ,, لازم تثقفين نفسك .. وتزودين سيرتك بالشهادات قدر استطاعتك ...

و اطررررقي كل الابوااااااااااب ,, لاتقولين هذولي مااعلنوا وهذولي ماعندهم قسم نسائي وهذولي مدري ايش ..... لالالالالا ذبي وجهك في كل مكاااااان ولو تروحين بنفسك وتضبطين امورك يكون افضل


طبعا انصحك في خلال بحثك اول شي بموقع قوقل ... دوري فيه لين تطلعين مخه

ياما لقيت فيه بلاااااوي .... بس مثل ماقلت لك ... يعتمد على طريقة بحثك

وبرضو روحي لهالرابط

http://vb.eqla3.com/forumdisplay.php?f=49&order=desc


هذا القسم اكثر من راااااائع .. و90% من اعلانات الوظايف اللي فيه حقيقيه .. ومن تجررربة اكلمكم

وناس تتفانى في خدمتك ومساعدتك ,, ادخلي كل المواضيع ... لان بعضها يكون في الردود روابط لتقديمات ... يعني احيانا العنوان مايعطيك دليل على المضمون

وهو نفس الموقع اللي قلت لكم فيه نصايح عن المقابلات

وبرضو زوري هالموقع

http://www.womanish.net/Jobseekers_ar.htm

هذا لي تجربة شخصيه مع صاحبته

الانسانه اكثـــــــــــــر من رائعه

طبعا هي شركة استشارات .. يجونها الشركات عشان تجهز لهم طاقم موظفات نسائي

وحده فاهمه وتحاول توفر وظيفه للبنت السعودية بما يتناسب مع ظروفها وامكانياتها

لدرجه انها تقول ممكن اوظف بدون شهادة بس لازم يكون عندك مهااارة معينه او شي يميزك او شي تبدعين فيه

وبرضو ذكرت من كلامها انها ممكن توظف وحده وهي في بيتهم ..!! المهم تكون هالانسانه ملتزمه بشغلها وتأديه مثل ماينطلب منها

مو تروح استراحات وتفلها شاهي وقهاوي وماتسوي شي ..!!

عموما كلموها بنفسكم وشوفوا

و برضو عندكم مستشفى العسكري ... هذا درعموا عليهم وروحوا خذوا ابلكيشن (ورقه طلب) وعبوها كلها شهر الا داقين عليكم ..... وبرضو من تجررربه واتصلوا علي بس انا مارحت لهم كان عندي ظروف

و مدينه الملك عبدالعزيز الطبيه ,,, انا قدمت عن طريق موقعهم

بس يوم رحت اخذ الاوراق واعبي الطلب ,,, لقيت عاااااالم عندهم بنات وشباب

كلهم جايين بدون تقديم نت ...... وبصراحة سريعيييين في الاجراءات .. اهم شي عندهم تعدين اختبار الانجليزي

والموظفه قالت لي انهم محتااااااجيييييين ,,, وخاصه سكرتيرات ... و اهم شرط هو سرررعة الطباعه

تقول نسويلك اختبار واذا تعديته تتوظفين ورواتبهم حلووووووة

لقيت بنات كثيييييير ,, والاحلى يعيدون لك اختبار الانجليزي الظاهر 3 مرات اذا ماتعديتيه اول مره

يعني فله

و برضو البنك الفرنسي ....اتصلوا فيني و رحت لهم .... وسووا مقابله بس الظاهر ماعجبتهم لاني متنقبه لوووول وهم شغلهم اختلاااااط والبنات كاشفات هناك

عموما انا طووووووووولت بالموضوووووووووع

اسسسسفه جدا

واتمنى فعلا تستفيدوووووون واللي تتوظف تبشرني ههههههههه

وانا ولله الحــــــمــــــد توظفت في وظيفه ماكنت احلم فيهااااااااااااااا " ماشاء الله" من ناحية موقعهم ومن ناحية الراااتب ومن ناحية انه بدون اختلاط وحتى طبيعة عملي الحمدلله

ومازالت العروض تجيني ..!! هذا من فضل ربي ... ولكل مجتهد نصيــــــــب

ولا تجي وحده تقول ان شهادتي مطلوبه ...... والله اعرف بنات تخصصاتهم مو مطلووووبه ابداااااااا ومع ذلك توظفوا وبأحسن الاماكن ..... وبدوووون وااااااااسسسسسطه ....... المهم تثقين بالله وتعملين بالاسباب


نقطة اخيرة .. انتبهي لجوالك هههههههههههه ترى ياما تجيني مكالمات من ثابت وارجع ادق الاقيهم وظيفه كلموا ويوم مارديت مافكروا يدقون على ابوي او حتى يتصلون فيني مرة ثانية

اتصلي و اول مايرد عليك مسج صوتي بتعرفين هم اي جهه واطلبي تحويلة التوظيف وقولي لهم انتم داقين وكذا هههههههه جد والله ترى انا كذا اسوي


ونماذج السيرة المتواضعة موجوده في المرفقات ( وردة)<<<مااقدر احط رموز كثيرة في الموضوع هع

* النموذج مافيه خانة للخبرات لان ماعندي خبرات ,, بس اللي عندها ممكن تضيف كلمة الخبرات وتكتب خبراتها , وفي خانه العنوان تكتبين المدينه والحي .. ورقم البيت ورقم جوالك

وطبعا النموذج العربي مترجم النموذج الانجليزي بالضبط

و اي وحده مو عارفه تعبيها تنزل برنامج الوافي وتترجم ... مرة سهل البرنامج وبيساعدك


و اي سؤال او استفسار انا حاضرة

و اللي استفادت من موضوعي تدعي لي دعوة طاهرة من قلبها ,, واللي مااستفادت برضو تدعي لي :22:


.

ماشااء الله


ابداع اختي


الله يوفقك

ويرزقني انا والبنوتات وظااائف<<خوذي وثيقة تخرجك اول ياساقطه

الله يعطيك العافيه

الله يوفقك دنيا واخره

يالله كل ذا حتسي !!

مشاء الله عليك

احس فاتورة جوالك ماتطيح عن 5 الاف