شلون تتخلصين من حب الشباب واثاره بعد خلال اقل من شهرين ... للحالات المزمنه جدا

الحين قبل لا نبدأ لازم تتأكدين ان البشره خاليه من الحبوب اللي فيها دهون
وان كل اللي في بشرتج هي اثار لونها بني غامجه ترفع الضغط
لكنها فاضيه ماكو داخلها شي
يعني مو بارزه برا البشره
وطبعا ماكو مثل غسول ماي الورد اهو اللي بيطلع كل هلدهون و الاوساخ خلال ايام

المهم

حتى نبدأ بالتقشير لازم تستخدمين اقوى مقشر على الاطلاااااق
وهو اكسترا دريم
مقشر ممتاز وسريع المفعول
لكن ديري بالج وانتي تستخدمينه
هذا مو كريم عادي
هذا اي غلطه ممكن تعدم بشرتج
في بنات يفضلون يستخدمون كريم ( رتن a )
لكن انا صراحه افضل اكسترا دريم لان مفعوله اقوى
المهم اولى الخطوات اهو انج تروحين للصيدليه
وتطلبين اكسترا دريم extra dream 3راح يقولج ان فيه ثلاث انواع
انتي اختاري النوع الثالث
مكتوب عليه رقم ثلاثه
لان اهو اقوى شي
و لما تردين للبيت تروحين تغسلين بماي الورد
وقبل لا تنامين تحطين الاكسترا دريم
في اكثر من طريقه لاستخدامه
ممكن تحطينه بقطنه و تمسين فيه بشرتج ( بالنسبه لي احس ان الكميه اللي توصل للبشره قليله بسبب تشرب القطنه لغالبيه سائل الاكسترا دريم )
وممكن بكلينكس ( نفس شعوري تجاه القطن )
انا اشوف ان افضل طريقه اهي انج تحطينه في صحن صغير انتي ما تبينه
يكون هالصحن خاص فيه
تدرون ليش ؟
لانه يصبغ على الصحون
لكنه ما يصبغ على البشره


تحطينه قبل لا تنامين
واول ما تقعدين راح تتخرعين
لان بشرتج بتصير جنها سمجه مطلعينها من البحر قبل يومين
هههههههههههههههههههههههههه
فلا تخافين لان هذا شي طبيعي

لكن اهم شي انج ما تنامين بدرجه حراره مرتفعه كلش
لازم يكون الجو حلو او بارد او معتدل
لكن مو حار
خلال هالفتره لازم ما تتعرضين لاشعه الشمس خيررررر شررررر
والا ترى بتطلع نتيجه عكسيه و تتدمر بشرتج
لان المقشر ما يصير تطلعين فيه بالشمس
او حتى لو غسلتيه ما يصير تطلعين خلال هالفتره
شصار يعني احبسي عمرج شهرين
>>> ماكو دوامات يعني عطيتكم اجازه
احنا البنات ترى مو مضطرين نشتغل بالشمس
اذا احنا بالـمدرسه لا تطلعين بالشمس بالفرصه
واذا بالدوام فخير وبركه معناته ماكو شمس داخل مكتبج
و خلال هالفتره اي مكان تبين تطلعين له
لااازم واقي ضد الشمس
اقل شي حمايه 80ضروري
روحي المركز الفرنسي او اي مكان ثاني
واطلبي هالواقي و لازم تكون حمايته عاليه حيل






المهم
و نفس الشي لا تتعرضين للبخار
يعني مو اذا امج قاعده تطبخ تروحين ترزين فيسج داخل الجدر
لان البخار حاله حال الشمس
واذا انتي مضطره تطبخين حطي الواقي
وحاولي ما تتعرضين للبخار
و شغلي التكييف بالمطبخ
يمكن تشوفوني اشدد كل شي بس
هالشي كله كله لمصلحتج
لو اي غلطه ترى ممكن تندمين عليها طول عمرج والله

المهم استخدميه لما تحسين ان الاثار قربت التخف
ممكن تلاحظين ان الحبوب صارت تطلع لج مره ثانيه
لا تخافين
قاوميهم بماي الورد
تراه خوش سلاح ضد الحبوب




تصير الحبه جدام ماي الورد كأنها دنماركي تهددينه بالمقاطعه




لكن لا تستخدمينه كل يوم طبعا
لانه قوي على البشره
احلى شي انج تستخدمينه يومين ورا بعض
بعدين تريحين بشرتج يومين
( تريحينها من الاكسترا دريم مو من الباقي )
لان الخلطات ضروريه و حتى ماي الورد ضروري

المهم بجذي نكون خلصنا
وراح تلاحظين مع الوقت اثار الحبوب قاعده تخف بشكل روعه
اذا وحده طالعه مالها خلق و خالفت شي من اللي قلناه
وقالت ماعليه ما صار شي خل اطلع بالشمس مره وحده بس او خل اروح اطبخ بدون واقي او خلاطنش بماي الورد
وبعدها راحت بشرتها ملح بسبب استخدام الاكسترا دريم بشكل غلط
لا تلوم الا نفسها
لان احنا شددنا عدل بالنصايح و القوانيين
والوقايه بتلاقونها بمشاكرتي الثانيه ان شاء الله

اهم شي تتذكرونه ان ماكو حل نهائي للحبوب .. فعلا تروح .. لكن ما يمنع انها ترجع من جديد
لان الحبوب هي سموم و دهون زايده عن حاجه الجسم
فيتخلص منها عن طريق الحبوب اللي انتو تشفونها بالبشره
فافضل شي ان الواحد يطبخ سبل الوقايه
لان الوقايه خير من العلاج
ومع هذا لا يمنع ظهور الحبوب لكنه يخفف منه :-

اول شي هذي شغلات عن النفسه لان مثل ما انتو عارفين النفسيه
تلعب دور مهم في بظارة البشره


1- ذكر الله .. الله سبحان يقول : من اعرض عن ذكري فان له معيشة ضنكا
وفعلا لو تلاحظون ان الانسان اللي دايما بعيد عن ربه .
مهما كان يحاول يكون سعيد و يشتري كل اللي يبي ..
لكن في شي ناقصه وهو غذاء الروح ..
و لا في احد منا يعرف غذاء الروح الا اللي خلقها ..
خالقنا اعلم فينا





2- ( هونها تهون ) كل المشاكل اللي بهالدنيا تهون
وكل المصايب هم تهون
الواحد اذا كان قريب من ربه .. راح يعينه على تخطي اي مصيبه
و تذكري ان اي مصيبه في الدنيا .. كثر ما اهي قويه .. وكثر ما انتي صبرتي عليها
اللي خلقنا راح يكافأج باغلى منها يوم القيامه
الصبر الصبر عند المصائب
يمك تقولون شدخل المصايب بالبشره .. لكن هذا شي مهم .. مو بس للحبوب
للسعاده بشكل عام .. ماكو احد ما يبي يكون سعيد .. المتشائم لا يمكن
يكون سعيد
والرسول عليه السلام كان يشدد علينا بموضوع الصبر



ثانيا شغلات تتعلق بالغذاء :-


1 - اممم كأني قاعده اشوفج الحين تقرين موضوع وانتي حاطه في حلجج درازن ككاو
هالعاده مو شي ترى .. حلو انج تاكلين ككاو مره بالاسبوع
>>> خايفه احد يقوم عليها
بصراحه ماادري شنو تحبون بالككاو
لكن اذا كلش ملزمه تاكلينه خففي كثر ما تقدرين
شفيها اذا اكلتي ككاو واحد او اثنين بالاسبوع ؟
ترى كل اللي تاكلينه الحين
ماراح يبين على جسمج الحين
راح يبين لما توصلين الثلاثين
راح تلاقين كميه السكر كلها بالدم كبيره حيل
ولا تقدرين تسوين رجيم بسهوله
راح تقولين لنفسج : مع اني اكل شويه لكن جسمي قاعد يمتن بشكل كبير
ترى هذا بسبب كميه السكر الكبيره اللي كنتي تاكلينها ايام الطفوله و الشباب
تطلع نتايجها بالثلاثين


2- الرسول عليه السلام حذرنا من السموم البيضاء
السكر و الملح
انتي عارفه شكثر يحتاج الانسان ملح كل يوم ؟
نص ملعقه صغيره ملح كل يوم
فمابالج بالكميات اللي احنا قاعدين ناكلها عالغدا و العشا كل يوم ؟
الملح كثرته تنشف الدم
و ممكن يسبب فقر دم
و بهالشي انسي ان بشرتج تتعدل
لان اذا وحده مثلا لونها حنطي و ودها تكون بيضه
لا يمكن يتعدل لونها .
وحتى لو تعدل بيرجع مره ثانيه
اذا كان فيها فقر دم
طيب والحل ؟؟
الحل اهو رقم ثلاثه



3 - شرب ما لا يقل عن 7 او 6 قلاصات ماي كل يوم
وانتي قاعده عند الكمبيوتر هاتيلج بطل ماي صحه حجم كبير
و قعدي شربي فيه
و لما يخلص روحي عبيه
على فكره راح تقومين من الجهاز غصب عليج عشان تروحين الحمام وانتي بكرامه
ههههههههههه
كل نص ساعه راح تروحين الحمام
بس راح تكون النتيجه مبهره



4- الخضره . وما ادراك ما الخضره
شكلي بخلص الثانويه و ابدا اشتغل بفرع الخضرا
و اوزعها على بنات الكويت غصب طيب ياكلون
حطي حيلج بالخضرا و الفواكه
اكليهم كل يوم
خصوصا ( التفاح - الخس - الموز - العنب الاخضر - الخيار )
هذيل بالذات لازم اكل بشكل مستمر
لانهم ينظفون الجسم من كل السموم
ويخلونه نظيف بمعنى الكلمه





بالنسبه للنظافه الشخصيه :-



1- صابونتج لازم تكون خاصه فيج
مو كل من هب ودب راح يستخدمها
افضل صابونة على الاطلاااااااق صابونة ( كلين اند كلير )
تلاقينها بالجمعيه
ما تنشف البشره من الدهون الطبيعيه وبهذا ما تصير صلبه جنها طابوقه



2 - لما تغسلين افضل شي تستخدمين الكلينكس
بصراحه ماادري شلون في بنات يستخدمون فوطه
هالفوطه ممكن تكون وسخه
وحتى لو انج منظفتها
مو شي تستخدمينها اكثر من مره حتى لو لمجرد انج تنشفين
افضل شي كلينكس


3- وانتي قاعده عالتلفزيون او عالنت لا تتعبثين بالحبوب
ولا تلمسينج بيدج
حتى لو تقولين ان ايدج نظيفه
لا تلمسينهم خير شر
عشان ما تطلع لهم اثار

4- سماعة التلفون و الكيبورد .... اااه منهم
قريت في مجله قبل فتره
ان الكيبورد خصوصا مال الشغل اللي تستخدمه العايله كلها
اوصخ من المرحاض ( وانتو بكرامه )
لان كمية الجراثيم اللي فيه
اكبر من الكميه اللي بالحمام
تصوروا ؟
وبعضنا اول ما يقوم من النت ياكل بدون ما يغسل ايده
او تقعد تفرك بشرتها واهي توها حاطه ايدها عالكيبورد

و كذلك سماعة التلفون
لا تخلينها تلامس بشرتج كلش عالاذن وبس
لان في بنات يتميعون لما السماعه تمر عالبشره كلها
شوي و تفركها على راسها بعد



5 - شعرج
دايما ارفعي شعرج لا يلمس بشرتج
رفيجتي الله يذكرها بالخير
اتذكر بشرتها ما شاء الله كانت صافيه
راحت قصت قصه شحلاتها
بس مشكلتها ان شعرها بهالقصه لازم يلامس خدودها
( يعني موضه عشتو )
و هني بدت مشكلتها
لما بدت تطلع لها حبوب
مع ان بشرتها كانت صافيه
تعقدت البنيه مو عارفه السبب
بس بعد فتره تعدلت
لانها قامت ترفع شعرها عن بشرتها
وفعلا لما بدت تطنش بالموضه و تهتم ببشرتها
راحت الحبوب كلها
فدايما لا تخلين شعرج يلامس اطراف خدودج


الشغله الاخيره اللي حابه انه عليها
ان في بنات مهما يعدلون بانفسهم ماكو فايده
والسبب يرجع الى عدم انتضام الهرمونات في الجسم
وهالشغله محتاجه الدكتوره
و راح تعطيج حبوب كورس علاج مدته 6 اشهر
وبعدها راح تتعدل الهرمونات
وان شاء الله تصير بشرتج صاااافيه












وسلامتكم
اااااااااسفه ادري ان الكلام شكثره و هالنصايح غثيثه
بس والله مو بيدي
هذي كلها شغلات ضروريه

السلام عليكم

تسلمين أختيje t'aime على خلطاتج و الحمد لله أنا سويت لي جدول على أساس أهتم بعمري و ببشرتي

و باخذ كمن وصفه من الوصفات اللي أنتي كاتبتنهم

هههههههه..

الله يقطع سوالــفج ضحكتيني والله ..

ع العموم انا داشه عشان الفضول ومع انه مافيني حبوب والحمدالله .. بس بعد ابي بشرتي اتصير أحلى واحلى .. عافان الله ابن آدم طماع .. ^__^

يعطيـــــــــج العافيه حبيبتي ..

مشكورة
والله يسعدك :)