Raghad Ahmad

Raghad Ahmad @raghad_ahmad

عضوة نشيطة

دجاج بالكاري (هندي) جربوها ومارح تندموا :p

أطباق رئيسية

السلام عليكم حبيباتي
كيفكم؟ ان شاءالله كويسين

اليوم جبتلكم طريقة أكلة :p مررة لزييزة اليوم عملتها عالسحور صورتها بس الصور مهي راضية تنزل في المنتدى ماادري ايش السبب

طبعًا الأكلة هندية :P زي ما قولتلكم أغلب أكلاتي في المنتدى حتكون هندية

الأكلة اسمها دجاج بالكاري
والمقادير هيا :
قطع دجاج (يعني دجاجة مقطعة كل قسم لحال)
1/2 ملعقة ملح
1/2 ملعقة فلفل أسود
1/4 ملعقة بهار تندوري
بعد ما نقطع الدجاج نرش عليه الملح والفلفل الاسود وبهار التندوري

في الخلاط نحط :
1 بصلة كبيرة
5 فص ثوم
1/2 ملعقة زنجبيل مطحون
1 قرن فلفل اخضر حار
1 ملعقة كبيرة كاري
1 ملعقة صغيرة ملح
1/2 ملعقة فلفل اسود
1 ملعقة صغيرة كزبرة ناشفة
1 ملعقة صغيرة كمون
2 ملعقة كبيرة عصير ليمون
1 علبة لبن زبادي (روب)
1/2 ملعقة زعفران
1 ملعقة صغيرة فلفل احمر بودرة
1/4 ملعقة بهار التندوري

نتبل الدجاج بالصلصة وعشان الطعم يكون أطعم غرزي الدجاج بالسكينة عشان الصلصة تدخل جوا
استني عالتتبيلة كدا نص ساعة او ربع ساعه عشان تاخد طعم وادا مااستنيتي عادي مو مشكلة (وادا ما تبغي الاكل يكون مرة حار لا تحطي فلفل احمر والبهار التندوري حطي بس 1/4 ملعقة )

بعدين في قدر عالنار حطي شوية زيت وشوحي عليه الدجاج دخلي قطعتين قطعتين وشوحيهم وطبعا عشان الزيت ما يطير عليكي غطي القدر شوية واقلبي الدجاج الين ياخد اللون البني او الدهبي خرجيه حطيه في صحن وحطي اللي بعدو وزي كدا (طبعا مجرد تشويح)

بعد ما يتشوحه الدجاج كبي الصلصة اللي بقيت في القدر وحطي عليها ربع كوب مويا وارجعي حطي الدجاج في القدر (خليه على نار هادئة الين يستوي الدجاج)

وبالنسبة للرز سوي رز ابيض عادي ولما يقرب يستوي كبي عليه شوية من الصلصة حقت الدجاج بس كبيها بالمصفاية عشان البصل وكدا لا يدخل في الرز اللي يبقى في المصفاية رجعيه عالدجاج

وبعد ما يستوو كلهم حطي الرز وفوقو قطع الدجاج وكبي فوق الدجاج الصلصة وبالهنا والعافية :p
10
5K

يلزم عليك تسجيل الدخول أولًا لكتابة تعليق.

تسجيل دخول

ام محمد 343
ام محمد 343
جزاكم الله خير ، جاري التطبيق😋
om maged
om maged
تسلمي الف شكر
ريم المها المها
ريم المها المها
سلمت أناملك وسلم إبداعك
ودمتي بحفظ الله ورعايته
Raghad Ahmad
Raghad Ahmad
سلمت أناملك وسلم إبداعك ودمتي بحفظ الله ورعايته
سلمت أناملك وسلم إبداعك ودمتي بحفظ الله ورعايته
الله يسلمكم حبايبي :*
نزف المحاني
نزف المحاني
وينقل الى الأطباق الساخنة ...