كيف أتصرف مع زوج يحطم شخصيتي

.


ببدأ قصتي بجملة إن الطيب في الغالب يعتقده البعض ضعيف وأهبل
أنا كذا طيبه وعارفة إن الكل يستغلني ماديا ومع كذا ( كنت ) مرتاحة و أعطي أكثر واللي بيدي مو لي أحيانا أتضايق بس ما أقدر أقول لا للي يطلبني طالما كان معي .. راتبي رغم إنه يتجاوز 12 الف ولكن ما أحس إني مستفيده منه لأني أشتري لذا وأعطي ذا و أدفع لذا ..
المهم مشت الأيام وتزوجت المرة الأولى وكتب الله إني أنفصل عن زوجي بعد 6 أيام وبعد ماسحب مني حوالي 60 الف في هالفترة القصيرة .. وممكن يستغلني أكثر لو طالت المدة :)
ولحد الحين ما أدري ليه تطلقت أو ليه حصل هالشئ ( على فكرة تزوجت وأنا عمري 33 و كنت مستعدة أتمسك بذا الزوج علشان الهرب من العنوسة )

كتب الله وتزوجت للمرة الثانية وهو زواجي الحالي اللي مستمر 4 سنوات
زوجي رتبته عالية و متعلم و وسيم ( أكثر جمال مني ) .. وعنده مشكلة بالإنجاب .. وكان متزوج قبلي و منفصل عن زوجته ( يعني الحال من بعضه )
تزوجته بعد أنفصالي بحوالي 9 شهور وكنت حاطة في بالي إن زواجي ذا ماراح يفشل ( خايفة من كلام الناس ) ..
من أول أسبوع أكتشفت خيانته لي ومكالماته وعلاقاته ومن ضمنهم مكالمات مع طليقته .. ( تصدقون ما زعلت ولا عصبت ولا كسرت الدنيا على راسه :) )
سألته بهدووووووووووووووء وبروووووووووود سخيف إذا كان له علاقات .. قال : لا أبدا ... و سويت إني صدقته ( رغم إني شفت كل شئ بعيني وقريت الرسائل والاتصالات ) و خليت المركب يمشي علشان الناس تقول مبسوطة مع زوجها وما تطلقت ..

مرت الأيام وهو يكذب و أنا عارفه إنه يكذب ومطنشه وأقول في نفسي طالما الأمر مكالمات ونزوة بتعدي و بيعقل و بأعيش مبسوطه و خليت الحكمة شعاري :)
كنت في نفسي دوم أقول وش حادك وليه تستحملين الإهانه و ليه تسمحين له يدوس كرامتك ويخونك وإنتي كنتي معززة مكرمة عند أهلك و لك شخصيتك وكرامتك ( لكن كله كلام مع نفسي وما أطلع منه شئ )

واجهته مرة وفتحت جواله وجبته قدامه وقلت له شوف رسايل طليقتك والبنات وعلاقتك معهم .. و طبعا ثار ورفع صوته وعصب ( هذا سلاحه معي العصبية والهيجان وأنا أسكت والتزم الهدوووء )
عصب وقلب الموضوع ليه أتجسس عليه وأفتح جواله .. وكانت ذي أول مشكله بيينا في الشهر الثاني من الزواج
ماخلى كلمة سخيفه وجارحه ماقالها لي وإنه متفضل بزواجه مني و أحمدي ربك و إنتي و إنتي ..........الخ

تصدقون عديتها له ههههههههههههههههههه ومن هنا بدأت اللامبالاه منه و اكتشف إني خايفه من الطلاق للمرة الثانية وبدى يدووس على كل ذرة كرامه عندي
وأنا معترضة داخليا على تصرفاته .. لكن ما أقدر أطلع اللي بقلبي وأصرخ فيه وأوقفه عند حده

== == للتوضيح ترى تعامله معي طيب جدا و لكن نقطة خلافنا علاقاته و خيانته و إذا أنفتح هالموضوع أو أكتشفت خيانه بدأ ينقلب لوحش جارح و كلامه ما يقوله الد الأعداء == ==
ودائما يردد أهم شئ ما أنام مع غيرك و أنا بالنسبة لي هالشئ تسلية

مرت الأيام وبدى يستوطي حيطتي على قولة المصارية و بكل بساطة يقول أنا كذا وبكلم بنات وحر ولو أجيبهم البيت مو شغلك وإذا عاجبك أو روحي لأهلك

مرات أنفعل ومرات أسكت ومرات يعتذر ( صارت سماجه مو حياة زوجية )

وأنتقل لمرحلة إنه حبني مع العشرة وصار يراعي خاطري " نوعا ما " .. بس هالحب أنقلب تملك وصار يشك بكل تصرف وإني على علاقات وكل مادق جوالي فز وكل ماجت رسالة قال منو
ولا فيه خروج من البيت إلا للعمل ولو أتأخر دقيقة مصيبة ( طبعا اروح مع سواقي الخاص ) ومية يمين اني ما اتكلم مع السواق
حتى لما أروح لأهلي يطلب إني أتصل عليه أول ما أوصل عندهم علشان يحسب الوقت
تغيرت حياتي و نشاطي في عملي و ضحيت بأشياء كثيرة علشانه .. تقريبا سخرت نفسي له ورضيت انه يتحكم بشخصيتي
حتى أهلي أروح لهم كل أسبوعين أو ثلاثه مرة وحده .. لا أروح لقرايب ولا صديقات و لا سوق ولا مكان
السوق معه و على استعجال و تعصيب منه وبدون مايدفع شئ


نجي للنقطة الأهم ( راتبي ) أكيد جاء في بالكم هالسؤال :)
لا يمكن يشوف معي مبلغ و يغض الطرف عنه .. لازم يستغله بشئ من باب ( أنا أولى من غيري ) وقالها كثير أنتي تعطين الكل وأنا أولى مع إن ماعليه قاصر

أنتقلنا من التملك للسيطرة والتحكم حتى بشؤون البيت الداخلية .. لا تكلمين في البيت أحد يخص العمل / لا تلبسين كذا / لا تغسلين الهدوم اليوم / لا تغسلين الحوش / لا تسوين بالأثاث كذا / حتى دورات المياه وأنتم بكرامة يقول أغسلي الأرضية وخلي الجدار مو علشان شئ بس يبي يتحكم الخ

مرة يجيب معي الشغالة وإذا صارت بالبيت قال ما أبغى شغالة في بيتي ..


يعني ما يبي لي كلمة أو تصرف بشئ يموت إذا تصرفت بشئ من نفسي .. وزاد الطين بله يكرر ويعيد ويزيد ( بيتي و فرشته بفلوسي وأنا حر ) وعلى هالموال ليل نهار وقال هالكلمة في شهر أكثر من الف مرة

طبعا لازال مستمر بالعلاقات والمكالمات لكن حريص على إخفاءها عني ومسوي قدامي المستقيم :)

نفسيتي تغيرت و لبسي صار مهمل و أبسط الاحتياجات تكون ناقصتني وأضطر أنتظر أيام لين يفضى وأروح أخذها وأحيانا يقول ماله داعي خاصة ملابس الدوام
أهلي ابتعدت عنهم وصرت أمر عليهم بإستعجال لأنه يزعجني بالتلفون وينك تعالي بسرعه
مرة طفح الكيل عندي وأخذت أغراضي ورحت لأهلي .. وبعدها بخمس أيام أتصل وكان في قمة التعب وقال إنه بينجن لو مارجعت له و إنه تعبان و و و .... وفعلا رجعت له على طول وشفت حالته كان باين التعب عليه
لدرجة اعتذر بشكل ما كنت أتخيله من واحد في كبرياءه و شوفة نفسه ..
اعرف يحبني .. لكن يحب الخيانه والعلاقات ويعتبر هالشئ يخليه بطل و يشيل من داخله عقدة عدم الانجاب
وقالها لي أكثر من مرة هالعلاقات تحسسه إنه مرغوب
أنا إنسانه عاطفية جدا والكلمة الحلوة تجيب راسي بسرعه .. وفوق كذا عندي قلب يرحم حتى اليهود الظاهر :)
إذا قررت أزعل أو أعصب أفكر فيه و أحن عليه بسرعه وأرجع
وقفت معه بمواقف كثثثثثثثثثثثثثثثثثيرة و قفة رجال وما أقولها افتخار او تفضل مني ... ومع كذا عمري ماسمعت منه شكر أو رد جميل
بالعكس دوم يقول مالك فضل و لا استفدت منك بشئ ويحاول يطلع هو المتفضل ( مع العلم من يوم تزوجته للحين ماعمره صرف على حاجاتي الشخصية وحتى أشياء البيت أنا أشتريها أحيانا )

بمعنى أوضح لا عيال يجبروني أصبر / ولا مال مغطيني فيه / ولا سفر ولا هدايا / ولا تعامل حسن / و يبي يعزلني عن كل الناس باستثناء أهلي وأهله

حياة روتينية ومملة .. من الصبح لييين الليل نوم دوام تلفزيون ( كلها مباريات وسياسه ) وبعدها نوم
أحس بأنفجر و بأطق من الملل و ياكثر مايعلق على جلستي على النت ولازم يمر يشوف وش أكتب و وش أطالع

==== اليوم حصلت مشكله إنه أحد قرايبي توفى وكنت بأروح أعزي مع أهلي قلت له ورفض وقال كيفي وأنا حر وما أبغاك تروحين ====
لأول مرة أحس إني اقول كفاية وما بستحمل أكثر وكأن هالموقف الشعرة اللي قصمت ظهر البعير

وشلت أغراضي وطلعت من البيت مع نية صادقة إني ما أضعف أو أرجع لين يتغير الحال :sm4:

بطله صح ؟

على فكرة أنا في الواقع وفي العمل شخصية قوية جدا والكل يعمل لي الف حساب لكن داخل بيتي أحس من كثر أبتعادي عن المشاكل ورغبتي بحياة هادية صرت الغي شخصيتي وكرامتي وأتنازل شوي شوي

حاليا أنا صح بقراري الطلعة من البيت ؟
وكيف أقدر أصحح وضعي و أرجع قوية ولي مكانتي

ما أبغاه يحبني ويلغي كرامتي وشخصيتي .. ابغى منه فقط حياة طبيعية بدون قيود أو شك أو خيانة




( صديقتي كتبت قصتي قبل بيوزرها بس كانت مختصرتها جدا وحبيت أكتبها كامله وأعرف رايكم .. وربي سجلت بالمنتدى لأني أثق في كلامكم وأعتبره حل بالنسبة لي رغم إني كتبة مشكلتي بمنتدى ثاني لكن رأي بنات حواء يهمني جدا )