السلام عليكم ورحمة الله وبركاته..
هالأيام شوي فاضية وقلت أنزلكم الوصفات الموجوة عندي..
هذول 3 طرق لأهم أنواع الخبز الموجودة عدنا بالامارات.. طبعا فيه غيرهم وايد وان شاءالله أحطي غيرهم بالمرات الياية..
أولا: خبز الجباب.. ( نفس البان كيك )
المقادير:
3 ونص كوب طحين رقم 1
فنجان ونص حليب بودرة
فنجان ونص سكر
بيضتين
م ك خميرة
م ك بيكينج بودر
رشة زعفران وهيل ( اذا تبنونه مثل البان كيك ضيفوا فانيلا بدل الزعفران )
ذرة ملح
كاسين ماي
الطريقة:
تخلط جميع المقادير وتترك ترتاح نص ساعة.. والعجينة مثل الكيك تقريبا..
نحمر التاوة ونضيف المقدار المطلوب على حسب حجمه ونتركه يتحمر من تحت ونقلبه لما يبدي يطلع مثل الفقاعات وهذا أهم شي.. اذا مافيه فقاعات معناتها العجين ماخمرت..
وهذا شكله ببالنهاية.. طبعا هذا مع الزعفران وممكن شوية كركم حتى يصفر..
وأحلى شي يتاكل مع الجبن والعسل أو القشطة والعسل أو الدبس أو السكر.. يم يم
.
ثانيا: خبز الجباتي.. الغالب يعرفه ويسويه..
المقادير:
كوبين طحين رقم 1
ذرة ملح
ملعقتين زيت
ماي تقريبا كوبين أو على حسب الحاجة
ممكن اضافة ملعقتين حليب بودرة بس أنا ماضيفهم الا نادر
الطريقة:
تخلط المقادير كلها مع بعض واذا احتاجت ماي نزيد.. ونحاول ندخل فيها الهوا حتى تستوي العجينة حلوة والخبز يكون لين وطري.. نترك العجينة تقريبا ربع ساعة ترتاح ونكورهم ونفردهم بطحين.. نحطي نقط من الزيت عالمغلاة ونبدي نحمرهم من الجهتين.. خفيف ولذيذ.. حلو مع الجبن والعسل أو البيض أو الفول أو العدس يمييييييييي
وهذا شكله النهائي..
.
ثالثا: خبز المحلى اللذيذ.. وفي اللي يسميه محلى زايد..
وطبعا فيه عدنا خبز ثاني أسمه محلى وشكله مثل خبز الرقاق بس يكون فيه شكر.. ويطلع لونه بالنهاي أصفر أو بني..
المقادير:
كوب ونص طحين رقم 1
2 م ك حليب بودرة
نص فنجان سكر
بيضة
ذرة ملح
شوية زعفران وهيل
3 كوب ماي
الطريقة:
نحطي كل المقادير في الخلاط وعلى طول نعمل الخبز.. نحطي القليل بالمغلاة ونحاول نواسي كل المساحة وطبعا بتطلع الخبزة على حسب وسع المغلاة.. نفس اللي فوق ممكن ناكله مع الجبن والعسل أو القشطة والعسل يم يم..
وهذا الشكل النهائي له.. ولاحظوا انها رقيقة تقريبا.. بعكس الجباب لازم يكون متين شوي..
وبالعافية عليكم الخبز ..
حياكم الله..
.
ماشاءالله عليك
الله يسعدك على المجهود الطيب
بحاول اطبقة شكلة خطير ^ــ^