اكلة الملوخية(الملوكية) من ملف اطيب الاكلات السورية من تحت دياتي (بالصور)

بناء على طلب بعض الاخوات في المنتدى قررت اعمل ملف كامل للأكلات السورية لانومتل ما وضحوا انو بيتعبوا وهن بيدوروا في الصفحات للمشاركة نفسها ومعكن حق للصراحة ومشان هيك رح اعمل ***** الله ملف بس ليكمل عدد الاكلات ولوقتها رح نزل كل أكلة بموضوع وبعدين اجمعهن في ملف بإذن الله



واليوم طبختلكن أكلة الملوخية او متل ما بيسموها جدودنا الملوكية لأنها بجد أكلة ملوكية والملوخية بتصير بالدجاج أو اللحم وفي ناس بتحط دجاج ولحم مع بعض متل ما بيعملوا بيت حماي الله يسلمهن

انا بحب اعملها متل اهلي بالدجاج بس وبعكلها ناشفة شوي يعني مناكلها بالخبز وفي ناس بيحبوها مع رز فبيخلوا المرق تبعها اكتر وهي بتصير بس ملينا من الرز واكلات الرز وانا بحب اطبخها ناشفة للتغييير


وبسم الله نبدأ أولا بالمقادير:


كيلوا ملوخية تقريبا طبعا منظفة ومغسولة ومنشفة وانا اهلي الله يسلمهن بيفرزوها وقت المونة وبيبعتولي حصتي يعني ما بتعب فيها - طولت عليكن-معليش انا لعاية شوي:p

بعدين دجاجة كاملة منظفة منيح بالليمون والطحينة ومغسولة انا بحطلها ليمون وملعقة طحينة بفركها فيها بتروح كل الزفرة والريحة حتى بالسلق ما بشم ريحتها لاني مو كتير انا والدجاج بعدين منسلقها من المطيبات لومي-وفلفل حب وقرنفل-وورق غار وهيل وبصلة صغيرة وبعدين منفتتها ومننزع عنها الجلد- وراسيت ثوم او اكثر حسب الرغبة انا بعمل راس مهروس وراس بتركوا حب وملح وبهار ومكعب ماجي انا بفضل ماجي الخضار - وليمونة-وسمن




طريقة التحضير: اول شي وأهم شي انو ندبل الملوخية بطنجرة مع شوية سمنة ومنضل نقلب ونقلب ونقلب لحتى يدبلوا يعني ع شوي رح يستوا من التقليب طبعا ومشان ما تلزق الملوخية منبخها شوي مي كل شوي
بعد ماتدبل- منحط بطنجرة تانية سمن ومنقلب الثوم الحب والمدقوق ومنحط الملح ومكعب الماجي والبها وبعد مانقلبهن منزيد الدجاج المسلوق والمفتت ومنقلب حتى تاخد كل المقادير من بعضها بعدين من زيد عليهن الملوخية ومنقلب ومنحط اليمون المعصورة وهي مهمة مشان الملوخية ما تعمل خيطان وقت السكب مو حلوة وبس منتركها حوالي نصف ساعة او اكتر شوي مع التقليب المستمر وإضافة الماء كل ما نشفت يعني مو تكبوا مي وتتركوا الطنجرة وتروحوا بدها طولت بال ومراق لكن هي اكلة ملوكية


وبس يا حبوباتي وتقدم مع ليمون ومخلل بس انا حامل وممنوعة عن المخللات مشان هيك ماحطيت وصحتين وعافية ع قلبكن وعم استنى درودكن الحلوة