بسم الله ولاحول ولاقوة إلا بالله ,,,
بنات حبيت أخبركم عن موضوع الإثباتات لأبناء المطلقات ومشاكلهم في هويات أو شهادة ميلاد أطفالهم ,
حاليآ الأحوال المدنيه عندهم أوامر في إصدار سجل أسره لكل مطلقه تطلب إثبات لأطفالها , والموضوع تقريبآ صار من شهر , وقليل يعرفو فيه , فـ ياليت تنشرو الخبر للمحتاجات وترفعو الموضوع وتعينو فيه أمثالنا يلي محتاجات إثبات لأطفالهم وحل مشاكلهم مع أبائهم بـ الخصوص هذا ...
المطلوب :
تروحي للأحوال المدنيه وتطلبي إصدار سجل أسره لأطفالك ومعاكي :
1- صك الطلاق وصوره منه
2 - هويتك الأصل وصوره منها
3 - تكتبي معروض لمدير الأحوال عن طلبك
عني ,,,
- كانت معرفتي عن الموضوع بالصدفه ^_^ , ومن ثاني يوم عرفت فيه قدمت وحصلت ع السجل بنفس الوقت وبدون تعقيدات والحمدلله من قبل ومن بعد ...
- أنا ماأخذت موعد من الأنترنت لأنو الموضوع جديد ولسى مافي إيقونة الطلب , وكمان ع كلام الموظفه مايحوج موعد .
- للأحتياط ولحتى مايتفلسفو الموظفات خلي معاك أي إثبات لأطفالك حتى لو كرت التطعيم ,
- لو ماعندك هويه خاصه فيكي ممكن كرت عائلتك " بس الأفضل تطلعي هويه خاصه فيكي , منها إستقلاليه وأكيد راح تحتاجيه في المستقبل "
- لو ماعندك الأصل لصك الطلاق " مثلآ لو عندك طفل أو أطفال من طليق سابق وتزوجت ثاني وصكك الطلاق للأول في المحكمه , عادي ممكن صوره تنفع "
- المعروض ماتشيلي همه لأنو الموظفه راح تمليك ايش تكتبي , وإنتي ساعتها بس توقعي ,
- الإصدار للكرت حيكون في نفس الوقت من قسم الرجال , لذالك لو ماحبيتي تدخلي بنفسك قسم
الرجال خلي أحد من محارمك معاكي , وخلي في بالك إنتي كذا كذا راح تدخلي توقعي بنفسك عند الموظف ,
- الكرت حيكون مثل البطاقه الشخصيه يلي معانا " تمامأ مثل بطاقة الشخصيه لرجال " يعني :
إسم طفلك " أطفالك " وتحته مكتوب أبناء فلانه بنت فلان ....
وفوق باليسار صورة والدهم " هما ياخذوها من صورة والدهم في النظام تلقائي "
ويسموه هناك بالأحوال " سجل أسره "
- الإستفاده منه , لحد الآن مش مجربه في أيش راح يفيدني , بس حدي مبسوطه وعملت حفله كمان ^_^ , لأنو كان ماعندي إثبات لولدي غير صوره من شهادة ميلاده وكرت التطعيم بعد طلوع الروح عطاني أياه ,
بس ع الأقل عندي شيئ أستند عليه في تنقلاتي ...
أتوقع جاوبت ع كل سؤال ممكن يكون ,
أعتذر عن الرد لو ماكان لأنو نادرآ بدخل ع المنتدى ,
بتمنى تنشرو الخبريه وربي ينفع بكم وتساعدو ناس محتاجه هذا الموضوع بمثل حالتنا ,
بتمنى " يتثبت " الموضوع للفائده لاأكثر ,
بتمنى لكم السعاده ودعوه من قلوبكم الطاهره ...
أضفت صورة الكرت لحتى يوضح الموضوع ,
طبعآ يلي ممسوح هيا بيانات ولدي " إسمه - رقم سجله المدني - إسمي - صورة والده "
والا ورق برنت هذا ما ابيه ؟؟؟