السعودية - السعودية
البخور الدوسري
عندي افضل انواع البخور الدوسري الاصلي للعرايس
السعودية - كل المدن
خلطات عطارة ممتازة
يوجد لدينا جميع انواع خلطات العطارة وكريمات وعسل العنبرية للتسمين
           
           
إضافة رد
 
أدوات الموضوع انواع عرض الموضوع
03-01-1427 هـ, 04:29 مساءً
#151
السويسرول (دون)
5 بيضات
3/4 كوب سكر
3/4 كوب دقيق . زرة ملح
معلقة صغيرة فانيليا
معلقة صغيرة بيكنج بودر
مربى مشمش او فراولة
2 فرخ ورق ذبدة
الطريقة
نضرب البيض بالمضرب الكهرباء لحد ما تلاقية بقى هش و فية رغاوى .نضع الفانيليا. نضع السكر شوية شوية على البيض واحنا بنضرب لحد ما تشوفى تخانتة كانك حطة علية دقيق. ينخل الدقيق ويضاف له البكنج بودر وزرة الملح ..بالمعلقة الخشب نضع الدقيق على الخليط ونقلب بالراحة شوية شوية فى اتجاة واحد .ولعى الفرن و خلية جاهز على حرارة متوسطة. ندهن صينية طويلة بدون حواف بالسمن . نقص ورقة الذبدة على اد الصينية مع ترك 1سم من كل جنب ثم نضع الورقة على السمنة اللى دهننها فحنلاقى الورقة لذقت فى الصينية و ندهن الورقة كويس بالسمن. ويصب فوقها الخليط على ان تكون سمك الخليط 1سم تقريبا. يوضع الصينية فى فرن متوسط الحرارة لمدة عشر دقائق او ربع ساعة بالكتير حتى يحمر السطح .جهزى على الرخامة ورقة الذبدة التانية افرديها امامك و رشى عليها كلها شوية سكر بودرة. يعد ماتطلع الصينية من الفرن اقلبيها على الورقة المرشوشة بالسكر و اشيل الصينية من فوق الكيكة و اشيل بالراحة الورقة اللى لزقة فى الكيكة و الف السويسرول على الفاضى بالورفة اللى تحته لمدة 10 دقائق .نخفف المربى بوضعها فى مقلاية على نار هادية لفة واحدة حتلاقيها بقيت ناعمة و كدة حتكون سهلة الفرد .نفك السويسرول و نفردعلية المربى مع ترك 1/2 سم من الاطراف وممكن وضع خط واحد بالعرض على الطرف اللى ناحيتك مكسرات على اساس ان المكسرات كأنها فى المركز عند التقطيع .الف السويسرول و اقفل الاجناب كويس و اضعة فى الثلاجة حوالى ساعتين .لما يطلع افك الورقة واقطع القطعة الفاضية من كل جنب و اما ارش الوش بالسكر البودرة او افرش طبقة خفيفة من المربى على السويسرول و ادحرج السويسرول على ورقة عليها مكسرات فحتمسك على طول فى المربى السويسرول بالشيكولانه نفس الطريقة بس بدل المربى بنحشيه بكريمة الشيكولاته
ملحوظة :انا هنا عملت السويسرول ابيض عادى وبعدين بعد ما وضعته فى الصينية رشيت علية معلقة كاكاو ونكشته بالشوكة علشان يطلع لونه فى النهاية ابيض مشبح بالكاكاو. اول مايطلع من الفرن افضلى مغطياة بالصينية اللى استوى فيها 5 دقايق فقط وبعدين شيلى الصينية وشيلى الورقة وروحى لفة على طول حتلاقية بيلف اخر حلاوة معاكى وعمرة ما حيتكسر بس اهم حاجة برضه متكتريش الدقيق فى العجينة واوعى تسبية فى الفرن اكتر من دقايق حيطلع من الفرن وهو لونه اصفر فااااااتح

طبق سهل (سمسم)
جبت صدور وقطعتها ترنشات عريضة شوية وبعدين شوحت بصلة واما اصفرت حطيت الفلفل ثوانى وبعدين حطيت الفراخ وجزر مبشور تشويحة وبعدين ملح وفلفل وبهارات فراخ ودبس رومان وقلبتهموبعدين سبتها علن نار هادية تستوى فى ميتها وبعدين كنت سالقة مكرونة حطيتها فى طاجن بيركسوعليها الفراخ وعلبة كريمة خفق وقلبتهم مع بعض وعلى الوش شوية زبدة كانت خفيفة جدا وسريعة جدا وممكن بطاطس محمرةوسلطة جنبها

صينية البفتيك بالكريمة (دون)
نص كيلو بفتيك
كوب مشروم
بصلة متوسطة
عدد 2 بطاطس شرائح بالعرض
5 معالق كريمة لبانى او قشدة الخفق
ملح وفلفل
معلقة زبدة
الطريقة
اذاكان البفتيك بتلو
نتبل البفتيك بالملح والفلفل والبهارات. نسيح الزبدة بس ونشوح فيها البفتيك لحد ما لونه يتغير بس .بعد ما نقشر البطاطس ونقطعها شرائح رفيعة بالعرض .نشوح البطاطس مكان البفتيك ثم نضع فى طبق فرن شرائح البطالطس تغطى قاع الصينية ثم نضع البفتيك بجانب بعض فوق البطاطس. نشوح البصلة والمشروم فى نفس المقلاية مكان البفتيك لحد ما يصفروا ثم نضع الكريمة ونقلب لحد ما يختلطوا ببعض ثم نصبهم على وش الصينية وندخلها فرن متوسط مش عالى لحد ما يستوى البفتيك والصينية كلها حتندمج مع بعض وطعمها جميل وبالهنا والشفا
اما اذا كان الفتيك كندوز صغير
يبقى تضربيه الاول و بعد ما تشوحية فى الزبدة تخلية يستوى نص سوى الاول وتكملى الصينية عادى
بنفس الطريقة

صينية المكرونة بالحليب (دون)
كيس مكرونة قلم
3 لتر حليب
5 معالق كبيرة نشا
كوب سكر
4 معالق كبيرة سمنة
فانيليا
جوز هند
مكسرات
الطريقة
نسلق المكرونة عادى بس متحطيش ملح فى الماء. خدى من الحليب كوب ودوبى فية النشا .اغلى الحليب ودوبى فية السكر ثم ضعى علية كوب الحليب اللى بالنشا وقلبيهم كويس ثم نضع المكرونة فى الحليب والفانيليا والسمنة
وقلبيهم ثم ضعى المكسرات وجوز الهند .ادهنى صينية كبيرة بالسمن وبعدين صبى بقى الخليط فى الصينية ودخليها الفرن بس خليه حامى لحد ما يجمد الحليب ويحمر الوش نطلعها من الفرن وبتتاكل ساخنة او باردة

مكرونة بالزبادى (دون)
كيس مكرونة (نص كيلو)
2 كوب زبادى
4 بيضات
نص فرخة مسلوقة ومقطعة
ملح – فلفل – زعتر
كوب جبنة مبشورة(اى نوع)
زبدة
معلقة كبيرة سمن
الطريقة
نسلق المكرونة ونشطفها ونصفيها .نقدح السمن ونضع علية المكرونة والملح والفلفل ونقلبهم لمدة 5 دقائق نضرب البيض ونضيفة على الزبادى ثم نضيف الجبنة الى الزبادى والبيض ونقلب كله مع بعض ثم نضيف قطع الدجاج ونخلط كله مع بعض .نضع المكرونة فى طبق فرن ونضع عليها الخليط ونضع قطع زبدة صغيرة على الوش وندخلها الفرن لحد وشها ما يحمر (مش حتاخد كتير لان كل المكونات مستوية) يعنى حوالى ربع ساعة

الكيكة يا ام العلاء (البان دي سبانيا) (دون)
3 معالق كبيرة سمنة( نص كوب)
كوب حليب
3 بيضات
معلقة صغيرة فانيليا
كوب سكر
معلقة كبيرة بيكنج بودر
3 كوب دقيق
الطريقة
نضع السمنة فى طبق بلاستيك وندعكها كويس قوى بكف ايدنا لحد ما تنعم خالص .نضع السكر على السمنة ونضربهم كويس بايدنا لحد ماتحسى ان السكر زاب .اضع البيض بيضة بيضة مع الفانيليا واضرب بايدى وانا برفع ايدى من تحت لفوق علشان الهواء يدخل للعجينة .اضع البيكنج بودر على الدقيق واضع القيق شوية شوية بالتبادل مع الحليب يعنى شوية دقيق وشوية حليب لحد ما جتتكون عندك عجينة .ادهنى الصينية بالسمنة ورشى رشة دقيق وصبى فيها العجينة .دخليها الفرن متوسط الحرارة لحد ما تعلى وتستوى .بعد ما تخرج وتبرد قطعيها سمبوكسات بالسكينة

تورتة الكريمة بالفراولة (دون)
كيكة اسفنجية
6 بيضات
1/4 1 كوب سكر بودرة
1/4 1 كوب دقيق
معلقة بيكنج بودر
معلقة فانيليا
كيلو فراولة
كريم شانتى
الطريقة
ناخد نص كمية الفراولة و نقطعها انصاص و نحط عليها كلها سكر عادى و نقلبها و نسيبها شوية حنلاقيها نزلت عصيرها دة حنستخدمه
1-زى ما اتفقنا نقطع الكيكة بالعرض بالسكينة لنصين
2-بالمعلقة نبتدى نسقى الطبقة الاولى من الكيكة بعصير الفراولة (او) نحط الفرشاة فى العصير و نبتدى زى مانكون بنسئسء على الكيكة
3-نضع جزء من الكريمة و نسوية كويس بالسكينة العريضة او الباليت
4-نضع انصاص الفراولة على كل الكيكة
5-نضع الطبقة التانية من الكيكة و نسقيها بعصير الفراولة بنفس الطريقة
6- نضع الكربم شانتية اما نفردة على سطح التورتة و الاجناب كويس اما نضع الكريمة فى الكيس و القمع و نعملة على هيئة وردات و نضع فراولاية على كل وردة كريمة وممكن تزوقى الجناب بالقمع تعملى الكريمة على هيئة خطوط او صوابع بالطول. نرش سكر على الفراولة ونتركها لحد ما تنزل العصير بتاعها اللى حنسقى بيه التورته .نضع الفراوله فى مصفاة علشان ناخد العصير .نقسم التورتة نصفين او ثلاثة بالعرض. نسقى التورتة بالعصير وبعدين ندهنها بطبقة كريمة ونرصص عليها انصاص فراولة .نضع نص التورتة التانى ونضغط علية كويس بايدنا نسقى خفيف بالعصير من على الوش وندهن الاجناب بالكريمة بالكيس والقمع نزوق التورتة زى ما انتى عيزاه

قالب الارز بالفاكهة (دون)
2 و نص كوب حليب
نص كوب ارز
3 معالق كبيرة سكر
2 معلقة كبيرة زبدة
3 بيضات
فانيليا
زرة ملح
علبة كمبوت
الطريقة
نغسل الارز ونحطه فى حلة على النار فيها ماء يكفى لتغطية الارز لحد مايغلى لمدة 5 دقايق مثلا وبعدين تطفى النار وتصفيه وتغسلية بالماء العادى .نغلى الحليب على النار مع السكر ثم نضع الارز علية ومعلقة زبدة وزرة الملح ونخلية على النار لمدة من ربع لتلت ساعة وانتى بتقلبى كويس وبعدين اطفى النار .نضرب بياض البيض لوحدة ونضرب صفار البيض لوحدة مع الفانيليا ثم نضع الصفار على الارز ونقلبهم بالراحة ثم نضع البياض
ونقلبهم بالراحة خالص .صفى علبة الكمبوت من العصير بتاعها خالص .ادهنى قالب بالزبدة( قالب الكيك الطويل)
ضعى نص كمية الكمبوت فى القالب ونص الكمية التانية اخلطيها مع الارز وحطيه فى القالب فوق الفاكهة .غطى القالب بورقة فويل وضعية على حمام مائى(زى الكريم كراميل) داخل الفرن لحد ما يستوى تطلعية وتضعيه فى الثلاجة يبرد وبعدين تطلعية وتقلبية وقت التقديم وبالهنا والشفا

صينية العجة فى الفرن (دون)
المقادير
10 بيضات
3 معالق كبيرة دقيق
بصلة متوسطة مخرطة
نص حزمة بقدونس مخرطة ( الاوراق بس بدون العيدان )
2 طماطماية متوسطة و مقطعة صغير
ثلث كوب زيت
ملح و فلفل
الطريقة
فى سلطانية نضرب كويس البيض و الدقيق بمضرب البيض .اضع علية البقدونس و الطماطم و البصل و الزيت و نخلطهم كلكم تماما .ندهن صينية بالزيت و نصب فية الخليط و ندخلة الفرن حوالى من 10 دقايق لربع ساعة لحد ما تلاقى الوش بقى مصفر و لونة حلو مش احمر علشان تفضل هشة زى الكيكة ما تنشفش
ملحوظة /انا مش بحط فيها بيكنج بودر لان البيض كافى انه يخليها تنفش وانتى بنفسك حتشوفيها حتطلع هشة و عالية و خفيفة زى الكيكة

قرص العجة الصغير المدور (دون)
4 او 5 بيضات حسب مقاس الطاسة التيفال بتاعتك
نص حزمة بقدونس _ معلقة صغيرة دقيق
بصلة متوسطة
طماطماية متوسطة
ملح _ فلفل
معلقة سمن
الطريقة
اكسر البيض و اضربة بالشوكة فى سلطانية و احط الملح و الفلفل و الدقيق واربهم كويس بالشوكة .اضع السمن فى المقلاية و اضع البصل لحد ما يصفر و بعدين الطماطماية و اقلب تقليبة و بعدين البقدونس المغسول والمفروم و اقلب تقليبة و بعدين اروح كباهم على اللى فى الطبق الغويط و اقلب كلة عشان يندمجوا مع بعض .احط حتة سمن صغيرة و انزل عليها كل المقدار لحد مايستوى قرص العجة من تحت و اروح قلباة فى طبق و ارجعه تانى المقلاية على الوش التانى لحد ما يستوى و كدة يكون قرص العجة استوى و بالهنا و الشفا
ملحوظة :ممكن تزودى مثلا المقدار ل 10 بيضات و تضعفى باقى المقادير و تعمليها فى صينية فى الفرن و تبقى غداء

صينية البطاطس ( باللحمة او الدجاج) (دون)
كيلو بطاطس _ نص كيلو طما طم _ ( او 3 ملعقة كبيرة صلصة مذ ا بة فى ماء ) _ملح _ فلفل _ بصلة متوسطة _ 2 ملعقة سمن _ قطع لحم حسب العدد المطلوب _ 3 فصوص ثو م _ عدد 2 حبة طماطم شرا ئح
الطريقة
_ تغسل البطا طس و تقطع حلقا ت متو سطة التخا نة _يقشر البصل و يقطع حلقا ت متو سطة _ تغسل قطع اللحم و تو ضع فى الصينية تو ضع البطاطس و الملح و الفلفل و الثوم و الصلصة و نرصص حلقات الطما طم على وجه الصينية ثم نوزع السمن على الوجه _ نضعها الاول على عين البوتجاز من فو ق الى ان تستو ى نص سو ا_ مع تز و يد قليل قليل من الماء كلما ا حتا جت _ نضعها فى فر ن متو سط الحر ار ة الى ان تستوى و يصبح لونها احمر جميل
ملحوظة ::: اذا كا نت اللحمة بتلو او ضا نى تو ضع كما شرحت فوق واذا كانت اللحمة كندوز يفضل ان تسلق اولا لوحد ها ثم تو ضع فى الصينية

اللي حيبقى عندها لية الخروف و مش بتحب تستخدمها زي ما هي، ممكن تقطعها كلها مكعبات و تسليها كلها مرة واحدة و تصفيها و تعبيها في برطمانات و تستخدمها زي السمنة، و لو مش بتحب البقايا اللي حتفضل من التسييح ترميها، لكن ممكن تخليها في برطمان لوحدها و تضيفها مع التسبيكات بتدي نفس حلو و مش بتضايق في الطعم لانك مش بتحسي بيها (ملحوظة من نودي)

الشعيرية بالسكر (دون)
كيس شعيرية (او نص كيلو)
3 معالق كبيرة سكر
4 معالق كبيرة سمنة او ممكن زيت زرة
2 معلقة كبيرة سكر ناعم
فصين حبهان( وممكن الاستغناء عنهم)
الطريقة
كسرى الشعيرية قطع صغيرة .نضع السمنة او الزيت فى مقلاية لحد ما يسخن ونضع فيها الشعيرية ونحمرها لحد ما لونها يبقى بنى فاتح ثم ضعى ماء عليها والسكر ووطى النار عليها حتلاقيها استوت على طول خليها لحد ما الماء ينشف كله يبقى مفيهاش ماء خالص .ضعيها فى طبق ورشى على وشها سكر بودرة

كباب الفقراء (دون)
علبة فول مدمس
2 معلقة كبيرة طحينة
نص حزمة كسبرة خضراء
2 معلقة كبيرة سمنة (او نباتى)
بصله متوسطة
ملح - كمون
فص ثوم
قطعة فحم
الطريقة
افرمى الكسبرة ناعم. ابشرى البصلة ناعم .ولعى الفحمة لحد ماتحمر. سخنى الفول كويس وضعية فى الطبق
وضعى علية السمنة و البصل والثوم والكسبرة والطحينة والملح والكمون واخلطيهم كويس .اعملى حفرة فى نص الطبق وضعى الفحمة المولعة وغطى الطبق بسرعة حوالى 5 دقايق ثم شيلى الغطاء وشيلى الفحمة وقدمية مع الخبز المقمر ( الناشف _ المحمص)وبالهنا والشفا
صينية البولوبيف (دون)
2 علبة بولوبيف
نص معلقة صغيرة مستردة
كوب فتات خبز(خبز فينو مبشور )
2 معلقة كبيرة سمنة
3 معالق كبيرة بصل مبشور
2 بيضة
نص كوب شوربة
الطريقة
نهرس البولوبيف كويس بالشوكة اوافرمية فى الكبة خشن واخلطية بفتات الخبز .ضعى السمنة فى مقلاية وحمرى فيها البصل الى ان يصفر ثم ضعى خليط البولوبيف .اضربى البيض بالشوكة وضعيه على الشوربة وقلبيهم ثم ضعيهم على خليط البولوبيف وقلبى قلبى لحد ما حتلاقى الخليط بقى طرى نوعا ما. ادهنى صينية بالسمنة وضعى فيها الخليط وسوى السطح كويس وقطعية مربعات اوسمبوسكات ودخلية فرن متوسط الحرارة حوالى من نص ساعة لساعة الاربع لحد ماتستوى ووشها يحمر وبالهنا والشفا

صينية البيض المسلوق (دون)
8 بيضات مسلوقة
بصلة صغيرة مبشورة
2 فلفلة رومى مقطعة صغير جدا
2 معلقة سمنة
3 معالق كبيرة دقيق
كوب و نص عصير طماطم
كوب ونص ماء او شوربة
معلقة كبيرة بقدونس مفروم
ملح وفلفل
بقسماط ناعم
جبنة رومى مبشورة
الطريقة
نشوح البصل والفلفل الاخضر فى السمنة ويعدين نضع عليهم الدقيق ونقلب لحد ما يتخلطوا .نضع الماء وعصير الطماطم والملح والفلفل ونتركهم لحد مايغلوا ثم نشيلهم من على النار ونضيفلهم البقدونس المفروم. ندهن صينية بالزبدة ونقطع البيض شرائح ونرصصها فى الصينية ونصب الخليط فوقها ثم نرش شوية بقسماط وجبنة رومى مبشورة وندخلها فرن متوسط الحرارة حوالى ثلث ساعة وبتتاكل ساخنة وبالهنا والشفا

البيتزا (دون)
( سريعة بدون تخمير)
2 ونص كوب دقيق + 1 كوب حليب دافىء + 5 معالق كبيرة زيت ورشة ملح
ملعقة كبيرة خميرة فورية+ ملعقة سكر صغيرة+ بيضة+ رشة زعتر
للوجة: صلصة - فلفل اخضر مقطع قطع صغيرة – سوسيس – بسطرمة
تونة – زيتون اسود واخضر (اى اضافات )
الطريقة
نضع جميع المقادير فى العجانة ونضربهم حتكون العجينة مفرولة .اضع الحليب شوية شوية والعجانة شغاله لحد ما تلاقى العجينة اتلمت واتكورت وتركت جناب العجانة خالص .نرش الرخامة بالدقيق ونبدء فى فرد العجينة بالنشابة ونضعها فى الصينية ونخرم العجينة با لشوكة .نفردالصلصة على العجينة ثم نرش رشة جبنة صغيرة ثم نضع الاضافات حسب الرغبة ثم نرش طبقة الجبنة المبشورة ثم نرش نقطتين بالظبط زيت .ندخلها الفرن متوسط لحد ما الجبنة تسيح وتطلعيها يادوب لونها يبقى فاتح علشان مالتنشفش منك. اذا كنتى عايزة البيتسا (مارجريتا) بدون اى اضافات يبقى حتكتفى فقط بالصلصة وعليها الجبنة المبشورة

بقسماط فى السريع علشان كوباية الشاى (دون)
نص كيلو دقيق - زرة ملح - نص كوب زيت - ربع كوب سكر - معلقة كبيرة بيكنج بودر - معلقة صغيرة فانيليا - 2 بيضة - حليب حسب العجن (انا اخد منى نص كوب)- سمسم
الطريقة
اضع فى العجانة الزيت والسكر والبيض والفانيليا واضربهم شوية ثم اضع الملح والبيكنج بودر على الدقيق واضعة على المقدار والعجانة شغالة .انزل شوية شوية حليب لحد ما تلاقى العجينة اتكورت زى الصورة وتركت
اناء الخلاط كدة اصبحت جاهزة .ناخد حتة صغيرة على هيئة كرة ونعملها اصبع حسب الرغبة يعنى ممكن صباع طويل وممكن قصير وممكن تخين وممكن قصير يعنى حسب رغبتك انتى .ارصص الاصابع فى الصينية وادهن الوش بالحليب وارش سمسم حسب الرغبة يعنى ممكن لأ .دخلية فرن متوسط الحرارة مش حياخد وقت وحتلاقى الوش احمر وبقى جميل وبالف هنا وشفا

السمك الهامور هو السمك الوقار هنا عندنا وفعلا بيكون جميل اوي في البانيه وكمان جربيه مقلي بالدقيق بعد تتبيله طبعا وتحمريه في زيت مع ارز احمر بيكون تحفه
اما انواع السمك :عند البلطي البحري احلي من النيلي طبعا وممكن تشويه او تقليه زي الصوره كده .وفي السمك البوري طبعا وده ممكن مشوي زي الصوره برضو او تعمليه سنجاري بالبصل والخضره والطماطم .وسمك اللوت وده بيكون تحفه في الصينيه او في المقلي بانيه وسمك دنيس وده حلاوته مشوي بالزيت والليمون او بالرده وسمك البربوني
اما السمك المشوي ازاي تخليه متبل حلو هقولك علي سر
بصي ياستي بعد ماتشوي السمك عموما بالرده تكوني محضره كيس نايلون (شنطه بلاستيك من بتوع السوبر ماركت )وكل سمكه تشويها تحطيها في الكيس وترشيها ملح وكمون وتروحي لفه الكيس تقفليه يعني وهكذا لحد ماتنهي السمك كله شوي وده طبعا لانه النايلون بيخلي السمك يعرق وبالتالي الميه دي تطري السمك ويفضل محتفظ بسخونته وكمان وده الاهم انه يتقشر بسهوله وقت الغداء ولو اتفضل عندك سمك ممكن يتسخن تاني يوم علي بخار ماء او تلفيه بالفويل وفتحطيه في الفرن او التوسترودي احسن طريقه عشان السمك يتبل كويس لكن محلات السمك بعد الشوي بيكونوا محضرين ماء وملح وشطه وكمون ويضعوها علي السمك بمجرد خوجه من الفرن وانا مش بحبز الطريقه دي وده عن خبره جربي طريقتي وهتعرفي الفرق (ملحوظة من ام الهنا)

ماما لما بتعمل السمك المشوى بتحضر تتبيله كدة بتحطها عليه بعد ما بيتشوى و بيطلع تحفه ما شاء الله و هى عبارة عن ليمون و خل و ثوم و نعناع و ملح و كمون و كزبرة ناشفه و فلفل حامى او رومى و ممكن الوان بيعمل شكل حلو اوى و شويه ماء صغيرين . طبعا تفرمى الثوم مع الملح و الكمون و الكزبرة و تحطيهم فى طبق و عليهم باقى المكونات مع رشه نعناع و بعد لما تشوى السمكه و هى سخنه تحطيها فى التتبيله دى شويه صغيرين على الناحيتين و تطلعيها منها و بعدها ترشى عليها معلقتين من التتبيله دى و تقدميها بيها بتبقى تحفه والله جربيها (ملحوظة من مسلمة)

كفتة بالكارى والبطاطس(طبق سريع) (دون)
نص كيلو لحمة مفرومة
عدد 2 بطاطس كبيرة
3 معالق كبار كارى بودر
بصلة مبشورة
ملح وفلفل
زيت
الطريقة
تخلط اللحمة المفرومة مع البصلة والملح والفلفل .ناخد قطعة لحم اد الليمونة و نكورها بين ايدينا على هيئة كورة وهكذا نستمر حتى ينتهى المقدار كله .نحضر مقلاة تيفال ونضع فيها سمنة الى ان تسخن ثم نحمر الكفتة
بعد ماتتحمر نشيلها فى طبق جانبا .نقشر البطاطس ونقطعه مكعبات صغيرة .نضع معلقة زيت فى الحلة ونشوح فيها بصلة مبشورة صغيرة لحد ما تصفر ثم نضع الكفتة والبطاطس والكارى ونضع ماء ساخن عليهم فى الحلة ونظبط الحودء ( الملح) ونتركة حتى يستوى يعنى لما البطاطس تستوى لان الكفته اساسا مستوية يغرف فى طبق مع الارز الابيض او الارز بالكارى وبالهنا والشفا

انا الشوى بستخدم التتبيلة الاتية
سواء لحمة او دجاج او شيش مثلا للفرخة الواحدة او كيلو اللحمة عدد 1 كوب زبادى مع بصلة متوسطة مبشورة ناعم جدا مع طمطماية مبشورة ناعم وملح وفلفل وخل ...............الزبادى والخل بيخلوا اللحمة او الفراخ طرية وتستوى بسرعة وياريت لو تتبليها من بليل او من الصبح بدرى بالنسبة للطماطم قبل لما تنغزيها فى السيخ تشيلى منها الجزء اللى فية البزر اللى بيبقى طرى وداخله ماء ولكن تسيبى اللحم اللى بجانب القشرة ولما تنغزيها تنغزيها من ضهرها مش من عند اللحم علشان من عند اللحم بتاع الطمطاية مع الحرارة بتستوى وتطرى الطماطم وتقع لكن من ورا من عند الجلدة بتاعة الطماطم بتفضل ماسكة فى السيخ ما بتقعش
وبالنسبة لحرق البصل والفلفل والطماطم ممكن يحصل لما تكون اللحمة كندوز لانها بتاخد وقت لكن الضانى والبتلو بتستوى بسرعة والخضار مش حيلحق يتحرق او اللى حيتحرق هى القشرة الخارجية لكن من الداخل بتبقى مشوية وجميلة (ملحوظة عن شوي اللحم لدون)

صينية الجلاش بطعم البيتسا (دون)
باكو جلاش
كوب شوربة ( مرقة)
سمنة
زيتون اسود وزيتون اخضر
لانشون
فلفل اخضر (رومى)
جبنة بيضاء مهروسة بمعلقة زعتر
جبنة شرايح (سلايس)
الطريقة
نحضر صينية وندهنها سمن خفيف. نضع ورقتين من الجلاش ثم ندهن سمن بالفرشاة وهكذا لحد ما نخلص نص كمية الجلاش. نضع الجبنة البيضاء المهروسة بالزعتر ثم نضع حلقات الفلفل ثم نضع دوائر اللانشون ثم شرائح الزيتون بنوعية .نضع باقى كمية الجلاش بنفس الطريقة الاولى ثم نقطعها اما مثلثات او مربعات .ندخلها فرن متوسط على 180 يادوب 5 دقايق او لما تلاحظى ان وشها اتلون و اصفر نطلعها ونصب عليها كوب الشوربة وندخلها تانى الفرن لحد ما تحمر

الكرنبيت بالايطاليان صوص (ام زياد):
كرنبيت مقطع ومسلوق فى ماء وملح وكمون
2-مقادير الصوص:-
1كوب الاربع دقيق
1ونصف لتر لبن
1بصله صغيره مبشورة ناعم
3 ملاعق كبار سمنه او زبده
1/4 كجم جبنه شيدر(او ممكن اى نوع جبنه تحبيه)
1كوب ماشروم
2كوب فراخ مقطعه صغير ومتشوحه على النار أو ممكن تسلقيها الاول وبعدها تقطعيها
الطريقه:-
نشوح البصل فى السمن واول ما يصفر اضع الدقيق واقلب كويس تقليبتين ثم ابدأ اضع اللبن شوى شوى مع التقليب المستمر بالمضر السلك عشان مش تكلكع .بعد ما اضع مقدار اللبن كله اقلب على نار هاديه حتى يصبح قوامه كريمى ثم اضع الماشروم والفراخ والجبنه واقلب كويس .فى قالب بايركس مدهون سمنه اضع قليل من الصوص ثم الكرنبيط ثم باقى الصوص واضع على الوجه شرايح جبنه شيدر واضعه فى الفرن حتى يحمر وجهه

الفتة (دون)
ارز ابيض مستوى _ عيش بلدى محمص _لحمة مسلوقة بالشوربة _صلصة طمامم بالخل و الثوم .
طريقة سلق اللحمة ( ضانى او بتلو او كندوز صغير او رقبة )نضع الماء على النار و فية بصلة كبيرة مقطعة نصين و وورقتين لاورو و ملح وقلفل الى ان تغلى اضع اللحمة و اشيل طبعا الريم كل ما يطلع و ارمية الى ان تستوى 3/4 سوى اروح بالكبشة اشيلها من الشوربة و اصفى الشوربة بالمصفاة
اجيب حلة تانية نظيفة و اضع فيها ملعقة كبيرة سمن و لما تقدح ارمى فيها فصين مستكة و فصين حبهان حتلاقى ريحتهم طلعن تروحى حطة على طول اللحمة كلها ثقليبة فى السمنة و تلروحى منزلة عليها الشوربة حتعمل تششششش و حتشمى بقى ريحة الشوربة الجميلة
حتستوى اللحمة اطفى النار
طريقة عمل الصلصة بالخل و الثوم :
اضع على النار 2ملعقة سمن و عليهم راس ثوم مفرى لحد ما يصفر بس الثوم
اروح حطة علية 1/2 كوب خل حتى يغلى ثم اضع صلصة طماطم وملح وفلفل و بهارات و قليل من الماء ؤ اتركها حتى تتسبك حوالى 10 دقائق
طريقة تركيب طبق الفتة :
1_ اقطع العيش قطع متوسطة فى الطبق او الصينية و ارشرشة بالشوربة لحد ما كلة يشرب شوربة
2_ اضع الارز على العيش و افردة كويس و اضع كبشة شوربة
3_ ثم اضع بالكبشة صلصة الطماطم علىوش الارز كلة بس مش قليلة
4_ ثم ارصص قطع اللحم الهوبر على و ش طبق الفتة و حيطلع منظرة و ريحتة تفتح النفس و بالهنا و الشفا

صينية البقلاوة بالمهلبية (دون)
باكو جلاش
سمنة سايحة
المهلبية:
كوب حليب – معلقة كبيرة نشا- فانيليا
معلقة زبدة
شراب (شيرة ) 2كوب سكر – كوب ونص ماء
نص ليمونة
الطريقة
نعمل المهلبية
ناخد من الحليب نص كوب ونذوب فية النشا كويس .نضع باقى الحليب فى حلة على النارلحد ما يغلى ثم نضع النشا المذاب فى الحليب ونقلب لحد ماالخليط حيتخن (يتماسك) ثم اضع الفانيليا والذبدة ونقلبهم كويس ونتركها جانبا .نحضر الصينية وندهنها بالسمن ثم نضع اول ورقتين من الجلاش ثم ندهن بالفرشاة بالسمن وهكذا حتى
الانتهاء من نص كمية الجلاش ثم نضع طبقة من المهلبية بس تكون بعيدة عن الاطراف .نعمل نص الصينية التانى بنفس الطريقة ومتنسيش تبقى تضعى الزيادات اللى بتتبقى من ورق الجلاش بين الطبقات. نقطع الجلاش اما مثلثات واما سمبوكسات ثم نرش سمن سائح على الوجة وندخلها الفرن لحد ما تستوى ويحمر الوجة ثم تخرج من الفرن وتسقى بالشراب البارد وهى ساخنة وبالهنا والشفا

الجيلى بالكريمة (دون)
2باكو جيلى فراولة _ 2 ظرف كريم شانتية _ فراولة للزواق
نغلى على النار 3 كوب ماء ثم نضع علية الجيلى لحد ما يغلى و يدوب .نعمل الكريمة بنفس الطريقة المكتوبة على العلبة .نضع الكريمة فى الثلاجة و نضع الجيلى حتى يجمد تماما .نخرجهم من الثلاجة و نضع الكريمة على الجيلى و بالمضرب الكهرباء .نخلطهم مع يعض كويس حيبقى الخليط فاتح و ناعم لانهم حيتجانسوا على بعض نضعهم فى الكاسات و نجمل الوش بوردات كريمة و وحدات فراولة صغيرة .
مبيكونش سايل يا نودى خالص بيبقى ماسك نفسة لان المفروض بندوب باكو الجيلى فى 2 كوب ماء دة الطبيعلى لكن احنا هنا مدوبين ال2 باكو فى 3 كوب ماء فقط مش 4 وكدة بيبقى ماسك نفسه اكتر من الاول وبعد كدة لما بنضعه مع الكريمة برضه بيبقى ماسك لكن اهم حاجة لما تيجى تجمدى الجيلى الاول خالص وهو لوحده ماتجمديهوش فى الفريزر علشان ماياخدش ماء من التلج ابقى جمدية فى التلاجة من تحت

وبالنسبة للبفتيك انا بعملة يا اما فيلية بالبصل او بانية او بيكاتا او بصوص المشروم او بالصلصة البنى او بحشية لحمة مفرومة معصجة او خضار سوتية (ملحوظة من دون)
وبالنسبة للكفتة المشوية انا مبعملهاش بالحمة حمراء لأ بتكون فيها نسبة دسم او ببشر معاها حتتة لية صغيرة مع الملح والفلفل والبهارات وماء عصير بصل وليس بصل يعنى باخد من البصلة البشر بتاعها ماء خالص بالمبشرة العين الضيقة خالص وبعدين اصبعها واخرمها من النص بايد المعلقة الخشب علشان الفتحة تبقى واسعة (ملحوظة من دون)

قرص طرية (دون)
4 كوب دقيق
زرة ملح
كوب سمنة
قطعة خميرة بيرة(قد اليوسفى الصغير)
لبن رايب او زبادى
الطريقة
نضع الملح على الدقيق .اضع السمنة واخلطهم ببعض .ادوب الخميرة بنص معلقة سكر صغيرة فى ربع كوب ماء دافىء ثم اضعها على الدقيق .ادفى اللبن الرايب او الزبادى ثم اعجن بيهم لحد ما العجينة تتلم وتلاقى ايديكى
بقيت نضيفة مفيهاش عجينة خالص .ابدء اعمل العجينة على هيئة كور قد التفاح الاصفر وكل واحدة اخلصها ارصصها جنب التانية فى الطبق .بعد ما انتهى من عمل العجينة كلها كور .ابتدى ابطط بايدى كرة كرة بس بشرط
انى ابتدى من اول كرة انا كنت عملاها وحطاها فى الصينية مش من اخر واحدة خلصتها (فاهمين قصدى ؟)
ابطط كرة كرة. ممكن تتخنيها وممكن ترققيها زى ماانتى عايزة .تضعيها على صاجة الفرن الاساسية اللى بتبقى فوق النار مش على الرف الحديد ونضعها فى فرن متوسط لحد ماتستوى .ملحوظة مش بندهن الصاج ولا بندهن وش الفطير .ملحوظة ممكن نحشية بمعلقة مربى من الداخل

كيكة الجزر (دون)
3 بيضات
2 ونص كوب جزر مبشور خشن
2 كوب دقيق
3/4 كوب زيت
كوب وربع سكر
معلقة صغيرة بيكنج بودر
معلقة صغيرة بيكربونات
معلقة صغيرة قرفة
معلقة صغيرة فانيليا
الطريقة
ضعى الخميرة وزرة ملح والقرفة واخلطيهم فى الخلاط او بالمضرب ضعى الزيت والسكر لحد ما يدوب شوية ثم ضعى البيض والفانيليا واضربى ثم ضعى الجزر واخلطى .ضعى الدقيق بالمكونات اللى علية واخلطى كله واذا لقيتيها ماسكة شوية معاكى يا رانيا ممكن تحطى لها شوية حليب بتاع ربع لنص كوب بس (انا جربت مرة احط عصير جزر بدل الحليب بس معجبتنيش )ضعيها فى الصينية المدهونة ودخليها فرن متوسط الحرارة لحد ماتستوى زى الكيكة العادية وممكن تحطيلها زبيب او عين جمل مكسر

تورته بطريقه حبيبه قلبي don(سبانيش فلاور)
بس غيرت شويه في المقادير علشان حجم الصينيه عندي صغيره
5 بيضات
كوب سكر
كوب دقيق
معلقه كبيره بيكنج بودر
حوالي ربع كوب ماء
فانيليا
و لو التورته بالشوكولاته شيلي معلقتين دقيق مثلا و حطي بدالهم كاكاو او نفس النسبه
الطريقه
اضربي البيض بالمضرب الكهربائي حوالي 15 دقيقه و بعدين ضيفي السكر و الفالنيليا و الماء و اضربي تاني
هتلاقي المزيج بقي زي العجينه السايله بس من غير دقيق .ضيفي الدقيق المنخزل طبعا و البيكنج بودر و قلبي بالراحه و في اتجاه واحد علشان الهوا ميطلعش .انا بدل ما ادهن الصينيه عندي بابطنها بورق الومنيوم(فويل) و اصب الخليط و علي الفرن المسخن مسبقا علي 180 درجه مئؤيه حوالي 40 دقيقه .اول ما تطلع سيبيها تبرد و قطعيها نصفين و اسقيها بالشربات او عصير الكمبوت و المربي و الكريمه و زوقيها زي ما تحبي

الكريم كراميل (دون)
اولا : الكريم :
4 اكواب حليب _8 بيضات _3ملاعق كبيرة سكر_2 كيس فانيليا
الكراميل :
كوب كبير سكر _ معلقة شاى صغيرة ماء _ قوالب صغيرة او قوالب فويل صغيرة او صينية او فورمة الكيكة او قوالب الكيك المستطيلة
نبل القوالب اللى حنحط فيها الكريم كراميل من الداخل و نكب الماء الذائد
لعمل الكراميل نضع السكر فى مقلاية وعلية الماء ونقلب لحد مانلاقى السكر بدء بصفر ثم بدء يبقى بنى فاتح ثم بنى غامق .نشيلة و نصبة على طول فى القوالب المبلولة بارتفاع 1 او 2 سم .
لعمل الكريم
ندفى اللبن مع السكر على النار و نطفى النار ثم نضع علية البيض المضروب والمضاف له الفانيليا و نضربه كويس بالمضرب السلك اليدوى او الكهرباء . نصبة فى القوالب على الكراميل ونرصص القوالب فى صينيه كبيرة بها ماء لربع ارتفاع القوالب فقط علشان لما الماء يغلى ما يخشش فى القوالب يبوظها ونضع الصينية على النار حوالى ساعة او لحد ماتلاقى الكريم كراميل مسك نفسه .اشيله من على البوتجاز و ادخلة الفرن لحد ما يكمل سوى ووشه يحمر .نطلعة و نحطه يبرد فى الثلاجة و عند التقديم نمسك القالب بايدنا وفوقه طبق مقلوب ونهز القالب لحد ما يتقلب فلى الطبق حيبقى الكريم تحت و الكراميل فوق .

صينية مكرونة بصلصة الجبن (دون)
كيس مكرونة (500 جرام)
2 مقدار من صلصة الجبن
بقسماط ناعم
معلقة زبدة
جبنة رومى مبشورة للوش
الطريقة
بعد ما تسلقى المكرونة وتصفيها.اخلطى المكرونة ب 3/4 مقدار صلصة الجبنة .ندهن طبق فرن بالزبدة ونضع المكرونة ونضع باقى كمية صلصة الجبن على وش الصينية كويس وبعدين نرش رشة بقسماط ورشة جبنة رومى مبشورة والزبدة وندخلها الفرن لحد ما تحمر وتقدم ساخنة
صلصه الجبن
صلصة بشاميل
2معلقة كبيرة سمنة
2 معلقة كبيرة دقيق
2 كوب شوربة (مرق)
ملح وفلفل
5 معالق كبيرة جبنة رومى مبشورة
الطريقة
تعمل صلصة البشاميل بنفس الطريقة العادية وبعد ما تطفى النار نضع الجبنة الرومى المبشورة ونقلبها كويس بالمعلقة الخشب بس من غير مانحطها خالص تانى على الناروتستخدم

عمل الارز (دون)
كوب الارز بياخد كوب ماء ومعلقتين زيت
كوب الارز و 1/4 كوب شعيرية بياخد كوب وربع ماء و3 معالق زيت
.............................. .............................. .............................. .........
الارز المفلفل (دون)
كوب ارز ابيض عادى (قصير الحبة)
كوب ماء
2 معلقة زيت
ملح
الطريقة
اغسلى الارز
ضعى الزيت فى حلة على النار لحد ما يسخن كويس. ضعى الارز على الزيت وقلبى قلبى بالمعلقة لحد ما تحسى ان الارز كله اتبل من الزيت تروحى حاطة الملح وتقلبى تقليبة ثم ضعى الماء وقلبيهم وغطى الحلة لحد ما الارز خلاص قرب يشرب الماء كله تروحى مقلباة و موطية النار على هادى خالص وممكن تضعى تحت الحلة الشياطة او الحديدة المدورة وماتفضليش تفتحى علية علشان البخار ما يخرجش من الحلة يا دوب حتفتحى علية مرة وتدوقى الارز اذا لقيتية استوى خلاص اطفى واذا لقيتية لسة فية شوية حصحصة رشرشى بس كدة بايدك على وشة وقلبية وكل الحكاية بياخد ربع ساعة او تلت وبالهنا والشفا

الارز بالشعيرية (دون)
كوب ارز ابيض عادى (قصير الحبة)
1/4 كوب شعيرية
كوب وربع ماء
3معلقة زيت
ملح
الطريقة
اغسلى الارز. ضعى الزيت فى حلة على النار لحد ما يسخن كويس .ضعى الشعيرية وقلبيها فى الزيت لحد ماتحمر ثم ضعى الارز على الشعيرية وقلبى قلبى بالمعلقة لحد ما تحسى ان الارز كله اتبل من الزيت تروحى حاطة الملح وتقلبى تقليبة ثم ضعى الماء وقلبيهم وغطى الحلة لحد ما الارز خلاص قرب يشرب الماء كله تروحى مقلباة و موطية النار على هادى خالص وممكن تضعى تحت الحلة الشياطة او الحديدة المدورة وماتفضليش تفتحى علية علشان البخار ما يخرجش من الحلة يا دوب حتفتحى علية مرة وتدوقى الارز اذا لقيتية استوى خلاص اطفى واذا لقيتية لسة فية شوية حصحصة رشرشى بس كدة بايدك على وشة وقلبية وكل الحكاية بياخد ربع ساعة او تلت


توقيع

يا رب لك الحمد كما ينبغي لجلال وجهك و عظيم سلطانك

اللهم اغفر لي و لوالدي و للمؤمنين و المؤمنات يوم يقوم الحساب

اللهم احفظني و زوجي وولدي من كل سوء


رد مع اقتباس إرسال الموضوع إلى الفيس بوك إرسال الموضوع إلى تويتر
Noody30 غير متواجد حالياً  



03-01-1427 هـ, 04:30 مساءً
#152
صينية المكرونة بالمستردة والسوسيس (دون)
كيس مكرونة (500 جرام)
بشاميل خفيف
بيضة مربوبة للوش
جبنة رومى مبشورة للوش
3 معالق كبيرة مستردة
سوسيس مقطع حلقات
الطريقة
بعد ما تسلقى المكرونة وتصفيها اخلطى المكرونة ب 3/4 البشاميل والمستردة والسوسيس. ندهن طبق فرن بالزبدة ونضع المكرونة ونضع باقى البشاميل على وش الصينية كويس وبعدين نضع البيضة ورشة جبنة رومى مبشورة وندخلها الفرن لحد ما تحمر وتقدم ساخنة

البسكوت باليانسون (دون)
كوب زيت
كوب سمن
8 بيضات + 2 صفار بيض
4/1 1 كيلو دقيق
2/1 1 كوب سكر بودرة
3 معالق كبيرة يانسون صحيح و محمص
1 معلقة شاى بيكنج بودر + 1/2 معلقة شاى نشادر _ فانيليا
الطريقة :
فى الخلاط نضرب الاول الزيت شوية ثم نضع علية السمن و يضرب قليلا مع الزيت .نضع عليهم السكر و يضرب
نضيف البيض واحدة واحدة مع الفانيليا ونضربهم شوية .اضع اليانسون و اضرب شوية. اضع البيكنج بودر و النشادر على الدقيق .اضيف الدقيق للمقدار و اخلط كويس بايدى كلة مع بعضة .ادهن صينية بالزيت وابدء اعمل قطعة من العجينة على هيئة رغيف فينو و اترك مسافة فى الصينية بين كل رغيف و رغيف .ادخلهم الفرن لحد ما يستوا فى حرارة متوسطة .اطلعهم من الفرن و ابدء فى تقطيع كل رغيف بالعرض بالسكينة على هيئة شرايح رفيعة .ارصص هذة الشرايح فى الصينية تانى و ادخلهم الفرن لحد ما يحمر وجهها

السمك البانيه (دون)
فيلية سمك بلطى او قشر بياض
ملح و فلفل
نص ليمونة
2 بيضة مضروبة بالشوكة
بقسماط ناعم
زيت للتحمير
الطريقة
نغسل السمك ونتركه لحد ما يصفى مايته .نتبل السمك بالملح والفلفل وعصير الليمون ونتركه حوالى نص ساعة
نضع شريحة السمك فى البيض ثم فى البقسماط ونحمرها فى الزيت لحد ماتستوى وتحمر ونشيلها على الورق الماص للدهون .يقدم الطبق مع سلطة الطحينة وسلطة بابا غنوج مع العيش او الارز

كيكة اسفنجية (دون)
مقاديرها/
6 بيضات
1/4 1 كوب سكر بودرة
1/4 1 كوب دقيق
معلقة بيكنج بودر
معلقة فانيليا
.....................
كريم شانتى
ملبس ملون
كريز
علبة كمبوت مشكل
الطريقة
نضع الكمبوت فى المصفى علشان نصفى الكمبوت من العصير بتاعه تماما
1-زى ما اتفقنا نقطع الكيكة بالعرض بالسكينة لنصين
2-بالمعلقة نبتدى نسقى الطبقة الاولى من الكيكة بعصير الكمبوت (او) نحط الفرشاة فى العصير و نبتدى زى مانكون بنسئسء على الكيكة
3-نضع جزء من الكريمة و نسوية كويس بالسكينة العريضة او الباليت
4-نضع الكمبوت على كل الكيكة
5-نضع الطبقة التانية من الكيكة و نسقيها بعصير الكمبوت بنفس الطريقة
6- نضع الكربم شانتية و نفردة على سطح التورتة و الاجناب كويس وبالمشط البلاستيك المخصوص نسوى وش التورتة و نضع وحدات الكريز ونرش الملبس الملون باى طريقة زخرفية على زوقك الحلو

اصابع البقلاوة (دون)
نص كيلو جلاش (باكو)
سمن سائح
مكسرات مفرومة
شربات(عسل – قطر – شيرة)
(2 كوب سكر – كوب ونص ماء – نص ليمونة –فانيليا
او قرفة
الطريقة
اذا كنتى عايزة الصابع رفيع ضعى امامك ورقتين جلاش وادهنى بالفرشاة سمن ثم اثنيهم بالعرض وضعى على الطرف مكسرات مفرومة ثم ضعى العصاة ولفى الورقة عليها الى ان تنتهى ثم كشكشى الورقة بأنك تسحبى او تزقى الورقة على العصاة للناحية التانية ثم اسحبى العصاة اما ان تتركيها صابع وترصصيهم فى الصينية واما ان تلفى الصابع على هيئة دائرة .ادهنى الجلاش وهو فى الصينية بالسمن ثم دخلية فرن متوسط الحرارة الى ان يصفر لونه وطلعية وهو ساخن واسقية بالشراب البارد

الأكلير (دون)
المقادير:
2 كوب دقيق _ 1 كوب ماء _ 1 كوب ذبدة و زيت (يعنى نص ذبدة و نص ذيت )
من 5 ل 6 بيضات _ معلقة صغيرة فانيليا.زرة ملح.
الطريقة:
حطى الماء فى حلة على النار لما يادوب حيدفى حطى الذبدة والزيت على الماء و لما يغلى حطى الدقيق كله مرة واحدة وقلبى بسرعة و النار واطية لحد ما حتلاقى العجينة لفت معاكى و بقيت زى الكرة روحى شايلة الحلة من على النار لحد ما تبرد خالص . ابتدى حطى البيض على العجينة بس بشرط تحطى بيضة و تضربيها فى العجينة لحد ما تختفى و بعدين تروحى حطة اللى بعدها بنفس الطريقة و هكذا .بس توقفى وضع البيض لما تلاقى العجينة عاملة خط نازل من المضرب متماسك مثل منقار الحمامة .هاتى بقى الكيس بالقمع المخصوص بتاع بلح الشام و اقلبية الاول على ضهرة و بليه بالفرشاة بالذيت و ارجعى اعدلية تانى . حطى العجينة فى الكيس و انزلة فى الصينية صوابع طولها زى ماانتى عوزة وادخله الفرن لحد ما يستوى .اطلعه من الفرن وافتح بالسكينة فى جنب واحد من صباع الاكلير(زى السندوتش) وبالمعلقة الصغيرة اطلع العجينة الصفراء اللى بتبقى بالداخل وابدء فى حشوه بالكريم باتسير بالمعلقة او بالقمع واقفله واكون مجهزة الشيكولاته السايحة واروح وضعة الوش فقط فى الشيكولاته زى رغبتك اما خط رفيع اما خط تخين . ملحوظة ممكن وضع المقدار كله زيت وممكن وضع قالب ذبدة قلم ال 113 جرام
بالنسبة للاكلير انا احيانا بعمله ومبستخدموش على طول يعنى لو حشيله بس بيبقى 3 _4 أيام بعد ما بتخبزيه وبيطلع من الفرن يتسبيه لحد ما يبرد خالص وبعدين ترصصيهم فى طبق فل وتضعيهم فى كيس نايلون وتحطيهم فى الثلاجة مش فى الفريزر وعند الاستخدام تكملى نفس الطريقة عادى وتحشيهم وتسيحى الشيكولاته الخام للوش . (ملحوظة من دون)

كريم باتسير بالشيكولاته (دون)
2 كوب حليب
2 معلقه كبيره دقيق
2 بيضة
فانيليا
3 معلقه كبيره سكر
2 معلقه كبيره كاكاو
الطريقه
نضع كل المقادير مع بعض ونضربهم فى الخلاط لحد ما يندمجوا ثم نضعهم فى حلة على النار لحد ما يتخن الخليط ويترك يبرد ويستخدم فى الحشو

بقسماط فى السريع علشان كوباية الشاى (دون)
نص كيلو دقيق - زرة ملح - نص كوب زيت - ربع كوب سكر - معلقة كبيرة بيكنج بودر - معلقة صغيرة فانيليا - 2 بيضة - حليب حسب العجن (انا اخد منى نص كوب)- سمسم
الطريقة
اضع فى العجانة الزيت والسكر والبيض والفانيليا واضربهم شوية ثم اضع الملح والبيكنج بودر على الدقيق واضعة على المقدار والعجانة شغالة .انزل شوية شوية حليب لحد ما تلاقى العجينة اتكورت زى الصورة وتركت
اناء الخلاط كدة اصبحت جاهزة .ناخد حتة صغيرة على هيئة كرة ونعملها اصبع حسب الرغبة يعنى ممكن صباع طويل وممكن قصير وممكن تخين وممكن قصير يعنى حسب رغبتك انتى .ارصص الاصابع فى الصينية وادهن الوش بالحليب وارش سمسم حسب الرغبة يعنى ممكن لأ .دخلية فرن متوسط الحرارة مش حياخد وقت وحتلاقى الوش احمر وبقى جميل وبالف هنا وشفا

محسن الدقيق (دون)
بنستخدم محسن الدقيق علشان لو كان نوع الدقيق وحش واحنا منعرفش
....بالنسبة لمحسن الدقيق بتحطى معلقة صغيرة على كيلو الدقيق ......تمام ؟؟
لكن الخميرة بتقل النص طالما استعملنا المحسن ...يعنى لو نفترض حتستعملى كيلو دقيق..+ معلقتين خميرة
لكن لو حتستعملى كيلو دقيق + معلقة صغيرة محسن دقيق يبقى فى الحاله دى حتحطى معلقة واحدة خميرة بدل معلقتين ...
نقول كمان لو انتى طبيعى (حتستعملى الدقيق بدون محسن يبقى تحطى الخميرة بتاعتك كلها ) لكن لو حتستعملى المحسن يبقى تحطى الدقيق + المحسن + نص مقدار الخميرة اللى كان المفروض تحطيها ....يعنى المحسن والخميرة بيكملوا بعض .....
وعلى فكرة المحسن و الخميرة لما بيشتغلوا مع بعض بيدوا نتيجة حلوة
محسن الدقيق نوعان
الاول فى صورة بودرة بيضاء ودة بنستخدمة بنفس الطريقة اللى قلتلك عليها و بيستعمل فقط للمخبوزات زى الكرواسان و العيش و البيتزا و خلافة ............
.لكن محسن الدقيق التانى
بيبقى عامل زى الفازلين و بيستعمل فقط فى الكيك و التورتة و بنضع منه معلقة اكل كبيرة على الكيكة او معلقة اكل كبيرة على الكيكة الاسفنجية ( التورتة )

البصارة (دون)
المقادير
نص كيلو فول مدشوش
3 حزمة بقدونس_ حزمة كسبرة خضراء
1 بصلة كبيرة او بصلتين متوسطين
1 رأس ثوم
ملح، فلفل أسود
كمون، نعناع ناشف
للتقلية :
ثوم، كسبرة ناشفة ، عصير ليمونتين ،زيت
الطريقة
نغسل الخضرة كويس و نخرطها بالسكينة .نسلق الفول والبقدونس والكزبرة مع البصل والثوم مع بعض فى ماء حتى يستوي تماماً ويتهري.وممكن تسوى فى حلة الضغط ( البرستو ) وممكن لو عازت ماء نضيف لها نستنى لما تبرد شوية و نضربها فى الخلاط ونرجعها على النار تانى . نحط لها بقى الملح والفلفل الأسود والكمون والنعناع ونسيبها لحد ماتغلى نكون عملنا التقلية .نضع الزيت على النار حوالى 3 معالق ثم اضع الثوم المهروس
لحد ما يصفر ثم اضع الكزبرة الناعمة الناشفة. بعد ماتجهز خدى منها شوية و حطيها فى البصارة قبل ما تغرفيها فى الاطباق مع تقليبة ثم اضع عصير ليمونة كبيرة او ليمونتين و اطفى النار على طول .بعد مانغرف البصارة فى الاطباق نضع باقى مقدار التقلية على وش الاطباق طبق وبالهناء والشفاء

الفسيخ المصرى (دون)
اى كمية من السمك البورى
ملح خشن
لازم لازم لما تجيبى السمك البورى للتفسيخ ميكنش السمك اتحط فى الثلج قبل كدة و لا اتحط فوقة ثلج والا مش حينفع يتفسخ ولزلك لما تكونى عايزة تعملى فسيخ بتطلبى من يتاع السمك انه يجهزلك سمك ما تحطش فى الثلج يعنى بيبقى من مياة البحر مباشرة وهو بتاع السمك بيجبهولك وبيبقى عارف
الطريقة
تجيبى السمك وتحطية زى ما هو على قفص او فى مصفاة تغطية بشاشة علشان الشمس تدخله وتحطية فى الشمس لمدة يومان كاملين او لحد ما تلاقية ورم واتنفخ تماما وحتلاحظى انه نزل المياة والدم بتوعه تماما
تشيلية و تجيبى الملح الخشن وتبتدى تحشى بيه كويس الخياشيم بتاعة السمك و تجيبى الملح و تمشى بايدك على السمكة من تحت من عند الزيل لفوق عند الراس وتدخلى الملح كويس بين القشور بتاعته تماما
وتشيلى السمك فى صفيحة او شوال وترصصية بجانب بعضة راس وزيل وبعدين ترشى ملح علية كويس وترصصى برضة السمك راس وزيل يعنى خلف خلاف وترشى ملح على وشة كويس وتلفى الشوال كويس قوى قوى و تربطية بحيث ما يدخلوش هواء تماما او تلفية فى قطع قماش كتيرة تماما وتحطية فى اى مكان بعيد عن الهواء لمدة 10 ايام او 12 يوم وبعدها يكون الفسيخ جاهز

الارز بالخلطة ( طبق اساسى فى العزايم) (دون)
3 او 4 اكواب ارز مغسول _مكسرات ( بندق * لوز * عين جمل * زبيب ) _كبد و كلاوى _ زيت _ عسل ( كوب سكر _ كوب ماء _ نص ليمونة)
الطريقة :
1_ طريقة الكبد و الكلاوى :
الكمية زى ما انتى عوزة فية اكياس بتتباع جاهزة هاتى كيس كيلو قطعية قطع متوسطة و اغسليهم ثم ضعى ملعقة سمن فى حلة صغيرة و عليهم بصلة متوسطة مفرومة لحد ما تصفر و بعدين فصين توم و الكبد و الكلاوى و تقلبى تقلبى يعنى بتشوحيهم و تذودى شوية ماء فى شوية ماء لحد ما يستووا وتبلى ملح وفلفل و اركنيهم على جنب.
2_ضعى المكسرات فى صينية صغيرة و حطيهم فى الفرن او فى توستر دقائق لحد ما يحمروا شيليهم و انفخى القشرة بتاعتهم حتلاقيها بتطير على طول واركنيهم على جنب .احضر حلة كبيرة واضع فيها زيت كتير يعنى ممكن 3كوب لحد ما يقدح اروح حطة الارز و اقلب و اقلب لحد ما يبقى لونه ذهبى غامق ثم اصفية بمصفاة من الذيت و اركنة
3_اعمل العسل فى مقلاية
( اضع السكر و الماء و الليمون و اقلب لحد مايبقى لونه ذهبى
4_اضع الارز على النار عادى و علية الماء لحد ما يشربها و اتركة لحين يقرب من السوى
5_ عند قرب السوى اضع علية العسل واقلبه كويس لحد ما يختلط كلة مع بعض مع رشة ماء خفيفة و اتركه لحد مايستوى
6_اضع علية 1/2 مقدار الكبد و الكلاوى و المكسرات ونقلب كله لمدة دقيقة ثم اطفى النار و انزله
عند التقديم / نغرف الارز فى سيرفيس بيضاوى و نضع على الوجة باقى المكسرات و الكبد و الكلاوى و يقدم

شاورما الدجاج (دون)
1 علبة ذبادى_بصلة متوسطة _ طماطماية متوسطة _2 ملعقة خل _1/2 ملعقة سماق _ 1/2 ملعقة كارى _ عصير 1/2 ليمونة _ 2 فص ثوم _ 1/2 ملعقة تابل شاورما . دجاجة كاملة مخلية او صدور دجاج مقطعة شرائح رفيعة
[الطريقة
1] نضرب كلة فى الخلاط بتاع العصير ( الدورق ).
2] نفتح الفرخة من ظهرها بالطول ونضع عليها المقدار المضروب فى الخلاط .
3] ونتركها ساعة ثم نضعها فى صينية على النار و نغطى الصينية بورقة فويل لحد ماتستوى الفرخة
3] نتركها تبرد ثم نخلى الفرخة من العضم و نقطع الفراخ شرائح رفيعة مثل الشاورما و ممكن تقطعيها بأيدك على طول من غير سكينة حتلاقيها سهلة جدا ((مع الاحتفاظ بالسائل الموجود فى الصينية ))
4]نضع شوية زيت فى صينية يعنى حوالى 3 معالق كبيرة . ونفرد فيها الشاورما الى ان تحمر من جهة ثم نقلبها تحمر من الجهة التانية .
5] ارش عليها شوية من السائل اللى سبق و احتفظنا به و اقلبهم علشان تاخد شوية طراوة . وكدة اصبحت جاهزة
طبعا انتى عارفة طريقة تقديمها بتجيبى العيش الشامى و تفصلى الوش عن الضهر او تعملى الرغيف زى ماهو و تدهنية بالمايونيز المخصوص اللى حقولك طريقتة حالا .ثم شرائح خيار مخلل او كام صابع بطاطس محمرة و بالمعلقة نحط الشاورما ونلف الرغيف و تلفية فى ورقة ذبدة و بالهنا و الشفا
طريقة مايونيز الشاورما (دون)
2 فص ثوم _ بعض نقاط عصير ليمون _و بعض نقط خل _نضعهم على المايونيز ونقلبهم بالمعلقة ثم ندهن بيهم الرغيف

بصى يا سيتى لما بتفتحى الدجاجة بتضعى عليها الخليط بعد ما بتضربيه فى الخلاط وبتقلبيها فى الخليط كويس وبتتركيها الساعة فبيكون لحم الدجاجة اخذ طعم الخليط كويس ولما بتضعيها على النار بتقلبيها على الجانبين علشان تستوى من الناحيتين ولما تنتهى من التقليب بتغطيها تانى بالورقة الفويل. بالنسبة للخيار بتاع الشاورما دة بعمله فى وقتها والدجاج على النار بتستوى بكون خللت الخيار فى السريع وحمرت البطاطس وعملت المايونيز يعنى مش بخلله الا فى وقتها وهو عبارة عن 3 خيارات او 4 خيارات بقطعهم صوابع بالطول مثل الصورة وبحطهم فى حلة صغيرة على ادهم او فى الكنكة الكبيرة (الحجم الكبير من كنكة القهوة ) وبضع نص كوب ماء مغلى ونص كوب خل ابيض او كوب ماء مغلى وكوب خل المهم ان المقدار يغطى الخيار وزرة ملح وفص ثوم واحد مهروس بيغلوا على النار لحد ما حتلاقى الخيار لونه اتغير مثل الصورة و طرى شوية تروحى شيلاه من الماء فى طبق لحين الاستخدام .دة الخيار السريع اللى فى وقتها .......(ملحوظة من دون)

بصى يا ستى بالنسبة للفراخ اللى انا عامله بيها الشاورما فى الصورة دى صدور بس كبيرة قوى ولحمها ناشف عامل زى الديك الرومى علشان كدة سلقتهم نص سلق الاول وبعد كدة سحبتهم على هيئة نساير وبعدين حطيتهم مع الخلطة اللى انا ضربتها فى الخلاط وانتى شايفة فى الصورة وانا بنزل الخلطة من الطبق على الفراخ المفصصة وبتكملى السوى عادى زى ما انا كاتبة وبالنسبة للفويل دة انا بغطى بيه الفراخ بس يعنى ممكن تغطيها بغطاء حلة عادى يعنى . ممكن تبيتيها فى الخلطة من قبلها بيوم فى التلاجة وممكن بعد ما تستوى وهى فى المقلاية تروحى مغطياها بورقة فويل وتستخدميها تانى يوم بتسخنيها بس وبالنسبة لشاورما الدجاج بضع لها مايونيز وخيار مخلل وبطاطس محمرة كله على البارد فى العيش وبالنسبة لشاورما اللحمة بعد ما بتستوى وتقرب تحمر بضع عليها طماطم مقطعة صغير وبقدونس مخرط صغير واقلب تقليبتين وبعدين اطفى ثم ادهن العيش سلطة طحينة خفيفة او مايونيز. عارفة علشان حتى لو انتى فى عشاء عامله النوعين يعنى شندوتشات فراخ وسندوتشات شاورما لحمة يبقى فية فرق بينهم فى الطعم ميبقوش هما الاتنين فيهم بقدونس وبصل وطماطم يبقى كل نوع طعمه مميز . بصى لو حتستخدمى صدور كبيرة زى اللى فى الصورة يبقى تعملى زى ما كتبت نص سلقة الاول ولو الصدور العادية الصغيرة يبقى تضعيها على طول مع الخلطة المضروبة فى الخلاط وتكملى الطريقة عادى لانها مابتاخدش وقت خالص فى السوى .......(ملحوظة من دون)

صينية المكرونة بالبشاميل (دون)
كيس مكرونة فرن (ريجينا )_ 2 بيضة مضروبين بالشوكة_ و عليهم رشة ملح و فلفل_ عصاج بالصلصة
3ملعقة كبيرة جبنة رومى مبشورة - بشاميل
اسلق المكرونة فى ماء مغلى مع ملح و ملعقة زيت .اصفيها من ماء السلق و اشطفها كويس بالماء البارد واصفيها فى المصفاة .احضر صينية و ادهنها بشاميل مش سمنة .اضع البيض المضروب على المكرونة و اخلط بايدى كويس ثم اضع بشاميل على المكرونة و الجبنة المبشورة و اقلب اقلب المكرونة لحد بالنظر لما الاقيها كلها فيها بشاميل كويس . اضع نص المكرونة فى الصينية و اسوية كويس ثم اضع العصاج اللى يصلصة و اسويه كويس ثم اضع باقى المكرونه و اسويها ثم اضع بشاميل على الوجة و افردة و اسوية كويس ثم اضع على الوجه بيضة مضروبة ادخلها فرن متوسط الحرارة لحد ما تستوى و وشها حيحمر وممكن برضة لما تطلع من الفرن تغطى الصينية حتلا قيها طريت


اذا فاض عندك مثلا مكرونة عليها صلصة اعمليها صينية تانية طازة
(( صينية المكرونة من البواقى اللى عندك)) (دون)
لو فاض عندك مكرونة بصلصة طماطم
او مكرونة بصلصة الجبنة
او مكرونة بالعصاج
(حقولك تعمليها تانى صينية مكرونة طازة ازاى ؟؟)
المقادير:
المكرونة اللى باقية عندك
بشاميل
3 بيضات
عصاج بصلصة طماطم
ملح وفلفل وزرة جوزة الطيب
بقسماط ناعم
نص معلقة زبدة
الطريقة
نضرب البيض بالشوكة ونضيفة على البشاميل ونقلبهم .نخلط المكرونة بنص مقدار البشاميل .ندهن الصينية بالسمنة ونرشها كويس بالبقسماط .نضع نص مقدار البشاميل المتبقى فى الصينية ونفرده كويس ثم نضع نص كمية المكرونة ثم نضع العصاج ثم باقى كمية المكرونة ثم البشاميل ثم نرش شوية بقسماط ناعم والزبدة السايحة وندخلها فرن متوسط الحرارة لحد ما تحمر

الخيار المخلل (دون)
كيلو خيار رفيع
2 كوب ماء
3 كوب خل
ملح ( حوالى ربع كوب)
نص راس ثوم مهروسة
ممكن شطة
وممكن قرن فلفل حامى
2 عود كرفس ( الورق)
الطريقة
نغسل الخيار ونشق كل واحدة بالطول لحد نصها .نضع الخيار فى برطمان ونصع الثوم المهروس والكرفس والشطة او قرن الفلفل .نضع الماء والخل فى حلة والملح لحد ما يغلوا ثم نضعهم على الخيار فى البرطمان ونرجه رجه و نغطية بالغطاء
ملحوظة: اذا لقيتى ان الماء والخل مش مغطى الخيار يبقى تزودى لحد ما يتغطى برضه ماء وخل بنفس
النسبة اللى فوق .الخيار دة ممكن يتاكل تاتى يوم او تالت يوم لان احنا غالينا الماء

فية طريقة دايما بستعملها علشان
اظبط الملح فى المخلل وهى طريقة البيضة
وهى : بعد ما تضعى الماء والخل فى الحلة
تغسلى بيضة كويس قوى وتروحى حطاها فى الحلة
وبعدين تبتدى تنزلى شوية شوية ملح لحد ما تلاقى البيضة
اتحركت من قاع الحلة وحتطلع لفوق تروحى مبطله وضع ملح
خلاص كدة تبقى كمية الملح اللى اتحطيت مظبوطة

خلطة بانية خليها عندك فى التلاجة (دون)
كيلو دقيق
2 معلقة كبيرة ملح
2 معلقة كبيرة كارى
1 معلقة كبيرة فلفل اسود
1 معلقة كبيرة بهارات
2 معلقة كبيرة بيكنج بودر
الطريقة:
نضع كل المقادير على بعض ونخلطهم كويس علشان كله يتوزع مظبوط .نضع المقدار فى كيس نايلون ونقفله كويس او فى علبة بلاستيك محكمة الغلق ونضعه فى التلاجة لحين الاستخدام
ملحوظة 1 :
بالنسبة لخلطة البانية دى بنستعملها للدجاج وممكن السمك
ملحوظة 2 :
لو حتستخدميها لدجاجة سليمة يبقى تضعى الدجاجة فى حلة فيها يادوب كوب ماء وملح وفلفل وبصلة لحد ما الماء يغلى غلوة ثم نطفى النار ونسيبها تهدى وبعدين نقطعها ونضعها فى الخلطة ثم نحمرها فى الزيت ولو عندك القلاية اقليها فيها بتبقى حلوة قوى

دجاج بطريقة الكولبست (دون)
دجاجة كيلو ونص
طماطماية شرايح
معلقة متوسطة سماق
3معلقة كبيرة زيت
2بصلة شرايح
ملح وفلفل
بهارات
الطريقة
تشق الدجاجة من ضهرها بالطول بالسكينة او تقطع ارباع حسب الرغبة نتبل الدجاجة بالملح والفلفل والبهارات نضع فى صينية معلقتيين زيت ونضع عليهم بصلة شرايح ونشوحها لحد ماتصفر ثم نضع الدجاجة ونفلب لحد ما حتحمر وتنزل مايتها وتستوى فيها وانتى بتقلبيها على الناحيتين لحد ما تستوى وطبعا بنغطيها علشان تستوى اسرع واذا احتاجت ماء نزودلها .نجهز البصلة التانية ونضع عليها ملح وفلفل والسماق وندعكها بيها كويس نحضر مقلاية ونضع فيها معلقة الزيت الباقية ونضع البصلة المدعوكة بالسماق والطماطماية الشرايح ونقلبهم لحد ما يدبلوا ويتشوحوا اوزعهم على الدجاجة او قطع الدجاج وادخلها الفرن تحت الشواية او عادى لحد ما تحمر هى والخلطة اللى عليها وتقدم

بالنسبة لبواقى الكيك طبعا طبعا ممكن تستغلية و ممكن تفننى حسب زوقك وتخترعى من عندك اولا ممكن تعملية اى نوع من انواع الترايفل ولو احنا فى الصيف تبقة استخداماته اكتر بنفرفتهم ونحط عليهم صوص فراولة او شيكولاتة ونحط ايس كريم من نفس النوع او ممكن جيلى وكريم شانتية لكن حاليا
1: اما ترايفل
2: او تفتفتية خالص وتحطى علية اما مربى او كريمة شوكولاته وتعجنيهم فى بعض وتعمليهم كور كبيرة وتدحرجى الكور فى شيكولاته فارمسيل وكدة بقى عامل زى الجاتوة وتضعى كل كرة فى طبق بليسية اوو ممكن تصبى شيكولاتة سايحة على الكور يعنى تبقى مكسية

كمونية الدجاج (دون)
نص كيلو صدور دجاج
نص راس ثوم
2 معلقة صغيرة كمون
معلقة كبيرة سمن
ملح وفلفل
الطريقة
نشيل الجلد والعضم من الدجاج ونقطعة مكعبات .نقطع الثوم حلقات .نشوح الدجاج فى السمنة ثم نضع الثوم ونقلب لحد ما الثوم يصفر نضع الكمون الناعم ونقلب تقليبة ثم نضع كوب ماء ونتركهم لحد ما يغلوا ويستوى الدجاج

قرص طرية (دون)
4 كوب دقيق
زرة ملح
كوب سمنة
قطعة خميرة بيرة(قد اليوسفى الصغير)
لبن رايب او زبادى
الطريقة
نضع الملح على الدقيق .اضع السمنة واخلطهم ببعض .ادوب الخميرة بنص معلقة سكر صغيرة فى ربع كوب ماء دافىء ثم اضعها على الدقيق .ادفى اللبن الرايب او الزبادى ثم اعجن بيهم لحد ما العجينة تتلم وتلاقى ايديكى
بقيت نضيفة مفيهاش عجينة خالص .ابدء اعمل العجينة على هيئة كور قد التفاح الاصفر وكل واحدة اخلصها ارصصها جنب التانية فى الطبق .بعد ما انتهى من عمل العجينة كلها كور ابتدى ابطط بايدى كرة كرة بس بشرط
انى ابتدى من اول كرة انا كنت عملاها وحطاها فى الصينية مش من اخر واحدة خلصتها. ابطط كرة كرة. ممكن تتخنيها وممكن ترققيها زى ماانتى عايزة .تضعيها على صاجة الفرن الاساسية اللى بتبقى فوق النار مش على الرف الحديد ونضعها فى فرن متوسط لحد ماتستوى
ملحوظة :مش بندهن الصاج ولا بندهن وش الفطير .ممكن نحشية بمعلقة مربى من الداخل

فتة بالزبادى (بسييييطة) (دون)
ارز ابيض مستوى
دجاجة مسلوقة
عيش بلدى
شوربة ( مرقة)
صلصة خل وثوم
2 كوب زبادى
الطريقة
نخلى الدجاجة من العظم والجلد ونقطعها نساير او قطع متوسطة او صغيرة .نحمص العيش ونقطعه قطع صغيرة ويوضع فى صينية بايركس او طبق غويط .نصب على العيش الشوربة المغلية لحد ما العيش يتشرب الشوربة ويبقى طرى ثم نضع على العيش طبقة من الارز ونفرده ونسوية كويس ثم نضع طبقة من الدجاج المقطع ونسوية كويس ثم نضع طبقة تانية من الارز ونسوية ثم نرش رشة شوربة لحد ما الارز كله يتبل بالشوربة
نضرب الزبادى بالمعلقة ثم نفرده على وش الارز كويس .نصب صلصة الخل والثوم على وش الطينية على هيئة
خطوط جنب بعض او على هيئة مربعات
ملحوظة :ممكن نضع طبقة اخرى من الدجاج على وش الصلصة وممكن نكتفى بس باللى بالداخل
صلصة الخل والثوم :
اضع على النار 2ملعقة سمن و عليهم نص راس ثوم مفرى لحد ما يصفر بس الثوم .اروح حطة علية 1/2 كوب خل حتى يغلى ثم اضع صلصة طماطم وملح وفلفل و بهارات و قليل من الماء اؤ الشوربة واتركها حتى تتسبك حوالى 10 دقائق

فتة بالزبادى للريجيم (دون)
ارز ابيض مسلوق
دجاجة مسلوقة بدون جلد
عيش بلدى بردة او سن او بر
شوربة ( مرقة)نضعها فى الثلاجة لحد ما تسقع وتتكون الدهون على هيئة طبقة على وش الشوربة نروح شايلين طبقة الدسم بالمعلقة نرميها وكدة تبقى الشوربة جاهزة
صلصة خل وثوم بدل السمنة نضع زيت او سمن نباتى وبدل الصلصة تبقى عصير طماطم فرش
2 كوب زبادى متوسط او خالى الدسم
الطريقة
بنفس الطريقة السابقة

الفشة المشوية (دون)
اغسلى الفشة كويس قوى وتبليها ملح وبهارات ونغزيها من النص كدة تنغيزات بالسكينة .ادهنى صينية بالزيت وضعى الفشة فيها ودخليها الفرن متوسط الحرارة لحد ما تستوى تقريبا حتاخد نص ساعة وبالهنا والشفا

الفشة المقلية (دون)
اغسلى الفشة كويس قوى واسلقيها فى ماء وملح نص سلقة يعنى تقريبا حوالى ربع ساعة .طلعيها وقطعيها قطع مدورة صغيرة .قطعى بصلة كبيرة تقطيع تخين وحمريها فى معلقة كبيرة سمنة ثم ضعى الفشة على البصلة وتبليها ملح وبهارات وقلبيها مع البصلة على نار متوسطة حوالى ربع ساعة كمان وتطفى وممكن تعصرى عليها ليمون

لفائف الزعتر.. (دون نقلا عن منال العالم)
العجينة :
2 ½ كوب دقيق
3 ملاعق كبيرة سكر
1 ملعقة صغيرة ملح
½ملعقة صغيرة بيكنج بودر
1 ملعقة كبيرة خميرة فورية
½ كوب زيت
½ كوب ماء دافئ
½ كوب لبن زبادي
الحشو: زيت زيتون - زعتر بالسمسم
الطريقة:
1-نخلط 2 كوب من الدقيق + الملح + الخميرة + البيكنج بودر + السكر ، ، نتمّ مزج المقادير ثم نضيف اللبن الزبادي + الزيت + الماء الدافئ – نعجن مع إضافة نصف كأس الدقيق المتبقي بالتدريج.
2- نلمّ العجين، ونجعلها ترتاح في طبق مدهون بالزيت و نرشها بزيت ونتركها في مكان دافئ تتخمّر.
3- نبدأ بفردها على شكل مستطيل ونضغط على الأطراف.
4- نضع زيت الزيتون ونوزعه على العجين بالفرشاء ثم نرش الزعتر المخلوط بالسمسم.
5- نلفّ العجين على شكل رولات ونقفل .
6- نقطع العجين بالخيط إلى قطع ونضغط عليها ضغطة خفيفة.
7- نتركها في قوالب الكب كيك لمدة 30 دقيقة.
8- نخبزها في الفرن 190˚ لمدة 12- 15 دقيقة.

الممبار (دون)
المقادير :
كيلو ممبار- 3 بصلات- شبت مقطع صغير – بقدونس مقطع صغير - كزبرة خضراء مقطعة صغير- ملح - فلفل – كمون- 3 طماطم كبيرة- 3كوب ارز- شطة ( لو عوزاة حراق )- 2 ملعقة سمن
اولا :طريقة تنظيف الممبار
- اول حاجة تشيلى الدهن بتاع الممبار و تغسلى الممبار جيدا و على الوش التانى و بعدين حطية امامك فى الحوض و ابتدى اجردى فى الممبار بالسكينة كويس قوى بس اوعى يتقطع منك و بعدين خلى ماء الحنفية ينزل جواة كويس و اغسلية تانى كويس قوى ثم ضعي علية كمية مش قليلة من الملح و الخل و سيبية ساعة ثم اشطفيه لحد ما تلاقى كل المخاط اللى كان فية نزل روحى رشة رشة دقيق كمان وادعكية كويس و بعدين ارجعى اغسلية كويس كدة تبقى مطمنة انه نضف تماما و ابدئى بقى تقطعية بالمقاس اللى انتى عوزاة يعنى صغير او يبقى الصباع طويل.
الحشوة: -
نغسل الارز
نبشر البصل والطماطم و نحطهم على الشبت و البقدونس والكزبرة ونضيف لهم الارز والملح والفلفل والكمون والشطة ونقلبهم جيدا وبعدين نحط السمن بالقمع- نحشي الممبار لثلثه بس بالخلطةو بعدين ندوس على الممبار بايدنا خفيف علشان توزعى الخلطة و عشان ما يبقاش الممبار مكبوس قوى - فى حلة كبيرة نغلى ماء و نضع به ملح و نمسك كل قطعة ممبار و نزلها بالراحة فى الماءالمغلى نلاحظ انها تنكمش و تتقفل من الطرفين و يترك على النار حتى ينضج - يصفي من ماء السلق و يحمر في الزيت و بالهنا والشفا
ملحوظة :كلنا عارفين طبعا ان الممبار دة اللى هو الامعاء الغليظة لكن السجق اللى هو الامعاء الدقيقة

محشى الكرنب (دون)
3 بصلات كبار
حزمة شبت، و 2 حزمة بقدونس
3 معالق كبار و مليانين صلصة طماطم
كيلو رز
كرنبة متوسطة
ملح _ فلفل _ كمون _ 3 معالق سمن كبار _3 معالق زيت
الطريقة:
تغلي ماء على النار و تحطى فية شوية كمون وتطلعى ورق الكرنب من الكرنبة بانك تقطعية من عند الراس بالسكينة وتحطية فى الماء المغلى يا دوب ثوانى و تطلعية فى المصفاة. بعد كدة تقطعية حسب المقاس اللى انتى عايزاة
طريقة عمل الخلطة:
تفرمى البصلةبالسكبنة وتحطى عليها شوية ملح و تفضلى بايدك تدعكيها كويس كانك بتعصريها بين كف ايدك حتلاحظى انها طريت و نزلت شويه سائل وهو المطلوب .بعد تنقية الخضرة طبعا و غسلها كويس تخرطيها بالسكبنة على البصل و تحطى كل التوابل و السمن و الزيت والطماطم و اخيرا تجيبى الرز وتغسلية وتصفية كويس وتحطية على الخلطة و تخلطى كله كله كويس وتحشى ورق الكرنب ورقة ورقة ومش كتير علشان ما ينفش. ضعى فى قعر الحلة قبل وضع المحشى شرائح طماطم تخينة تغطى بيها القعر كلة علشان المحشى اللى تحت ما يتحرقش. اغلى شوربة فى حلة و فيها معلقة زيت علشان المعلقة دى هى اللى بتدى صابع الكرنب لمعة من برة .ضعى الشوربة على الكرنب بحيث يا دوب تكون عند الصف الاولوتحطيةعلى النار و تهزى الحلة و تسبية يادوب يغلى ويشرب الشوربة تروحى موطية النار خالص زى الشمعة لحد ما يستوى بانك تطلعى صباع و تدوقية و ممكن عند التقديم تقلبى الحلة زى ما هيا فى سرفيس فحتلاقى شكل الطبق من فوق مرصص بحلقات الطماطم شكله حلو
ملحوظة اذا كانت الكرنبة صغيرة ممكن تفككيها بالسكينه كويس من فوق و تحطيها زى ما هيا فى الحلة حتلاحظى ان الورقة اللى حتكون جاهزة سابت الكرنبة لوحدها و بعديت عنها دة معناة انها خلصت و هكذا


رد مع اقتباس
Noody30 غير متواجد حالياً  



03-01-1427 هـ, 04:31 مساءً
#153
دجاج بانية بالزبادى (دون)
نص كيلو صدور دجاج
فصين ثوم مهروسين
كوب زبادى
2 بيضة - ملح
دقيق
عصير نص ليمونة
ربع معلقة صغيرة كزبرة ناعمة
ربع معلقة صغيرة كمون ناعم
نص معلقة صغيرة جنزبيل ناعم
بقسماط ناعم
زيت للتحمير
الطريقة
نخلط كله الزبادى والملح والكمون والكزبرة و الثوم وعصير الليمون .نضع صدور الدجاج فى التتبيلة ونخلطها كويس ونسيبها شوية .نضرب البيض بالشوكة .نضع قطع الدجاج فى الدقيق ثم فى البيض ثم فى البقسماط ونحمرها فى الزيت لحد ما تحمر وتبقى دهبى

صينية دجاج بالبطاطس (دون)
دجاجة كيلو ونص
نص كيلو بطاطس مدورة صغيرة
بصلة متوسطة مفرومة
ملح وفلفل
فصين مستكة
فصين حبهان
عود كرفس
جزرة كبيرة
معلقة زبدة
الطريقة
نسلق البطاطس ونقشرها زى ماهى .نقشر الجزرة ونقطعها دوائر ونقطع الكرفس صغير. نشق الفرخة بالطول من الظهر ونفردها كويس .ندعك الدجاجة بالملح والفلفل والبصلة ثم نضعها فى صينية على النار مع السمنة و الجزر والكرفس والمستكة والحبهان لحد ماتتشوح و حتنزل مايتها مع تقلبيها على الناحيتين وممكن تزودى شوية فى شوية ماء وتغطيها لحد ما تقرب تستوى .نضع البطاطس زى ما هى فى الصينية مع الدجاجة وندخلها الفرن لحد ما حتكمل سواها ووشها يحمر وبالهنا والشفا
ملحوظة: البطاطس تفضل سليمة زى ماهى متقطعيهاش وتكون الصغيرة خالص (اللى هى بتاعة التحمير)

لأي وصفة حلويات فيها قاعدة بسكويت بالزبدة (دون)
100 ج زبدة +2 باكو بسكوت مارى المدور الطويل
الطريقة :
سيحى الزبدة فقط كسرى البسكويت و اطحنية وحطى الزبدة السايحة علية واخلطيهم كويس قوى وحيكونوا عاملين زى رمل البحر ابططهم كويس فى صينية مدورة اللى القعر بتاعها بيتشال و بيكون لها قفل من الجنب احطها فى الفريزر 1 ساعة أو فى الديب فريزر 1/2 ساعة
,,,,,,,,,,,,,,,,,,,,,,,,,,,,,, ,,,,,,,,,,,,,,,,,,,,,,,,,,,,,, ,,,,,,,,,,,,,,,,,
2 باكو بسكوت شاى الاربعه و عشرين قطعة _ باكو زبدة 113 جرام
الطريقة
اضربى الذبدة كويس قوى لوحدها بالمضرب حد ماتبقى هشة قوى ضعى عليها البسكوت المطحون لحد ما يندمجوا مع بعض هاتىالصينية اللى بيتشال قعرها وادهنى الاول بنقطة واحدة زيت و اكبسى فيها قوى البسكوت بالذبدة و دخليها الفريزر لمدة ساعة . بالنسبة للبسكوت بعد ماتكسرية وتطحنية لازم لازم لازم تخلطيهم كويس قوى قوى مع الزبدة لما تحسى ان البسكوت كله مبلول ومتشبع وبيبقى فعلا عامل زى رمل البحر تروحى حطاة فى الصينية وكبساة وضغطاة كويس قوى قوى بايدك يعنى من الاخر تخدميه صح وهو بيتعجن مع الزبدة وتخدمية صح وهو بيتبطط وبيضغط فى الصينية وتتفرشية كويس فى الصينية يعنى العملية تعمليها بالراحة وبأتقان وبعدين تحطية فى الفريزر لمدة ساعة كامله .وعلى فكرة ممكن تبطنى الصينية الاول بورقة زبدة او ورقة فويل بس بشرط يكون الورق طالع لبرة علشان لما تخلصى خالص الصينية وتيجى تاكلوها تسحبى الحاجة الحلوة من الصينية من الورق تشديه لفوق تقوم كلها طالعة معاكى مظبوطة

توست بالبسطرمة (دون)
شرائح عيش توست
جبنة شرايح بعدد التوست اللى حتعملية
شرايح بسطرمة برضة بنفس العدد
زبدة
الطريقة
ادهنى شرائح التوست بطبقة كويسة من الزبدة ثم ضعى شريحة جبنة .ادهنى صينية بالزبدة ورصصى فيها التوست ودخليها الفرن لحد ما تسيح الجبنة .تطلعى الصينية من الفرن وتضعى على كل شريحة شريحة بسطرمة ودخلي الصينية تانى الفرن حوالى 3 دقايق بس وطلعيها من الفرن ويتاكل وهو ساخن بيبقى طعمة جميل جدا وخصوصا لما بنحط البسطرمة على الجبنة وهى سايحة بتعطى ريحة وطعم حلوة قوى
ملحوظة ممكن لو عندك عيش فينو بايت (صامولى)تستخدميه بدل التوست

كفتة الكبدة البانية (دون)
ربع كيلو كبدة (بتلو)
بيضة
ربع كيلو بطاطس
بصلة صغيرة سليمة
معلقة كبيرة بصل مبشور
ملح وفلفل
دقيق و بقسماط
زيت وسمنة للتحمير
الطريقة
اسلقى البطاطس وقشريها واهرسيها .اغسلى الكبدة وقطعيها شرائح رفيعة. نضع الكبدة على النار مع الملح والفلفل والبصلة مع شوية ماء قليلين لحد ماتغلى ونسيبها حوالى من5 /10 دقايق نفرم الكبدة مع البصل والبطاطس وملح وفلفل. نعملها كور صغيرة ثم ندحرجها فى الدقيق ثم فى البيض ثم فى البقسماط ونحمرها فى خليط من الزيت والسمن

معلومة مفيدة (دون)
جدول تحويل
للتحويل من أوقية ....الى جرام ......نضرب فى 28
للتحويل من رطل ....الى كيلو جرام ......نضرب فى 45,
للتحويل من معلقة شاى ...الى ملليمتر....نضرب فى 5
للتحويل من ملعقة كبيرة ...الى مللمتر ...نضرب فى 15
للتحويل من فنجان .......الى لتر .......نضرب فى 24,
للتحويل من جالون ......الى لتر .......نضرب فى 3,8
معلقة كبيرة مليانة = 15 جرام
معلقة حلو مليانة (متوسطة)=10 جرام
معلقة شاى صغيرة = 5 جرام
معلقة كبيرة = 25 جرام

الحمام المحشى (دون)
حمام بعدد افراد الاسرة او حسب الرغبة) .
كوب أرز _ أو حسب عدد الحمام
ملعقة صغيرة فلفل أسود
ملعقة صغيرة ملح _ بهارات _ ملعقة كبيرة كمون .
الكبد والقوانص بتاعة الحمام (بعد تقطيعهم لقطع صغيرة)
بصلة كبيرة أو بصلتين متوسطتي الحجم
ورق لورا _ 2 فص حبهان _ 2 فص مستكة _ 2 ملعقة كبيرة سمنة
(سمن و زيت للتحمير )
الطريقة:
- قومي بخلط البصل مع الملح والبهار والكمون والفلفل الأسود - قومي بإضافة الكبد والقوانص المقطعين إلى الخليط -اغسلي الأرز - ضعي الخليط كله على الأرز مع السمنة و اخلطية كويس - أبدأي بحشو الحمام واحدة واحدة من الأسفل ومن عند الرقبة فوق (بشرط انك ما تمليش الحمامة بالحشو لأن الأرز يينفش وبيذيد فى الماء اثناء السلق - اقفلى الحمام المحشي بوضع الرجلين فى الفتحة اللى تحت او خيطية بابرة و فتلة) - ضعي الحمام في ماءمغلى وبصلة صغيرة وأوراق اللورا و ملح و كمون. مع ملاحظة ان تكون الحلة كبيرة عشان لو الحلة صغيرة على الحمام ممكن رجلين الحمام يقطع الحمام اللى جنبه على النار -بعد ما يستوى نص سوا بنشيلة من الشوربة و نشوحة فى حلة تانية فيها ملعقة سمنة و الحبهان و المستكة ثم نصب عليهم الشوربه لحد ما الحمام يستوى -بعد السوى تشيلية بالراحة فى طبق لحد ما يبرد -ثم تحمرية فى مقلاية بها زيت و سمن
بالنسبة للحمام او الفراخ لما تطلعيها من الشوربة فى طبق بتسبيهم لحد ما بينزلوا الشوربة فى الطبق علشان متطرطش لما تتحط فى الزيت او السمنة وممكن تلاقى نار طلعت من المقلاية على ايدك فعلشان كدة الفرخة لازم تفضى اى شوربة تكون دخلت جواها الاول قبل التحمير وثانيا ماتحمريش فى مقلاية ضيقة وثالثا تحمرى ولما الحتة تحمر تقلبى حتة تانية وبالنسبة لانها بتتفتت او بتتقطع فى التحمير دة لانها بتبقى مستوية قوى يعنى العيب من زيادة السوى مش من التحمير وانا فى التحمير بحط زيت وسمنة مع بعض . بالنسبة للحشو اوعى تكبسى الارز خاااااااااااااااااااالص يعنى لما تحشيها تحسى انها لسة عايزة ارز كمان لكن انتى متزوديش خااااااااالص هى حتنفش فى الشوربة وحتملى الحمامة
بصى يا ام الحص خلية يسيب الرقبة والراس ما يقطعهمش ولما تيجى تحشى خدى بالك حتلاقى الرقبة طالعة من داخل الزور وهو عبارة عن قطعه جلد طويلة مظبوط ؟؟؟؟ انتى بالراحة بايدك مش لازم سكينة دخلى ايدك بالراحة جوة الزور وافصلى الرقبة بالراس تمام كدة ؟؟؟كدة حتلاقى امامك الحمامة وطالع من فوق جلدة عريضة طويلة فاضية لاننا شيلنا الرقبة بالراس مظبوط ؟؟؟؟ هو دة اللى حتبقى تفضى منة اى ارز زايد من داخل الحمامة وهو دة اللى امامك فى الصورة حتلاقينى ماسكة الزور بايدى وفرداه
بالنسبة لان الحمام بيطلع طويل دى عملية بسيطة جدا جدا كل الحكاية ان الحمامة لما بتكون مدبوحة بيبقى فيها الرقبة والراس تمام ؟؟؟؟ لما الفرارجى بيجى يقطع الرقبة او لما انتى بتيجوا تقطعوا الرقبة يمكن تكونوا بتقطعوها بالسكينة بالجلد اللى حواليها علشان كدة مابيبقاش فية مجال ان الجلد دة يتنفخ بالارز ويتمدد ويطول لكن المفروض انك تشيلى الرقبة بصوابعك مش بالسكينة من داخل الجلد اللى حواليها وتقطعى الرقبة مع الاحتفااااظ بالجلد اللى حواليها طويل زى ماهو

الدجاج المشوى بالورق الفويل (دون)
دجاجة متوسطة (كيلو ونص)
ملح وفلفل
1 علبة زبادى
معلقة صغيرة سماق
معلقة صغيرة جنزبيل
نص معلقة صغيرة بهارات دجاج
معلقة خل
3 فصوص ثوم مهروسين
بصلة صغيرة مبشورة ناعم
الطريقة
نضع كل التوابل على الزبادى ونخلطهم .بعد غسل الدجاجة نشقها من ضهرها بالطول بالسكينة .نضع التتبيلة على الدجاجة وندعكها بيها كويس وياريت لو تسبيها يعنى مش اقل من نص ساعة علشان تشرب من التتبيلة ويبقى طعمها احلى .نفرد ورقة فويل ونضع الدجاجة ونقفل عليها الورقة ونضعها فى الفرن على الرف حوالى ساعة حتكون استوت .نطلعها ونفتح الورقة من على وشها لحد ما حتحمر

طريقة خبز رررروعة وماتحتاج تخمير بس 10 دقائق (أميرة الشوق نقلا عن الاخت كل الامل)
والخبز يصلح مع المشويات والشورمة ومع الفطور
المقادير
3 دقيق
1 م ك سكر
ملح حسب الرغبة
كوب ماء دافئ
نص م ك خميره
3 ك ملاعق زيت
بيضه
م ص بكنج بودر
3م ك حليب بودرة
الطريقة
نخلط الخميره والسكر والماءوتترك لمدة 10 دقائق ثم نضيف الملح والبيضه ونخفق ثم نضيف الدقيق والبكنج بودرة والحليب المجفف والزيت ونعجن حتى نحصل على عجنة متماسكة .تكور العجين وترق مع رش السطح بقليل من الطحين حسب السمك المرغوب .نسخن مقلاه او صاج كبير وممكن نمسحها بشويه زيت مسحه خفيفه أنا ماحط زيت ونحطها بالصاج ونقلب على الوجهين على نار عالية نقلب بسرعة وحرص حتى لاتحترق
ثم نخفض النار تدرجياً حتى نحصل على خبزة متحمرة تراها ماتحمر كثير بس لون خفيف

الجمبرى البانية (دون)
جمبرى مقشر و نضيف _ 2 بيضة _بقسماط ناعم _ربع كوب حليب _ ملح و فلفل
_ اضربى البيض بالشوكة وضعى علية الحليب و الملح والفلفل . _ ضعى الجمبرى فى البيض و اخلطية كلة مع بعض .شيلى الجمبرى واحدة واحدة و ضعيها فى البقسماط .سخنى الزيت فى مقلاية على النار و حمرى الجمبرى على الوجهين حيبقى لونة زهبى حلو .شيلية على ورق ماص للدهون و بالهنا و الشفا
ملحوظة : ممكن تمسكى الجمبرياية بايدك و تدخلى خلة رفيعة بتاعة الاسنان من فوق لحد نهايتها حتلا قى الجمبرياية كأنها واقفة مفرودة مش مقوسة و تروحى محمراها عادى بالخلة . وعند الاكل تمسكيها من الخلة و تسحبيها فى بقك و بالهنا و الشفا

جمبرى بالصوص (دون)
كيلو جمبرى مقشر
بصلة متوسطة
فلفلة رومى
طماطماية متوسطة
ملح وفلفل
معلقتين زيت
الطريقة
نشوح البصلة فى الزيت لحد ما تصفر .نضع الجمبرى تقليبة مع البصلة. نضع الفلفلة الرومى المقطعه صغير
نضع الطماطماية المقطعة صغير مع التوابل ونقلب كلة ونضع ماء يغطى الجمبرى لحد ما يغلى ونخلى النار متوسطة لحد ما الجمبرى يستوى يغرف بالصوص ويقدم مع الارز بالكركم وبالهنا والشفا

الفروت سلاط (سلطة الفواكة )(دون)
فراولة - موز - تفاح -برتقال بسرة -سكر - كريم شانتية - ايس كريم
الطريقة
اغسلى الفراولة كويس و شيلى العنق الاخضر بتاعها . ازا كانت الوحدات صغيرة خليها زى ما هيا و ازا كانت كبيرة قطعيها نصين او حلقات .رشى عليها سكر كتير و اركنيها على جنب حتلاقيها بتنزل العصير الاحمر بتاعها كتير .قشرى الموز و قطعية شرائح مدورة وحطية على طول مع الفراوله علشان ما يسودش .قشرى البرتقالة و قطعيها مكعبات و حطيها عليهم .براحتك ممكن تقشرى التفاح وممكن لا و تقطعية برضة مكعبات و تحطية معاهم و تقلبى كلة مع بعض .ممكن افتح علبة كومبوت اناناس او كريز او خوخ و اقطعهم برضة قطع و اضيفهم على الفاكهة بتاعتى .اضعهم فى الثلاجة يسقعوا و الفاكهة حتنزل مايتها وحيتجانسوا مع بعض .عند التقديم ازا كانت المناسبة عيد ميلاد مثلا اصبه فى طبق غويط و اجملة بوردات الكريمة و اجمل فى كل وردة كريزة صحيحة وازا كان عادى للضيوف اصبه فى كاسات و اجمل بنفس الطريقة او ممكن اضع معلقة كبيرة كريمة على كل كاس و اقلب و اخلط الكريمة بالفاكهة و بعدين بالمعلقة المخصوص بتاعة الايس كريم اعمل كرة (بولة ) ايس كريم على وش الكاس و ممكن ارش رشة مكسرات مفرومة حسب الرغبة و بالهنا و الشفا
ملحوظة : ازا قطعتى الموز قبل وضعة على الفراولة بفترة اعصرى علية نص ليمونة عشان ما يسودش
ازا اضفتى للمكونات علبة كمبوت ممكن تحطى من العصير اللى فى العلبة على الفاكهة و تقلبى كويس

رقائق العجين الهش سريع الاعداد (هبة عبد العظيم)
ان هذا النوع من العجائن يعتبر احد انواع العجائن الهشه يتميز هذا النوع بالسهوله والسرعه فى الاعداد حيث تحصلين فى النهايه على رقائق من العجين الهش الى حد ما من المهم استخدام زبد مجمد والتقليل من لمس العجين باليد قدر الامكان .فى هذا النوع لايتم فرد الزبد داخل العجين ولكن يخلط مع الدقيق بعد بشره اذا بدا الزبد يطرى سيمتصه الدقيق ويفقد العجين سمه تكون الرقائق به لهذا السبب يكون من المهم الاحتفاظ بالعجين باردا الكميه فى هذه الوصفه تكفى لاعداد فطيرتين
الطريقه
2/1 2 كوب دقيق عادى - 2/1 ملعقه شاى ملح فى سلطانيه كبيره الحجم ابشرى 4/1 كوب زبد مجمد غير مملح فى السلطانيه باستخدام الفتحات الواسعه فى المبشره استخدمى سكينا فى مزج الزبد برفق مع الدقيق مع التاكد من تغطيه جميع قطع الزبد بالدقيق اضيفى 3 ملاعق مائده من الماء البارد وتمزج المقادير حتى تجتمع فى شكل كتل من العجين عندما يتجانس العجين ويتجانس قوامه غطى العجين وضعيه فى التلاجه لمده 30 دقيقه ثم افرديه بالنشابه وفقا للوصفه التى تقومين باعدادها

خضار سوتيه و جنبه ارز بالقرقة و الزبيب و الخضار (نوودي)
اولا الخضار السوتيه:
2 كيس خضار مشكل (نقيت منه شوية بسلة يعني حبة ملو اليد و كان مكعب جزر برضه ملو اليد و حاقول بعدين ليه)
بصلة متوسطة
ملح و فلفل اسود و نص ملعقة صغيرة خلطة ميلرز بنكهة الدجاج (ممكن الاستغناء عن ميلرز لكن بتدي طعم حلو)
زيت ذرة
الطريقة:
في حلة نحط الزيت و بعدين نخرط البصلة رفيع و نصفرها فيه يا دوب تدبل و بعدن نضيف الخضار و نضيفله الفلفل و الميلرز بس بدون الملح، و نخلي النار تحته هادية مع التقليب من وقت للتاني و اذا احتاج مية نضيف شوية بشوية، و متقلبيش كتير عشان الخضار المجمد بيتهري من التقليب، بس لما يحتاج مية عشان ميلزقش في الحلة. و قرب ما يستوي نملحه حسب الرغبة و نطفي عليه و كده يبقى جاهز.
الارز:
انا عملت 1 و نصف كوب ل 3 افراد
1 و نصف كوب ماء
ملو ايديك زبيب
البسلة اللي حشناها على جنب و مكعبات الجزر (المكعبات قطعتها شرايح بالسكينة لاني كنت عاوزة جزر مبشور بس مكنش عندي في البيت فاتصرفت بتقطيعه رفيع جدا)
ربع ملقعة صغيرة قرفة
ملعقة صغيرة ملح
زيت ذرة
نصف ملقعة صغيرة خلطة ميلرز بالدجاج
ذرة فلفل اسود
الطريقة:
في حلة الارز نضع الزيت و عليه البسلة و الجزر على نار هادية و نشوحهم كويس و بعدين نضيف الزبيب و نشوحه شوية و بعدين نضيف الماء و عليه الفلفل و الملح و الميلرز و القرفة و نغطي الحلة و نرفع النار. نغسل الرز و لما المية تغلي نضيف الرز و نسويه بالطريقة العادية.
كنت عاملة جنب الاكلة دي كفتة في الفرن و عند التقديم قدمت الطبق كالتالي:
نصفه الارز بالخضار و النصف التاني الخضار السوتيه و وزعت اصابع الكفتة حول الطبق و على خط التلاقي بين الرز و الخضار و بين كل صابع كفتة و التاني شريحة طماطم و عليها حلقة خيار. كان نفسي يكون فيه جزر عشان احط حلقة جزر كمان عشان الالوان بس المرة الجاية بقى.

البط (دون)
المقادير
عدد 3بصلات كبار
عدد 3 معالق كبيرة ارز
معلقة ملح صغيرة
ملعقة كبيرة كمون
نصف ملعقة صغيرة فلفل
2 ملعقة كبيرة سمن للحشو
سمن و زيت للتحمير
للتشويح _ فصين مستكة _فصين حبهان .
الطريقة:
نضع حلة على النار فيها ماء و بصلة مقطوعة نصين و ملح و كمون لحد ما يغلي
لعمل الحشوة:
نخلط البصل بعد تقطيعه بالسكينة تقطيع كبير والارز والملح و الفلفل والكمون و السمن و الكبدة والقنصة المتقطعة صغير و ندعكهم كويس بايدنا .نحشى البطة من الفتحة اللى تحت بالعرض بالخلطة بس ما املهاش قوى عشان الارز مايطلعش نى .اخيط الفتحة بعد الحشو بخيط و فتلة .نضع البطة في الحلة بعد ما غلي الماء لمدة ساعة او ساعة ونصف .و بتعرفى السوى لما تنغزيها بالسكينة ما تطلعش دم و تلاقى لحمها طرى .حنشوحها زى ما عملنا قبل كدة فى الحمام و نطلعها من الشوربة .و يا اما نحطها فى صينية و ندهن وش البطة بالسمن و ندخلها الفرن او نحمرها فى المقلاية بخليط من الزيت و السمن لحد ما تحمر

طبق دون لمسابقة الاطباق الرئيسية
(( هذه الوصفة أخذتها من شيف فى حفلة لزوجات الدبلوماسيين))
البرنسيس
نص كيلو سمك قطع (جزل)
ربع كيلو سبانخ
كوب ونص كبير كريمة لبانى
مشروم (حوالى عدد 7)
بصله كبيرة مخرطة
فلفلة رومى مقطعة مكعبات
2 حبة طماطم مقطعة مكعبات
3/4 كوب زيت زيتون
لوز مقشر ومحمص
ملح وفلفل اسود ناعم
3/4 كوب ماء
الطريقة
اضع السبانخ فى ماء مغلى لمدة 5 دقائق لحد ما تدبل ثم اشيلها من الماء واضعها فى المصفاة لتتخلص من كل الماء وممكن تضغطى عليها بأيدك- اضع فى مقلاة نص كمية الزيت مع نص كمية البصل المخرط لحد البصل ما يصفر- ثم اضع المشروم مع التقليب لحد ما لونه يتغير بسيط- ثم اضع الفلفل الرومى واقلب لحد ما لونه يزهزه
- ثم اضع الطماطم مع الملح والفلفل لحد ما تبدء تنزل صوص وتدبل نص دبلان- ارصص السمك فى صينية ثم اضع الخلطة اللى اتعملت فوق السمك وافردها كويس ثم اضع الماء على السمك - ادخلها الفرن حوالى نص ساعه لحد ما السمك يستوى ومش شرط ان وشه يحمر- اضع فى مقلاية باقى كمية الزيت مع باقى كمية البصل لحد ما البصل يصفر- اضع السبانخ المصفاة على البصل واقلب لمدة 5 دقائق - ثم اضع كوب الكريمة اللبانى مع التقليب لحد ما الكريمة تحتوى السبانخ ويكون الكريمة اخذت لون صفار او خضار السبانخ يعنى يادوب بس غلوة
- احضر صينية التقديم واضع نص كمية السبانخ - - ثم اضع على السبانخ نص كمية السمك بالخلطة - ثم اضع باقى كمية السبانخ- ثم باقى كمية السمك - ثم اصب الصوص المتخلف من سوى السمك على الصينية كلها- ثم ارش اللوز المحمر وتؤكل ساخنة

*طبق مشويات* (من كتاب العيد)
ربع كيلو لحم ضانى صغير من بيت الكلاوى
نصف كيلو ريش ضانى صغيرة
ربع كيلو كبدة شرايح رفيعة
2 كلاوى ضانى
4 قطع صغيرة من اللية فى حجم البندقة
2 بصلة مفرومة فرما ناعما
2 معلقة كبيرة عصير ليمون
ملح وفلفل

الطريقة
تشق الكلاوى نصفين وتغسل جيدا .نغسل اللحمة والريش ثم ينقع الجميع فى البصل المبشور بعد دعكه بالملح والفلفل وعصير الليمون. يترك الخليط منقوعا لمدة نصف ساعة .يشوى فى الشواية بعد دهنها بالزيت او على الفحم. اول ما تشوفى الدم ابتدى يظهر على سطح اللحمة .نقلب اللحمة على طول على الناحية التانية لحد ما تلاقى برضة الدم ظهر على اللحمة بعدها .تقلبى اللحمة لحد ما تستوى لمدة دقايق .نشيل اللحمة من على الشواية ونرصصها علىطبق مفروش بالبقدونس >

الكرشة بالحمص (كتاب العيد)
* كرشة مسلوقة و مقطعة قطع صغيرة.
* كوب عصير طماطم .
* بصلة متوسطة مفرومة.
* نص كوب حمص (حمص الشام ) مسلوق نص سلق .
* معلقة سمن كبيرة _نص راس ثوم
* مفرومة _ملح _فلفل _ كمون _ كوب و نص من ماء سلق الكرشة
* الطريقة *
نضع السمن فى حلة و نحمر فيها البصلة لما يصفر نضع الثوم و الحمص و نقلب تقليبتين و بعدين نحط عصير الطماطم و على نار متوسطة لحد الطماطم ما تتسبك و دة طبعا بانك حتلاقى لونها اتغير و تقلت .اضع حوالى كوب و نص من الماء اللى سلقت فية الكرشة اللى الحلة و الملح والفلفل و الكمون و نسيبها لحد ما الماء اللى حطناة تغلى .نضع الكرشة المسلوقة المقطعة فى الحلة و نقلب و نسيبها على نار هادية لحد ما تستوى و هى
مش بتاخد كتير يعنى حوالى 20 دقيقة مثلا

كبد وكلاوى بالصوص مع الارز الابيض (كتاب العيد)
المقادير
1* كيلو كبدة ضانى .
* عدد 3 كلاوى.
* عدد 2 قلب .
* 2فلفل اخضر رومى او حامى.
* رأس ثوم مفصصة ومفرومة.
* ملح – فلفل – كمون.
* ربع كوب زيت.
الطريقة
- يقطع الكبد والكلاوي والقلوب إلي شرائح رفيعة او مكعبات
- ثم تغسل بالماء وتصفي في مصفاة كل واحد لوحدة
- ثم يسخن الزيت وتقلب شرائح القلوب والكلاوي كويس لحد ما ينزلوا مايتهم ويشربوها
- وبعدين تضاف شرائح الكبدة إلي القلوب والكلاوي وتقلب جيدا ثم يضاف الثوم و الملح و الفلفل و الكمون والفلفل الأخضرثم يقلب كله مع بعض ويترك علي نار هادئة لحد ما يستووا مع اضافة القليل من الماء كلما احتاجوا ويقدم مع طبق من الارز الابيض
ملحوظة :ازا كنتى عوزاها بالصوص يبقى قبل ما تطفى النار وبعد ما تستوى تسيبى فيها شوية صوص
وازا كنت مش عيزاها بصوص يبقى بعد ما تستوى والماء بتاعها ينشف تقلبيها فى السمنة اللى معاها فى الحلة .

* كبدة الكباب حلة *(كتاب العيد)
المقادير
- 1/2 كيلو كبدة.
- 3 معالق سمنة.
- 1/2 راس ثوم.
- كوب عصير طماطم.
- ملح – فلفل – بهارات.
الطريقة
- بعد مانغسل الكبدة كويس ونجهزها نقطعها مكعبات.
- اقدحى السمنة وحمرى فيها الثوم (بس يكون مقطع حلقات مش مهروس ) لحد ما لونه يصفر
- ضعى مكعبات الكبدة على الثوم وتقلبى وتغطى الحلة وتكون النار هادية لحد ما الكبدة تنشف مايتها
- اضيفى عليها عليها عصير الطماطم و الملح والفلفل والبهارات
- اتركيها على نار هادية لحد ما تتسبك وتبان السمنة .
- - حمرى فيها الكبدة وتقدميها.

* كبدة بالدقة * (كتاب العيد)
المقادير

* ½كيلو كبدة بتلو.
* 1/2 راس ثوم مهروس.
* 3 معالق زيت.
* عصير ليمون.
* معلقة كبيرة بقدونس مفروم.
* ملح وفلفل و كمون.
الطريقة
- تغسل الكبدة كويس بالماء والخل
- وتشطف بالماء وتقطع شرائح رقيقة
- ندهن مقلاية بالزيت ونشوح فيها الكبدة كويس على نار عالية لحد ماتستوى ونشيلها من على النار
- نخلط كل مقادير الدقة اللى عندنا مع بعضالثوم والبقدونس و عصير الليمون والملح والفلفل والكمون ونضعهم على الكبدة اول ما تنزل من على النارونقلبهم كويس لحد ما الدقة تتخلط كويس بالكبدة ونقدمها ساخنة.

العكاوى المسلوقة (كتاب العيد)
* ذيل *
* بصلة مبشورة *
* معلقة كبيرة سمنة *
* معلقة دقيق *
* ملح وفلفل وحبهان *
* عصير طماطم *
الطريقة
- نغسل الذيل كويس جدا وندعكة كويس بالملح وبعدين نشطفه
- وبعدين ندعكه كويس بالدقيق وبعدين نشطفه كويس
- افصلى بقى حلقات او فكرات الذيل عن بعض
- ثم ضعيهم فى ماء مغلىالبصلة وتتبلية بالملح والفلفل والحبهان لحد ما يستوى وبالهنا والشفا

* العكاوى بالصلصة * (كتاب العيد)
* ذيل *
* بصلة مبشورة *
* معلقة كبيرة سمنة *
* معلقة دقيق *
* ملح وفلفل وحبهان *
* عصير طماطم *
الطريقة
- نغسل الذيل كويس جدا وندعكة كويس بالملح وبعدين نشطفه
- وبعدين ندعكه كويس بالدقيق وبعدين نشطفه كويس
- افصلى بقى حلقات او فكرات الذيل عن بعض
ثم ضعيهم فى ماء مغلىالبصلة وتتبلية بالملح والفلفل والحبهان لحد ما يستوى
- نشوح البصلة المبشورة فى السمنة لحد ماتصفر وبعدين نضع عصير الطماطم لحد ما الصلصة تتسبك
وبعدين نضع حلقات العكاوى المسلوقة فى الصلصة ونتركها ونقلبها حوالى من 5 ل 10 دقايق بس ونغرفها

طاجن العكاوى (كتاب العيد)
عكاوى مسلوقة
بصلة مبشورة
صلصة طماطم
الطريقة
نضع الذيل المسلوق فى طاجن-
ونضع علية بصلة مبشورة وملح وفلفل-
- ونضع علية صلصة الطماطم وندخله الفرن لحد ما يحمر.

** مخ بالعجة **(كتاب العيد)
المقادير
- مخ.
- بصلة مفرومة.
- معلقة كبيرة بقدونس مفروم.
- ملح وفلفل.
- سمنة للتحمير.
الطريقة
- يسلق المخ ثم يقطع شرائح (سميكة نوعا).
- نخلط البيض بالبقدونس بالبصل والملح والفلفل ونضربهم كويس قوى بالشوكة
- نغمس شرائح المخ فى خليط العجة ونحمره فى السمنة.


رد مع اقتباس
Noody30 غير متواجد حالياً  



03-01-1427 هـ, 04:35 مساءً
#154
بنات، بكده يكون الملفات ال 8 لدون تم تلخيصهم و في هذا الملخص تجدون جميع الاكلات اللي في الملفات. و ان شاء الله لما يخلص الملف التاسع، لنا عودة


رد مع اقتباس
Noody30 غير متواجد حالياً  



03-01-1427 هـ, 05:33 مساءً
#156
المشاركة الأصلية كتبت بواسطة هالةالقمر


جزاك الله خير يا احلى نودي وجعل كل حرف في ميزان حسناتك


توقيع


رد مع اقتباس
zayyoda غير متواجد حالياً  



04-01-1427 هـ, 01:34 صباحاً
#157
ربنا يبارك لك يا نودى انت ودون ويحقق لكم ما تتمنوه


رد مع اقتباس
ام ابشواى غير متواجد حالياً  



04-01-1427 هـ, 01:53 مساءً
#158
ام ابشواى شكرا وجزاكى الله خيرأ

شكرآ يا احلى نودى وربنا يجعلك فى كل حرف ثواب يارب


توقيع







رد مع اقتباس
don غير متواجد حالياً  



04-01-1427 هـ, 02:41 مساءً
#159
أنا من زمان ما دخلت الموضوع ده

بجد تسلم ايديكى يا نوودى وجعله الله فى ميزان حسناتك

وطبعا الفضل للشيف الكبيرة دون

ربنا يكرمكم يارب

ونفسى الواحد يساعدكم بحاجة لكن ماشاء الله مش محتاجين


رد مع اقتباس
zeireda غير متواجد حالياً  



04-01-1427 هـ, 02:48 مساءً
#160
تسلم ايديك يا نودى على طول كده دايما سابقه بالخير ربنا يضعه لكى امامك فى كل طريق يا اختى الحبيبه
واتمنى نشوف مدام وائل برضه بيننا تانى
نا قصنا كتييييييييييير


توقيع

لاتنكسر .. ماأحد ٍ مثل قلبي خسر .. لاينثوي عزمك وحيـــل الله قوي ..قاااادر يفرجها بعد ضيق وعسر
اللهم لك الحمد كما ينبغى لجلال وجهك وعظيم سلطانك
رد مع اقتباس
هبه عبد العظيم غير متواجد حالياً  



إضافة رد

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة
الانتقال السريع


الساعة الآن 05:24 .