ميزانيه مشروع ملابس واكسسوارت في امارة بوظبي

الصراحه طموحه بوظبي موظوعج رهيب ......
عندي مشروع ومب قادره ارتب افكاري....
ياليت تكملين للاخر....

قبل ان تبحثين عن محل الايجار وقبل ان تتاجرين حاولي انهاء التالي حتى لاي يتاخر فتح المحل وانتي تبحثين بعد ذلك، لديك خيارين اما ان تقومي بعمل الديكور بنفسك وبمجهود شخصي وهذا يكلفك جهد ووقت ولكنه اقل في التكلفة:

1.ابحثي عن اكثر من محل سيرايمك وقارني الاسعار وحاولي تاخذين سيراميك وابتعدي عن الجرانيت لانه اسهل في التنظيف حاول السؤال ايضا عن الاشخاص الذين يركبون السيراميك خاصه باليومي لانهم ارخص.
**سيراميك رأس الخيمة : بجانب محلات ايوب في مدينة زايد .
**سيرامك الامارات: مقابل الخزنه للتأمين بجانب محمصة لبنان وين شارع النجدة.
** في شارع النجدة محلات كثيرة للسيراميك ايضا.

2.الصبغ انا افضل جوتن وهو غير مكلف كثير يعني محل طوله 6 متر وعرضه 3 متر يكلفج الصبغ من دون تكلفه العامل 150 درهم والعامل حسب ما تتفقين خذي بعد باليومية .

3. ورق جدران يكلف في ذا ون 119 للمتر شكله وايد مميز في لمعه .

4.حاولي تصممين ديكور بسيط بسعر مناسب ولكن مميز اهتمي بلون الصبغ لا تختارين الالوان الغامقه حتى لا يتشتت نظر المشتري ويركز في البضاعه الالوان الفاتحه افضل،

5.اذا كان المحل صغير حاولي استغلال المساحات بافضل طريقه ، واستشيري فمن استشار ما خاب .

6. المطبعه لكروت السعر يكلفج 325 لطباعة 1000 كرت اما دفاتر الاسعار تكلفج 10 دفاتر ب 125.
عندج مطبعة الجزيرة في الخالدية خلف مصرف ابوظبي الاسلامي فرع النساء .

7. الاكياس بالنسبه للاكياس في نوعين النايلون الكيلو يكلفج 8.5 درهم اما الاكياس الكرتون يختلف سعرها بالحجم والافضل للكميات الكبيره انه يتم في الشارقة لان سعره اقل الاكياس المتوسطه سعرها 3.5 درهم بس اقل كميه 500 حبه .

8. مسدس لتثبيت بطاقة السعر وهذا تلاقينه في مكتبة جرير فرع الميناء وسعرها على ما اذكر 100 درهم مع الخيوط مالتها .

9.مكواة البخار الفلاح بلازا واي مكان يبيع مكاوي يكلف من 200 الين 400.

ناتي الان للتراخيص وهذي اتعب جزء في المشروع :

بعد ان تاختارين المحل وتتأجرينه تذهبين اولا الى البلدية
موقع البلدية للسؤال عن التراخيص
http://www.adm.gov.ae/DotNetNuke/ADM...4/Default.aspx
طبعا يطلبون الاوراق جواز السفر خلاصه القيد عقد ايجار المحل يعطيج فورم تعبينه عند الطباعين ويطلب منج ورقه من الزوج او ولي الامر بانه لا مانع .
بعدين لازم تروحين بعد ما يعطيج الفورم وتعبينه عند الخطاط لاعتماد اللوحه قبل تسليم الطلب
(مكان الخطاط الزبيدي قريب من البلدية في شارع السلام يكلفج اعتماد التوقيع 40 درهم)
يطلبون منج انج تختارين الاسم التجاري وتحجزينه وياخذون عنج 100 درهم وترفقي الورقه الي فيها الاسم التجاري مع الطلب، غير هذا يطلبون اعتماد توقيع من المحكمة ويكلفج 100 درهم 25 طباعه و75 لاعتماد

خلصتي من اعتماد التوقيع تردين للبلدية وتجهزين افلوسج

تكلفة الرخصه للازياء النسائيه والاكسسوارات : 2573

بعد هذا يحولونج عند التفتيش يروح المحل عشان يشوف مكانه ويوقع لج ورقه وتردين البلدية

يطلبون انج تسوين عضويه تجارية وتكلفج 1000درهم
============================================

خلصتي من البلدية الحين لازم ترخيص للديكور بس حسب مكان المحل تسالينهم وين اسوي ترخيص الديكور في اي فرع للبلدية يكلفج الترخيص للديكور 150 درهم

الحين العامله لها حالتين اما ان تكون على كفالة الزوج او الاب وهنيه بس تحتاجين منها ورقه انه لا مانع من انها تشتغل عندك .
تأخذين اوراقها وتروحين العمل والعمال ونصيحه روحي بدري لان موت زحمه خاصه عند الطباعين..
**يطلب منك فتح ملف لمنشأه يكلج 2000 درهم و90 لطباعه الفورم .
**تصريح عمل العامله 200 درهم و50 درهم لطباعه الفورم.
**توصلج البطاقه بالبريد .

طبعا يبقى البضاعه وهذي لازم تحطينها ببالج عشان ما تنضغطين اول البضاعه تكون عندج قبل ما تفتحين المحل وقبل ما تبدين الشغل عشان ما تتاخرين .

حاولي ترتيب افكارك ووضع التكاليف في دفتر كل شي ولو كان تكلفت طباعه ..

اي استفسار للمعاملات او اذا تبون توضيح لاتترددون في السؤال

وطلبي دعاء في ظهر الغيب ان الله يغفر لي ذنوبي ويهديني سواء السبيل

ما شاء الله عليج شرحج واضح ودقيق والله يباركلج بتجارتج