السلام عليكم ورحمة الله وبركاته
كيفكم حبيباتي
كل عام وانتم بخير
اولا شغله حابه اعتذر عن انشغالي وقله مواضيعي وردودي
مشغولة مره صراحه
وان شاء الله اقدر اعوضكم بهذا الموضوع وافيدكم
طبعا اي اشئله واستفسارات انا حاضره بس اعذروني اذا اتاخرت عليكم
حاعطيكم بعض الافكار والنصايح والخبرات لمكياج نظيف وانيق ومرتب
بسم الله
1)مكياج اقل = جمال اكثر.
لاتتوقعي كل ماكثرتي مكياج والوان انك حتصيري اجمل او ملفته اكثر لان كل ماقللتي مكياج كل ماابرزتي جمالك
2)الاساس لمكياج متقن ومدموج بطريقه مرتبه هوا الفرش اختاري افضل الانواع حتي لو غاليه مع المحافظه والاهتمام راح تعيش عندك وتوفري مبلغ اكثر من انك تشتري كل شهر فرشه رخيصه ومو بس الغالي جيد في ماركات سعرها معقول وجودتها عاليه مثل ماركه سيجما بس هذي لازم تطلبيها من النت وفي تاجرات اكيد يوفروها.
3)ابتعدي تماما عن اي اساس او كونسيلر افتح من لونك الطبيعي حتي لو بدرجه لان النتيجه راح تكون ماساويه .
4)اذا عندك عيب معين في وجهك لاتستخدمي في هذي المنطقه الوان صارخه تلفت النظر للعيب اكثر يعني اذا الاسنان مو بيضا او فيها مشكله مو متساويه مثلا استخدمي دايما البيجيات والبنكيات الهاديه بعدي عن الاحمر والفوشي والاورنج والالوان الصارخه لانها تلفت النظر للعيب اللي ممكن مايكون ملحوظ لو مثلا كنتي مو ناتفه منطقه الشنب بعدي عن الالوان لانها تلفت النظر للمنطقه .
5)اذا كانت بشرتك دهنيه ابتعدي عن البلاشر الكريمي واستخدمي اساس خالي من الزيوت مخصص للبشره الدهنيه.
6)اذا كان عندك عيوب في البشره من مسامات او حبوب او تصبغات بعدي عن اللمعات على الوجه والاضاءات اكتفي ببلاشر مات يعني مطفي لانه مايظهر العيوب مثل الاضاءه والشيمر.
7)في بودرات معينه عند ماركات زي ماك عندهم بلوت باودر هذي مخصصه لامتصاص الزيوت وطفي لمعه الوجه اللي يكون سببها زياده افراز الدهون عالانف خاصه وفي كمان بيس ينحط قبل الاساس من ميك اب فوريفر اسمه اول مات.
8)الاهم من انه يكون مكياجك معقد ورسمات وسحبات والوان انه يكون نظيف وبشرتك صحيه ومتجانسه يعني مهما كنتي حاطه الوان حلوه على عينك محد حيلاحظ اذا كان في تناثر شدو تحت العين او تلطيخ مسكره فوق العين اذا ماعندك وقت ترتبي مكياجك اكتفي بشدو بسيط وكحل وماسكرا ووفري الوقت انك تنظفي وترتبي مكياج بعد الانتهاء.
9)لازم تراعي انتهاء صلاحيه الادوات الكريميه بشكل خااااص خاصه الاساس والكونسيلر والماسكرا ممكن اول ماتفتحي الاساس تحطي لصقه صغيره تحتها تكتبي تاريخ الاستخدام عشان تعرفي انه مر عليها سنه وتبدليها والماسكرا كمان خطر استخدامها بعد مرور السته اشهر .
10)فرش المكياج لازم تنغسل مزبوط بعد كل فترة خاصه اذا كنتي حاطتها على تسريحتك تغسليها حتي لو مااستخدمتيها يكفي الغبار خاصه الفرش اللي تستخدميها للاساس لان الامور الكريميه تلقط غبره وجراثيم اسرع من الباودر وكل الفرش عموما لازم تنغسل كل فترة لانها ممكن تسبب حبوب او حساسيه للعين
11)حاعطيكم طريقه غسولي الشخصي اللي اغسل فرشي فيه واغلبها من ماك وسيجما والطريقه اخدتها من منتدى كويتيات العضوة سباركل وموجوده في اليوتيوب بس الاجنبيات عندهم اغراض مو عندنا الطريقه هي(اخلط ملعقه شامبو اطفال مع ملعقه بلسم للتنعيم مع ملعقتين انتي بكتيريا للتعقيم في نص كاسه ماء واحط شويه في صحن فاضي صغير وادخل الفرشه واحركها الى ان يختفي اللون تماما وتصير الفرشه نظيفه بعدين اشطفها واعصرها وامدها على منشفه نظيفه الين تنشف ) انتبهوا ترفعوها قبل ماتنشف لان المويه تنزل داخل الشعر وتفك الغرا .
12)حاولي تتعلي طريقه تحديد الوجه لانها تعطي جمال للمكياج موجود مواضيع وصور ومقاطع في اليوتيوب مره كثير واسمها كونتورينغ وهايلايتينغ وهذي تساعدك انط ترمسي وجهك تنحفي محل ماتحبي وتبرزي محل ماتحبي وباختصار انك تحطي لون برنزي مطفي تحت عظمه خدك تعطي امتلاء حلو للخدود وفوق تفاحه الخد تحطي اضاءه تعطيكي نضاره وتغمي على جوانب الانف وتفتحي طرفه تعطيكي مظهر انف واقف وحاد وتغمقي جوانب الجبين وتفتحي وسطه تعطيكي مظهر انحف للوجه الحركه مره حلوه بس لازم تتقنيها لان بشع شكلها لو سويتي البرونزي خط واضح وحدد ومادمجتيه كويس وتعطي شكل مبقع
13)حاولي تتجنبي اي خط محدد في مكياجك يعني لو بتدمجي لونين لاتخلي بينهم خط فاصل لا ادمجي بينهم بالفرشه الي ان تحسي انه انخلطو واندمجوا ومو باين الفاصل بينهم لانه هذا الفن لو سويتي سموكي اسود مثلا ادمجي نهايه اللون بالفرشه الين مايتموه عشان مايبان قوس كانو بقلم مرسوم شكلها مو حلو حتى في تحديد الوجه والانف لاتخلي الاطراف خط واضح خليه يندمج مع بشره وجهك.
هذي الامور اللي قدرت افكر فيها حاليا واي اسئله انا حاضره
اي منتج تحتاجينه وعندك استفسارات تخصه ؟ او محتارة وش تشترين من مستحضرات التجميل او مشاكل معينه ان شاء الله اساعدك