السلام عليكم بنات حواء
شخباركم حبيباتي
عودتكم اني كل ما اجرب شي والاقي نتيجة حلوة فورا اجي اعلمكم علية
اليوم جبت ماسك روعة للشعر الجاف والمجعد يفرد الشعر مثل الكيراتين طبعا هذا مو كلامي هذا كلام كل الفيديوز الي حصلتها باليوتيوب لافريقيات شعرهم خشن واجعد مررررة وبها الماسك يصير ناعم ومفرود
جربته اليوم والنتيجة ماشاء الله
نعومة والشعرة فعلا تكون مفرودة
لمعة جميله جدا
شعر حيوي وحريري
نجي لمكونات الماسك
ثمرة افوكادو (تلاقونة بالسوبر ماركت الكبيرة بنده الدانوب الخ)
احرصي على اختيار ثمرة لينة يعني يوم تضغطيها تكون لينه وناصجة مو قاسيه
ملعقة مايونيز
ملعقتين الى 3 زيت زيتون
ملعقة زبادي
ملعقة عسل
الطريقة
هذي المقادير تكفي شعر متوسط الطول تحت الكتف بشوي
زودي الكمية اذا كان شعرك اطول
الطريقة
اقسمي الثمرة المتوسطة لاكبيره ولاصغيره الى نصفين
(راح استخدم نصفها فقط والي شعرها كثير وطويل تستخدمها كلها)
قشريها بشويش وطلعي النواة برة
ضعيها في الخلاط
مع ملعقة المايونيز وملعقتين زيت زيتون وملعقة زبادي وملعقه عسل
اضربيهم زين لين تتكون معاكي كريمة
اذا حسيتيها تخينه مره زودي الزيت (طبعا حجم الثمرة راح يختلف من وحده للثانية)
المهم في الاخر القوام يكون كثيف لاهو مووويه ولاهوا ثقيل مررره
مهم جدا تخلطية كويس حتى ماتعلق المكونات بشعرك وتصبح صعبه في ازالتها
تضعي الماسك جيدا على الفروة اولا مع التدليك
كانك بتحطي حنة غطي الخصلات كويس من الجذور حتى الاطراف
غطي راسك ببونية استحمام بلاستيك او كيس او تغليف الطعام
الي يتوفر
المهم تغطية زين ولاتخلي نفس
منشفه او فوطه فوق الغطاء البلاستيك وخليه ساعتين كامللله
بعد ساعتين شيلي الغطاء وعلى الحمام
شللي شعرك بالموية لين تنزل كل المكونات
استخدمي شامبو افضل شطفه وحدة بس بس تكون مظبوطة وتكون بشامبو طبيعي مانبي نخرب مفعول الماسك
(انا اعتمد شامبو صابون الغار واصنعه بنفسي)
نجي للخطوة المهمة وهي البلسم
راح تجيبي حليب جوز هند متوفر بالسوبر ماركت يجي معلب مثل علب المشروم او الفول انتبهي نبغى حليب جوز الهند وليس كريمة جوز الهند
راح تفتحي العلبة وتاخدي منها مقدار يكفيكي لاننا راح نحطه على الشعر كبلسم
ضعي حليب جوز الهند على الجذور غرقيها تمام
راح تتبقى كمية الي مفروض تحطيها على الاطراف انتظري لاتحطيها
جيبي مقدار من بلسمك او حمام الزيت المتوفر عندك واخلطيها مع خليب جوز الهند بالزبدية طبعا مو بعلبه البلسم
بعد ماخلطتيها زين حطي الخليط على الشعر فقط من فوق لين الاطراف فهمتوني عالشعر مو الجذور
غطي راسك ببونية وخدي حمامك وخلصي كل شي وبعد 15 دقيقه اشطفي شعرك زين بالماء فقط
راح تشوفي نعومة وليونة بشعرك شي مو طبيعي لمعه وحيوية ومن تجربتي زي ماعودتكم
حسب الفيديوهات والمنتجات الاجنبيه يقولوا هذا الماسك مفيد مرتين بالشهر كل 15 يوم
اتمنى يعجبكم
اختكم ميمي
