السلام عليكم ورحمه الله وبركاته
كيف يكون دولابك منظم لشهور طويله ؟سؤال تساله الكثيرات وتشتكى من الدولاب الهم الكبير اللي كل مايترتب سرعان ما يتلخبط في وقت وجيز الموضوع ده لقيت كتير بيسالوا عليه وكتير بعتولى علي الخاص يسالونى ازاى بحافظ علي ترتيب دولابي ومعقول مش بزهق من كتر ترتيبه
والحقيقه انى مش بتعب في ترتيبه خالص ولا برتبه اصلا اه والله دنا حتى ساعات بزهق منه فبلخبطه وارجع اغير ترتيبه ماهو مش عايز يتنكش ههههههه
المهم ان دولابك بيعبر عنك وللاسف بيوت كتير منظمه ونضيفه والدولاب كارثه وانا شفت ستات كتير نضاف اوى ودولابهم فضيحه وطبعا مينفعش ابدا لانه بيعبر عن شخصيتك مش علشان مقفول يبقي نهمله
وساعات تحصل ظروف ويبقي شكلك وحش جدا ساعاتها انا والله حصلي موقف شعرت فيه بالفخر من اهتمامى بالدولاب مره زارتنى قريبه لزوجى بيعجبها شقتى ونظامى فيها وكانت بتجهز وجايه تسالنى عن حاجت هى ومامتها وقالتلى عايزه اشوف دولابك علشان اعرف ارص دولابي فتحت الدولاب انبهروا من تنظيمه وقالولي كانه دولاب عروسه انا فرحت اوى ساعتها تخيلي لو كان مبهدل كان شكلي هيبقي ايه وللعلم انا كان بقالي اكتر من سنتين ودلوقتى قربت من 7 سنين بسم الله ماشاء الله وعمره ما اتبهدل منى
اهم حاجه تعرفي ترتبيه ازاى وده هيساعدك كتير في الحفاظ عليه
يشتكى البعض من الدولاب لايكفي الملابس
الزوج والاطفال بيبهدلوا الترتيب
مفيش مكان لملابس الاطفال
ودى تقريبا الاسباب اللى بتخلى الدولاب يتبهدل بسرعه
اولا....................................
افرزى الملابس جيدا كل الملابس اللى مش بتستخدميها حتى لو جديده تماما ومثلا مش منسباكى او مش مريحه ليكى لاتترددى واجمعيها وطلعيها للصدقه غيرك اولى بيها ومحتاجها وربنا هيعوضك باحسن منها
وطبعا كتير بيستخسروا ويقولوا بكره هلبسها لما اخس
لما لما وفي الاخر بتتركن وزحمه علي الفاضي
يلا قومى لمى كل الزايد وطلعيه بسرعه
خلصتى ...........
الدولاب بيجى ترتيب رفوفه غالبا مش مناسب كبير علي الفاضي ممكن تغيري علي حسب احتياجاتك يعنى معظم هدومك بتتعلق يبقي نزود الشماعات او العكس نزود الرفوف او نستخدم مقسمات وانا نزلت ده في مواضيعي والرابط اهو
http://forum.hawaaworld.com/showthread.php?t=3421199
خلاص رتبتى الرفوف وزودتيها وفي الرابط خصصت درفه كامله لملابس بناتى وبرضوا الدولاب كفي ومرتب جدا
بالنسبه للبطاطين والمفارش والالحفه انا فرشت مشمع تحت السرير ورصيتها وكل فتره بنضفها وارجعها تانى
اما المفرش الخفيفه واللى بستخدمها كتير حطيتها في التسريحه لان منظرها في الدولاب مش مريح وبلاش تحطى حاجه فوق الدولاب برضه شكلها مش هيبقي حلو
هنيجى لترتيب الهدوم في الدولا واهم خطوه لما تيجى ترتبي الهدوم قسميهم صح الخطوه دى هتساعدك بنسبه 95 % ان الدولاب يفضل مرتب
بمعنى مثلا ملابس زوجك هتطبقي البلوفرات مع بعض البناطيل مع بعض البلوفرات الداخليه سوا القمصان والبناطيل الكلاسيك والبدل هتتعلق الجينزات مع بعض البرمودا مع بعض لبس الرياضه مع بعض التيشرتات مع بعض والترنجات سوا والملابس الداخليه ممكن تلفيها رول او في الادراج او الكراتين والمقسمات تحطيها شوفي الصوره كدا وركزى هتلاقي كل صنف لوحده وده اهم حاجه بحيث لما جوزك يحتاج حاجه بمجرد النظر يشوفها وشوفي الكراتين تحت فيها الملابس الداخليه لفيتها رولات علشان بتتلخبط بسرعه
اما بالنسبه ليكى التقسيم هيختلف بس الفكره واحده مثلا هتخلى الترنجات سوا والعبايات البيتى والبجامات الصيفي مع بعض وتحطى الشورت او البنطلون جوا التيشرت سوا اما لبس الخروج انا عندى معظمه عبايات علشان النقاب تنيتها نصين وعلقتها علي الشماعات واللانجيري جبت شماعات اطفال وعلقته عليه وفي انواع ملهاش حاجه اعلقها منها لفيتها رول في الكراتين هبقي اكتب الرابط
اما الملايات والفوط خليت ليها رف واحد وحطيت الملايه جواها اكياسها وخليت اللى بستخدمه فقط والباقي شيلته
اما الدرفه الاخيره خليتها لبناتى وفساتين البنات مكنتش حلوه لما بطبقها عملتلها شماعه وبقي شكلها جميل وبرضوا قسمت نفست التقسيم
وتانى سر التخصص كل صف فيه نوع واحد وركزى في الصور من فضلك علشان تفهمى قصدى
طبعا متخليش اولادك يجيبوا حاجه من الدولاب اتعبي انتى وجيبي لغايه لمايكبروا
جوزك عرفيه تقسيم ملابسه هتلاقيه بمنتهى السهوله بيعرف يجيب اللى هو عايزه ومتنسيش تحطى كل بنطلون داخل التيشرت بتاعه
الشرابات حطيها في كرتون او مقسمات
ملابسك الداخليه نفس الشئ لانها هتشوه منظر الدولاب
لو جوزك برضوا لسه بينكش قومى انتى وجهزى ملابسه مش هتاخد منك ثوانى وهتاخدى ثواب
انا والله حفظت مكان الملابس وانا قاعده بقيت اقوله الصف التانى علي اليمين مثلا تالت قطعه ههههههههه خلاص حفظت كل الاماكن وهو كمان حفظ