بسم الله الرحمن الرحيم
السلام عليكم ورحمة الله وبركاته
اولا : اشكركم على الفعالية الرائعه
جزاكم الله خير
توقعت مواضيع كثيرة من الأخوات
لكن الى الآن لسه المشاركات قليله
احب نستفيد من بعض
جزاكم الله خير
تكلموا اخواتي قبلي عن شكر النعم
جزاهم الله خير
وعن شكر الله على نعمة الإسلام
الحمدلله والشكر لله
فأعظم النعم نعمة الدين : فهذه النعمة العظيمة التي يجب أن نشكر الله عليها غاية الشكر. وإنما يعرف قدرها وعظمتها من نظر في حال العالم وما نزل بهم من أنواع الكفر والشرك والضلال، وما ظهر بين العالم من أنواع الفساد والانحراف وإيثار العاجلة والزهد في الآجلة،............. ابن باز رحمه الله.
لا اعرف من اين ابدأ في موضوعي هذا لكن عندي كم عمل بسيط اعملها في حياتي
واحب ان يستفيد غيري....
الزائد او الفائض عن احتياجنا كثير جدا
فمثلا عند طبخ الغداء او العشاء بعض الأوقات يزيد الطعام حتى لو شئ بسيط حتى لو قطعه ضعيها في كيس ومن ثم في الثلاجه سواء معجنات او ايدامات او غيره
ان كان دجاج نظيف اي غير مأكول منه فضعيه في كيس محكم ثم في الفريزل
لأنه يا اخواتي المال هذا مو مالنا والنعمه ماهي ملكنا
هذا كله مال الله وهذي نعم انعم الله بها علينا فعلينا المحافظه عليها والاستفادة منها
فكما انا وانتي وغيرنا لدينا انواع الأكل الحمدلله فغيرنا ليس لديه شئ ولا حتى ماء
وانما يحفرون بيوت النمل بحثا عن الطعام ... وهذه حقيقه والى اليوم 2012
وبالنسبة للأكل اللي دخلته الثلاجه مااخليه يطول بالكثير يوم او يومين واجمع كل ذلك في كيس نظيف وكل نوع في كيس منفصل
يعني ما اخلطه........؟؟؟
يابنات الله يسعدكم احب انبه على شئ مهم جدا ... يعني مو خلاص الأكل ماراح آكله انا او عائلتي بل راح يأكله واحد فقير فأعجن الدنيا
اخلط الأكل الخبز على الرز على غيره هذا حرااااااااااااااااااام
اتمنى مايكون فيه احد يعمل كذا بدون مبالاة..........
تأكدي انك اذا تبغي تحصلي على الأجر فكوني أمينة واعملي بإخلاص
وإلا ..... فليسوا بحاجه لك او انك تأثمين
لأنهم بشر ويحسون .......وربما هم افضل منا لأنهم مبتلون بالفقر.
من فترة كنت ارسل للمحطة بأكل وبعد فترة رفضوا يشيلوه من زوجي واستغربنا وانا متأكدة من نظافة اكلي وزوجي استغرب الظاهر كان يأتيهم من غيري اكل.....مو نظيف....
المهم بعدها حرصت بزيادة وانا اطلع زائد الأكل
انا لا اريد رياء من قولي هذا ....
كذلك لما اطلع الأكل للعمال اللي يشتغلوا في محطة الوقود او اللي يعملوا في البقالة او الحجات اللي نلاقيهم بالشوارع واللي يبحثوا عن الطعام في سلل القمامة او لما نكون طالعين الى البحر فأعطي كذلك العمال اللي ينظفوا
مثلا لو كان عندي رز زائد فأضعه في علبة بلاستيك كبيرة وعليه ملاعق بلاستيك ان توفرت لدي.. فلا ابخل عليهم
مثل كذا:
اوقات اتعمد اكثر في الطبخ لأنه انا وزوجي اثنين فقط فكوب رز يكفينا ويزيد
فأطبخ ثلاث اكواب او اربعه واضع عليه تونة او دجاج او ادام مفرزلة عندي من قبل طبعا بعد مااسخنها واضع عليها كم ملعقه بلاستيك
واوقات اذا عندي تانج او فمتو فاعمل لهم في قارورة الماء وابردها ثم نتصدق بها
مع كاسات بلاستيك
( وما اكثر البلاستيك وما ارخصه)
اما إذا كان عندنا عزيمة او مناسبة والأكل يفيض بكثرة لأنه عند الضيوف احب الأكل يزيد ولا ينقص (بزيادة معقولة )
المهم لما يغادروا الضيوف فأقسم الرز مثلا بيني وبين جاراتي ان رغبنا...
وان كان كثير بزيادة فأجيب صحن مثل هذا
واضع فيه الرز واللحم ان بقي واغلفه بورق الألمنيوم وارسله للصدقه
وبقية الرز المأكول منه يعني ما ينفع نأكله فأطلعه للقطط
واضع عليه كيس ويطلعه زوجي يضعه بجانب سلة القمامة اللي بالشارع
واذا كان الرز المتسخ كثير فما اطلعه كله من شان لا يوسخ الشارع
فأقسمه نصفين اليوم اطلع نصف وغدا نصف
( تعلمت ذلك من جارتي جزاها الله خير )
وهنا عندي ملاحظة ايضا انه انا اضع الأكل في صحون البروستد واعدل اطرافها لأنها تكون حادة وبتجرح الحيوانات
مثل كذا
وكذلك لما يكون عندي الأكل مفلفل شطة وخاصه الدجاج فأغسله قد ما اقدر ثم اطلعه للقطط...اخاف من الإثم...
الفواكه
اوقات مانوصل عليها من كثر الأكل اللي في الثلاجه
او يمر علينا اوقات نشتريها وننشغل عنها بظروف
وبعد فتره نفتكرها تلاقيها طاااابت بزيادة فما نقدر نأكلها كلها في وقت واحد واوقات يوسوس لك ابليس انه لا تتصدقي فيها بل اتركيها بكرة او بعده طلعيها على الغدا او العشا ومن ثم تنسينها مرة ثانيه
فأنا خلاص اكون عارفه انه بنأكلها او لا...؟ وان رأيتها كثيرة فأخرجيها للصدقه او قطعيها واخرجيها للصدقه او قطعيها وارسلي للجيران.
وكذلك الخضار اوقات تطيب بسرعه او نضطر للسفر ولابد من عدم تركها بالثلاجه وتفسد ونأثم على ذلك
فإذا عندك مجال في الفريزل فقطعيها وفرزليها
وإذا ماتتفرزل اطلعها معي واتصدق بها
كذلك ان عندك فائض حليب او لبن او عصير صار قريب تاريخ انتهاء صلاحيتها
او بعض الأوقات حلا او كيك فتصدقي به وتخيلي كيف فرحتهم وهم ياكلوه هم او اطفالهم
كذلك اوقات لما يكون عندي ضيوف زوجي يجيب كيكات وبسكويتات وبعد ذهابهم ما نحبها انا وزوجي فأجمعها بكيس واعطي عيال الجيران واوقات كثير اطلعها مع الصدقه
والخبز
اكثر شي احسه يزيد عن حاجتنا
فكل يوم ان عندي خبز زائد او معجنات وما تكون فيها شطة
فأضعها في كيس واتركه مفتوح وكل يوم اضيف عليه
ومن ثم لما نخرج المهملات نخرجها معاه ويعلقها زوجي بالصندوق بالشارع ومن ثم يأخذوه اللي يحتاجوه وغالبا اللي عندهم خرفان ليقدموه لهم ...
كذلك ايام البرد
تشوفي العمال في الشوارع بردانين مرررة ونحنا بدفا في السيارة وملابس لاحصر لها في البيوت وطبعا عندنا مافي اهتمام بهذي الفئة لا من جهتنا ولا من الجهات المسؤوله عنهم...!؟
فما يضرنا ان رحت للسوق واخذت عشر او 15 قبعه وقفاز او شراب
ونحنا ماشين في الطريق وزوجي كل شوي يوقف ويعطي واحد
شوفي كيف فرحتهم وكيف يدعوا لك
وحتى يصيروا يعرفوك...
وما اظن تفرق هالخمسين ريال او السبعين ريال ان طلعناها كل سنة مع دخول الشتاء...
حاليا الجو حار جداااااا
فلنحاول من فترة لفترة نطلع عصائر باردة وان كانت رخيصه او تانج وفيمتو او مهلبية
المال......
صحيح ان حفظنا للنعمه يكون بشكر الله عليها
ويكون بالكسب الحلال
وكذلك بالإنفاق
وكذلك بالصدقه منها
الصدقه ثم الصدقه ثم الصدقه
اخواتي والله لشعور رائع ادخلي يدك في المحفظة واخرجي مافيها
ضعي كل مبلغ في منديل واجعليها في يدك وكل ماتلاقي محتاج اعطيه
وادعي في نفسك باللي تبغيه
كل ذا وذاك
يا اخواتي اجعلوا ماتقوموا به خالصا لوجه الله
وبينك وبين نفسك او زوجك وفقط
اخواتي: مع كل الحرص منا
لكن يجي اوقات نرمي اكل كثير بسبب
اعتقد الإهمال فقط وكثر النعم والله اعلم
والله يغفر لنا
اللهم اني أشهدك ان كل ماكتبت لم ارد به الا ان نستفيد انا وأخواتي
الحمدلله
يارب ان وفقت فيما كتبت فمنك ياذو الجلا والإكرام
وان اخطأت فمن الشيطان ومن نفسي
...
اخواتي الغاليات سعدت جدا بردودكم وافكاركم
الله يرضى عنكم ويسعدكم
راح ابدأ بفكرة قالتها لي اخت غاليه وعزيزة ع قلبي: جزاها الله خير
وودي اطبقها مع جارتي لما ترجع من السفر...
(عارفة اغلب الايام افطارنا من بواقى افطار سلفتى ولاننا نتغدى متأخر لو بقى عندى اكل اعطيه لها تحطوا جنب العشا او ياكلوه عيالها قبل يرجع ابوهم لانهم يتأخروا بالعشا والامور عادية مع اننا بفضل ونعمة من الله ولا ينقصنا شئ والحمد لله
وكمان الملابس اغلب ملابس بنتي الكبيرة وهى صغيرة كانت لبنت اختى لان عمها كان يهديها ماركات )
.....
بعض الأخوات كان عندهم سؤال من شان تفريز الرز ...
اتمنى تفيدكم افكار البنات /
*
bnt alsadh
حابه اعطيكي فكره على الرز ايا كان نوع الرز الباقي الي فرزلتيه تقدرين تعملين فيه حشوة مثل حشوة الدجاج تجيبين دجاجه كامله وتحشي بيه الدجاجه وبكذا استفدتي منه حتى لو بقي من الرز كم ملعقه
* سوسوه العسولة
بس قرئت لوحده كاتبه فكره حلوه انه عندها فريزر وتجيب كيس كبير وتجمع فيه كل الاكل اللي يزيد طبعا داخل الفريزر وبعد فتره اسبوعين او شهر تشيل الكيس ويودوه مكان بعيد عن البيوت زي مكب النفايات او اي مكان ممكن يكون فيه حيوانات قطط كلاب وغيره وتكب الكيس هناك وطبعا راح ياكل منه الحيوانات ومايروح على الفاضي.
* احب اللون الأحمر
وازيدك من الشعر بيت حتى الفضلات(بواقي الأكل ) احطها في كيس واحطها في الفريزر اخرجها نهاية الاسبوع للحيونات
لانه ممكن يكون فها رز او اي طعام وحرام ارميه في الزبالة
*
Alsamt
بالنسبة للرز الزايد اذا كان مأكول منه وملموس وما تقدري تقدميه لاحد من جيران او شي
تقدري تحطيه في عتبة الشباك تأكل الطيور منه.
* آ م ت الله
جزاك الله الف خير اختي وجعله في ميزان حسناتك
والله هذه مشكله ان من جد اعاني منها
وماني عارفه كيف اتصرف او ايش الحل
انا عندي اخواني اثنين معاقين واحد عمره 10 والاخر11
يحبو يفتحو العصاير والحليبات اللي بالشكلاته والفراوله وما يشربوها كلها
يعني الكرتون يجلس فقط كم يوم ويا ريت اذا لابيشربوه لا
نصه ينكب على الارض وناهيك عن الكيك والرز والسمك والدجاج وكل شي
والله وكلووووو ينكب في الزباله وما كنت اهتم
بس الحمد لله بعد ما تبت لربي توبه نصوحه والى الان ثابته عليها
الحمد لله
صرت المها بس كللللللللها مع بعض في كيس واحد ما اقدر افرزها في اكياس
لان كل حاجه يكون في منها حبه او حبتين يعني شي قلييييل
افيديني يا اختي جزاك الله خير
لان الموضوع مسببلي ازمه وحنا عيله كبيره(ما شاء الله)
ويا كثر الاكل اللي يفيض وينكب الله يسامحنا
وانا دحين لي كم يوم مرتاحه نفسيا صرت الم كل الاكل بس في كيس واحد
وانتي بكلامك هذا حزنتيني ان هذا اللي اسويه حرااااااااام
طيب ايش اسوي؟؟؟؟
وردت عليها اختنا الغاليه /
* الياسمين 68
انا مثلك اجمع الاكل النظيف واعطيه لعمال النظافة
واللى معفوس اعطيه للى يربوا غنم او طيور
الخبز اجففه واطحنه بقسماط
وعادة اشترى كميات قليلة من الخضار والفاكهة
واطبخ على القد واذا رميت بواقى او قشرالخضار بالزبالة اكرمكم الله يكون بكيس لحاله وبنية انه ياكل منه اى حيوان شفت واحدة مالاخوات تقول كده.
الاخت امة الله بواقى العصير ممكن تثلجيه بعد متحطيها بكاس وداخله عصاالشيش طاووق او مصاصة وياخدوها مثلجة او تعملى كوكتيل ويشربوه بكاس او اضافة لسلطة الفواكهه والحليب استخدميه لاى طبخه او حلا وممكن تشليه بالفريزر وتستخدميه وقت الحاجة بس انتبهى لتاريخ الصلاحية.
* البراءة
وحابه اضيف تقدرين تحطين على الشباك صحن فيه عدس او رز وصحن ثاني فيه مويه للحمام والعصافير.
* وسن3
حتى القهوه والشاهي ممكن تعطي الترامس للعمال
اللي قريب منكم في المحلات واذا خلصو يرجعوها لك
وتحطي معها بسكوت أو فطائر أو حلا ...
وبعد اذا انتي على الكورنيش خذي معك صحون بلاستيك
وكأسات توزعي فيها على العمال الباعه المتجولين
تعطيهم ماء أو شاهي مع بسكوت وكيك وقهوه مع حلا
وممكن اللي يبقى من العشاء ويكون نظيف تقدميه لهم
وهذا اللي الحين اسويه لان أول كانت شقتي تحتها محلات وكنت اعطي العمال كل مغرب شاهي قهوه
وحلا وكيك ...وباقي الاكل حق العزايم مثل الذبايح
يكلمهم زوجي يجون ياخذونه ويقسمونه في اكياس
ولا شي يبقى ....
وبعد اذا كان جمعتنا بر البيت أخذ معي حافظات وعلب
واشيل الاكل الباقي واذا جيت البيت سخنته ورتبته
وحطيته في صحون وارسلته لهم ....
والحمد لله الواحد ينبسط اذا قدم شي لو بسيط للغير
الله يقبل منا ...
بس الحين نقلت بيت ثاني ولا احصل عمال اعطيهم
الا اذا طلعت الكورنيش ...
والحمد لله حتى البزران أخذ اللي عندي حلاو شبس كيك
عصير واللي يمر علي أو يلعب مع أولادي أقول عطوه معكم
والحمد لله حتى الاولاد يتعودون على الصدقه ....
memo90
* مواسم الأمل
وكمان لاتنسو بقايا الخبز جففوها واعطوها اي واحد عنده غنم او ابل ماشيه او جففوها واطحنوها وعطوها للعصافير بالشباك او الحوش او البسكوت او الارز.
* أم بسام
بالنسبة لي اجمع الباقي من الخبز والارز واحطه باكياس وافرزنه كل اسبوعين اجمعه في كيس كبير واحط اذا عندي بسكويت زايد اوتمر ما ابغاه اوكيك اجمعها كلها واوديها لاصحاب الغنم وانا خارجة اتمشى وعرفتلي وحدة صرت كل فترة اوديلها ولما اتاخر عليها تقولي ليه اتأخرتي علي وتفرح فيها كثير
واحيانا اضع لها اغراض للاكل في كيس لوحده
اما اغراض المطبخ الزايدة احيانا الوحدة تشتري كميات كثيرة وماتستهلكها كلها مثل المكرونة والمعلبات ورز ودقيق و غيرها اعطيها الشغالة اذا كانت ايجار
والافضل البحث عن فقراء متعففين والتصدق عليهم.
* شذا الجنان
جزاكِ الله خيراً ، موضوعك جداً مهم ، عني أنا أفعل مثلك إلا أني الأكل الزائد لا أضعه
في الفريزر بل اخرجه فوراً في نفس اليوم على حسب الكمية فلو كانت كثيرة اقسمها في
أكثر من صحن ولو كانت قليلة اضعها في صحن ثم أغلف كل صحن ويوزعه زوجي على العمال
في الشارع .. ولو كان الأكل قليل جداً فأضع الرز في صحن بلاستيك أو كيس صغير وأضع
الدجاج أو اللحم في صحن آخر أو كيس ثم يخرجه زوجي عند الزبالة وصحن الأرز يبعده
قليلاً في أرض قريبة للبيت ليكون للطيور .. ومن وقت لآخر اتفحّص الثلاجة فلو كان فيها شيء يكاد
ينتهي أجله ونحن لن نستخدمه فأخرجه واجمع الأغراض في كيس واعطيها زوجي يعطيه
العمال ، والعزائم الكبيرة اشتري قبل العزيمة الصحون المعدنية مثل الصورة التي وضعتِ وأوزع
فيها السلطات والمقبلات لوحدها والأرز واللحم مع بعض واوزع على الجيران والأقارب أو
نعطيه العمال ونحفظ لنا منه في الفريزر لغداء اليوم الثاني ..
فكرة حلوة لأختنا/
* فننوونة
من ناحيه ان يكوون الاكل نضييف احنا دايم نهتم بالهنقطه صرنا نحط لكل واحد بصحن عشان ما ينحاس الباقي..
* انثى راااقيه
انا نفس طريقتك بالخبز وبرضو زائد المعجنات والكيكات والبسكوتات اجيب كرتون واجمع فيه لحد ما احس انه كثير
يمكن اقعد اربع او خمس اسابيع
ثم اعطيه واحد من جماعتنا عنده مزراعه فيها ارانب ودجاج وغنم وحمام
واما الاكل الحمد لله ماعمره زاد كثييير
الحمد لله والشكر على هالنعمه
* غيمه..
من تجربة مايتم العمل إلا بمعاونة الرجل...
أعرف كثيرات يتحسرن على باقي الاطعمه و خصوصا بعد العزايم و تتقطع قلوبهن لفعل الخير و يتحمسن لمثل اللي تسوين لكن للاسف ما يلقن اللي يعينهن لامن زوج و لا ابن و لا أخ .. و النتيجة يفسد و يرمى - ما عدا البعض ممن لديهن حوش أو سطح تضعه للطيور خصوصا الرز -
و عزاهن ان ربي يعلم نياتهن و يكتب أجرهن ღ
وفكرة حلوة عند اختنا/
* ضووءء
وبرضه عن نفسي دايم او كل يوم يزيد الاكل فبحطه في الثلاجة ما القى احد يوديه للعمال اصلا يكون قليل لاني اسوي على قدنا
فيوم الخميس اكون صايمة وزوجي يتغدى عند اهله فاسخنه للفطور ويصير بوفيه صغير على قدي والباقي احطه بكيس واعلقه عند الزبالة بره الشارع لانه صعب ارميه جوة الزبالة.
...
shahr
انااجمع الاكل الزائد في كيس في الفريزر ولما اروح البحر ارميه للسمك الاقي السمك يتجمع وحتى الطيور تلتقطه من البحر
كمان حتى لو كنت مسافرة بالطيارة اخذه معي وكاني بالسيارة
كمان لما نروح مطعم نطلب من النادل يحط لنا اوعية نضع بها الزائد وناكله تاني يوم.
واختي الغاليه/
ماشاء الله جارتي حتى لو صحن يبقى من الاكل يبقى تقول أرسليه لي
اذا ماعجبها هي وبناتها الناس اذواق بتحط عليه ماء وبصحن وتحطه للحمام فوق السطوح
وماشاء الله برغم ظروفهم ودخلهم جداً محدود وهم اسرة كبيرة الا للقوة الا بالله تشوفين السعادة والطمأنينة بحياتها
لكن من حرصها على النعم حتى لما مجتمع مع الجيران كل اسبوع او اكثر هي بتقول الا كل الزائد أنا باخذه للحمام
اذا كان نظيف تسخنه وتاكله هي وعائلتها.
اخواتي الا هنا لم ينتهي الموضوع
فماشاء الله فيكم الخير والبركه وننتظر افكاركم في الاستفادة من الفائض من النعمه
.......