سحب اللون + صبغة شعري الـ أمبراي بطريقة المشاغل <<< بالصور خطوة بخطوة

العناية بالشعر






السلام عليكم ورحمة الله وبركاته

هنا طريقة صبغ الشعر حقت المشاغل... الموضوع طويل وتعليمي مو للتفرج لووول .. وانا بالي طويل للتفاصيل احب الشغل الي مرة نظيف...

انا مانيب خبيرة,وهذي اول مرة اسوي سحب لون, بس قرات بما فيه الكفاية وقررت اطبق الي قريته... انا هنا ما اقول سووا الطريقة... اللهم اعرض الي سويته للي حابة تعرف وتجرب وهي تتحمل تبعات اي شيء يصير...

الموضوع مقسم الى عدة اقسام

(1) اختبار سحب اللون
(2) سحب اللون
(3) التونر
(4) صبغ الشعر
(5) غسل الشعر
(6) تحذيرات



(1) اختبار سحب اللون

نعم سحب اللون يدمر الشعر... الي خايفة على شعرها لا تسوي شيء... الي ماتبي تسحب لون بنفسها تروح لمشغل...

الغرض من التجربة حساب كم يحتاج شعرك انت حتى يتخلص من لونه ويصبح اصفر على برتقالي... التجربة مهمة ولازم تركزين في حساب الوقت وتسجلينه عندك, لان هالحسبة هي الي بتستخدمينها لما تسوين سحب لون لكل شعرك... كل واحدة شعرها مختلف والحسبة تختلف من شخص لشخص...

العدة الي نحتاجها
(أ) اكسجين سائل نسبة 9% يكتب عالعلبة 30 volume... انا الي استخدمت من شركة joico .. (مكتوب عليه 40 ...بس انا مخففته لـ 30... انت اشتري الـ 30 مباشرة)
(ب) بودرة سحب للون, ايضا من شركة joico ..
(ج) قفازات
(د) ملاعق قياس حتى نقيس الكميات الي نبيها
(ه) شرائح ألمنيوم حق المطبخ
(و) صحنين وفرشتين
(ز) شامبو قوي حتى يوقف مفعول الاكسجين
...




الطريقة
(1) اختاري الخصلة الي تبين تسحبين لونها... لميها مع بعض حتى ترجعين لها بسهولة للمقارنة, لان اللون الي انسحب مابتعرفينه بالضبط الا لما يجف الشعر... زي ما انا مسوية بالصورة...




(2) خذي ملعقتين من السائل مع ملعقة واحدة من البودرة... واخلطيهم زين زين... (انت ممكن تستخدمين ملعقة واحدة من السائل مع ملعقة واحدة من البودرة اذا ماتبين سحب لون عالي.. على حسب وش اللون الي تبين تصبغين... اذا مرة فاتح ملعقتين سائل,اذا غامق شوي ملعقة واحدة تكفي).... لاحظي الكمية مرة بسيطة بس حق الخصلة...




(3) خذي فرشة + شريحة ألمنيوم واصبغي الشعرة ولميها زين بالألمنيوم حتى ماتنفك... كل عشر دقايق راجعي اللون, لانه بيبدا يفتح مباشرة... لما يوصل للون الي بالصورة توقفي... انا تقريبا اخذ مني 40 دقيقة... بس هذا شعري وكل واحدة شعرها مختلف... انت شوفي اللون ومتى ماصار فاتح كفاية توقفي وسجلي الوقت عندك...




(4) مجرد ماتحصلي على اللون الي تبين اغسلي الخصلة بالشامبو وجففي الشعر تماما..


(2) سحب اللون من تحت

(1) اول شغلة "المفروض" انك ماتستشوري شعرك... بس انا شعري ملولو (كيرلي)... لو افكر اسحب لون وهو كذا بنعفس... فاستشورته عالسريع حتى اقدر اتعامل معه زي العالم والناس :hmh: ... فـ انت وشعرك!

(اذا كنت بتسحبين لون من الجذور الى الشعر كله لازم خطوتين مهمات... (أ) شعرك مايكون لسه مغسول, خليه لبعد يوم حتى يكون شعرك دهني شوية يحمي الفروة... و(ب) تبدئين من الاطراف واخر شيء تسوينه الجذور, لانها تتلون بسرعة من حرارة الفروة... )

(2) انا ابي الصبغة بس تكون من اسفل شعري... على شكل أمبراي (متدرج من لون شعري الى اللون الي ابيه)... نبي نتحاشا يكون فيه خط واضح بين لون الشعر والصبغة... مانبي شغل همج! :hmh: ...لذلك مشطي شعرك على وراء من عند الفروة زي الي بالصورة... (الصورة من النت)




(3) قسمي شعرك الى اربع اقسام... سوي علامة زائد... اول خط من مقدمة الراس الى مؤخرته... والثاني من خلف الاذن اليمنى الى خلف الاذن اليسرى... لمي الاربع بمساكات شعر بشكل قوي حتى ماتتحرك... ثم ارفعي الثنتين الي قدام بمشابك شعر حتى مايجون بطريقك وابدئي بالثنتين الي من وراء... جيبيهم على قدام واشتغلي عليهم مرة على خصلة من اليمين ومرة على خصلة من اليسار حتى مايطلع اليمين مسحوب منه اللون اكثر من اليسار... نبي شغل نظيف! انا كنت محددة اني ابي اسحب لون من كل خصلة تقريبا تقريبا 23-25 سم من تحت... بكذا اضمن ان الشعر الي لونه مسحوب من وراء نفس طول الي قدام...
وبعدها لمي كل قسم بـ ألمنيوم حتى يحفظ الحرارة... واذا حابة تستخدمي استشوار لمدة خمس دقايق حتى يسرع عملية سحب اللون تقدري...

(تاكدي هنا انك لابسة ملابس مو جايبه خبرها وتشتغلين في مكان دافئ ومو خايفة يتوسخ... البسي كيس سوي له فتحة للراس وافتحيه من الجوانب حتى مايجي على ملابسك شيء, ولا تنسي القفازات ضروري جدا)...

(4) كل عشر دقايق شيكي على شعرك... ولا تنسين اقصى مدة تخلينها هي المدة الي حسبناها في التجربة الي سويناها بالخطوة الاولى... الحسبة بتبدأ من اخر خصلة لوناها , ليه؟؟ لان ماتبين اخر شعرة ماينسحب لونها ويصير شعرك مخربط... حاولي تكونين سريعة شوي هنا بس حافظي على نظافة شغلك!!

(5) ... شيكت ورضيت عن اخر خصلة؟ اغسلي شعرك زين بشامبو قوي حتى يوقف سحب اللون... ولا تضيفين بلسم... استخدمي شامبو من غير بلسم...

وبكذا خلصنا من سحب اللون!



(3) التونر

هذي الخطوة اختيارية ممكن تتعديها! الغرض منها تشيل اللمعة الصفراء الزايدة... هي تفيد اكثر للي شعرهم فااتح جدا (بلاتنم)... ويبدا عليه الصفار... استخدمت التونر من شركة Jerome Russell ... ماسوت شيء باستثناء انها شالت اللمعة الذهبية...

هذا شعري بعد... لو تقارنون مابتلقون اللمعة الذهبية الي بالصورة الاولى بعد السحب





(4) صبغ الشعر

العدة الي نحتاج:
(أ) الألوان الي تبين (حرية شخصية!)... انا بغيت الوان الطاووس ازرق واخضر زمردي وتفاحي... من شركة joico ( <<< رهيبيييييييييييييين جووودة عالية)




(ب) عدد الصحون والفرش بحسب عدد الالوان الي اخترت
(ج) مشابك شعر
(د) قفازات
(ه) شرائح ألمنيوم... انا استخدمت ورق خاص ما انصح فيه, بس لانه كان مقصوص وجاهز على الطول الي انا ابيه... فتكاسلت اجهز الألمنيوم... انصحك تقصينه وتجهزينه قبل تبدئين بتحتاجين وااجد, جهزي عالاقل خمسين الى ستين شريحة... اذا شعرك كثير زيدي... فيه بكرة ألمنيوم جاهزة تشترينها مقاسها مناسب خاصة للشعر... الالمنيوم يحفظ الحرارة ومايمتص شيء.. وهذا الي نبيه...
(و) بلسم
(ز) وطبعا مناديل مبلولة حقين الاطفال حتى تمسحي قفازاتك بين الحين والثاني اذا نزل عليهم لون، مانبيه يعدم الالوان الثانية... وكحول حتى تمسحي اي شي يجي على رقبتك ووجهك مباااشرة




الطريقة

(1) نرجع نقسم الشعر زي ماقسمناه المرة الاولى...( المرة هذي مانحتاج نمشط الشعر على وراء.).. بتحتاجين يكون مستشور اذا شعرك كيرلي حتى يسهل عليك شغلك وحتى يكون متساوي لما تستشورينه للطلعات...

(2) امسكي خصل رفييعة جدا... نعم الموضوع بياخذ وقتك ويبي لك تتفرغين ساعتين بس للصبغ... لكن نبي شغل نظيف... نبي الالوان تتجانس مع بعضها, ونبي الخصل ايضا تتجانس مع بعضها... البنات العجولات يقعدون في بيتهم .. اخر شيء تبينه تصبغين في البيت وبالاخر يطلع شغلك يفشل...

(3) ابدئي التلوين من تحت واطلعي على فوق... لكل لون فرشة خاصة انتبهي تحطين الفرشة بالصحن الغلط... ابدئي باللون الي تحت ...

(4) كل خصلة ابدئي اصبغيها مو من عند المكان الي انسحب منه اللون... لااا قبل بثلاث سنتيميتر لان اصلا لون شعرك اسود وماراح يبين فيه اللون بشكل واضح (هذا اذا بين!)... لكن العبرة في اننا لازم نخبي مكان سحب اللون ولازم تصبغينه زين وتكثري لون هنا... اذا بدأت من عند سحب اللون احتمال ماينصبغ كله ويبقى فيه شعرات صفراء... وع :hmh:

(5) الالوان لما تحطيها ضروري تتداخل في بعضها! لا تحطينها على شكل مربعات كل مربع لحاله... مكان الالتقاء بين الاوان مهم, ركزي عليه... خلي اللونين يجون على هالمنطقة حتى يتجانسون وايضا لاجل ماتنسين مكان ويطلع اللون الاصفر حق سحب اللون!! كوني كريمة بالالوان...




(6) طريقة استخدام الفرشة مهمة... تاكدي انك توصلين اللون للشعرة مرة باستخدام حافة الفرشة ومرة وسط الفرشة ومشطي الشعرة وانت تلونينها بحافة الفرشة.. كل ما اشتغلت بامانه طلع شغلك افضل...

وخلاص لمي شعرك في كيس وخليه المدة المكتوبة على علبة اللون... وشيكي عليه هل هو اللون الي تبين توصلين له والا باقي... اذا باقي خليه كمان شوي...


(5) غسل الشعر

انا كنت شايلة هم ان اللون الازرق ينزل على اللون التفاحي... بس حقيقة الالوان الي استخدمت جودة عااالية حتى مابهذلني بالحمام !! كان ناشف , الموية بس اول ثلاث دقايق فيها شوية لون وبعدين صفت على طول... مادري هل لاني استخدمت ورق بدل ألمنيوم!؟ ومافسخت الالوان على بعض...

الطريقة حتى مايفسخ اللون على الالوان الي تحت

اغسلي شعرك بماء شبه بارد بالطريقه هذي:

الشعر قلنا مقسم لاربع اقسام... اغسلي كل قسم لحاله مبدئيا قبل الغسلة الاخيرة... انا بدات باللون الازرق لانه اغمق دخلته داخل سطل مويا (رفعت الجزء الاخضر) بايدي وشلت اللون الزايد منه واضفت شوية بلسم حتى اشيل اللون الباقي... ثم غسلت اللونين الثانين بعد كذا... ولما خلصت الاربعة اقسام بهالطريقة غسلت شعري كله فقط ببــــــــلسم... مو بشامبو...

وبس! جففت شعري واستشورته للمرة الثالثة :hmh: حتى اشوف النتيجة النهائية (لان اللون وهو مبلول يكون غامق!)... وهذي النتيجة...





تحذيرات وتنبيهات

- لا تفكرين تخلطين شيء الا قبل ماتستخدمينه بخمس دقايق... لانه بيتأكسد وبيروح مفعولة...
- لا تستخدمين اي شيء معدني او فيه معدن, لا معالق ولا فرش ولا مشابك شعر.. كل شيء زجاج والا بلاستك...
- حاولي تشتغلين بعيد عن المكيف لان الحرارة تساعد بسحب اللون وبصبغته
- العجولات والخوافات يستريحون بارك الله فيهم!


وبس! مانزلت هالموضوع قبل العيد لان فيه مجازفة... ومابي احد يدعي علي... الي ماعندها ثقة بنفسها لا تسوي شيء...
45
109K

يلزم عليك تسجيل الدخول أولًا لكتابة تعليق.

تسجيل دخول

أحسآس||~
أحسآس||~
معلومات حلوه الله يسعدك وكمان كثير يحتاجو يتعلمو يعملو الشيء بنفسهم
انا قبل سحبت لون شعري ب اكسجين 9 العادي اللي من الصيدلية وبودرة بليندر
وزبط معايا بس خشنلي شعري *_* مررره
بس موضوعك مرره بطل ماشاء الله :love:
رحالة عبر الزمن
رحالة عبر الزمن
ما شاء الله موضوع بطل

انا من الخوافات ومستحيل اجازف بشعري
يقولك خلك على مينونك لا يك اللى اين منة هههههههههههه :rotaeye:

طيب بسالك ليال انتي راضية عن النتيجة لانة احس اخر صورة
مو لون واحد شكلة 3 الوان ببعض

والله يسعدك وكل عام وانتي بخير
شفته بفرح
شفته بفرح
يجزاك الله خير
ليالـ الفجر
ليالـ الفجر
يجزاك الله خير
يجزاك الله خير


الله يسعدك ياخيتي منورة الحته... اتمنى البنات يحتفظون بالموضوع بالمفضلة ليوم الحاجة...

هل لما سحبت لون صبغتيه؟ لان وضعه بالنسبة لي قبل الصبغ مرة صعب... بس لما صبغته تقريبا رجع قريب من العادي (مو زيه, بس ايضا مو خشن)...



هههههههه انا ادري فيكم, اصلا اغلب مواضيع القسم مواد من المطبخ, ياختي حسيت اني داخله دار مسنين!! مدري وين الحياة والمجازفة فيكم :08:

انا صراحة عندي هوس تغيير ومليت من النمط المعتاد اشقر ودرجاته ومدري وش... شكل ممل :dry:

من قال المفروض لون واحد... الصبغة أمبراي (مدرج من غامق الى فاتح)... فأنا اخترت ألوان الطاووس ازرق واخضر وتفاحي (التفاحي مو مرة باين بالصورة بسبب الاضاءة)...شعري متدرج من لونه الاسود الى الازرق ثم الاخضر ثم الاخضر التفاحي...

هذي نفس الالوان الي انا استخدمت, الفرق انهم بادين من فوق... انا بس من تحت...



سعيدة جدا جدا بالشكل النهائي والا مانزلت الموضوع وكتبت الطريقة بالتفصيل... بعد مانبي نبلش احد :2thmup:

زي ماقلت الالوان حرية شخصية, تقدر الواحدة تختار بني الى اشقر الى بلاتنم... الطريقة نفسها, الفرق اللون



واياك ياقلبي :26:
ليالـ الفجر
ليالـ الفجر
هذي صورة لشغل يفشل ومابي نتايج اي واحدة تكون بهالشكل...
(1) اللون الاصفر حق سحب اللون داش عرض... المفروض مايبين شكله رخيص وبدائي... انا كتبت انك تتفادي هالشيء بأنك تبدئي صبغ 3 سم قبل مكان سحب اللون وتكثري لون...
(2) الالوان مو منسجمة مع بعض... جاي شكلها مربعات.. منظر ابد غير حضاري... الحل انك تاخذين الخصل جزء جزء بكميات قليلة...
(3) اذا مركزين بتلقون اللون الاخضر فاتح بين الازرق والاخضر (مع ان الازرق غامق).. هذا لانها مادمجت اللونين مع بعض...فصفار الشعرة (من سحب اللون) أثر على اللون النهائي.... تفادي هالشيء بأنك تلونين اللونين فوق بعض بحيث تبدئين باللون الفاتح اول ثم الغامق... (لاجل كذا كتبت فوق ابدئي لوني من تحت واطلعي على فوق...)