من زمان كان ودي اشارك بأطباق . لكنني ما ابي اكتب طبخه من غير ما اصورها و هذا اللي كان مأخرني عن طرح طبخاتي
لكن كثر ما كنت استفيد منكم قلت بلا كسل يا بنت و فيديهم مثل ما اهما فادوج
فحبيت ابدأ بطبقين مميزين الكل يسألني عنهم
و إنشاء الله الباقي بالطريق
و سامحونا على وضوح الصور لأنها مصورة من موبايل
ترا جد والله شكل و الوان الطبختين وااايد احلى من الصور .. الألوان هني تضيق الخلق شوي :)
راح اكتب اليوم طريقة شوربة الربيان و الربيان بصلصة التشيلي
شوربة الربيان
" سريعة و ما تاخذ وقت "
المقادير :
- ملعقة كبيرة زبدة
-بصلة مفرومة
- حبة فلفل حار" تشيلي " مفرومة بعد نزع البذور"إذا تحبون الحرارة المعتدلة استخدموا الفلفل الأخضر اللي شويه كبيير ، و إذا تحبونها حارة أكثر استخدموا الفلفل الأخضر الهندي الصغير . و إذا ما تبونها حارة كلش استخدموا الفلفل البارد "
- كرفس انجليزي مقطع قطع صغيرة " و إذا مو متوفر ممكن استبدالة بالكرفس العادي هم حلو . و هم إذا مو متوفر استبدلوه بكزبر ..و هم إذا ما عندج سويها بدونهم .. أنا جربتها بالاربع أنواع و كله طيب بس مع الكرفس الأنجليزي أطيب "
- فص ثوم مدقوق
- رشة فلفل أحمر حلو" بابريكا " و رشة فلفل أحمر حار " تقريبا ربع ملعقة صغيرة بس هم يرجع للذوق " .
- 3 ملاعق كبيرة طحين
- لتر ماء مذوب فية مكعب ماجي دجاج "إذا عندج صلصة السمك أو المحار ضيفي نصف ملعقة صغيرة للماي مو أكثر "
- ملح و فلفل أسود
- ربع كيلو ربيان مقشر و منظف
- عدد 2 ورق غار
الطريقة
1- ذوبي الزبدة على حرارة منخفضة علشان ما تحترق . و ضيفي لها البصل و خلطي لما يلين . بعدين ضيفي الثوم
2- ضيفي الفلفل الأحمر الحلو و الحار و خلطي زين " كل شغلنا على نار هاااديه "
3- ضيفي الفلفل التشيلي و خلطي
و بعدين ضيفي الكرفس
4- حطي الحين الطحين و خليه ينخلط مع الزبدة عدل . بعدين صبي الماي اللي مذوب فيه الماجي . و خلطي بخلاط الايد لما يذوب الطحين عدل . بعدين حطي و رقتين غار ...
5-قطعي الربيان قطع معتدله " سنتمتر تقريبا " و ضيفيه للشوربة و ضيفي الملح و الفلفل و خلي الشوربة تطبخ ليما تثقل
و قدميها
و بالعافيه ...
و طبقنا الثاني المميز هو
الربيان بالصلصة التشيلي
المقادير :
- نص كيلو أو اكثر ربيان
- 2 ملعقة كبيرة زيت + 2 ملعقة كبيرة زبدة
- كوب بصل مقطع شرائح
- 1 كريما كي دي دي أو كوب من أي نوع من الكريما
- 1 ملعقة كبيرة ثوم مدقوق
- 2 ملعقة كبيرة طحين
- 2 ملعقة كبيرة عصير ليمون " او أقل حسب الرغبة "
- ربع ملعقة صغيرة كركم
- 2 فلفل حار "تشيلي " .. أنا استخدم حبه من التشيلي الهندي الحار و حبه من الكبير اللي أقل حرارة .. و انتوا و حسب رغبتكم أو استبدلوه بالفلفل البارد .
- نص كوب حليب جوز الهند " ترا يعطيه نكهة حلو .. يعني لو حابين تقللونه كيفكم بس نصيحة لا تستغنون عنه "
الطريقة :
1- نغسل الربيان ثم نصفيه من الماء و نرشة شوية فلفل اسود و ملح و ليمون و اتركيه ربع ساعة .
2- نغمر قطع الربيان بالطحين .. و ننفضها منه حتى لا تتكون عليه طبقة سميكة
3- نسخن الزيت و الزبدة في مقلاة على حرارة معتدلة . بعدين نقلي قطع الربيان فيها من الجهتين ليما تستوي عدل .
و شيلي الربيان من النار لما يحمر و يصير لونه ذهبي و حطيهم بمصفاة
بعدين حطيهم بفرن دافي بدون ما تغطينهم علشان يظلون مقرمشين .. أو اذا تحبين صخنيهم قبل التقديم بالمايكرويف
4- بنفس الزيت أقلي البصل لما يلين بعدين ضيفي الثوم .. و بعد ما تطلع ريحته ضيفي التشيلي
5- نضيف عصير الليميون و نصيحة لا تضيفون الكمية كلها .. بس شويه و قبل التقديم ذوقوا الطعم و إذا احتاج ليمون أكثر زيدوه .
6- ضيفوا حليب جوز الهند و خلطوا زين
7- ضيفوا الكريما ثم الملح و شوية فلفل أسود
8- اضيفوا الكركم .. و اتركوا الخليط على نار متوسطة الحرارة لما ينخفض مستوى الصلصة و تثقل .
و اهني لما بدا يطبخ و يثقل
9- صفي الربيان بصحن التقديم
10 - صبي الخليط فوق او وسط الربيان و قدمية على طول ..
لذييييييييييييذ
اتمنى انكم تجربونه و يعجبكم