يوميات فطور بيتنا بهالشهر الفضيل وبالصور :) ..

[غرومة..]

هلا حبيبتي مجروحة انا موجودة بس قاعدة احمل الصور عشان ابدا انزل الصور ، تسلمين ياقلبي على اهتمامج وسؤالج يالغلا ..

[المحبة للرسول]

الله يحفظك يا رب
ما شاء الله عليكى
نمسك الخشب

[غرومة..]

مـــــاشـــــاء الله تـــبـــارك الــرحـــمـــن



اليوم الواحد والعشرين من شهر البركة..
اليوم الجمعة كانت جمعتنا عساها جمعة مباركة ، والحمد الله اليوم كان عندنا خالاتي وجدتي وعيالهم واخواني ماشاء الله تبارك الرحمن ..


هذي صورة السفرة ولله الحمد والشكر على نعمته ويحفظها من الزوال قبل لايجون اخواني وابوي من المسجد كنا لحد الحين نعدل فيها ومغطينها بقصدير عشان تحافظ على حرارتها ..





شوربة العدس الصفرا الخشنة بالشعيرية لذيــــــــــذة..

المقادير:
1 1\2 ك عدس أصفر
1\4 ك شعيرية مكسرة
كمون وفلفل أسود وملح
2 م ك بصل مفروم
1م م ثوم

الطريقة:
يغسل العدس جيدا ويسلق بماء نظيف ب 4 كوب ماء ..
نطحن نصه بالخلاط الكهربائي وبعدين نحمس البصل المفروم بجدر بشوية زيت لحد ما يتغير لونه ثم الثوم والعدس اللي ماطحناه والبهارات ونقلب ثم نضيف الشعيرية و نصب خليط العدس المطحون عليه..
ونقلب وخليها لحد ما تغلي ونطفي النار عنها..
وقدميها مع الخبز المحمص والليمون وبالعافية ..





هريس..




كبة وسمبوسة مشكلة..






سلطة الخس والجزر والزيتون..

المقادير:
خس مقطع شرايح
جزر مبروش خشن
خيار مبروش خشن
نعناع مفروم ناعم
زيتون أسباني أسود شرائح

التتبيلة:
زيت زيتون وليمون وسماق وملح ونعناع ناشف

الطريقة:
اخلطي المقادير ثم اخلطي مقادير التتبيلة ثم صبيها عليها..






بيتزا التوست بطريقتنا سهلة وخفيفة ولذيذة جدا..
المقادير:
توست منزوع الاطراف
جبن كرافت الكاس
3 م ك صلصة البيتزا الجاهزة + 3 م ك كاتشب
نقانق مقطع دوائر
اخلطي : فلفل اخضر بارد مقطع مكعبات ناعمة مع م ك بصل مفروم ناعم مع 2م ك مايونيز وم ك جبن كرافت
جبن موتزريلا

الطريقة:
ادهني التوست بجبن كرافت وضعي عليها قطعة ثانية توست "تصير مثل الساندويش" ثم ضعي شوي من خلطة البيتزا على التوست ثم شوي من خلطة الفلفل الاخضر وكم حبة نقانق ثم غطيها بجبن الموتزيلا ودخليها فرن حار "170" لمدة 5-7 دقايق لحد مايذوب الجبن وطلعيها على طول لاتخلينها تتحمر ..



وهذا من داخل شوفوا الجبن ..

[غرومة..]

الاندومي باللحم والخضار على الطريقة الصينية سهلة ولذيذة وسريعة..

المقادير:
1\2 ك لحم عجل مقطع شرائح طولية
فلفل اخضر بارد مقطع شرائح طولية
بصل مقطع شرائح طولية
ملفوف مقطع شرائح طولية

1\2 ك صويا صوص السميكة "طعمها حامض حلو"
زيت وزبدة

تتبيلة اللحم:
م ك روب ، م م فلفل حار احمر بودرة ، م م كمون ، م م فلفل أسود

3 علب اندومي "مقلية"

الطريقة:
تبلي اللحم بالتتبيلة وخليها من ساعة الى ساعتين ثم اقلي اللحم بالزيت والزبدة لحد مايستوي..
اقلي كل نوع من الخضار لوحده بزيت وزبدة قلي خفيف وخلي كل نوع بروحه "مجرد تشويح لحد ما يذبلون"..
نسوي الاندمي عادي" نسلقها لمدة دقيقتين بماء حار ثم اقليها بالبهارات والتتبيلة المرفقة بالكيس"..
اخلطي الخضار واللحم بمقلاة عميقة جدا وصبي عليهم صوص الصويا قلبي لمدة 5-10 دقايق ثم اخلطي الاندمي مع الخضار وطفي النار عنهم وقلبي عدل وحطيهم بصحن التقديم..





الفريك الأخضر لذيذة جدا ومغذي..
بالنسبة لي هالنوع من الفريك يعتبر من ألذ أنواع الفريك واحلى من الفريك اللي استخدمناه بحشو البط..

المقادير:
فريك أخضر " منظف من الصخر ترى فيه وايد صخر صغير ومغسول ومنقوع ساعتين"
ماء سلق الدجاج حار
ملح
2م ك زبدة

للتزيين :"لوز مقطع طوليا وصنوبر" محمرين بزيت وزبدة

الطريقة:
حطي الفريك بالجدر وصبي عليه ماء سلق الدجاج وخليهم بنفس المستوى "يعني الماء بس يغطي سطح الفريك لا اكثر ولا اقل ، لاننا نقعنا الفريك ساعتين" ، وخليه لحد مايغلي وحطي الزبدة على الوجه ثم غطي الجدر بالقصدير وقصري النار عليه وحطي حديدة تحت الجدر وخلي الفريك يطبخ على نار هادية لحد ما يستوي 15-20 دقيقة وعند التقديم يزيين بالقلوبات المحمرة والدجاج المحمر..





الرز بالبازلاء واللحم المفروم لذيذ جدا جدا جدا..
اخواني اطلبوا رز قوزي امس من لذته وامي ماحبت تكرر الرز فسوت نفس الفكرة بس مختلفة..

المقادير:
رز مغسول ومنقوع نص ساعة
بصل مفروم
كيلو لحم مفروم
كيس بازلاء "العلب ماينفع"
ماء سلق دجاج أو لحم
زيت وزبدة

للتزيين :"لوز مقطع طوليا وصنوبر" محمرين بزيت وزبدة

البهارات:
2م ك دارسين ناعم
1م ك كمون
1 م ك فلفل اسود
وملح

الطريقة:
احمسي البصل بالزيت والزبدة ثم اللحم المفروم وقلبي ثم ضعي البهارات وقلبي اللحم لحد مل يبدا ينشف مايه ، ضيفي البازلاء وقلبي شوي ثم ضيفي ماء السلق وخليه على نار هادئة لمدة نص ساعة ، ثم ضيفي الرز وحركيه شوي وبعدين قصدري الجدر واتركيه على نار هادئة وحطي حديدة تحت الجدر وخليه لمدة 20 دقيقة بدون فتح ، وعند التقديم يزيين بالقلوبات المحمرة والدجاج المحمر..





معكرونة بالبشاميل لذيــــــــــذة..
طريقتها موجودة بهالرابط ..
الــعــزيــمــة





وهذي صورة الأطباق كلها لاحظوا لون الرز والفريك رووووووعة ..

[غرومة..]

تشريب ومرق لحم بالبطاطس والكوسا..





صينية البطاطس والمشروم والذرة بالكريمة ، لذيييييييييذة وسريعة من ايد خالتي ام فيصل..

المقادير:
4 ك بطاطس مقطعة مكعبات ومقلية
2 علبة مشروم شرائح
2 علبة ذرة
علبة كريمة + 2 م ك جبن كرافت الكاس
ك جبن موتزريلا
فلفل اسود وملح

الطريقة:
اخلطي البطاطس والمشروم والذرة والبهار والملح ثم اخلطي الكريمة والجبن معاهم ودخليهم الفرن لمدة 15 دقيقة على 180 ثم طلعيها ورشي الجبن ودخليها الفرن لحد مايذوب ثم قدميها..





مسقعة خالتي أم يوسف اللذيذة..

طريقة عملها

تابع الطريقة..




أما صينية الرز اللي بالسفرة فهذي من امس "لان كان عندنا عشا لعمامي صورت لكم كل شي بس كرت الصور ضاع ادوره وانزلها لكم لانهم رووووووووعة خصوا البوفية وهرم الفواكه ، اخلص اللي بيدي الحين واقوم ادوره"

[غرومة..]

الحلويات:



جلي وكاستر وكريم كراميل
تمر
قطايف "جبن ومكسرات وقشطة"



كيكة بيتي كروكر الشوكولاته الغامقة باضافات رووووعة ..

المقادير:
كيكة بيتي كروكر سويتها مثل ماهو مكتوب

كيس كريم كراميل سويه عادي
2 علبة قيمر الكبيرة
3 ملاعق كاكاو
3 م ك نوتيلا
2 دريم ويب

للتزيين:
فليك وفستق مطحون

الطريقة:
سوي الكيكة وخليها تبرد تماما..
كريمة الحشو: علبة دريم ويب + قيمر + 3 ملاعق كاكاو + 3 م ك نوتيلا اخلطيهم عدل

كريمة التغطية:علبة دريم ويب + قيمر

قصيها اثنين حطي القسم الاول بطبق التقديم وشربيها 2م ك كريم كراميل ثم حطي كريمة الحشوة ، حطي الكيكة الثانية وشربيها 2م ك كريم كراميل ثم غطيها بكريمة التغطية..
زينيها بالفستق والفليك..



وهذا من داخل..





بسبوسة محشية قشطة ومزينه بالفستق..





حلو سهل جدا ولذيذ جدا جدا جدا ..

المقادير:
كيك كاكاو
2 علبة عصير مانجو
بسكويت جلكوز "تقريبا 5 علب"
الخلطة: 4 كيري + كيس كريم كراميل + علبة عصير مانجو + 1.5 علبة قيمر كبيرة

صوص كاكاو للتزيين

الطريقة:
صفي الكيك بالبايركس ثم شربيه علبة عصير مانجو ثم صفي طبقتين بسكويت جلكوز وشربي كل طبق عصير ثم اخلطي الخلطة وصبيها على الوجه و زينيها بالكاكاو ودخليها الثلاجة لمدة 6 ساعات ثم قدميها..



المشروبات:
بيذان "شراب اللوز"
فيمتو
عصير برتقال
شراب الورد
دارسين بالجوز
قهوة عربية
لومي
شاي بالزعفران





هذي سفرة اليوم بالتعاون مع خالاتي انتظر رايكم فيها يالغلا ، انتظروني باجر في سفرة مختلفة وجديدة بإذن الرحمن ..

دعواتكم لأبوي الغالي ان الله يشفيه وطولنا بعمره وعمر أمي الغالية..
وان الله يرزقني الــزوج الصالح الغني بدينه وماله وأخلاقه اللي يفرح قلب امي وابوي..
والله يكتب لنا المغفرة والجنة بهالايام المباركة..
اللهم أميــــــــــــــــــــــــــن ..

[غرومة..]

تسلمون حبيباتي على متابعتكم وكلامكم العسل ..

المشاركة الأصلية كتبت بواسطة ***غلا***

لا قصدي المسقعــــــــــــة
غلطانة>>>خخخخخخ

ههههههههه اقول ياربي ماحطيت طريقة خالتي <<< والله شككتيني بنفسي وقعدت ادور على الطريقة بالصفحات ..

المشاركة الأصلية كتبت بواسطة lora18

ماشالله ولاقوة الا بالله

متابعه لليوم وبقوه

تسلمين حبيبتي..

المشاركة الأصلية كتبت بواسطة الرمــش الحزيــن

عندي سؤال عن ساندويش التورتيلا وين احصله بالجمعيات او مركز سلطان لاني دورت وما عرفت شكله

حبيبتي انت انا اخذه من مركز سلطان ..

هذي علبة التورتيلا..



وهذي علبة التاكو "فيها التاكو السوفت والكريسب"..

المشاركة الأصلية كتبت بواسطة قطــــــرة ضــوء

الله يعطيك العافية

من جد عيني عليك باردة والله استفدت من طبخاتك لكن الستيك اللح مو راضي تطلع الصور عندي بطريقته

هلا حبيبتي ، اي طريقة يريت تسويلي اقتباس على ردي عشان احملهم لج يالغلا ..

[ghada.hiba]

الله يجعلها صفرة دايمة

[مجروحه ,,,]

غرومة
ياجعل عيني ما تبكيج
الله يرزقج بالزوج الصالح الي يفرح قلبج ويسعدج ويطول بعمر الوالد والوالده ويرزقج الجنه
السفره اليوم مرره حلوه ولذيذه مبدعه ..عساها بالعافيه على قلوبكم يارب ومن يد ما نعدمها

سويت حلو الايس الكريم مرره روعه فديت قلبج

[غرومة..]

المشاركة الأصلية كتبت بواسطة ludi

ما شاء الله لا اله الا الله ....الله يسلم هالايدين يا غاليه
انا صارلي اربع ايام ما افتح النت كنت مشغووووووله كثير بس شفت الحلقات الللي فاتتني
صرااااااحه والله مو عارفه شو احكي ....؟؟
كل طبق اروع من الثاني و كل شغلك فن و زووووق و ترتيب .....ما شاء الله
الله يحفظك و يخليك لاهلك و يرزقك بابن الحلال اللهم امين

ياقلبي انتي والله انت الذوق ، تسلمين حبيبتي ..

المشاركة الأصلية كتبت بواسطة حصالة أم ربية

غرومة أخيراااااااا أبشرش جربت الكنافة بس حطيت فيها جبن عكاوي ما عندي جدايل وحطيتها في قالب الكيك الميني أسرع وصار شكله حلو

وجربت بعد من عندش المعكرونه الإسباقيتي بالباشميل فوق وصراحه عجبتني

ومشكورة يا بعد عمري

تسلمين حبيبتي والله يبشرج بكل خير ان شاء الله ، عليج يالعافية ياقلبي وفكرتج روعة ما شاء الله عليج ..

المشاركة الأصلية كتبت بواسطة القلوب اطفال

غرووووومه

تسلم الايادي اللي سوت هالاكلات

الله يحفظج ويحفظ الوالد والوالدة

طبقت حلا الاناناس وطلع لذييييييييييذ

سويته كله على كيك الفانيليا

وطبقة الكريمة اللي فوق .. انا سويتها جامده شوي

وهذي صورتها

ياقلبي انت عليكم بالف عافية ان شاء الله ويسلملي قلبج وذوقج يالغلا ، شكل الحلو رووووعة ..