أندريفنا

أندريفنا @andryfna

محررة برونزية

بنتي..وفتحة سقف الحلق..مشوار الألم والأمل..بالصور

الأمومة والطفل

قبل سنة من كتابة هذا الموضوع رزقني ربي ببنت بعد ثمانية أشهر من الحمل..
سبحان الله كنت رايحة بلجرشي أحضر زواج أختي..يا دوب دخلت أسلم على أهلي وأبارك لأختي وعلى طول رحت مستشفى الولادة هناك بسبب كثرة المويات النازلة بدون ألم..جلست عندهم لحد ما ربي رزقني ببنتي..
بعد ما خفت آلام الولادة سألت نفسي..يا ربي أرضعها طبيعي والا أرضعها بالرضاعة..لا أحسن طبيعي..لا بلاش وجع قلب كفاية أخوانها خلينا على الرضاعة أحسن..
شوي إلا والممرضة جاية عندي:
معليش ماما..بس..بيبي أنتي ما في رضاعة..عشان كذا لازم مغذية..
أنا قمت من فراشي على طول..قلت لها:
لا تعطونها مغذيات لحد ما أجرب أرضعها بنفسي..
ويوم دخلت الحضانة وضميتها لصدري كانت صغيرة مرة..وما استجابت للرضاعة..ولا لصدري..حجزنت كثير..قلت يمكن هي زعلانة لأني زعلت يوم حملت فيها..وقلت لها:
سامحيني أنا أحبك..وبابا يحبك..واخوانك كلهم ينتظرونك..وجلست أعددهم لها واحد واحد..ولكنها رفضت ترضع..
رجعت لفراشي حزينة وأنا أعاني آلام الولادة..كنت في نفسي أقول..يمكن لأنها انولدت بدري..يمكن لأني زعلت يوم حملت فيها عشان كذا ربي غاضب علي..وراح ياخذها مني..
مرت الليلة الأولى من حياتها وكانت من أطول الليالي اللي مرت علي..
اليوم الثاني نزلت عندها وهي على حالها..ما رضعت..ولا بكت..ولا تحركت..بالرغم من أن كل شي في شكلها كان طبيعي ونبضها سليم..
في ظهر ذاك اليوم اتصلت دكتورة الأطفال على رقم الغرفة اللي انا فيها وقالت تعالي أبغاك..
قلت أنا يمكن بنتي تحتضر..ونزلت وانا أذكر ربي وأحمده وقلبي يتقطع عليها..
يوم نزلت كانت الدكتورة تبتسم وفرحانة..قالت:
أخيرا عرفنا ليش بنتك مو قادرة ترضع..
شوفي..وشالت بنتي وفتحت فمها وقالت..عندها فتحة في سقف الحلق عشان كذا ما تقدر ترضع..
تصدقون يا بنات أني فرحت فرح ما يعلم به إلا الله..يعني بنتي مو زعلانة مني..بنتي بإذن الله راح تعيش..
قالت:لازم تجرون لها عملية..وإلى ذلك الحين اشتروا لها الحلمات المخصصة لحالتها عشان تقدر ترضع..
سألتها إذا كانت الحلمات عندهم فقالت أنها غير متوفرة بالمدينة كلها..
وطوال فترة وجودي في المستشفى كانت الممرضة تضغط الحلمة العادية على لثتها السفلية عشان تعصر الحليب ويدخل في فمها..
قالت الدكتورة لازم ترضعينها وهي جالسة عشان ما يطلع من خشمها أو يدخل في أذنها..
وسويت مثل ما قالت الدكتورة ومثل ما سوت الممرضة..
كنت أضم بنتي وأقول في نفسي:بقدرة الله راح تعيشين وراح أبذل كل اللي أقدر عليه عشانك..
لما شفت أن طريقة الممرضة غير مجدية أبدا..وبنتي ما ترضع زين قررت أني أتصرف بنفسي..وفعلا..كبرت فتحة الحلمة..وصرت أعصرها بالإبهام والسبابة لحد ما ترضع..والحمد لله لما شافت الدكتورة مستوى الحليب اللي ترضعه ارتفع سمحت لنا بالخروج..
رجعنا بيتنا..وزوجي كان فاقد الأمل في أنها تعيش..ولكن أنا كان كلي أمل بأنها راح تكون بخير..وأن هذا البلاء نعمة..وتكفير ذنوب..ودرس يمكن أستفيد منه وأفيد غيري..
كنت أقوم في الليل وأرضعها واجلس معها ساعة لحد ما ترضع 5 مل..وكنت أقول في كل ليلة..الحمد لله..تذكري أمهات الأطفال اللي مطروحين على الفراش ما يقدرون يمشون..وتذكري أمهات الأطفال اللي عندهم مشاكل عقلية وما يجلسون ولا يريحون أمهاتهم..كل هذا خلاني أحس بمعاناة أمهات ذوي الاحتياجات الخاصة..وفي نفس الوقت حسيت بالرضا والحمد لله..
بالنسبة للرضاعة الطبيعية فكل محاولاتي معها فشلت..لأن الحنك كان مفتوح تماما..وما كان عندها أي قدرة على المص..
بعد كم يوم من رجعتنا توقفت بنتي عن الرضاعة تماما..وكانت جهودي في عصر الحلمة ما تسوي شي..
حسيت أنها بتضيع من يدي..وكنت أسأل الله يلهمني الصواب..سبحان الله..تذكرت برواز الإبرة..أو الشرنقة..اللي يحطونها مع أدوية الأطفال..أخذتها ونظفتها واستخدمتها بدل الرضاعة..
كنت أحط الحليب في الرضاعة..وأسحبه بالشرنقة..وأسقيها وهي جالسة..سبحان الله ارتفع مستوى الحليب ل15 مل للرضعة الواحدة..قد إيش فرحت..
بعد كم يوم وصلت الحلمات الخاصة..كان شكلها مخيف..ومحاولة إدخالها إلى فم ابنتي الصغير يعني تعذيبها..
قررت أستمر على الشرنقة حتى ما تكون تجربة الرضاعة بالنسبة لها تجربة مؤلمة..
بعد ما كملت بنتي أسبوعين..قررت أنني لازم أتفاءل أكثر..ووديتها للمستوصف وطلبت من الممرضة تخرم أذانيها..
كانت هي المرة الأولى اللي تبكي فيها بنتي..طلعت ثلاث صيحات وبعدها سكتت..
قد إيش فرحت يوم سمعت صوتها وهي تبكي..الحمد لله ربي أحياها حياة ثانية..
لما رجعت البيت جربت أعطيها الرضاعة..وسبحان الله رضعت بنتي بقوة أفضل من السابق..صح أني لازم أضغط على الحلمة باصابعي..بس استجابتها كانت أفضل..وما عدت أستخدم الشرنقة..
بعد شهر من ولادتها..في أول يوم من ايام رمضان الماضي..كانت بنتي على السرير..ولثاني مرة في حياتها..نسمع صوتها وهي تبكي..والله كان ذاك اليوم بالنسبة لي عيد..
كلنا تجمعنا حولها فرحانين..وكأنها تغني أو تضحك..
بعد شهر ودينها مستشفى خاص في أبها..قال الدكتور الفتحة كبيرة مرة ويمكن تحتاج عمليتين وبالنسبة لوزنها مستحيل يصير مثل الأطفال العاديين بس شدوا حيلكم في تغذيتها لأنها راح تحتاج وزن كثير وقت العملية..وما راح تسويها إلا بعد ما تكمل عشرة شهور..
رجعنا وأنا مو فرحانة ولا زعلانة..الحمد لله..بدأ المشوار..ولازم نبذل جهدنا معاها..
يوم وديتها المستوصف عشان التطعيم قالت لي الممرضة فيه حليب خاص بالأطفال ناقصي النمو والمبسترين..وأعطتني منه كمية..
اسم الحليب"سيميلاك نيوشور" غطايته ذهبية..
المهم أول ما بدأت أعطيه بنتي تحسنت رضاعتها كثير وانفتحت شهيتها..وزاد وزنها على طول..لكن صارت تشرق بشكل مفزع..
لأنها ترجع الحليب ولما ترجعه ما يطلع برا..بالعكس يطلع على خشمها ويمنعها من التنفس وتجلس على هال الحال من 20 ثانية إلى دقيقة واحنا معها في صراع عشان تتنفس..
كنت في البداية أخاف وأحزن..وأتألم..بس لما شافتها أمي..وشافت كيف أفزع وأقوم أسعفها..قالت لي:"أنتي بها الطريقة تروعينها..وتزيدين من خوفها..اهدئي عشان هي تهدأ"
بالفعل مسكت بالوصية..استمرت الشرقات هذي تجيها تقريبا 20 مرة في اليوم..بس صرت اتعامل معها بشكل أفضل..
قالت لي أمي بعد ما اشتكيت من عصر حلمة الرضاعة وأنها صارت تسبب لي ألم في يدي..خاصة الإبهام صار مجروح.."ليش ما تستخدمين كاسة العصير أريح لك ولها" وبالفعل غيرت رضاعتها بكاسة العصير الخاصة بالأطفال..والحمد لله تحسنت رضاعتها أكثر..وصارت تستغرق وقت أقل لإنهاء الرضعة.. رضاعتها طبعا-للتذكير- وهي جالسة..

موعدنا الثاني كان في مستشفى عسير عند طبيب تجميل مصري..ما أعطانا تفاصيل كثير عن حالتها..ولما قلنا له عن الشرقة قال "لازم تتعايشون مع الوضع لحد ما تسوي العملية"
سألناه عن تغذيتها قال هذا تخصص طبيب الأطفال..
لما رجعنا البيت حلمت حلم أحسبه رؤيا من الله والله أعلم..
شفت حرمة شايلة ولدها وأذنه طايحة شوي..شالته وودته عند الدكتور وقالت له كيف أعالجه؟قال لها:تعايشي مع الوضع..قامت الحرمة ورجعت بيتها واخذت شاش ولفت أذن ولدها مع راسه وقالت:إذا الدكتور ما يقدر يعالجك أنا بعالجك
الحلم هذا أثر فيني..وقلت لبنتي..إذا الدكاترة ما قدروا يسوون لك شي..بعون الله أنا بسوي اللي أقدر عليه..
وتذكرت كلام حلو عن الأشجار المريضة..إذا احنا أهملناها مات كل الجمال اللي فيها..بس إذا ساعدناها..وأسقيناها وغذيناها أعطتنا أجمل ما عندها..عشان كذا..لازم أبذل جهدي عشان أحصل على أفضل النتائج لبنتي..
بالنسبة للبسكوت والزبادي..كنت كلما أكلتها عطست لحد ما يطلع كله من خشمها..عشان كذا اكتفيت بالرضاعة لحد ما ربي يفرجها..
في الموعد الثالث كان عند طبيب سعودي في مستشفى عسير..سألني كيف ترضع..وريته كاسة العصير وقلت له:يا ليت أي أم عندها مثل حالة بنتي تنصحونها بهالرضاعة..
مرت الشهور ثقيلة وبطيئة..لحد ما كملت ثمانية شهور..لما شافها الدكتور قال خلاص عمليتها الشهر الجاي لازم نلحق عليها قبل ما تبدأ الكلام..وفعلا بنتي ما كانت تقول أي حرف..بس كانت عليها أغاني زي العسل..
طوال فترة مراجعاتي شفت حالات أصعب من حالة بنتي..وتكلمت مع أمهاتهم..واحدة عندها بنت منغولية بس كانت البنت في قمة الأناقة والنظافة..وكانت كتلة من حب..تسلم على الناس وتصافحهم..قالت أمها: ربيتها بالحب..عندي سبعة غيرها بس حبها هي في قلبي غير..
لما دخلنا المستشفى وبدأنا التحاليل والفحوصات..كان كل من شاف بنتي يحسب عمرها سنة..الحمد لله قد إيش فرحت..أني قدرت أساعد بنتي وأزيد وزنها وما استسلمت لكلام الدكتور اللي قال بأنه مستحيل تكون مثل بقية الأطفال..
استمروا في الأيام الأولى يسوون لها أشعة وتحاليل وفحوصات للتأكد من سلامة جميع أعضاءها الداخلية..
ليلة العملية ما قدرت أنام..
لما جت الساعة سبعة نزلونا غرفة العمليات..
الساعة ثمانية وربع دخلت بنتي غرفة العمليات..وأنا لحالي..أهلي وزوجي وأقاربي كل شوي يتصلون..وأنا عادي..توضيت وصليت وقعدت ادعي لبنتي..
مرت ساعة..ساعتين..ثلاث..أربع..ولما خلصت خمس ساعات غطيت وجهي وبكيت بحرارة..
بعدها صليت الظهر..وما امداني أخلص الصلاة إلا والممرضة تبشرني بانتهاء العملية..
طلعولي بنتي..أول شي شفته فيها شوشتها..دايم يقولون قصيها..قلت كيف أقص الشوشة اللي بشرتني بخروجها من العمليات..
ما أدري كيف وصلت عندي وما أدري كيف ما جريت لها..بس لما شفتها لقيتهم رابطين لسانها بخيط وملصقين الخيط على خدها..
ولقيتهم حاطين جبيرتين علي يدينها..
غطيت وجهي وبكيت..
حاولوا الممرضات يخلوني اشوفها..رفضت..ليش الخيط..ليش الجبيرة؟
يوم طلعنا التنويم كانوا كل الأمهات حولي..وجلسوا يطمنوني..ولكني قررت أصلي ركعتين قبل ما اطالع فيها مرة ثانية..
ولما شفتها حضنتها وقعدت أبكي..
فهمتني الممرضة أن الخيط عشان ما تمسك العملية بلسانها
والجبيرة عشان ما تمسك العملية بيدها..
بعد 24 ساعة أخيرا فكوا الخيط من لسانها..وأنا من يوم دخلت العمليات ما اكلت ولا شي..
سمحوا لها بالماء وعصير التفاح بس..ولكنها رفضت..وكانت تبكي بكاء ضعيف..
بعد يومين من العملية ارتفعت حرارتها..وتضخم الطحال عندها..وكل شوي تحاليل..ووشوشات بين الأطباء..سألتهم وش في بنتي..قالوا الطحال متضخم ويمكن عندها مرض خطير..
الحمد لله على قضائه..صح أني ما اعترضت..بس في نفس الوقت ما قدرت أتحمل الخبر..وراحت صحتي..وانقفلت شهيتي تماما..بس أصلي وادعي وأقرا عليها واكمدها بالكمادات..
وزوجي وأخته الله يجزاهم خير كل ما جوا للزيارة يعطون بنتي ماء زمزم مقري عليه ومخلوط بعسل..
ثالث يوم من ارتفاع الحرارة جا استشاري الأطفال وقال لي: راح نعطيها اليوم فرصة إذا ما نزلت حرارتها تصرفنا..
أنا ما سألت وشلون راح يتصرفون..على طول تربعت..وحطيت بنتي في حضني..وغطيتها من راسها لرجولها بالكمادات..حتى رقبتها لفيت عليها كمادات..صارت كانها مومياء بس وجهها مكشوف..
وقرأت عليها لساعات طويلة..
في العصر قالت لي واحدة:
"الله يطمن قلبك على بنتك"
قد إيش هالدعوة طمنتني..تدرون ليش..لأن الدعوة هذي دامها طلعت..معناته الله راح يطمن قلبي..
بعدها اتصلت أمي وقالت لي:"تفاءلي..إذا شافتك حزينة راح تحزن مثلك"..
تصدقون يا بنات..بعد ما صكيت السماعة..شلتها بين أيديني ولعبتها..على طول تجاوبت معي وصارت تلعب..صح كانت ضعيفة بس بذلت اللي تقدر عليه..
ولما جا زوجي واخته وقت الزيارة أعطوها الماء المقري والعسل زي كل مرة..
الساعة التاسعة مساء في ذلك اليوم..وبعد ما انتهت الزيارة..طالعت فيني بنتي وضحكت..
"ماما"
كانت أول مرة تقولها..وانخفضت درجة حرارتها..وصارت تلعب..سبحان الله..كيف..وليش..صارت بخير..
بغيت أحضنها من الفرحة..بس قلت لا..أول شي سجود الشكر للي له الحمد والشكر..لله اللي عافى بنتي وأنقذها من المرض..والحمى..
مرت ثلاثة شهور على عملية بنتي..وزنها نزل بسبب العملية والحمى.بس صحتها تحسنت..وصارت تقدر تاكل المأكولات الخفيفة..وما عادت تشرق ولله الحمد.. صارت تنطق بعض الحروف..
صحيح باقي فيه فتحة صغيرة بس الحمد لله شي أهون من شي..قال الدكتور تحتاج الفتحة الصغيرة إلى 4 شهور عشان تنقفل..
أنا الحمد لله راضية..سواء كانت راح تنقفل لحالها أو بعملية..فهذا أمر الله..ولكن..أسأل الله بمنه وكرمه يشفيها ويعافيها وما تحتاج لعملية ثانية..
أنا كتبت قصتي هنا عشان اللي عندهم عيال مثل بنتي يستفيدون..ويتفاءلون..لأن التفاؤل بحمد الله كان بداية مشوار السعادة في قصة معاناة ابنتي..

بنتي يوم دخلنا المستشفى


ليلة العملية


قبل العملية بدقائق يا جعلني فدوة الشوشة


بعد العملية


ثاني يوم من العملية


بعد خمسة أيام من العملية


بعد ستة أيام من العملية


بعد أسبوع من العملية



وخرجت نسنس من المستشفى والحمد لله
579
128K

يلزم عليك تسجيل الدخول أولًا لكتابة تعليق.

تسجيل دخول

أندريفنا
أندريفنا
نسيت أشكر كل من ساعدني في هذي الفترة..
أمي..وزوجي..واخت زوجي اللي شالت عيالي في عيونها..وسلفاتي اللي ما قصروا بالمواساة والاتصال ورعاية أولادي أيام الدراسة
بالفعل..الصديق ما يظهر إلا وقت الشدايد..
سماء2010
سماء2010
الحمدلله على سلامتها
يارب تكبر وتشوفيها عروسة
حـــــــــــــــور
الحمد لله اللي شفاها
الله يخليها لك ويحرسها من العين
بجد انتي رااااااااااااااائعه وهنيئا لبنتك بمثل امها
اسال الله ان يصلحها ويجعلها بارة تقية من اهل القران هي واخوتها
اصلح الله لي ولك ذرياتنا ورزقنا برهم
اعجبتيني كثيييير ربي لايحرمك الاجر
ام فهد arena
ام فهد arena
ما شاء الله تبارك الله يا ربي احفضها و اشفيها و تشوفينها عروس يا رب
سعوديه من قلب
سعوديه من قلب
الله يمتعك بشوفتها عروس يااااااارب

قصت بنتك قطعت قلبي الله يتمم عليها الصحة والعافية