تحياتي لكم يا بنات حواء،، قبل كمن سنه كنا نستغرب كيف يسوون الحمام المغربي لكن ألحين ولله الحمد صار الكل مبدع في هالمجال،،، لكن الحمام الايراني وايد ناس تحتار فيه ووايد اسئله تنحط بخصوص الحمام الايراني والسفيداب لكن اليوم سلمكم الله من الشر يبتلكم معلومات وطريقة الحمام الايراني موضحه بالصور والطريقه هذي يبتها من وحده إيرانيه ويانا فالدوام وجربتها والصراااااحه روووووعه لاحظت التفتيح من اول استخدام واليوم قررت احطلكم الطريقه لاني شفت كذا وحده من العضوات طالبينها وحبيت اساعدهم.
والموضوووووع حصري لعالم حــــــــــــــــــــــــــــــــــــــــــــــــــواء
نتبدي ويا بعض بسم الله الرحمن الرحيم ..
أولا مقاديير الحمام الايراني - السفيداب عباره عن ثلاث اشياء:
1- الحجر
وهو عباره عن حجر ايراني وموجود في ايران وكلمة سفيداب اظن معناها الماي الابيض مب متأكده من المعلومه بس اظن هذي معناها وله اسم ثاني اليوم عرفته من فارسة حـــواء اللي هو حجر الباروق.
---------------------------------
2- البودره
البودره هي نفسها الحجر بس هذي مطحووونه
----------------------------------
3- الصابونه
---------------------------------
الطريقه الاولى للوجه:
ناخذ ملعقتين اكل من بودرة السفيداب مع ملعقة روب السعوديين يسمونه (زبادي) ونعصر فوقهم ليمونه ونخلط مزيج بحيث يكون القوام متماسك شوي ويصلح يكون ماسك للوجه، ندهن الوجهه بالماسك وبعدين نتريا ربع ساعه لين ينشف بروحه.
-------------------------------
الطريقه الثانيه للجسم:
ترشين على كل جسمج مااااي داافي عسب تتفتح المسامات وتفتحين الماااي الحار عسب يستوي عندج بخااار فالحمام يعني شرات الحمام المغربي، قبلها بربع ساعه خذي احجار السفيداب وودنيها في ماي ورد (ودنيها بالإماراتي ) يعني نقعيها، عقب خذي الحجر ودلكي كل جسمج بالحجر بحركه دائريه وركزي عالمناطق الغامجه شرات الابط، الاكواع، الرقبه، الركب، بين الافخاذ والمؤخره، اخذي ليفه الحمام المغربي وافركي بس بحنيه مب بالقو عقب بتشوفون اليلد الميت يطيح شرات المساحه (المحايه).
--------------------------
ثالثاً
خذي صابونة السفيداب واغسلي جسمج بعد ماتخلصين من الدلكه
--------------------------
رابعاً
وآخر شي تاخذين ورد مجفف واتودنينه (تنقعينه) في ماي ورد بشرط يكون بارد وتصبينه على جسمج عسب يعطييج رييييييييحه روووووووووعه ويسكرلج مسام الجسم.
طبعاً قبل ما انهي موضوعي بس حبيت اشكر اختي مووون يعني قمر بالانجليزي طبعاً هذا اسم دلع ازقرها فيه دايما، لانها هي سبب نجاحي في كل شي من بعد الله سبحانه وتعالى والله يخليها لي يارب ويخليكم لي خوااات دايما يا بنات حواء.
وفي النهايه نقولكم حمام الهنا انشالله ..
يعطيك الف عاااااااااااااااااااااااافيه