ان شاء الله هاقدم لكم أخواتى العزيزات طبق سهل وخفيف ويارب يعجبكم ودى تعتبر اول مشاركة لى بالصور يارب تظهر كويس
الطبق هو "فروت بان كيك" من برنامج من كل بلد اكلة
وهذا هو تطبيقى للطبق
المقادير:
215جم دقيق ( كوب وملعقتين تقريبا )
1/2 كيلو لبن ( 2 كوب)
3 بيضات
100جم سكر ( 8 ملاعق )
90 جم زيت ذرة ( 4-5 ملاعق )
90 جم زبدة سايحة
ذرة ملح – ذرة فانيليا
الطريقة:
1- نخلط البيض والسكر وذرة الملح والفانيليا فى الخلاط الكهربائى لحد ما يتجانسوا ثم نضيف الزيت والزبد
2- ننزل باللبن شوية بشوية مع استمرار الخلط
3- نضيف الدقيق مع الخلط جيدا نلاحظ ان العجينة تكون سايلة مثل عجينة الكريب او الكانيلونى
4- نصفى العجينة اذا لاحظنا وجود كتل دقيق بها ثم نترك العجينة دقائق تستريح
5- ندهن مقلاة ( طاسة ) زيت بفرشة مسحة خفيفة جدا وناخد بمغرفة الاكل مقدار مناسب لحجم المقلاة ( انا استخدمت مقاسين من المقلاة كبيرة وصغيرة)
وهذه صورة استخدام المقلاة الكبيرة
هذه صورة البان كيك بعد النضج
ودى صور البان كيك الاصغر
وده بعد النضج
6- نترك البان كيك حتى تنضج من على جانب ثم نقلبها على الاخر حتى يصير لونها ذهبى
ملاحظة: نعرف انها جاهزة للقلب على الجانب الاخر اذا تحركت معنا فى المقلاة بمعنى ان طول ما هى لسه بتكون لازقة فى المقلاة ولو حاولنا قلبها قبل ذلك ممكن تقطع
7- نكمل بنفس الطريقة حتى الانتهاء من كل الخليط مع مراعاة ترك المقلاة تبرد قليلا بين كل واحدة والاخرى
- ممكن تحشى البان كيك حسب رغبتك وبالمتوافر عندك فى البيت مربى او كريمة مخفوقة و فواكه مسكرة او باسترى كريم اوشيكولاتة مثل التى يدهن بها التوست او تمر مهروس قليلا فى الزيدة هذه هى الافكار اللى عندى وطبعا ده بيرجع لذوقك فى الحشو
ودى صورة الشيكولاتة اللى استخدمتها فى الحشو
- اهم شئ اذا كنتى هتحشيها كريمة لابد ان يكون البان كيك بارد قبل الحشو حتى لا تسيح الكريمة
- انا رشيت سكر بودرة على بعض الوحدات وهى ساخنة ولفيتها كانت رائعة بس تكون ساخنة
- تضعى الحشو ثم تبرم الوحدات وممكن تقطع من المنتصف بالورب اذا كانت طويلة والصورة توضح اكثر
ولو كان طولها مناسب تترك كما هى زى كده
- ممكن كمان تعملى وحدات صغيرة وتضعيها طبقات فوق بعضها بينها كريمة وتزينيها بالفاكهة
واكيد كل واحدة بيبقى عندها افكار اكثر وده اللى انا جربته حتى الان لو حد عنده افكار كمان ياريت يقول عليها
* الشيف كان قال فكرة للتقديم :
1/4 لتر شراب او شيرة – 1/4 لتر ماء – 40 جم كاستر بودرة
( وقال ان ممكن نستخدم الكوب بدل اللتر يعنى 1/4 كوب بدل 1/4 لتر )
نذوب الكاستر فى القليل من الماء وننزل به على الشراب والماء (يكونوا على النار ) ونقلب جيدا يكون تم حشو كل الوحدات وترص فى طبق التقديم ننزل بالصوص على وش البان كيك وتزين بالفاكهة المسكرة ودى الصورة
يلا يا بنات جربوها وقولولى الاخبار وبالهنا