السلام عليكم
اليوم الثلاثاء كان عندي برنامج الام الزائرة لروضة بنتي...
طبعا بديت اجمع الافكار قبل اسبوعين تقريبا .. وماشاء الله لقيت موضوع في عالم حواء فادني كثير..
وبنتي ياعمري من سنة جدي وهي كل ماسوت شيء قالت لاتنسين تعلمين صديقاتي اني سويت كذا.. لدرجة طرت عليها ذاك اليوم فرشت السجادة وجلست تصلي وقالت شوفيني اصلي علمي صديقاتي<--موب رياء ابد
المهم انا مدرسة ادرس جميع المراحل ابتدائي ومتوسط وثانوي ..بس ماعمري زملت مثل يوم جيت بروح لهلاطفال ..كله من بنتي من كثر ماتحرصني ..قولي كذا ولاتقولين كذا.. اخر شيء حومت كبدي قلت وشرايك تتكلمين بدالي وتمدحين نفسك وتقولين كل اللي تبين وخلاص قالت لاانت قولي بس لاتنسين تقولين كذا هههههههه
المهم البداية طبعا جيت للروضة وكانوا معطيني وقت نصف ساعة بس.. يعني يالله يمديني اسوي شيء.. وكنت خايفة مااضبط الفصل.. بس والله ياحليلهم من يوم جيت وهم ساكتين ومطيرين عيونهم من الحماس..
اول ماجيت سلمت على الاستاذة برا الفصل وقلت لها تنادي بنتي ولبستها فستان وكنت مسوية لها تسريحة بسيطة من الصباح ..وقلت لها انت اليوم اميرة الفصل.. وتشققت من الوناسة
ودخلت علفصل سلمت على البنات وعرفتهم بنفسي وجلست على كرسي ورزيت بنتي جنبي على الكرسي وسألت البنات عن اسمائهم ..
وطلعت الهدايا اللي جبتها لهم وصفيتها قدامهم وقلت هذي الهدايا للمؤدبات بس خلوني اشوف من المؤدبة فيكم ..قامت سعابيلهم تقوطر ياعمري عليهم
بعدين وريتهم عرض بوربوينت كنت مسويته لبنتي من يومها صغيرة الى وهي في الروضة وجلست اوريهم واسأل بنتي وش هذي الصورة وين كنتي؟؟ وهي تعلمهم
وطلعت ملابسها يومها صغيرة وقلت شوفوا شلون كانت صغيرة وشوفوا شلون كبرت وحطيت الملابس عليها ووريتهم جزمتها -الله يكرمكم- وتحمسوا مره قالوا يووو صغيرة مره
بعدين تكلمت شوي عن بنتي..قلت الكلام اللي هي مدرستنيي ..لها شهرين وهي تحقن فيني..وانا اقول في نفسي الله يستر عسى مانسيت شيء وش بيفكني من لسانها بعدين؟
وبعدين طلعت قصة وقريتها عليهم .. ياربي على حماسهم يجنن بسم الله عليهم
وبعد ماخلصت من القصة قلت لهم وشرايكم نلعب وكنت مجهزه لعبة خطوه
صفيتهم كلهم صف واحد وجبت معي بطاقات كتبت عليها الحروف وخليت بنتي تسحب بطاقة وتوريهم واللي تقول الحرف اول وحدة تتقدم خطوة واللي توصل الاولى هي الفايزة
بعد ماخلصنا اللعبة كنت جايبه معي صحن فواكه مشكله مقطعتها لهم وجبت اعواد شوي ومناديل وسألتهم عن فوائد الفاكهه ولازم تاكلون
وهذي صور اعواد الشوي والمناديل
والفاكهة نسيت اصورها بس كانت عباره عن كيوي وفراوله ومانجو وفندي واناناس شكلها يجنن
بعد ماخلصوا شكرتهم وخليت بنتي توزع عليهم الهدايا
وكنت ملصقة على الهديه اهداء مع اسم بنتي بشكل مفرغ عشان يلونونه وكتبت لوني
والهدية كان فيها كتيب صغير عن الحروف + مراية سفنج بوب+ بلونات +بيضة وبقولكم سالفة البيضة
البيضة شوفوها في الصوره تجي فاضية مافيها اي شيء وهم يرسمون فيها او يلونونها زي مايبغون .. هذي اللي في الصورة شغل بنتي وريتهم وقلت صلحوا بيضاتكم وجيبوها وروها الاستاذة
وبعدين كنت مجهزه هدية مفاجأة لبنتي وحاطه عليها صورتها وهي تقرا قرآن وقلت هذي هديه لبنتي عشانها تحفظ القران واعطيتها اياها قدامهم وبنتي بتطير من السعادةوهذي صورة الغلاف لاني نسيت اصورها قبل
وبعدين الاستاذة اهدت بنتي هديه بعد والله استحيت تمنيت اني جبت لها شيء
وضفيت عفشي وودعتهم وانتهت رحلتي لروضة بنتي ..
ان شاء الله تستفيدون من الافكار اللي عندي وترا الاغراض كلها شريتها من الهزازي كلفتني تقريبا 300 ريال
يالله بانتظار ردودكم وعلى فكره ترا هذا اول موضوع انزل فيه صور ... خخخخخخ
شكرا مره على التثبيت