هذا سلمكم الله اليوم الصبح نزلت عجلا ابروح مع الوالد نفتح رقم حساب لعيون حافز >> خابرين الشروط اللي مدري وش تبي
وهاليوم ابشركم آخر يوم لي بصيام القضاء
والوالد صايم الست .. بقى له كم يوم
مالكم بالطويله ..
رحنا انا واختي والوالد (الشايب الصايم ) آه لو يدرون بس
تعرفون عاد سواقة الشيبان للسيارات ماغير تناقز مع الحفر بالطريق
مشينا من البيت الساعة ثمان ونص .. وعلى مالفينا المدينة كلها المكان الواحد نروح له مرتين ثلاث .. خبركم الشيبان مايعرفون واجد بسواقة المدن .. حنا الوالد له كم سنه بالقرية .. وهالحين لما رجع للمدينه كلش تغير عليه .. راح يبي فرع بنك الراجحي وانا اقوله يبه اي بنك هم ماحددوا نبي المتيسر اللي مابه وجع راس ومراجعات وزحام وانتظار ..
قال : مالك يابنيتي الا الراجحي >>> مافي امل يتراجع
والله صدعت روسنا مع الشمس الحاره .. وكل شوي يخاصم على سواقة الناس (إنت ماتشوف )! (وراك واقف تحررررك ) !! (أمش ياولد ) !!
وهو مايشوف زين بعينه موية زرقاء وعلى هذا مايهتم بنفسه ولايلبس نظارة
والله ياوخياتي حسيت ان المسألة بتطول وقام يشتغل القولون عندي والكتمة لازمتني
رفعت الاوراق على شباك السيارة منشان الشمس حرقتني
وشوي يناظر على طريقة عيادة اسنان .. قام نزل اختي تبي تشد التقويم .. وانا عيوني تسذا :32:
قال : ماياخذ دقايق .. انا جلست بالسيارة .. شوي الا وهم جو .. مالقوا الدكتور .. ماخلص اجازتة!
أنا قلت بنفسي : والله من الحظ النايم
المشكله موب راضي يسأل الناس عن موقع البنك
راح وقف بالسياره قال : انا خابرة هنا .. يمكن نقلوه !
وشوله ينقلونه !! :angry2: مالهم حتى سنه!
قلت يبه كلش تغير موب على خبرك !
وانا احس بيغمى علي من الشمس والارهاق
المشكله البارح ماتسحرت ولاادري ان ورانا هالمهزلة !
قلت ابتصل على وحده من صحباتي كود تدلني على موقع هالبنك .. ناظرت بالجوال .. اتصل على مين كل الربع مثلي عاطلات يعني نيام ..!
وقف الوالد عند الصراف يبي يسأل وشوي جاب العلم
مشينا.. قربع قربع .. يدعس بنزين منشان يلحق الاشارة .. وشوي يفرررمل سيارة قدامه .. وحنا تسذا :eek:
تشهدت ثم قلت سيد الاستغفار .. وتذكرت اني لابسه سروال طويل يستر العورة .. لاصار شي ولاشي :o
اناظر الساعة صارت عشر .. شوي الا وصلنا عند هالبنك البعييييد .. وننزل معنا الاوراق (حطها الوالد بكيس ابيض كرتونه حق السندوتشات :22: )
لقيت اللي جالسين ع المكتب ناظرت فيني عطتني ابتسامة صفراء :30:
قلت لها : لوسمحتي ابي رقم حساب .. قالت اخذي هالورقه عبيها .. ثم سألتني عندكم صندوق بريدي .. عرفت ان الموضوع معقد حبتين ..
ثم قلت لأختي اتصلي ع الوالد يعطينا الرمز البريدي .. والله ياااهي مهزلة مالها نهاااية
دقت عليه على مااعبي أنا الورقة
قال دقي بعد شوي ابدور عليها .. واعبي البيانات : الاسم كامل .. والحاله الاجتماعيه .. والمستوى التعليمي (اللي ماجنينا وراه الا التعب والمذلة ) .. ورقم الجوال والتلفون .. والحي .. ونوعية السكن <ملك _عائلي_ أجار ...>
دقينا على الوالد هاه لقيت الرمز البريدي ثم يملينا من سبع ارقام .. كل شوي يقول من اليسار لليمين .. وانا اناظر ساعتي اعرف بها اليسار :42:
ثم وصى علي الوالد قال : وبالمره يابنيتي خليهم يطلعون لك بطاقة صراف
واعبي الورقه اعطيها .. قالت : بكره تعالوا معكم الورقة قبل الساعة تسع .. ترى ماتجي تسع الاعشر الا والطابور عند الباب قبل مانفتح !!
يالطييييييييف .. ليه ماعطتنا الورقه نعبيها بالبيت ثم نرجعها دام المرمطة فينا فينا
مليناها لخبطه وكل شوي نكتب معلومه ثم نشخط عليها
وبعدين وشوله هالزحام !!
اسمعها تنادي بالارقام والكراسي مليانه حريم
قلت لها : طيب ابي اطلع بطاقة صراف ..
قالت مو من عندنا !! :o >واضح تبي تصرفني
لو مو من عندهم اجل من ويييييييين ؟؟؟؟؟
والله اعطيها ظهري ونطلع من عندهم رايحين ع السيارة
الاشوي مالقينا الوالد .. يالله حنا ناقصين !! وين بيروح يعني ..
نتصل عليه .. قال هاه خلصتوا : لاوالله يقولون حنا جايين متأخرين ( عشره صباح ومتأخرين :eek: ) !
قال : ليه ؟
قلت : ابي اقولك التفاصيل بالسياره بس انت وينك ؟ قال : انا بالبنك (القسم الرجالي) بآجيكم هالحين
والله عطيته العلم .. قال : انا يابنياتي ابي اعرف ليه امور هالحريم متعقده وين مانروح مايمشون الامور مثل عندنا حنا الرياجيل والله اني نازل لكم من البنك مافيه احد غير انا واثنين من الموظفين يبون يخدمونا بعيونهم
قلت : يبه هالحريم طول عمرهم مُستعبدين من الرجال ماهم متعودين يتولون الامور ويكونون قادة
وهالحين يبون يمارسون العنهجيه من باب انهم ماهم مصدقين الوضع اللي هم فيه!
قال : ورانا باتسر جيه لهنا .. يالله المعونه
قلت : انا من هالحين ناوية أفطر باتسر منشان اجي مصحصحه ورايقة وبآخذ معي عصير باااارد امزمز عليه
وانت يبه .. تكفى نبي نجي بدري كفايه مشاوير
قال : يابنيتي نمشي من البيت ثمان ونص :eek:
والله على ماوصلنا البيت اشغل المكيف وانزل العباة وانفض فراشي واتمدد جثه هامده !!
ثم اقوم اناظر البيانات اللي كتبناها بالبنك .. الا يبيلها تعديل .. السكن : المفروض اكتب عائلي مو ملك ..
والرمز البريدي ابوي عطانيه غلط لما كنا بالبنك
أعدل هالبيانات .. وانا اكلم وحده من البنات واسالها منشان اتاكد
وهالحين شايلة هم موقع حافز .. من امس وهو عطلان الايقونات عندي ماتستجيب كنها عطلانه قالوا لي البنات تصفحي من قوقل كروم وانا والله حملته .. ثم فتحت قوقل ..قلت خلاص اكيد انه تحمل معناته بيفتح لي من كروم .. والله لافتح ولاشي نفس الموقع الخايس حقهم !!
ولهالحين بعد كل هالتعب ماحققت حاجتين :
1/ بطاقة الصراف البنك مو راضين يطلعونها لي مره وحده مع الحساب .. والايبان كيف آخذه من عندهم وشو هو اصلآ .؟
2/ موقع حافز العطلان وانا محملة كروم !!
((هذه جزء من يومياتي مع حافز النكد .. وباتسر اذا ربي كتب لي عمر وعافية اكمل لكم .. والله ماوصلت الا وقلبي به نواغز تعورني .. باتسر يمكن يجي خبري والله يستر ))
غيداء السعيد @ghydaaa_alsaayd
محررة ماسية
يلزم عليك تسجيل الدخول أولًا لكتابة تعليق.
يوووووو الله يعين ع المرمطه وليتها بالاخير تجي
تدرين اني مسويه لي قائمه بالطلبات يعني لو ماجت بتسمعون خبر انتحاري
وانا الحمدلله عندي حساب بس تقفل يعني يمكن شغلتي اهووووون
تدرين اني مسويه لي قائمه بالطلبات يعني لو ماجت بتسمعون خبر انتحاري
وانا الحمدلله عندي حساب بس تقفل يعني يمكن شغلتي اهووووون
هلا اختي
انا رحت لبنك الراجحي والله لايوريك جيناهم الساعه 9 وهم يفتحون الساعه 9 ونص المهم من دخلنا كان قدامي حريم والله عطت اربع حريم او خمس عطتهم ورق قالت عبوها قلت لها انا ابي ورقه قالت خلاص اليوم نكتفي بالمجموعه هذي """"اي مجموعه يرحم والديك وانتي معطيه خمس حريم قالت تعالي بكرة قلت هين واقول لزوجي ويفتح لي حساب عند بنك البلاد بس لسا مادخلته بالموقع وان شاء الله انه يفتح معي والله يعينك انتي على بكرة
انا رحت لبنك الراجحي والله لايوريك جيناهم الساعه 9 وهم يفتحون الساعه 9 ونص المهم من دخلنا كان قدامي حريم والله عطت اربع حريم او خمس عطتهم ورق قالت عبوها قلت لها انا ابي ورقه قالت خلاص اليوم نكتفي بالمجموعه هذي """"اي مجموعه يرحم والديك وانتي معطيه خمس حريم قالت تعالي بكرة قلت هين واقول لزوجي ويفتح لي حساب عند بنك البلاد بس لسا مادخلته بالموقع وان شاء الله انه يفتح معي والله يعينك انتي على بكرة
الصفحة الأخيرة
الله يسعدك ويوفقك