من زمـاان عندي سالوفه ابي اسولف عليكم..وبــلا منقــود :)

بسم الله الرحمن الرحيم

السلام عليكم ورحمة الله وبركاته

وشلونكم يا صويحباتي


الصراحه من اول ابي اسولف عليكم بسوالف ناشبه في البطين الايمن

لكن ما الله اراد الا اليوم ..ويارب يفتح علي وعليكم بالخير

والصراحه هو موضوع حساس شوي ..وابي منكم تعتبريني اختك جالسه تسولف عليك بجلسه حلوه هاادئة..

وتسولف عليك من غير ماتنحرج منك و من غير ماتنقدين عليها :heart:



هذا يا طويلات العمر على طاعته ان شاءلله

زمان صار موقف مع واحد من اخواني ..وكان وقتها بزر صغير يمكن ابو 12 سنه,,

وكل ما اتذكر هالموقف ينقبض صدري وابكي بكاء كأنه توه الموقف صار

قبل هذا الموقف اخوي بدأ يتعب وتظهر عليه علامات مرض غريب..احرمه من المدرسه

وقتها أنا كنت صغيره اهبل...:biggrinlo.كان عمري تقربآ حوال 14 او 15 سنه,,وكنت مرجوجه شويتين....

كنت اسهر بغرفتي والبس فساتن وافسخ فستان واتنطنط وارقص قدام المرايه في تالي الليول << بسم الله علي :unhappy:

مع اني ملاحظة ان في شي مهب طبيعي في بيتنا صاير

شي مهب زين يصير في بيتنا ,,وكنت اشوف أمي ونفسيتها المتقلبه من تعب اخوي

وكنت اشوف أبوي يسولف مع امي بخصوص تعب اخوي,,ايش نسوي و وين نوديه وشفيه ولدك وش جاه

وطاري عمليه ومشتسفى وتنويم وماتنويم ,,ومن هالحكي

طبعآ وحده برجتي بوقتها اخر همها من يمرض ومن يموت..<< كش عليك :frown:

وفي يوم كنت امارس هوايتي المرجوجه تالي الليول ..وكأني عطشت من كثر التنطيط وابي اروح المطبخ واشرب مويه


وافتح غرفتي بهدوء عشان ماصحي احد <<فيك الخير والله

المهم وامشي بشويش ..البيت كله طافي ماغير لمبات الممر مثل السهاريه...

إلا واسمع صوت أنيين يشق الصدر ..صووت واحد يبكي بكااء مكبوت عشان محد يسمعه

تعرفون لما تبين تبكين وحولك ناس وتبين تكتمين الصوت ؟؟

تبين تبكين وتطلعين مابصدرك .ونفس الوقت ماتبين احد يسمعك ويقطع عليك بكاك..فتضطرين تكتمين صوتك قد ماتقدرين؟؟

كذا انا كنت اسمع الصوت

مشيت ادور هالصوت إلا ولاقي لمبة الحمام والعه

واقرب من الحمام ..واحط اذني على باب الحمام ..واسمع اخوي يبكييييييييييي بكاء يحرق يحررررررررق القلب


شوي واسمعه يشد مثل اللي عنده امسااك..يشششد بأنين وألم

شوي إلا اسمعه يستفرغ..واضح انه يستفرغ هوا ..لانه بطنه فاضي له كم يوم ماياكل...

وشوي الا يرجع صوت البكى الأليم المخنوق


انا هنا مصدوووووووومه ..رجعت خطوتين

ايش اسوي ؟


ادق على اخوي وسأله وشفيك؟؟


اصحي امي؟؟

طيب امي مسكينه شكلها ماعرفت النوم من وقت ماتعب اخوي!!

حسيت بشي في صدري...حزن...صدمه.. فجعة.. خوف..مدري وشهو

سندت ضهري على الجدار جنب باب الحمام وجلست ودفنت راسي بين يدين على ركبي وجلست ابكي

والله كل ما تذكر هذا الموقف..وتذكر ذاك الصوت اللي يشق الصدر ماتحمل وابكي


واللي يحزن اني بكيت الين صفى راسي ..ومادريت الا وانا في غفوة نومه وانا على وضعي

صحيت من غفوتي اللي مدري كم راح عليها...صحيت على صوت بكى اخوي اللي مازال في الحمام :44:
يا قلبي قلبااه كلن نايم ومرتاح ..واخوي في الحمام يصيح وينوح

عدت الايام ثقيلة ..ووبعد الرحوات والجيات بالمستشفيات طلع عنده القولون وتقرحات والتهابات..

وسبب خرجات وسبب اشياء كثيره انحرم من الراحه صار يقضي اغلب وقته في الحمام...

احرمت اخوي من شي طبيعي لكل إنسان ,وهو التغوط بشكل طبيعي وسهل وعادي

تعرفون ايش يعني بشكل سهل وعادي؟؟؟

يعني اذا حسيتي انك تبين تقضين حاجتك بكل بساطه تروحين للحمام تغوطتي ووتبولتي عادي وتطهرتي

وخلاص طلعتي ..لكن فيه ناس محرومين من هالنعمة

يحكي لي اخوي احدى المواقف اللي شافها في المستشفى ..

بعد وقت الزياره اضطر رفيقه المريض في الغرفه نفسها انه يروح الحمام...

يقول وشكل واحد من الزوار نسي يفتح السيفون بعد ماقضى حاجته

تدرين وش صار؟؟؟

يقول اخوي ان هالمريض جلس يطالع في المرحاض او بالاصح يناظر في (الغائط) وتنهـــد تنهيده تشق الصدر شق

ثم قال وهو يناظر فيه بألم (( الله يهني صاحبك الله يهنيه )) :44:

المهم وتمر الايام يكبر اخوي وتمر عليه الايام وفيها من التعب والألم والطوارئ والاسعفات والعمليات و و و ..

اللي مايعلم فيها إلا الله

وخلاص تأقلمنا على الوضع .واخوي التزم بالله وتقبل الوضع ومشت الايام

والحمدلله صاير اخوي احسن بكثير فضل من الله


وموقف ثاني حصل: وحده من جماعتنا متزوجة ماشاءلله عندها من الخير اشكال والوان

وبنين وبنات وتقريبآ كلهم متزوجين........

المهم في اخر حمل لها جابت بنت ..فقدت هالام طعم الحياة..

هالبنت ولدت بتشوه احرمها من انها تتبرز من تحت

تعرفون من وين يطلع برازها ؟؟



من فمها

قسسسسسم بالله يا خواتي ماكذبت عليكم

امها تكلم امي وتبكي بكاء على بنتها ...

تقول ان بنتها فيها تشوه في امعائها خلا برازها وبولها يرجع وتستفرغه عن طريق فمها :(

يالله تخيلوا قلب امها يوم تشوف براز بنتها وبولها يطلع من فمها ,,يااااااااااااااااارب رحمتك بعبادك


لكن الحمدلله البنت ربي انعم عليها بفضله ومنته وسهل لها عمليه ..والحمدلله صارت الأن تخرج الاذى من مكانه الطبيعي والحمدلله..كبرت والحين هي سنة اولى او ثاني ابتدائي



يالله يا بنات يااااااااااااااااااااه والله انها نعمه كبيره ماشكرنا الله عليها

نعمه ماكلفنا على انفسنا ثواني نشكر الله عليها
صح الكثير يشكر الله على نعمه الظاهره لكن الاغلبيه ينسى شكر النعم الباطنه

والصراحه يا بنات ومن غير منقود

من اجمل العبادات اللي اقوم بها..عباده اعملها وانا اقضي حاجتي<<السموحه منكم

كثير منا اذا دخلت الحمام تقضي حاجتها ..يقوم خيالها الواسع يوديها شرق وغرب ويمر خيالها بيت فلان ..

وتذكر سوالف قديمه واشياء ماتخطر على بالك الا اذا صرتي تقضين حاجتك

والبعض يلعب عليها الشيطان ويصير تتخيل احد يتحرك وراها ولا بيطلع لها شي فجأة او او

تلاعب شيطان بس عشان يلهيك عن عبادة التأمل وعبادة شكر الله اللي سهل عليك خروج هذا الأذى منك

من غير ما تتعبين نفسك بهضمه او بطحنه او بتمريره من المري الى المعده ,وريحك وشال عنك وظيفه

فلترة الطعام ..الزين منه يروح مع الدم والأذى منه يخرج من مخرج صغير لو صار به شي انفجرت امعائك

وكان أتلفت الكبد ونقص لاكسجين عن الرئة ويكون حالك ميته على قيد الحياة !!

هذا كله يلهيك عنه الشيطان تتأملينه..

لآنك لو تأملتيه راح تخشعين وممكن تبكين مع تذكر نعمة الله عليك وكيف انتي مقصره في شكر الله

هذي اسمها نعم الله الباطنه اللي تحتاج عبادة التأمل

الرسول عليه الصلاة والسلام كان يقول :{ : كان رسول الله صلى الله عليه وسلم إذا أكل ، أو شرب قال : الحمد لله الذي أطعم وسقى وسوغه وجعل له مخرجا } .


وسوغة: أي ساغ الطعام والشراب :أي سهُل مَدخلُه في الحَلْق، قال الله تعالى (سائغاً للشّاربينَ)،

قال: فَسَاغَ ليَ الشَّرَابُ وكُنْتُ قِدْماً ,., أكادُ أَغَصُّ بالماءِ الحَمِـيمِ

وجعل له مخرجآ : سهل خروجه بأن جعل له طريق يخرج منه

فتخيلي لو الاذى هذا بدال مايطلع من الدبر راح على الكليه ولا مشي مع الدم ؟

فهذي نعمة اعطانا اياها ربي وحرم بنت قريبتنا فصارت تخرجه من فمها

وحرم ذاك المريض اللي جلس يناظر فضلة غيره بحزن.. مشتاق لنعمه فقدها

حتى انا الكثير منا اذا دخل الحمام ذكر الله وسمى بس خوف من الشياطين

لكن لما ربي يسهل عليه وينظف بطنه ومثانته ويصفي له كليته..ويسهل خروج الاذى منه ابد يغسل ويطلع

حتى مايكلف على نفسه يقول اذا خرج غفرانك ربي ويشكر الله ان سهلها عليه

طبع بني أدم جحود ..الله المستعان :(

فالحمدلله الذي اسبغ علينا نِعَمَةُ الضاهره والباطنه

كان ابو بكر الصديق اذا خرج بعد قضاء حاجته يقول: الحمدلله على هذي النعمة التي غفل عنها كثير من الناس

هذا من غير اننا والحمدلله نمشي نروح للحمام ونقضي حاجاتنا من غير كشف العورات للغير

ومن غير محد يحط لنا حفايظ تحتنا ..ويجي من يغيره لنا إما محتسب إما مكره

الله لايرخصنا لاحد ونعوذبالله ان نرد إلى ارذل العمر

واخيرآ اعتذر منكم طولت عليكم ..السموحه منكم

حبيت اذكر نفسي واياكم بنعمة غفلنا عنها..

اسال الله ان يعلمنا حقيقة الشكر..وان يرزقنا شكر نِعَمَةُ..وان يعذر تقصيرنا

احبكم في الله :26: