بسم الله الرحمن الرحيم
السلام عليكم
انا حبيت اشارك في فعاليات بيتى يميزنى علشان انا بحب بيتى جدا وفعلا
بحس انه مميز بالرغم انه صغير وبسيط
بس مميز بلمساتى فيه وان كل حاجه فيه انا بعملها بايدي الفازات والتابلوهات
والستاير والمفارش حتى جددت دهان المطبخ بنفسي واي شئ بعمله بايدي وكمان عملت رفوف اضافيه لزياده تنظيم الدواليب بنفسي
وبحب كمان اهتم بنضافته جدا لان البيت النضيف بيجلب الملائكه وربنا جميل يحب الجمال
وهاخدكوا في جوله في بيتى الصغير ومن فضلكم التعليقات تكون مثمره وبلاش دا صغير واغراضك بسيط والكلام ده احنا الحياه عندنا بمصر تختلف عن عندكم بالسعوديه وكمان مستوي المعيشه العبره بالنضافه والنظام
دي صور غرفه النوم
دا الدولاب وانا زودت فيه رفوف ونزلت الشماعات تحت علشان اعرف ارتب الملابس وكمان عملت رف زياده في المنتصف
هنا جبت كراتين الاحذيه وغلفتهم وحطيت فيهم قطع الملابس الداخليه
والتوبات لفيتهم رول ووحطيتهم وكدا اسهل بكتير علشان يفضلوا مرتبين
ونظمت الملابس كل صنف لوحده ملابس بيت او خروج او كاجوال ........
وهنا عملت تعليقه للاكسسوار
ودا سبت غسيل غير مستخدم استغليته وحطيت فيه الشنط علشان مالهاش مكان وعلشان يبقي شكلها منظم
