الملف الخاص بأسئلة و مواضيع أحلى بنات فى مصر ( الجزء الثالث )

اشكركم
صباح الخير على احلى بنات مصر
والله مش عارفة اقولكم ايه على الترحيب الفظيع دة ........... بس ربنا يخليكم وميرسى خالص
ونظراً لطلب الجماهير وخاصة كهرمانة وشكر خاص ليها احب اعرفكم على نفسى
انا ياستى زوجة من 7 سنين وعندى ولد وبنت وبموت موت فى جوزى وطبعا هو كمان
وعلى فكرة احنا اصلا اتجوزنا عن قصة حب رهيبة شهدت تفاصيلها اروقة جامعة القاهرة ومش هتصدقونى لو قلتلكم انى كل ما مريت من هناك ببصلها بحنين قد ايه (كانت اجمل ايام حياتنا ) بصراحة كدة زى مابيقولو عندى ربنا فى السما وجوزى فى الأرض وبحب اولادى جداً بس مش قد ابوهم هو الأصل ههههههههه.
وعلى فكرة انا ربة منزل ومابحبش الشغل وبصراحة جوزى كمان بيغير عليا موت ورافض حكاية الشغل دى . لكن بحب جداً القراءة وتصفح النت وقنوات الأفلام ومليش قوى فى الرياضة
والحمد لله انا رشيقة مش محتاجة ليها . اه كمان انا بحب الميكب جداً وبحب اتفنن فى الوانه وطريقة وضعه وبحط لبنات العيلة ولأصحابى فى المناسابات يعنى الى تحب تسأل فى حاجة انا موجودة ورنا يسهل وعنى شوية صور للشادو تجنن اكيد هبقى اوريهلكم.
واشكر مروة وان شاء الله اكلمك على الخاص علشان لفات الطرح
واسفة ان كنت طولت عليكم يلاااااااااااااا بااااااااااااااى

السلام عليكم ورحمة الله وبركاته

ازيكم كلكم

كل الحبايب الغالين المنوريين الصفحات

دايما يا وسام تعبينك معانا

بس بتختفى فين يا جميل

يا بنات بمناسبه الملف التالت

عندى سؤال موجه لكل الاخوات اللى معانا فى الملف

كل واحده استفادت ايه فى الملفين السابقين

طبعا الاجابه تكون غير ان احنا كسبنا بعض كاصدقاء واخوات

اى حاجه استفدنا منها تقولوها على طول

بانتظاركم يا قمرات

اختكم المحبه لكم فى الله
ام باسل

السلام عليكم و رحمة الله و بركاته

انا جييييييييييييييييييييييييييييت

اول ما سمعت وسووسه بتنادي جيت جري!!!!

اهلا و سهلا حبيبة زوجها منورانا يا قمر بس بلاش الجملة دي "عندى ربنا فى السما وجوزى فى الأرض" لانها حرام و فيها شبهة شرك، طبعا انتي بتقوليها من غير قصد لكن لازم ننتبه لكلامنا عشان منرتكبش ذنوب و احنا مش حاسين، صح كلامي؟؟ و ربنا يخليلك زوجك و اولادك و احنا كمان!!!

مارويلا يا سكرتي ازيك؟؟ قوليلي بقى ايه حكاية الشموع دي كلها، و ازاي بتغيري لون المية اصلي مجنونة بالحاجات دي بس مش بالاقي اشكال كتير للشموع زي اللي بتحكي عنها دي

اينا تسلمي على الوصفة الحلوة دي و ان شاء الله نجربها و ندعيلك، و ربنا يوفقك جوزك يا رب و فريقه يفوز، الا قوليلي هو بيدرب اي فريق؟؟ فريق محلي بالامارات؟؟ انا اصلي باموووووووووت في كرة القدم، اعمل ايه؟؟ متربية بين 3 اولاد لازم اطلع باحب الكورة!!! و الادهى من كده ان انا و اسرتي كلنا اهلاوية و خطيبي بس اللي زملكاوين و يوم ما بييجي عندنا و فيه مباراة للزمالك بابا و اخويا بيهروه تريأة!!! بس انا ساعات معاه و ساعات عليه بصراحة!!!

سكرة هانم، حاجيبلك الصور ان شاء الله المرة الجاية، اما صورة الميك اب اللي عجبتني فلما ارجع اشوفها حاحاول انزلها لك هنا.

بقية البنات انتوا فين؟؟

عليكم السلام و رحمة الله و بركاته

اهلا حبيبتي ام باسل

انا لسه شايفة ردك حالا

و طبعا مبروك لينا على الجزء التالت

بالنسبة لموضوع استفدنا ايه بالتحديد، بصراحة مش عارفة اقول حاجة بالتحديد غير اني استفدت من تبادلنا الحوار و الخبرات و الصداقات، لكن مفيش شئ معين لفت انتباهي و ده مش تقليل من شأن الموضوعين لكن لصعوبة تحديد نقطة معينة للافادة، يمكن استفدت في حاجات بطريقة غير مباشرة لكن برضه مش قادرة احددها، و يا رب أكون انا قدرت افيدكم بأي حاجة من خلال مشاركاتي معاكم

انا اول واحده هقول
عرفت ان فى انواع كتير من الميك اب انا ماكنتش اعرفها
بصراحه مخبيش عليكم
انا حسيت انى من العصور الحجريه
لكن استفدت
شيء اكبر ومهم بكتييييير من الميك اب اللى بعتبروا ان شيء مؤقت موش دائم
استفدت ان ما شاء الله جوانا خير كبير جدا وغيره على دينا عظيمه
وكمان غيره على بلدنا
استفدت ان كلنا بنقدم ايد المساعده لكل اخت تحتاج ده
وده اسمو التكافل فيما بيننا
فى حفظ الله
ام باسل