كل سنة وانتم طيبين ياحبايبي انا بعد لما نزلت الممبار اخت من المنتدي طلبت الحلويات والفشة
في مصر المحلات اللي بتبيع الممبار جاهز (المسمط) لازم يكون معاه فشة (الرئة )وحلويات ( البنكرياس ولحم البطن )تعالو ا نشوفها علشان لوجربنا الممبار نعمل وجبة (مسمط) كاملة
بسم الله الرحمن الرحيم
حنجيب الفشة مقطعةكبير ونحط معاها الحلويات اولحم البطن اولحمة راسونحطهم في حلة ومعاهم مية قليلة بحيث يستووا منهم فيهم ونخرط بصلة علشان تشيل الزفرة
نوطي النار وننتظر السوا هي بتاخد وقت بس نتابع المية لونشفت نذود شوية لحد لما تستوي وده شكلها
نقطعها ترنشات ونركنها
نجيب لحم مفروم ونتبلها بمية بصل مبشور وملح وفلفل ونعجنها ونعملها كور
ونكون طبعا عاملين ممبار ونبدا نقلي كله الكفتة والممبار والفشة وفي زيت ويكون مع الزيت قطعة لية (دهن الغنم )
اهم حاجة ان اللي يتقلي انقله في مصفاة لان الفشة بتشرب زيت وبعد المصفاة احطه علي ورق نشاف وبعدين علي البقدونس بس فيه محلات بيبيعوه في رغيف عيش اول لما يطلع من القلاية علشان العيش يبوش وده بيبقي اسمه (رغيف سمين )
بعد لما نخلص قلي نجيب بصل مقطع جوانح ونقليه في نفس الزيت بس يصفر فقط ونرشه علي وش الطبق المشكل ده
احنا ممكن نعمل الممبار ونسلقه ونحطه في التلاجة علشان مايبقاش مجهود بس في الاخر بتكلي طبق لذيذ وطعم جديد ويستاهل التجربة والصورة تحكم
وبالف صحة وعافية علي قلوبكم يللا مستنية الردود والدعوة الحلوة اللي عودتوني عليها
وفي الاخر بتاكلو طبق لذيذ وطعم جديد يستاهل التعب