طريقة شامبو وزيت يقلبو شعرك باروكه حتى لو فلافل ينقلب .. تابعوني وماتتندمو !1

مساء الخير ياحلوين

وحشتوني :heart:

غبت عليكم كثير بس رجعت لكم بشي مررره خطيييييير ورخيص :32::32:

مطول الغيبات جاب الغنايم :icon18:


من زمان كنت مشتركه في منتدى و استفدت من البنات كثير قريت طريقه حلوه وفتدتني كثييييير لدرجة اني أنحسدت ع شعري كان قبل زواج اختي باسبوع استشورت وفتحتو وربي جات وحده هيا و أمها يقولو ايش تستخدمي لشعرك لانو باين صحي أنا عادي قلت لهم لاني ما احب الانانيه و الخباثه وزي ما استفدت لازم غيري يستفيد

اللي تتبع طريقتي مستحيل تكتب موضوع ساعدوني شعري يتساقط _خفيف _خشن _مافي حيويه _مافي لمعه _مايطول كل هذا بح بح بح :32:


أول شي أقولو لكم الأكل الصحي يعني ( صحن سلطه يوميا او بعد يوم + كوب حليب + كاسه عصير برتقال طازج أو حق المراعي + الاكثار من الأكل اللي يوجد في فيتامين ( أ ) زي الجزر و السمك و التونه و الجمبري معروفين بتطويل الشعر والمحافظه ع البشره )

نجي للسر :



طريقة الزيت اللي ما أستغنى عنها

المقادير :

زيت املا الأخضر الخايس ابو ريحه + زيت سمسم أصلي + زيت خروع أصلي + زيت أملا الذهبي + زيت نارجيل بدون ريحه زي براشوت القديم الأصلي

نخلطهم بكميات متساويه وندهن الشعر يوميا أو يوم بعد يوم أهم شي نسوي مساج قوي وسريع ( اللي ماتعرف طريقة المساج تكتب باليوتيوب طريقة مساج للشعر وتشوف اللي تقدر عليه لانه الطرق كثيره)

نترك الزيت لمدة 4 او 6 ساعات و اللي ماعندها وقت تسويه قبل ماتنام و الصباح تغسلو عادي مايضر بس نغسلو بطريقة الشامبو اللي مكتوبه تحت

ندهن الفروه و مسحه وحده وخفيفه ع الشعر انتبهو لاتغرقونو بالزيت


********************************************
طريقتي في الشامبو :


المقادير للشعر الخشن و المجعد و العادي و الناعم :

علبة شامبو اي نوع اهم شي تكون ريحتها حلوه ويناسب شعرك العلبه حجمها وسط + صفار بيضتين يعني تاخذو الصفار من البيضه بس + فنجان القهوه الصغير زيت زيتون + نص فنجان القهوه حبه سوداء مطحونه + ملعقه كبيره عسل اي نوع

الطريقه :

أخلطو المقادير كلها مع بعض تمام بالملعقه وجيبي قمع عشان تعبي في علبة الشامبو وماينكب في الارض و الباقي في علبه ثانيه لانو الكميه تتضاعف


يسير هذا الشامبو اللي نستخدمو على طول واللي ماتتركه ابدا أضمن لها شعر صحي وحيوي طويل غزير حتى لو كانت تصبغ في السنه مره كذا ماحينعدم شعرها وماتستخدمو شامبو ثاني أبدا حتى بعده مافي ريحه

الطريقه دي تطول وتنبت الشعر وتملي الفراغات يسير باروكه وترطب وتحمي الشعر من الاستشوار وتعطي لمعه للشعر



المقادير للشعر الدهني :

علبة شامبو اي نوع اهم شي تكون ريحتها حلوه ويناسب شعرك العلبه حجمها وسط + بياض بيضتين يعني بس تاخذو البياض + فنجان القهوه الصغير زيت زيتون + نص فنجان القهوه حبه سوداء مطحونه + ملعقه كبيرهه عسل اي نوع


طريقة الاستخدام

نرج علبة الشامبو قبل الاستخدام ضرور ي ( نرج _ نخض _ نحرك ) كل وحده ولهجتها ان شاء الله تكونو فهمتو

نحط الشامبو وندلك فروة الراس بالأصابع مو بالأظافر نحك لالا كذا غلط أنتبهو تنجرح الفروه بس نروح ندلك الجسم بالصابون بعدها ننزل الشعر ع قدام يعني ع الوجه و نغسل الشعر يعني لازم نخلي الشامبو شويا ونحط المنشفه الين نلبس بعد مانلبس ننزل المنشفه نقسم الشعر ارباع ونمسح كل جزء بكريم ( ماكسام ) لونو ابيض الاصلي من أي محل تجميل لانو في تقليد و اكيد الكل يعرفو من أيام جدي سعرو 10 ريال



تنبيه :


لاتخافون مافي ريحة بيض ولاشي ولايخرب أبدا يجلس زي ماهو لانو الشامبو يحميه من الخراب فهمتو وينظف الشعر تمام وريحة الشعر تكون شامبو وعااادي نخلي العلبه في الحمام مايضر و النتيجه تبان حق الشامبو لحاله بعد اسبوعين لكن مع الزيت من أول اسبوع بترقصي من الفرحه وياليت تستمرو عليها طول حياتكم عشان تحافظو ع شعركم ومايخرب ..

البيض مفيد للشعر ومع نفسو اللي يقول مضر كمان اللي تبغى تستخدم الشامبو بدون الزيوت عادي تقدر ويعطيعا نتيجه مررره حلوه بس لازم الكريم وحتى اللي فارده شعرها وخلاص قررت تبعد عن الفرد تستخدم نفس الطريقه بترجع شعرها احسن من اول واللي شعرهم فلافل بينقلب 180 درجه

اللي تبغى ريحه حلوه لشعرها تجيب عطر دهني خاص بالشعر اي نوع تكون ريحتو حلوه وتحط كم نقطه بالكريم وتحركو تمام يسير ريحة الشعر عطر ولو بخرتي تطلع واااااو ..

لاتقولو نزليي صور ما أعرف أبدا روحو قوقل شوفو صورة الكريم اللي مايعرفو


للعلم انا أستخدمت بيض ( فقيه ) لأنو أفضل بيض مو زي الباقي ريحتهم زفر وقويه .. الشامبو حقي الفيف لوريال ب 10 ومرات ب 12 أو شامبو ألو ايفا بالصبار علبتو خضراء صناعه مصريه ب 13 ريال و الاسعار تختلف بكل مركز

مدة استخدامي لها من زمان 4 سنين ودي الخامسه و النتيجه بانت من أول اسبوع الشعر سار رطب وصحي وقوي ويلمممع وهااجد بعد ما اغسلو بعد شهر بالكثير الفرق في الطول والكثافه ومايتعبني في الاستشوار لاني ما استشور الا لو بطلع أو اي أحد جاني ونوع شعري جاف و مجعد والحين مرره أتغير الحمدلله و انا كل يوم أسوي زيت ومرات يوم بعد يوم ع حسب بس في البدايه كنت شهر كامل كل يوم زيت ونفس الشامبو دا وحمام زيت مره او مرتين بالاسبوع أسويه ( حمام زيت بوناويل الابيض ) الطريقه في العلبه .

رجااااااء اقرؤ الموضوع تمام لاتسألو بشي موجود جوابو بالموضوع لو لقيت أي سؤال جوابو هنا ماحرد عليها لاني وضحت كل شي

اللي تبغى تنقل مواضيعي عادي تاخذ راحتها بس لازم تذكر اسمي واسم المنتدى عالم حواء ..