السلام عليكم ورحمة الله وبركاته
.
.
لانكم غاليات علي وساعدتوني وقت ما انا محتاجه لكم
ماني مقصره معكم باللي جربته بحياتي وماقلت انا سمعته
كثير من البنات سالوا عن المقل يوم رديت على وحده من البنات اللي بطنها يطلع منه اصوات
مايحتاج اقولكم وش كثر احب المقل مو عشان طعمه المر .. لا والله لانه اسرع علاج لالامي
والله والله والله
اني كنت اعاني معاناه من الالام الدوره ماتتخيلون وش كثر
اني اتلوى بفراشي مثل الحيه من قوة الالم وابكي بكاء مثل الاطفال
واكل بنادول اكسترا مالايقل عن 3 حبات وانتم عارفين قوتها
واجلس يوم وليله وانا اقسم بالله لو اشرب فنجان ماي رجعته عز الله السامعات
وما اتحمل افتح فمي عشان مايدخل فيه هوى وانواع البطاطين لو اني بالصيف ولاتضحكون علي صحيح عمري 22 سنه وماكملتها لكن وربي عندي دبدوب ودبدوبي المسكين قسم بالله اني وقت الدوره اخليه مثل الكوره واحطه تحت بطني وانسدح عليه ابيه يلزق بطني بظهري عشان مافيه مجال للهوى وللالام
والله والله والله
لو اشرح لكم معاناتي انكم ماتصدقون اللي تسمعون
ويوم من الايام صدف ان جدتي كانت موجوده وتسال عني وقالولها مريضه
ودخلت علي ودرت انها الدوره
طلعت وجت وجابت معها كاسه صغيره فيها شي بس مدري شنو
وانا والله اني اذوق الموت واشربها وانا مدري لو تكون سم فيرآن اهم شي اني اخلص من الالام
بنات والله ماتصدقون
3 دقايق بالكثير وحسيت الدنيا تدور فيني اااااااااااااااااااااابي النوم
تخدرت وتخدرت كل الامي كني مغمى علي من الراحه اللي حسيتها
نمت والله ماصحيت الا من بكره
ويوم صحصحت وسالت جدتي قلت جده وشو اللي شربتيني اياه امس
قالت ياهولتي اللي هولتني وش اللي شربتك
ترى كلها (مقل) رجيته لك ببيالة قهوه من قهوتي العصر
قلت هاه مقل
جده حق شنو المقل
قالت الدوره يوم تذبحكن من قل الاهتمام ومن المطامره بهالبرد ويمتلي بطنك هوى وتلعب فيك الدوره لاجت
والمقل يعصر البطن من الهوى
ومن يوم ماقالت هالكلمه
وانا اطلق على الملقب بالمقل اسم (الذخيره) بنات قسم بالله صرت احطه بغرفة نومي من غلاه عندي
وقبل تجيني الدوره بيومين او ثلاث
لاجبنا القهوه وحطيناها وجلسنا نسولف احط كسرتين صغار بفنجالي واشربها وكل ماجيت اروح لدورة المياه تكرمون يطلع الهوى من مرتين لثلاث مرات لين يصير بطني اصلن ولله الحمد مافيه حتى نفخه >> بس انا ترى رياضيه من فضل ربي
وتنزل علي الدوره وانا قسم بايات الله احيان ما احس فيها لدرجة ما اكون لابسه فوطه اوقات
استغرب انها نزلت بدون الم الا اذا كان الم خفيف لايذكر .. ويمكن يكون بعد من وسوستي بالامها دايم
صورت لكم المقل وتراه مثل المره
بس كثير من البنات سالوا عنه وهم مايعرفون شكله
استخدموه صدقوني اذا مافادكم ماراح يضركم
وامانه اللي تجربه بس تعلمني ودي احس اني نفعتها
دعواتكم لي تكفون ان ربي يسهل اموري المتعقده ويخليلي والديني ويفرج عن اخوي السجين ويجمعني باحبابي ويشرح لي صدري
.
.
مشكورة حبيبتي والله ييسر امورك كلها يارب ويحفظ لك كل غالي
ويفرج عن أخوكي عاجلا غير اجلا يارب