السلام عليكم ورحمة الله وبركاته
مرحبا حبايبي ......
مساء النشاط والتفاؤل ......
حبيت اذكر تجربتي في تنظيم وقتي وخاصة الوقت الخاص فيني اللي اعشقه ولو يفوتني يخرب مزاجي ويقل نشاطي يعني هو الدافع القوي لنشاطي وكوني مروقه طول الوقت ومتحمله اطفالي وطلباتهم وزوجي وطلباته ........
اول شي انا كسوله ,,,,,, ايوه هذا احد عيوبي الكسل .. وانانيه احب نفسي ... فعشان اتغلب على الكسل .... حطيت لي نظام امشي عليه والحمدلله نجحت فيه لي ثلاث سنوات وانا عليه وقبلها جلست 6 شهور منهاره بعد طفلي الثاني احاول ارتب نفسي ووقتي واعطي كل واحد حقه ماقدرت خاصة اني كسوله خلقه ... والصفه الثانيه الانانيه وحب نفسي .... يعني احب اونس نفسي واعيش وقت اقضي فيه كل هواياتي ومراهقتي وجنوني وانفصل فيه شوي عن كوني ام وزوجة مسؤله ......... انا احتاج لهذا الشي عشان ما اظلم احد بانانيتي وتقديم هواياتي والاشياء اللي احبها ,,, على اطفالي وزوجي وبيتي ......
اولا الطاقه ............ كيف اشحن نفسي طاقه وقوه ...... واشبع نفسي من هواياتها واستمتع في يومي بعدها ........
اول شي خليت لي وقت سري ووقت خاص فيني اكون فيه لوحدي ولا عندي اشغال ولاشي ....
وهو سري لان حتى زوجي مايعرف عنه واللي حولي ....... وهذا حلاته احس فيها نوع من المغامره ماقلت لكم فيني شويت مراهقه باقيه ولازم اعطيها حقها :biggrin2: ماعلينا نبدا في صلب الموضوع
وقتي الخاص في الصباح اخترت الصباح لانه هو المناسب لي وكل وحده تعرف اللي يناسبها ويناسب ضروفها .........
اول شي من الليل اكون مجهزه كل شي لهذا اليوم الجميل والوقت اللي اعشقه ...... قبل لانام اكون منومه اطفالي وبيتي مرتب ونظيف من كل شي لان وراي يوم جميل ووقت اجمل ..... لدرجة يا بنات كل ماتذكرته احس بحماس ونشاط في الترتيب والتنظيف ......
اذن الفجر ...... اصبحنا واصبح الملك لله ........
اقوم اصلي .... و اقرأ وردي من القرأن والاذكار (( كنت مقصره فيها واتكاسل عنها وااجلها جاهدت نفسي وقلت ابدا يومي بعلاقة قويه مع ربي ,,, ))
ادخل المطبخ اجهز الفطور لولدي الكبير ولزوجي ... اوانا اجهز اغسل في نفس الوقت :3_13_12:
(( قلت لكم انا كسوله ... كنت اتركها لوقت تجهيزي للغداء واقول يبدا الشغل مره وحده ..... الان لا كل شي بوقته وانا متحمسه وسعيده ,,,, ليش لان بعد ساعة وقتي الخاص بيبدا :icon19:
خلصت من تجهيز الفطور
طريقتي فيه سندويشات اصلحها واغلفها ببلاستك والعصير بأكواب بلاستك مع غطاها مع شفاط عرفتوها اتوقع ..... ولدي ياكل وحده وياخذ الثانيه فسحه في المدرسه ... زوجي ياخذ سندويشاته معه للعمل ...
الان اروح لولدي الله يصلحه ويبلغني فيه امام مسجد ....
اصحيه يغسل ويلبس ويفطر
واصحي زوجي ....يتجهز لدوامه
الان هم بيطلعون .... عند الباب ,, استودعهم الله واذكر طفلي بدعاء الخروج ..... (بتستغربون وش هالروقان ... والله ماهي مثاليه من جد كل هذا عشان هالوقت اللي اعطيته نفسي مروقه من الصبح ترا قبل ماكنت كذا استودعهم او اذكر ولدي بالدعاء ..... لكن الحمدلله غيرت من نفسي كثير )
وعند الباب ......... انا كذا :7_5_131: :icon31:
(طبعا عندي طفل صغير لكن يقوم عشر اغلب الايام حالات نادره يقوم معي ويكون يلعب بالعابه وعند التلفزيون او كراسته والوانه يعني مشغلته عني ..... )
الان يبدا وقتي ...... اروح للمطبخ اصلح قهوتي وفطوري عاد الفطور ابدع فيه لاني احب الفطور وهو الوجبه الدسمه لي من يوم بديت بالرجيم والاكل الصحي ..... القهوه كانت يوميا ..الان ...... لا خليتها ثلاث ايام في الاسبوع ,,, عشان صحتي وبشرتي
اجلس في غرفة الجلوس ولابتوبي عندي وجوالي وفطوري ..... واعيش هواياتي وتسلياتي ....
هل الوقت اصلح فيه اللي احب ..( طيب وش احب ... النت والتصفح والبحث فيه .. البرامج الوثائقيه والافلام الوثائقيه .. احب التاريخ .. حفظ القران كان هدفي...ولاني انثى :biggrinlo .. فمن الضروريات الخلطات للبشره والجسم والشعروالماسكات ....
بما اني اعشق التصفح والبحث والتنبيش تلقوني بالنت اتصفح المواقع والمدونات واقرأ في المواضيع في كل شي ماعندي شي محدد احب اخذ من كل شي في كل جوانب الحياة .. مايهمني غربي عربي
مسلمين غير مسلمين اخذ المفيد واترك الغير مفيد
واحيانا ... اجلس على التلفزيون اتابع البرامج الوثائقيه على قناة الجزيرة الوثائقيه وقناة احب برامجهم والقصص اللي يجبونها ....... قنقناة انترناشونال جرافيك ابوظبي وقناة فتافيت مايحتاج في الطبخ وبرامجه تجنن ..... وبرامج الصباح المباشره
واحيانا اكون مثقفه ههههههه شاده حيلي ,,, اقرأ لي كتاب .... (قبل زواجي كنت دودة كتب كنت اخلص الكتاب في يومين والروايه احيانا اخلصها في يوم .... وبعد الزواج خفت القراءة عندي بشكل كبير
والحين رجعت لها وبقوة وهذا من حسنات هالوقت اللي خصصته لي ...... فتحت حساب لي في الانستقرام للقراءة والاطلاع اسجل فيه يومياتي مع القراءة تشجيع لنفسي وتابعت فقط اصحاب القراءة ورواده واشارك في مسابقاتهم مثل قراءة 100 صفحة في اليوم ومثل قراءة 100 كتاب في السنة تلقون هالفعليات في تويتر ولها حسبات كثيره بس اكتبو قراءة وتطلع لكم ..... كل هذا تحفيز للقراءة واللي جرب يدخل عالم القراءة راح يعرف انه عاااالم جميل ياخذك بعيد عن الحياة ومشاكلها ....
ولي وقت اراجع فيه حفظي واقرأ فيه التفسير ومعانيه (طبعا اللي حببني لهشي قروبات مع بنات صالحات احسبهم والله حسيبه فيها تذكير بأمور الدين والعلاقة مع الله ... ومشاركة في قروب تفسير ننزل ايات وتفسيرها يوميا ......كنت مسجلة في قروب هنا حلقة تحفيظ مع بنات من عالم حواء واستفدت كثير لكن وقفت لضروف مرت علي ولاني سجلة في دار تحفيظ العصر وصار حفظي في الدار وبالتجويد ... طبعا الترم هذا ما الله كتب اسجل فيه فكتفيت في المراجعه لحد ما ادخل في الترم الثاني ان الله اراد ...
ايضا مسجلة في دوره علميه يوميا لازم اقرأ 10 صفحات من كتاب ديني واسمع شرح الشيخ جزاه الله خير ...... الدورة اسمها دورة نماء ابحثو عنها وتلقونها .. مقصره فيها احيانا الحق واحيانا مالحق واعوض في اخر الاسبوع ...
واحيانا ... العب رياضة وامشي على السير اذا كنت ماراح امشي العصر او العشاء في الممشى ...
طبعا بديت في الرجيم ومتابعة اكلي لي سنة وترا بطيئه في هذا الشي بس اللي مشيت فيه الرياضة والاكل الصحي يعني مو رجيم قوي لا ......
واحيانا يكون وقت اصلح فيه حمام مغربي تقشير ماسكات و زيت لشعري واتسبح ومن هالامور .....
طبعا كل هذي مقسمتها على مدار الاسبوع من الاحد للخميس .....
الجمعة والسبت لا مافيه هالوقت الخاص .......
الي الساعة 10 ,,,,,, هنا ينتهي وقتي .....
الان اصبح ربة منزل وأم هههههه لاعبه الدور صح .... ابد في اشغالي ,,, ان كان ولدي توه قايم افطره واعطيه اشياء ينشغل فيها عني ....... وابدا اصلح اشغالي ..
وش اشغالي ........
ترتيب الغرفه ترتيب كامل ... لان الصبح يوم صحى زوجي هويتها بس فتحت اشبابيك .....
الان ترتيبها وتعطيرها وتبخيرها .......
اشغل الغساله واحط الملابس
واشيل اللي نشفت وارتبها في الدولاب ......
اروح غرفة اولادي وارتبها .... هذا قبل يوم كانو صغار ( الحين هم يرتبون اسرتهم والعابهم وانا اشرف عليها بس اكنسها وانظف اللي تحت السراير )
ادخل المطبخ اجهز اكل خفيف لولدي اللي بيجي من المدرسه وبنفس الوقت اجهز للغداء تجهيز بس ..
ياذن الظهر ... اروح اصلي ,,,,,
بعد الصلاة .... وقت رجوع ولدي افتح له الباب واذكره بدعاء الدخول والسلام هو بصف ثاني ابتدائي لازم اذكره كل شوي ....( مثل ماقلت لكم بديت في هالعاده الجديده ... لاني حسيت ليه مانسويها مع اطفالنا وش ناقصنا مسلمين احنا وهذي الاذكار من دينا ليه مانربي اطفالنا عليها عشان ماتندثر لاني انا ماتعلمتها ولا حافظت عليها الا بعد ماكبرت .. وصراحة تعلمت هالشي من الشعوب الاسيوية تابعت لهم كذا فلم وكذا برنامج محافظين على عاداتهم في السلام والاكل والشرب وفي البيت والخروج وهم ماهم مسلمين ..... واحنا عندنا الاجمل وهو دينا واذكارنا وعبادات حلوه علمنا عليها دينا وفيها اجر فأحنا احق بهذا الشي من غيرنا ... ) ..
يغير ولدي ويتسبح ..(طبعا اسولف معه وهاتك يا أسئله كيف يومك في المدرسه ) ويلبس ويتغداء هو واخوه ... اروح اطلع الملابس من الغساله واشرها طبعا انا اغسل يوميا ما احب اجمع ماينفع التجميع مع الكسوله واللي تاجل عملها واللي تنسى وهالصفات فيني ..... ولاننا نغير كثير حنا في اليوم ...
خلصو عيالي اكل .... اشيل المواعين واحطها في المطبخ (هذي عاد ما اغسلها ههههههههه رجعت حليمه لعادتها القديمه ) :icon31:
امزح ... لا ,,, لان ماعندي وقت لازم اروح اتسبح واتجهز واصير زوجه وحبيبه الحين ههههههههههه ماقلت لكم لاعبة الدور صح ......... الحين اروح اتسبح واكشخ والبس لبس حلوو واشغل مكيف الغرفه قبل لايجي الحبيب :heart: ......
يجي ابونا وينام ....... ولان غدانا العصر يكون معي ساعة قبل وقت تجهيز الغداء .. ماشيه بالساعه ههههههههههه كله عشان يكون لي وقت لتبطح والتصفح ,,,,,
الحين معي ساعه قبل وقت الغداء اروح لمجلسي اللي احبه وانسدح او اتبطح :35: واتصفح الجوال واتس انستقرام تويتر يوتيوب والسماعه في اذني ,,, والله وناسه ... عيالي مع بعض يلعبون في غرفتهم او مجلس الرجال ..... واحيانا يقيلون ...... انا ما اقيل تراني قليلة نوم يكفيني نوم الليل .... طبعا لكثرتي النوم كثر واذا قللتيه قل ....
قبل اذان العصر بساعة اصلح الغداء ..... وانا اطبخ اغسل المواعين اول بأول ... ومعه مواعين غداء اولادي اللي قبل ساعتين .....
أذن العصر خلص غداي والمواعين خلصتها ......
زوجي يروح يصلي وانا اصلي وأهوي الغرفه احب افتح شباكها الصبح والعصر ,,,,امر على التسريحه مرور بسيط لزوم الكشخه :biggrin2: ان كان فيه شوشه ناطه رتبناها حطيت روج كحل عطر ومن هذي الامور .......
احط غداي ونتغداء .......
خلصنا اشيل المواعين واحطها في المجلى... (:icon31: ايوه ما اغسلها ... (كان في هالوقت اروح لدار العصر والمغرب ارجع ) الحين مافيه دار اجهز الشاي وفي هالوقت اكنس ارضية المطبخ وامسحها وامسخ طاولة الدولاب مطبخي صغير ماياخذ وقت ونظيف لان تنظيفي يومي .. والمواعين اجمعها في المجلى .. مافيه وقت لاني بتقهوى مع زوجي وبجلس مع ولدي الصغير هذا وقته,,,
احط الشاي ونتقهوى ولدي الكبير يروح لنادي ,,,,,, الان وقت ولدي الصغير حرام لازم اجلس معه .. اسولف معه اعلمه شي جديد حروف حفظ سور قصيره على حسب.. ونرسم نلون نلصق او يجيب العابة ونقص قصه .. او نلعب في الصلصال .....
أذن المغرب .. اشيل مواعين الشاي واحطها في المجلى
واصلي المغرب ...
يجي ولدي الكبير من النادي ... يغير ويتسبح واعطيه شي خفيف مثل فواكه له ولاخوه وأجلس على دروسه واذاكر له واسولف معه طول المغرب هذا وقته .... احيانا ماعنده واجبات كثيره فيبقى معنا وقت والعب معه ومع اخوه ... ( طبعا ليه عطيتهم وقت لان انا معطيه نفسي وقت فيحتاجون الوقت لهم وغير كذا لان لي تجربه معهم مع الاجهزه وادمان ولدي عليها وكيف خلصته من هذا الادمان فكان من الاسباب هالوقت اللي حطيته له ولأخوه )
يأذن العشاء .....
اجهز عشاء خفيف للعيال و انا وزوجي احيانا نتعشى خفيف مع العيال واحيانا مانتعشى ...
اشيل المواعين للمطبخ .....
اخذ المكنسه واكنس البيت كله وامسح الارضيه واغسل الحمامات ...
اسبح ولدي الصغير وانومه وينام اخوه الكبير معه ........
ادخل المطبخ ..... اغسل المواعين اللي حطيتها في المجلى وارتب المطبخ وامسح الفرن طبعا الفرن مايكون فيه شغل كثير اي شي ينكب امسحه بوقتها وشغل العميق نهاية الاسبوع .....
اجهز لبس ولدي في الصاله وشرباته وجزماته وشنطة .....
خلاص خلصت كل شي .... اتسبح اغسل بس جسمي .... واغير لبسي والبس لبس محترم وافل الشعر
واقلب زوجة وحبيبه الحين هههههههه ....... يكون عاد هذا وقتنا لحد ماننام ,,,,,,,,, ولا ننسى الجوال واطقطقه عليه قبل النوم عشقي ..
طبعا فيه الاشغال الاسبوعيه والعميقه اخليها نهاية الاسبوع ... لها جدول ... ووسط الاسبوع امشي نفس نظام اللي فوق الا اذا جت امور طارئه او تغير شي مثل نطلع نمشي في الممشى يتأجل شغل على حساب شغل ..... فياخذ وقت من نومي بالليل مثل اتاخر شوي في النومه او ياخذ وقت من وقتي الصبح ... وفيه ايام المناوبه اللي يناوب فيها زوجي يكون لها جدول خاص عاد هاليوم حفله بنسبه لي :22:
...............
والحمدلله هذا نظامي اللي حبيتكم تشاركوني فيه ....وبدعوة من اختي (الياسمين68 )شافتني نزلته في قسم الاسره وانصحتني انزله هنا وربي يسعدها فرحتني وشجعتني برسالتها لي وحبيت نظامي اكثر مما كنت احبه ... واعتذر منها لتأخر في تنزيل الموضوع بسبب خراب الابتوب وطول هالمده كنت ادخل بجوالي
... طبعا الحمدلله تغيرت كثيييير عن اول بعد مانظمت وقتي وقدرت الوقت واعطيت كل فرد من أسرتي حقها وسعيده بهذا الانجاز وهذا التغيير اللي فيني ..ولاحظت هالتغيير على زوجي واطفالي ,,, انا بطبعي متفائله وزاد تفاؤلي الحين .... الايام الجايه افكر اخذ دورات في الحاسب والانجليزي ... وافكر اتوظف .... واكيد بيتغير نظامي وجدولي وان شاء الله اكون قد هالشي .... ( طبعا وقتي الصبح الله يستر وش يصير عليه لكن ماعليه ادور له طريق :icon18:
طبعا لاننسى الذكر والتسبيح والاسغفار والسنن ولوتر وقيام الليل نخليها تتخلل يومنا ونظامنا لانها هي بركتنا .... انا ما اذكارها هنا لان هالشي بين العبد وربه ذكرت الضروري ....
اتمنى تستفيد من هالموضوع كل اخت تمر هنا لو تاخذ منه شي بسيط او تنصحني اغير فيه شي او اضيف له شي ,,,,,,,,
وبالتوفيق للجميع .......
اسعدنى جدا قبولك دعوتى وتشريف قسمنا بموضوعك المميز
ماشاء الله تبارك الله تنظيم وتخطيط وحسن اداراة لبيتك الله يوفقك ويسعدك ويبارك بوقتك وصحتك واوﻻدك
اجمل ما فى نظامك انك اعطيتى كل ذى حقا حقه وبديتى باﻻهم فالمهم ربك ثم نفسك ثم اسرتك وبيتك
اسعدتى نفسك واشبعتى احتياجاتك النفسية والجسديه من هوايات وراحة فاسعدتى من حولك