*:••:*• مراحـــــــــــل البنــــــــــــــــاء *:••:*• - منتديات عالم حواء

السعودية - الرياض
رضا مكتب فايز العنزي
يوجد خادمات من فلبين والهند واثيوبيا ممتازات جدا للتنازل :0551701577
              

السعودية - الرياض
رضا مكتب فايز العنزي
يوجد خادمات من فلبين والهند واثيوبيا ممتازات جدا للتنازل :0551701577
قديم 07-11-1431 هـ, 08:45 صباحاً   #1
نبضة صادقة

محررة
 
الصورة الرمزية نبضة صادقة
 
تاريخ التسجيل: 16-05-1425 هـ
المشاركات: 1,705


*:••:*• مراحـــــــــــل البنــــــــــــــــاء *:••:*•



أهلا حبيباتي..


كنت قد وعدت الأخوات قبل سنة و خاصة الأخت الفاضلة (Dream22) أني لدي

مفاجأة لهن وهي ترتيبي لموضوع اختي (Dream22) لكن حال دون

ذلك ظروف حملي وولادتي.


و بالفعل رتبته و نظمته و حذفت ما ليس له علاقة بالموضوع أو ما كان مكرر

و جعلت كل نصيحة تحت البند المناسب حتى اسهل لحبيباتي الوصول لأي

نصحية في يسر و سهولة دون تصفح كامل الموضوع منذ ذلك الوقت.

و ها أناذا اوفي بوعدي و إن كنت قد تاخرت فاعذروني
.


و أنا هنا أشكر حبيباتي عضوات الديوانية الأولى التي عشت معهن فترة لا بأس

بها لتبادل الآراء و النصائح، و على رأسهن الغالية (قمرا) فلولا تفاعلها لما وصلت

الديوانية لجزئها التاسع (ما شاء الله تبارك الله).. و اذكر على سبيل المثال من

العضوات الفاعلات آنذاك ..أم عموري.. و رتووووش.. و غلا الروح... و غيرهن


و أشكر جميع عضوات الديوانية الثانية و نا بعدها لتعاونهن على انجاح الديوانية

و تقديمهن للنصائح لا حرمهن الله الأجر.


و أشكر من لها الفضل في اخراجي لهذا الموضوع وهي الأخت (Dream22)

فقد سهلت على الكثيرات عناء تصفح الديوانية و جمعته في موضوع واحد


بعنوان:

نصائح معمارية رائعة من ديوانية الي بيعمرون بيوتهم

و قد فرحت كثيرا لما دخلت القسم ووجدت موضوعها مثبت

رغم انه لم ينل حقه وقتها من التصفح.


أسأل الله أن يبارك لها في علمها و عملها و عمرها


أرجوكن حبيباتي لا تحرموني و من كان سببا في هذا الموضوع من دعواتكن الصالحة.


قبل أن أبدأ أو لفت انتباهكن أني لم اقتصر على موضوع الأخت دريم

بل أضفت عليه اضافات من عندي و هي قليلة.

بالإضافاة إلى نصائح رائعة للأخت (عربوجة) كنت قد حفظتها عندي

منذ مدة و سأوضح نصائحها باللون الأزرق الفاتح.

كما كانت لدي متفرقات لكن لا أدري مصدرها للأسف.

و سأذيل الموضوع بمشيئة الله ببعض النصائح المتفرقة من المنتدى و خارجه.







مراحل البناء:

أختي غلا الروح بالنسبة لمراحل البناء كالتالي حسب معرفتي واللي عندها إضافة تقولها
العظم _ تأسيس الكهرباء _ تأسيس السباكة _ حلوق الأبواب _ حديد النوافذ _ التلييس - الجبس ماعدا الحمامات والمطابخ تكون بعد سيراميك الحائط _ اساسات الصباغة والبويه عشان ما تنعدم الأرضيات _ سيراميك الحوائط _ تركيب البانيوهات والمراوش الأرضية والكرسي العربي لو بتستخدمونه _ الأرضيات _ تركيب النوافذ_ الحديد ( الأبواب والدرابزين ) _ تركيب الأدوات الصحية وعمل فتحات اسبوتات _البويه _ الأبواب الخشبية ( إذا كنت بتجيبي ألأبواب مضروبة بويه جاهزة تخليها أخر شيء عشان ماتنعدم بس إذا كانت ماهي مضروبة بويه ممكن بعد النوافذ وقبل البويه بس نصيحة لا تشتروا الأبواب قبل النوافذ لإنه أخو زوجي أنعدمت عنده وزنية الباب عشان الهواء صار يدخل من النوافذ ويلعب بالأبواب وأضطر يجيب النجار مرة ثانية عشان يصلحها - تركيب اللمبات _ والتأثيث ( يارب متى نوصلها(




مرحلة ما قبل البناء (الخرائط و المساحات):

-انبهكم اخواتي اللي لسه في التصميم او ما بدأو العظم لازم تنتبهوا للحمامات ومقاساتها عشان ماتطلع معاكم صغيرة لازم ماتكون أصغر من 2* 2 ولا تعتمدو انه المهندس توزع معاه في الخريطه بعدين حتلاقونها مرة ضيقة ومحتاسين في توزيع الطقم فيها زي ماحصل معايا
ولازم تنتبهو زين للتوزيع من البداية من الخريطه ولما يعملو العظم تشيكوا الأماكن بنفسكم وكمان لما تعملوا السباكة خذوا معاكم طباشير وعلموا الأماكن اللي تبغون تحطون المغسلة الكرسي البانيو بدقة وراعوا أماكن فتح الباب الشباك وحاولو لو تخلو مكان السخان مخفي فوق الباب أو في الزاوية.


- نصيحة : انا كنت ارسم كل غرفه على وورقه مقاسها السنتميتر لكل متر واوزع كل شي الاثاث فيها غرف النوم الحمامات الصالات كل شي يتحدد من بدري لان جمال التصميم يكمله حسن توزيعك للاثاث بشكل يتناسب مع المساحات ..... ترى يا بنات هذه الطريقه مهمة و هي الطريقه اللي يستخدموها مصممين الديكور.

- الدور الارضي وبالذات الصالة خلوا شبابيكها كبيرة واصله الارض.


-اللي حابين يعملوا الدرج الدائري في وسط الهول ويطل على الصاله انصحهم بدرج جانبي للخدمة لانه عملي جدا انا سويته ونافعني كثييير لما يكون عندي ضيوف بالصالة زوجي ما يتقيد في حركته وكل من شافه يندم انه ما سواه.

-اما عيوب الدرج اللي في وسط الصالة في حاله عدم وجود درج ثاني للخدمة بتصير الشغاله طالعة نازله قدامكم ولو في عندك صديقاتك بالصالة ما يقدر زوجك يتحرك في بيته يقعد محبوس فوووق
عيب ثاني وهذا الكلام للجمييييييييع سامعين الجميع ترى الدرج الدائري مكلف جدااااااااا
مو بناه قصدي الرخام يكلف مبلغ جامد اعتقد كلفنا بس الرخام17000 غير الدرابزين مع ان الجانبي يقول زوجي كلف كله من تحت لفوق 1000 ريال وبرضه رخام شايفين الفرق صح النوع يختلف بس حتى لو كان نوع الرخام غالي برضه في فرق لان الغلا في قص الرخام


-الي ما يحبوا الشغالات مثلي انصحهم لا يخلوا غرفه الغسيل بالسطح لانه تعب طلوع ونزول ،انا سويته بالدور الثاني عند درج الخدمة وسويت جنبه غرفه شغاله بحمامها للاحتياط لو جبتها.

-غرفة الغسيل والكي اعمليلها حساب داخل البيت ولا تخليها فوق السطح اريح وانظف اذا كنت تغسلين بنفسك اريحلك واذا الشغاله يكون سهل عليك تشرفين عليها لانه اذا كانت فوق بتخبص الغسيل على كيفها انا ابدا مادخلت مزاجي غرف الغسيل اللي فوقوفكره حلوه ان غرفة الشغاله تحت واذا داخليه افضل.


-- و أنا لدي اقتراح بالنسبة لحركة الشغالة (إن وجدت) تكون محصورة في مساحة محددة، وذلك بجعل غرفة الغسيل و غرفة الشغالة و المطبخ في مساحة متصلة، أي يكون للمطبخ باب مباشر على غرفة الغسيل و الكي و على غرفتها، و بذلك تقللي من فرص ظهورها أمام عائلتك و زوجك، فلا تخرج من المطبخ إلا للتنظيف و الترتيب الروتيني و الذي عادة يكون في الصباح عند خلو المنزل من زوجك و أفراد العائلة البالغين.


-بالنسبه لمروحه الشفط في الحمامت نصيحة لا تعملوها في الجدران.... اعملوها قي سقف الحمام ..... مدري فاهمين قصدي او لا لان الشفاطات العاديه تدخل الغبار والاتربه وتعدم الدنيا بس هذه لا وعن تجربة لان جاتنا موجة غبار شديدة اللي مسويين الشفاط في الجدران حماماتهم انطمرت بالتراب وانا ما واجهت هذه المشكلة والحمد لله.


- شفاط السقف له فتحة في الجدار على بره .......... يعني شكله يصير كانه فتحه مكيف في السقف والسقف كله يتغطى بالجبس عشان تتغطى الاسلاك والهوز اللي يمر الهواء من خلاله على بره والفتحه اللي بره يكون لها غطاء مايل وفيه شبك صعب اني اوصف الشكل بس اكيد حتشوفيه بالمحلات اللي تبيعه.


-اللي مسووين المروش الصغير ابعدوا شباك الحمام عن حدود المروش شوية عشان حديد الستارة او الحاجز لانه واجهت مشكله مع البعض وكان الشباك في مكان تثبيت حديد الستارة وصعب انهم ينقلوا الشباك بعد ما انتهى كل شي.


-نجي للدرج حلو لو الدرج يطل على غرفة المعيشه على طول اشرح ويعطي منظر افضل يعني يكون في وسط الصاله وغرفة المعيشه والدرج والمطبخ وغرفة الطعام ملمومين لانهم القلب النابض في البيت ومكان الحركه والحياه إن شاء لله تكوني فهمت قصدي.


-في شي مهم التكيف المركزي مره مريح وصحي اذا عندك مزانيه كافيه لاتفوتينه.


- التكييف يكون مركزي للمبنى وهذا مكلف وهو التوب في مواصفات التكييف ومن مؤسسات معروفة ، يأتي تكييف اقل وهو تقليد المركزي المسمى (كونسيلت ) ، ويأتي اقل وهو ( السبلت ) ، والاخير الشباك .

-ملاحظه ثالثه انا ماني مع الاخوات الي نصحوك بالغاء الصاله العلويه لانه مهما كانت صغيره تخلي المكان شرح احسن ماتطلعي على غرف على طول.

-المهم الشبابيك الافضل انك تحددين اماكن فرش الغرف وخاصه غرف النوم لانه يمكن توزعينها وتكون الشباك الي بينفتح بيضيع عليك مكان السرير او الدولاب او غيره.

-اما القبه فإنتي عكسي انا عندنا قبتين وحده في الصاله العلويه صالة المعيشه وحجمها وسط وخليناها زجاج معشق ومع الجبس طالعه جنان والثانيه فوق بيت الدرج ونفس الحركه
اما قبتكم فاحس الجبس المغربي قديم الكل صلحه وفيه ناس راسمين في اسفل القبه من جوى مثل شكل الحجر والفتحات ياللي فيها حاطينها زجاج معشق طبعا ملون بس طالعه تجنن وترى الالوان تلعب دور.


-لاتعتمدون فقط على المهندس في تصميم الخارطه لازم تفرضون عليه رغبتكم في شكل البيت ، اي شى تبغينه لازم يحطه في الخارطه من البدايه مثل الفجوات الجداريه, النافوره,موقع جهاز التحليه مثلا ، لاني وقعت في نفس مشكلة الاخت غلا الروح قال المهندس اللي تبغينه من فجوات قولي للمقاول بعدين, طبعا ما صار من اللي بغيته شى.


-ومن ضمن اغلاطنا اننا رفعنا مدخل السياره وللحين نعاني سيارتنا لازم تحك اذا دخلناها
المدفئه خليناها بزاوية الصاله والمفروض انها تكون في الوجه لانها الحين قيدنا في ترتيب الكنب وغير كذا هالايام تدخل نامس للبيت واصلا مالها داااااااااعي بس قراده.

--والشيء الثاني احنا سلكنا للشتر بس راح عن بالنا ان لازم نركبه قبل الالمنيوم فركبناه بعد الالمنيوم وطلع شكله مو مره لان الصندوق حقه صار واضح من برى وحلاته يكون مخفي. (تعمدت تكون هذه الملاحظة هنا لأنك إن نوتي تركيب شتر للنوافذ فيلزمك معرفة أن ؤول الشتر سيأخذ حيز من طول النافذة).


-نصيحة قبل لا تقرري اي شي اعملي مثلي ،ارسمي على ورقه كل الجناح بمقاسات 1 متر= 1سنتيمتر وحطي كل التفاصيل بدقة فيها مكان القوس، وعرضه ووزعي الاثاث فيها السرير 2*2 سم الكومودينو اعطيها اقصى حد 70 *70ملم ، التسريحه حددي موقعها 50 تقريبا * ؟ على حسب طول تسريحتك ولاحظي المسافه بين التسريحة والسرير يمكن تكون 90 سم ....قريبه مرة
وشوفي المساحة الباقيه كم ... وزي ماقلتلك بيبقى بعد طرف السرير 1.6 م ولازم يكون قدامه مفتوح
ومن بعد جوانب السرير للجدار 1.4 يمين و1.4 يسار
ومن بعد الكومودينو للجدار 70 سم


-بس بالنسبة لغرفة الملابس انا ما احسها حلوة انج تدخلين على غرفة الملابس وبعدين تدخلين على غرفة النوم لان لو كانت فيها ملابس يبغالهم تدخيل لو كانت التسريحة مو مضبطه ؟؟ فالافضل انج تخلين مدخل غرفة النوم على الجلسة احلى او على الغرفة بس بدون ما يكشف السرير .. بس غرفة الملابس احبها منفصلة عن المدخل ولها باب افضل مثل ما ذكرتي.


-للمبتدءات في البناء (مثلي) هذا الموقع مليء بكتلوجات مباني (كروكي) للمساقط فقط، تشاهدينها و
تختاري اللي يناسبك منها... زرته قبل سنة و كانت الفرجة (بلاش) لكن الآن للأسف لازم يكون عندك
اشتراك سنوي بـ 100$... شفتي كيف الدنيا تغيرت..
سأعرض بعض النماذج اللي خزنتها لكن ليس الآن لضيق الوقت..

http://www.almohandes.com/almohandes...namicIndex.asp


-لسالفه كبر الغرفه المفروض ان جناح غرفه النوم المثالي يقسم الى 4 اقسام تشمل التالي :
(-غرفه نوم ,غرفه ملابس ويكون فيها التسريحه منعا لازعاج الطرف الاخر ثم دوره مياه مستقله, وغرفه جلسه متصله بالجناح فيه كل سبل الترفيه سواء كمبيوتر او مسجل وتلفزيون) اكرر مستقله يعني بباب يفتح على غرفه النوم الرئيسه ليتسنى لك الاستفاده منهابحريه اكبر و منعا لازعاج الطرف الاخرالذي قد يكون نائما 0مو قوس لو بلوك رجاجي لان كل هذه التصاميم حلوه بس ما تحقق الهدف المطلوب يعني توصل الصوت والاضائه
نرجع نوضح انه يجب هندسيا ان لا تزيد مساحه هذا الجناح باجزائه الاربعه عن 25% من مساحه مسطح بناء الدور الاول
لان الغرفه الرئيسه بكذا بتكون للنوم فقط, وما ينحط فيه الا السرير والكمدينو الصغار على جوانب السرير وصوفا واحده ووحده الادراج الطويله للانجري فقط فما فيه داعي انه تكبر على حساب باقي اجراء الجناح خصوصا انه اذا كبرت تعبتي في تنظيفها -خصوصا اذا كنتي زي حالاتنا ماتخلين الخادمه تنظف غرفتك_وما تبرد لم صيفا بسرعه وما تدفا لك شتاء بسرعه ، نظرا لكبر حجمها يعني 5×9 =45 متر تستهلك تدفئه وتبريد بشكل كبير يوميا ان لم يكن على مدار اليوم لان ذا يقوم وذا ينام ومن ثم ترتفع شريحه الكهرباء ويزيد معامل الضرب -خصوصا لذوي التكييف المركزي وعاد شوفي الفاتوره واذا تبين اقول لك عن 25نصيحه هندسيه لنجاح تصميم غرفه النوم انا في الخدمه وذلك فيما يتعلق بفرشها وتصميمها واسففييييييييييييييين على الاطاله



يتبع أرجو عدم الرد لحين اكتمال الموضوع

السعودية - الرياض
رضا مكتب فايز العنزي
يوجد خادمات من فلبين والهند واثيوبيا ممتازات جدا للتنازل :0551701577



نبضة صادقة غير متواجد حالياً رد مع اقتباس إرسال الموضوع إلى الفيس بوك إرسال الموضوع إلى تويتر


قديم 07-11-1431 هـ, 08:49 صباحاً   #2
نبضة صادقة

محررة
 
الصورة الرمزية نبضة صادقة
 
تاريخ التسجيل: 16-05-1425 هـ
المشاركات: 1,705


المرحلة الأولى ( الأساس و اقامة العظم):

- الاخت اللي قالت توهم بالميدةاهم شي لا تنسون الرش ضد العثة اثناء الاساسات وبعدها وشركة الرش والمقاول يحدد الاوقات متى..
شي ثاني زيارة المهندس بعد كل مرحلة مهمة جدانصيحة خواتي للي راح يبدون تحطون مهندس يشيك ورا المقاول
حنا بعد ما حطينا الاساسات جا المهندس واكتشف عمود ناقص مع ان المقاول ممتاز ويمدحونه الجميع ..


-وكمان أي مشكلة لازم أسأل فيها مهندسين من النت وما نعتمد كلام المقاول وبالفعل فادوني كثير كثير لإننا نحن تورطنا في المقاول اللي سوالنا العظم الله يسامحه غلط غلطات كثيرة غير أننا كنا نجيب مهندس يشيك وراها ويأخذ الفلوس وكله تمام بصراحة ماعندهم ذمة ولا ضمير ، من الأخطاء اللي عملها لنا تعرفوا ماعمل لنا المدخل ولا درج المدخل ايش رأيكم ولما كلمه زوجي يقول بعدين ونحن مصدقينه وبعدين ماصدقنا أنه يكمل الأساس ويروح أخرنا تقريبا سنة و8 شهور على بال ما خلصنا العظم تخيلوا.


-ولا تنسون زي ماقالوا الاخوات لازم المهندس يراجع شغل المقاول اول باول لان مقاولنا رغم انا شفنا شغله في بيت ثاني وعجبنا بس الله يهديه خرب علينا مدخل الرجال وحمام الاولاد واضطرينا نليس البيت كله عشان نعدل خطأه اللي رفض انه يصلحه وخسرنا زياده على اللياسه واحنا بنحط حجر فمافي داعي للياسه بس اضطرينا عشان نعدل الشكل الخارجي ، وبالنسبه للطوب اخذنا طوب احمر عشان يعزل الحراره والبروده.

-طبقه عزل تحت البلاط في السطح ضروريه تخفف البرودة من الدور الثاني وهذه غلطتنا ما سويناها لان الغرف اللي ما في فوقها بناء تصير فريزر ايام البرد.

- ما هي الراقية جداً من وجه نظري الراقية جداً التوب ما يلي :
العظم يكون التسليح فيه عالي ، والخرسانة من الشركات الكبرى ، والبناء جدارين بينهما صوف صخري ،الدفان يستخدم فيه الرمل ، العوازل الأرضية للخزان والقواعد والميده والأرقاب من شركات متخصصة .
- ترى في البناء الحديث ما يحتاج عمود بس يكون التسليح قوي ،حنا الدرج دائري بدون عمود ، اسألي عن هالنقطة اذا كنتو ما بديتو.


-بنات اللي خلصوا العظم ،كم جلسوا الى ان بدأو التشطيب ،قال لنا المقاول يخلص العظم بعد اربع شهور، اعرف اذا في سيولة كل شي يخلص بسرعة ، بس العمالة والمواعيد حقتهم والـ ....الخ، ابغى من خبرتكم اهم الشي اللي نتفاداها اثناء التشطيب ..يسلموو

بالنسبة للي عنده سيولة اظن خلال 8 شهور بلكثير ممكن يخلص والله يسهلكم وييسر أمركم اهم شيء لا تستعجلوا فكروا وخذوا معلومات قبل كل خطوة وانتو حضروا نفسكم وزوروا أماكن السيراميك وألأبواب والحديد والأطقم الصحية عشان لما تختاروا تعرفوا فين الأماكن الجيدة وتروحوا لها بسرعة
بس اللي ماعنده ممكن يطول سنين يعني نحن الى الان لنا ثلاث سنين وشايفاها طويلة وطفشانه وشكلنا بنكمل اربع سنين على بال ما نحول بس سمعت واحدة في المنتدى هنا اظن اسمها سنفورة لندن نزلت صوربيتها قريب قالت انه لها سبع سنين حمدت ربي وشكرته عشان كده صرت الان اتنازل عن بعض الأشياء عشان ما نطول أكثر وتجيني حالة نفسية بصراحة


نبضة صادقة غير متواجد حالياً رد مع اقتباس

قديم 07-11-1431 هـ, 08:55 صباحاً   #3
نبضة صادقة

محررة
 
الصورة الرمزية نبضة صادقة
 
تاريخ التسجيل: 16-05-1425 هـ
المشاركات: 1,705


المرحلة الثالثة ( التشطيب):


الكهرباء:

-بعد ذلك اذا كان عندك خبرة او ارجعي للمجلات والاخوات ووزعي الكهرباء وحددي بالظبط الانارة والاباليك الجدارية بالذات والاباجورات ومخارج الدش يجب دراستها جيدا حسب مكان التلفزيون والافياش واللمبات لان ذلك يترتب علية شراء افياش والافياش مهيب رخيصة ولا تسوين مثل وحدة اعرفها حطت في كل جدار مخرجين للاباليك وقالت اللي ما ابية الغية بعدين واكتشفت بعدين ان عندها في كل غرفة 6 افياش مالها داعي ومنظرها قبيح لانها الغت الاباليك حقتها
اتفقي مع الكهربائي على اماكن الافياس والمفاتيح بحيث مفاتيح الانارة تكون على جهة فتحة الباب للداخل وجميعها بجوار بعض وعلى ارتفاع 130 الى 140 سم حتى يسهل للداخل انارة الغرفة ولا يكون مثل المهبول يتخبط في الظلام
كذلك توزيع التلفونات ان كان بتركبين سنترال يجب ان يكون بجوار طاولة جانبية في مخطط الفرش حتى لا تسحبين اسلاك في البيت


-وغلطتي الثانية اني ماحددت اماكن الانارة على الجدران قبل التلييس عشان يمددون لها كهرب

-وكمان راعو في الكهرباء تسليك الإنتركم وجرس للشغالة بدل ما تنادي بصوتك وتتعبي والدش لازم تحددوا زين الأماكن اللي بتحطونه فيه لإنه لو عملتي توصيله بعدين بيطلع مشوش.

-حددوا اماكن افياش الكهرباء وكيبل التلفزيون مقابل الجلسه وحسب احتياجكم.

-طبلون الكهرباء حددوا مكانه بحيث ما يكون في وسط الهول زي ما حصل مع البعض وشوه المنظر.

-واول مرحله بعد العظم مثل ما قالت لك الاخت رتوش تحديد اماكن افياش الكهرباءوالتمديد للكهرب والسنترال واي نضام حمايه داخل الفيلا كا لحمايه ضد السرقه والانظمه الصوتيه ان حبيتي.

-حددي اماكن اطقم الحمامات ومجلى المطبخ وكل شي يتعلق بالسباكة قبل ردم الارضيه
وهذه الخطوة تتم مع الكهرباء في فترة وحدة لان كل شي يرتبط بالثاني
مثلا عند كل مغسله تحتاجي فيش كهرباء وعند مواسيير المجلى من تحت تحتاجي برضه فيش لمكينه طحن بقايا الطعام الديسبوسر وهذة ممتازة ............ وفيش لغساله الصحون لو ودك تشتريها ، ولو بتشتري جاكوزي برضه يحتاج فيش يعني مثل هذه الشغلات
تحديد اماكن الافياش والسويتشات تبدا في مرحلة الكهرباء واذا ما اخترتوا راح يتصرف العامل من حاله وعلى كيفه.


- ولا تنسي ان يكون عندك في كل مكان 220,110 للاحتياط وفي المطبخ بالذات مراح تتلخبطي بينهم لانك حتختاري شكل 220 ابو ثلاث فتحات للامان، واضاءة جداريه لدواليب المطبخ العلويه .......وفيش للفرن الكهربائي للي بيركبه.


- أخواتي تذكرت شيء لما تكلمتوا عن الأفياش والكهرباء بالنسبة لإضاءة السبوتات انتبهوا لا تخلوها كلها تولع وتقفل مع بعضها ( يعني سلكها واحد) لا خلوها على سلكين بحيث تكون واحدة ايوه وحدة لا
فهمتوني يعني لو تبغوا تفتحوها كلها ممكن ولو تبغوا اضاءة خافتة ممكن وبكذا يكون صرفية الكهرباء قليلة وانتبهوا لإنه فيه كهربائية اغبياء لما تقوليلهم هذا الكلام يعملولك صف كامل مع بعضه والصف الثاني مع بعضه لا فهموهم زين
بالنسبه للافياش انا من راي يجب ان تكون في متناول اليد وقريبه بالنسبه للغرف اما اذا في مخططك حابه ان يكون في تلفزيون بلازما معلق بالحائط يجب ان تحددي وين ودك تحطيه بالضبط علشان تحطي الفيش خلفه وما يبين الاسلاك نازله او طالعه.



--وانا ابحث لقيت هالموضوع وااايد حلو .. خاص للأفياش الكهربائية ... لكل من سألت عنه :

هذا الموضوع منقول من مجلة المسكن- العدد 17 (باختصار):و القاعدة المثالية تقول ((اجعل مقابسك الكهربائية ملائمة و سهلة للأستعمال, و متوارية عن الأنظار ثانيا)) وهذا يعني أن تطلب من الكهربائي المختص أن يقوم بتركيب المقابس بالقرب من حلوق الابواب قدر المستطاع ولكن بعد أن يقوم المقاول أو المصمم الداخلي بتقدير المسافات التي ستمتد اليها الزركشة الداخلية و خصوصا حول الأبواب, و الأسباب الجوهرية في أختيار هذا المكان للمقبس الكهربائي سببان:

1) اذا افترضنا و قمنا بوضع هذه المقابس على الجدران في الأطراف أو الوسط فلن يكون هناك مكان للوحة جدارية أو قطعة فنية يمكن تعليقها.

2) يميل أغلب الناس حالما يدخلوا لأية غرفة مظلمة ان يقوموا بمد أيديهم محاولين البحث عن المقبس الكهربائي بالقرب من الباب و ليس بعيدا عنه.

و من الجائز أن يتسائل أحدهم : إنني بحاجة لأكثر من مقبس كهربائي في الغرفة الواحدة. و هذا أمر طبيعي فيمكن أن يقوم الشخص بتجميع هذه المقابس في مجموعة واحدة فاذا كانت هناك أكثر من أربعة مفاتيح كهربائية فاطلب من الكهربائي أن يقوم بتركيب علبتين فوق بعضيهما و بتوازي لا في صف واحد إذ سيصعب عليك تذكر مكان أي زر أو مقبس.
المواصفات القياسية لمواضع المفاتيح و الأفياش الكهربائية

ترتفع العناصر الكهربائية عن مستوى الأرضية على النحو التالي:
أ- صندوق المفاتيح الرئيسي (الطبلون) 1.5 م
ب- مفاتيح السخانات 1.2 م
ت- الأفياش الكهربائية 30 سم
ث- أفياش التلفاز و التليفون 30 سم
ج- مفاتيح الإضاءة 1.2 م
ح- أفياش و مفاتيح المطبخ 1.4 م
- جميع الأسلاك الكهربائية تكون داخل أنابيب pvc من الدرجة 40 و الحد الأدنى لقطرها 15ملم.
- أسلاك المكيفات و أسلاك الإضاءة و أسلاك التلفاز و الأجراس تكون معزولة عن بعضها البعض.
- لا يتم استخدام الوصلات ما بين الأسلاك الا من خلال صناديق الوصل.
- جميع الأفياش و المفاتيح الكهربائية الخارجية تكون من النوع المقاوم للماء و الأوساخ.

وفي نهاية المطاف تذكر دائما أن ما يبدو لك واضحا و بديهيا فإنه من الجائز أن لا يبدو كذلك للكهربائي .
أخبر الكهربائي عن أماكن قطع الأثاث و التي من الجائز أن تؤثر على أماكن المقابس فمثلا إن خصصت مساحة لأحد المقاعد أو الطاولات فتأكد من مناقشة أبعاد ارتفاع المداخل الكهربائية و احتياجاتك, سواء أردت ان يكون المقبس الكهربائي فوق المقعد أو قريبا من الأرض.

إن التخطيط المدروس يوافق ما بين المقابس و المداخل الكهربائية و ما بين التشطيب الداخلي. ففي المطبخ يفضل أن تكون المداخل الكهربائية بالقرب من الكاونتر و حوالي كل 65 سم, وهذا يعني أنها ستتوزع على طول محيط الكاونتر, و لتجنب اختلاف وضعية المقابس مع تصميم السيراميك فإنه من الأفضل أن تتواجد مع الكهربائي لتتأكد من هذا التوافق (البعض يفضلون أن تتجمع المقابس بجوار بعضها )
إما تحت أو فوق كبائن المطبخ و بهذه الطريقة فإن المقابس ستكون متوارية عن الأنظار و سهلة الإستعمال, و المداخل الكهربائية ضرورية في تصاميم مطابخ الجزيرة و المكان الأفضل لها على الأطراف.
و من الواجب أن تكون المداخل و المقابس الكهربائية في الحمامات محمية و معزولة جيدا و على بعد 1 م من المغسلة (خطورة قرب الكهرباء من الماء معا) و اذا كنت تعلم تماما المكان الذي تود أن تخصصه لمقابسك الكهربائية فمن الأفضل أن تخبر الكهربائي بهذه الإختيارات لأن البعض يفضل أن يرى هذه المداخل بالقرب من المرآة و البعض يحبذها على جدار جانبي.
أما لباقي غرف المسكن في حال كان الأثاث منظما بحيث يبتعد عن الجدران فيفضل أن تكون المقابس الكهربائية قريبة من الأرض.

-افياش الكهربه لازم ما تكثرين منها في كل جدار لانها تنحسب لك وانتي تخسري روحك عليها بعدين تلقين ان ما منها فائدة بس تشويه للجدار .. وطبعا تنحط جنب الباب عشان من تدخلين الغرفة تلقين السويش تشغلين الليت احسن من تخبطين في شئ .. ولازم يكون عندك تصور لأماكن الاثاث .. لاماكن الثريات اللي بالسقف واللي بالجدار .. وهذا غير افياش التلفون والتلفزيون .. وعندج بالمطبخ افضل في كل جدار فيشة واتكون على مستوى الخزائن يعني في النص بين الخزانات .. عشان الاجهزة كثيرة في المطبخ بس تحملي عند المغسلة طبعا ما تخلين فيش عشان الماي ما يكهرب .. ايه بعد الافضل يكون تحت مو بالنص عشان لا تشوه الجدار بالاسلاك المتدلية ..
وباقي الأخوات بالنسبة للأفياش لاتنسون الأفياش في غرفة النوم للأستشوار عندالتسريحة وأفياش للأبجورات تكون أسفل الجدارعندالسريرواذاكنت بتحطين في الصالة ولاأي مكان آخر حددي موقعها عشان تتلافين مشكلة التوصيلات الكهربائية وانتبهوا فيه أفياش للتلفزيون وخلافه تجي فتحاتها دائرية نصيحة ابتعدوا عنها لأن لمايكون فيش أي جهازكهربائي عندك مشطوف مايدخل الابتوصيلة لأني عانيت من هالمشكله وحبيت أنبهكم



يتبع...


نبضة صادقة غير متواجد حالياً رد مع اقتباس

قديم 07-11-1431 هـ, 09:02 صباحاً   #4
نبضة صادقة

محررة
 
الصورة الرمزية نبضة صادقة
 
تاريخ التسجيل: 16-05-1425 هـ
المشاركات: 1,705


السباكة:

[COLOR="RoyalBlue"]-اول نصيحة لك من اخت توها منتهية من بنا بيت باعتراف الجميع كبير وجميل ودقيق اقول لك لا تشتتين افكارك وابداي خطوة خطوة
اولا انت انتهيت من العضم اول شي روحي محلات الادوات الصحية واختاري القطع الصحية ووزعيها في الحمام وقرري مكان كل قطعة لان ذلك يترتب علية تمديدات اساسية وبالانسبة للادوات الصحية الغالي عندك ابا حسين عندة ماركة عملية جدا كل عدتها من النحاس مهوب من البلاستك اسمها توتو وهم يقدمون خدمة التوزيع المجاني للقطع يعني يفيدونك بالافكار وحاولي انه يكون فية حركات في الحمام بالذات الرئيسي من ارشات ورسومات ما يكون حمام جامد ابدا اما الرخيص فعندك الخزف السعودي عندة اشكال حلوة بعد ومعقولة



-واستغنوا عن السخان في المطبخ لإنه يشوه المطبخ وخلو الماء السخان في المطبخ يجي من أقرب حمام له.
-بالنسبه لسخانات المويه خلوه واحد مركزي في سطح البيت يتوزع لكامل الحمامات والمطابخ
لان الحمامات بالسخانات القديمة شكلها بايخ.


-في شي اسمه كوع ريحة في الحمامات نبهوا على السباك انه يضبطه لان تطلع روائح كريهه ما تنطاق من الحمامات.


- حددي اماكن اطقم الحمامات ومجلى المطبخ وكل شي يتعلق بالسباكة قبل ردم الارضيه.


-وعندي غلطه اني ماحطيت مغسله في حمامي خليتها برى المشكله انه ضروري يكون فيه مغسله جوى خصوصا وقت الوضوء وفيه مكان لها بس لازم تكسير وحوسه.


-والتسريحه انا مكبره المغسله اللي في مدخل الغرفه وحاطه على جنبينها دواليب طويله عشان اخزن فيها اغراضي كلها من مكياج وكريمات وزيوت واستشوار ولفافات شعر واما الاكسسوارات بخليها على التسريحه اللي بحطها في غرفة النوم ولا راح اتكلف فيها.


-من مواصفات الفلل الراقية: السباكة هناك شركات متخصصة في التمديدات المميزة ومنها شركة انبوب التي تستلم منك من المخطط الى التسليم ومبلغها غالي شوي ، وكذلك تمديدات الكهرباء هناك افضل نوع هو التمديد بالمواسير الخفيفة السماكة بدلاً من الليات الحمراء العادية ، بعد ذلك تاتي الطلبات من انظمة الدش والهاتف والسنترال واشياء كثيرة قد لا تفيد التفصيلات دون ان نسمع الرغبة من الشخص المستفيد .


-بانسبه للحمام العربي فيه بعض الناس ترتاح له وتقدرين تحطينه في الحمامات اليوميه حقتكم ,وما احبذ وجوده في حمامات الضيافه لان الحمام العربي مع قلة الاستخدام تنشف قناة الصرف حقته و يطلع ريحه بالاضافه انه يتعذر فرش الحمام لان الارض بتكون دائما رطبه.




التلييس:

1-مرحلة ما قبل التلييس:

-لا تنسوا تخصصوا اماكن في الجدران لدواليب العبايات.


-الاشياء الي تمنينا اننا من اول حسبنا حسابها هي المغاسل تمنينا من الاول بنيناها وخلصنا من حوسة العمال من جديد يعني بالبلك وتخلين الي فوق مفتوح لان الرخام بيجي فوقه والمقدمه خليها مفتوحه عشان تحطين درفتين خشب تعطي شكل حلو للمغسله.

-في فكرة حلوة امكن اسويها ان شاءالله في بيتي الجديد اذا الله اراد
وهي تفصيل دولاب كبير ينفتح بطريقة السحب الجانبي ويكون شكله الخارجي مراااااااااااااااااااايه كبيرة ويكون الدولاب داخل الجدار عند المدخل بحيث اللي يشوفه يحسبه مرايا عادية على كبر الجدار لكن هو دولاب

2- التلييس:

-اية يجيك بعد ذلك مرحلة اللياسة لابد ان يكون مليس مجرب لان عيوب اللياسة خطيرة ما تبان الا بعد البوية حيث تظهلر التعرجات وفية حيلة بسيطة تمكنك من اكتشاف الاخطاء بعد ان ينتهي المليس تعالي في الليل وجيبي لمبة معك ومشيها على الجدار بذلك تكتشفين الخطا مبكرا كذلك انتبهي للتلييس من تحت لان ذلك يبان عند تركيب السيراميك والابواب
وانتبهي ان الاماكن اللي بيركب فيها حجر او سيراميك على الجدران يكون تلييسها خشن وليس ناعم لذلك يجب ان تقررين قبل اللياسة اذا كان عندك اماكن بها هذة الديكورات


-اللياسه واهم شي تكون بطريقه القده للحصول على افضل النتائج وقبل اللياس فيه شي اسمه( الطرطشه) وتعتبراول مراحل اللياسه وان كنتي بتحطين الواجهه حجر اوجزء منها تراه مايليس لان الحجر ما يحتاج لياسه ومتر التلييس عادة ب 5 بدون مواد ويستخدم فيه اسمنت بحريني وتخلط بماء عذب لتكون الياسه تمام وناعمه
[/color]



يتبــــــــــــــع..


نبضة صادقة غير متواجد حالياً رد مع اقتباس

قديم 07-11-1431 هـ, 09:09 صباحاً   #5
نبضة صادقة

محررة
 
الصورة الرمزية نبضة صادقة
 
تاريخ التسجيل: 16-05-1425 هـ
المشاركات: 1,705


الجبس و الأسقف + مكيفات السبليت:

الجبس ..ماعدا الحمامات والمطابخ تكون بعد سيراميك الحائط

-بعد اللياسة يامفعوصة عندك مرحلة الجبس وهناك نوعان للجبس من ناحية الخامة ومن ناحية طريقة التركيب
من ناحية الخامة عليك بالجبس الفرنسي لمنطقة الحمامات والمطبخ لانة لايمتص الموية ومقاوم للحريق لا سمح الله طبعا المقاول حيحاول يقنعك بالجبس السعودي ويقول انه يشبهه تدرين لية؟؟؟؟؟؟؟؟؟؟؟
لان كيس الجبس الفرنسي بخمسين ريال والسعودي بخمسة ريال عرفتي إإإإإإإإإإإإ
ثانيا اشترطي ان تكون عملية تصنيع الواح الجبس امام عينك في الموقع لانة ممكن يجيب لك بلاطات جبس عادي ويقول لك انة فرنسي وانتي ما تدرين وهناك طريقة نعرفها نحن مهندسين الديكور للتمييز ولكن يصعب شرحها
كذلك احسن نوع جبس فرنسي وارد البعيز نمبر ون كذا اسمة اذا سمع المقاول معك هذي المعلومات بيعرف انك منتيب سهلة وفاهمة واشترطي علية انيكون الشعر المستعمل في بلاطات الجبس شعر كيني وبكمية راهية لان الشعر هو اللي يمسك البلاطة ببعض واذا كان قليل تتشقق البلاطة بسرعة عرفتي لية طلبت منك ان يكون التصنيع للبلاطات في الموقع عموما الجبس همومة طويلة ولما تجين مرحلتة ارسلي لي على الخاص
بعد ذلك تجي طريقة تركيب الجبس او تعليقة هنالك الطريقة الهندية العادية وتستخدم في اغلب البيوت وهي تكون بربط البلاطات بالسقف بالشعر وهذة تستخدم دائما وسعره معقول ما بين 60-70 ريال وممكن باربعين ولكن انحاشي من ابو اربعين لانة سيغش في الخامة وافضل جنسية للجبس المعلمين الهنود ابعدي عن الباكستانيين لان ما عندهم سالفة
اما الطريقة الثانية فهي الطريقة الفرنسية وتستخدم للبيوت التي بها تكييف مركزي فاذا كان لديك قولي لي حتى اشرحها لك
واذا كان سقف بيتك واطي اختاري تصاميم ترتفع من الوسط لاعطاء احساس بالارتفاع
واشترطي على المقاول ان تكون الكرانيش من شركة الجبس السعودي وهو بيحضر لك كتلوج تختارين منه لان كرانيشهم حلوة وقوالبهم نظيفة
ابتعدي عن موديلات القدد والديزاينات الريفية التي تجي مثل العوارض العرضية والطولية الا اذا كنتي ستفرشين بيتك على الطراز الريفي او المكسيكي وقتها تمشي معك اوكي.
-اما طريقة التعليق الفرنسية فهي كالتالي
يقوم الفني بتركيب قواطع حديد مجلفن ومجلفن يعني انة معالج بطريقة بحيث لا يصدا الحديد مع الرطوبة المتسربة من التكييف على مدى الوقت مما يسبب بقع بنية بعد مرور 3 سنوات او اقل ويجب ان تكون نسبة الجلفنة من 150-الى 270 وهناك نسبة 70 ولكنها ضعيفة ويمكن ان تميزين القواطع هذي انها تتقشر لان نسبتها ضعيفة واحسن مورد لها المصنع السعودي للقواطع المجلفنة اشترطي ذلك وتكون نسبة المربعات اي الخطوط الطولية والعرضية بهذة القواطع60 في 60 لانك ممكن تحتاجينها في تعليق الثريات ولا تنسين ان تنبهين على الكهربائي ان يثبت خطافات قوية في الصبة في السقف لتعليق الثريات والا؟؟؟؟؟؟؟؟؟؟؟ قد تفاجئين عند تركيب الاضاءة انه لا يوجد خطاف مما يظطرك لتكسير الجبس لوضعها ثم اعادة الجبس واعادة دهانة مما ينتج عنة بقعة واضحة لو دهانك بطريقة التعتيق بعد القواطع يقوم فني الجبس بتعليق البلاطات الجبسية بالشعر في القواطع وليس في السقف حسب الطريقة الهندية و ويجب ان تبتعد قليلا عن داكتات التكييف حتى لا يتشقق الجبس عند اول عملية تشغيل للتكييف المركزي
كذلك يا ليت يكون التكييف وحدات منفصلة اي على اكثر شي كل غرفتين سوا وليس كما يفعل الكثيرين يشبكون غرف النوم كلها في ماكينة وحدة هي ارخص شوي بس في المستقبل لو نام شخص في غرفة اظطر ان يشغل تكييف غرف النوم كلها وهذي تكلفة في الكهرباء اضعاف تكلفة الماكينة في البداية
كذالك يجب ان يطلع مهندس الديكور التابع لك على مخططات داكتات التكييف النازلة من السطح للدور الارضي مرورا بالدور الاول لان اماكنها لازم ما تتعارض مع مخطط الفرش لان شركات التكييف اخر همها ديكور بيتك وقد تفاجئين انهم مررو الداكت في موقع سريرك او تسريحتك وهذا موااااااااااااااااال كبير يجب ان تنتبهين لة يا عزيزتي


-خلصت الجبس وغلطتي اني كنت ادور اشكال جاهزة ماحاولت اصمم كان في بالي اشكال كثير وحلوة
بس كنت خايفة انها ماتظبط وصرت ادور اشكال جاهزة
بس بعد التنفيذ ماعجبتني بس ان شاء الله بعد البوية تطلع احسن



-بالنسبة للسقف المطبخ كنت زيك محتارة بس حطيتها جبس لإنه الشرائح أبدا مادخلت مزاجي حسيته زي حق المعارض والمحلات والحمامات حطيت جبس فقط كرانيش سادة وطالعة حلوة بس اشترطي على الجبس الخاص بالحمامات والمطبخ أنه لازم يخلطونها بمادة اسمها اسكادورا اظن هذه تحمي الجبس من الرطوبة والحرارة وعادة يحطونها للجبس لخارجي بس أنا خليتوهم يحطونها برضه للحمامات والمطبخ.



-وحسب ما سمعت من زمان أن كيس الجبس الفرنسي 50 ريال والجبس السعودي 5 ريال شفتو الفرق كيف.
بس سألت واحدة خبيرة بالديكور قالت انها صممت لبيوت كثيرة جبس عادي في المطابخ والحمامات وماتغيرت معاهم وقالت لي حتى أنه لو تغير لونه ودهنتيه بويه 5 مرات كل سنتين ثلاث بيطلع معاك ارخص مما لو عملتيه بالفرنسي فنحن صرفنا نظر على طول عن الفرنسي.


- بالنسبه للبراويز افضلها من اسفل فقط في المجالس الرسميه يعني شريط عضي ومن تحته براويز عشان ما تقيدك في تعليق اللوحات هذا لو حبيتي
انا فكرت اعملها وزوجي كلم الجباس وبعد ما غيرت رأيي لقيته بدأ الشغل وخلص صالون الرجال
الشكل طلع حلو واعطى رسميه للمكان وميزه عن بقيه البيت فخليته
بس طبعا لو عملتيها ما اعتقد انها تمشي مع صرعات الديكور التعتيق والمكسيكي والذي منه
يعني البويه السادة تناسبه اكثر جبس اللي بالسقف لو تغيريها افضل.


- وانتبهي من اللحين حددي الاشياء اللي بتصلحونها بالجبس مثل الاقواس لاني يوم خلص من السقف كان فيه مدخل يودي لحمام الرجال وكان نفسي يحطه جبس ناعم فقال ليه ماقلتوا من اول اللحين الجبس حق السقف نازل ومقدر اصلح قوس.


-بالنسبه للجبس انا جبت شركه متخصصه وهي الحقل الاخضر اللي في التخصصي بس صراحه شغلهم مره حلو, بالنسبة لأسعار الحقل الأخضر كانت مررة مرتفعة والجبس أحنا ماتكلفنا فيه ولاحطينا موديلات
بس بالنسبة للديكورات الداخلية اللي على الجدران هم اللي راح ينفذونها لأن عندهم حركات روعة ومايرضون نصورها00لكن الأسقف ممكن تجيبين معلم من المحلات العادية وراح يضبطه لك ويعطيك ضمان



-بالنسبة للمكيفات السبليت اشوف انتو ممكن تحددوا أماكن معينة تحطوه فيها زي المجالس والصالات أحس احسن فيها السبليت
أنا عن نفسي في بيتنا حطيت كل البيت اسبليت ماعدا خمسة غرف وهي 3 غرف نوم الأطفال وجلس الحريم وغرفة الخادمة وندمت أني ما خليت مجلس الحريم سبليت.


-اختي انا ركبت قبه زجاجيه في البيت فوق الدرج من الزجاج الملون صحيح انه اقل جمالا من الزجاج المعشق بس الميزانيه فرضته علينا
الزجاج المعشق راح يكلف 17 الف ريال زجاج دائري ملون وفوقه حمايه ضد الشمس والكسر
ان شاء الله راح نركبه في المستقبل
وركبنا في الوقت الحالي الزجاج الملون ماشي حاله وهو خايط من البلاستيك والزجاج وفيه منه اشكال وانواع كلفنا 4000 ريال



يتبع....


نبضة صادقة غير متواجد حالياً رد مع اقتباس

قديم 07-11-1431 هـ, 09:20 صباحاً   #6
نبضة صادقة

محررة
 
الصورة الرمزية نبضة صادقة
 
تاريخ التسجيل: 16-05-1425 هـ
المشاركات: 1,705


الأرضيات + سيرميك الحائط:

قبل تركيب السيراميك اساسات الصباغة والبويه عشان ما تنعدم الأرضيات
-السيراميك كله سيراميك لا يغرونك واللي يناسبك حطية انا مثلا اشتريت من محل فخم اسمة سارة اكيد تعرفونة ايطالي والمتر ب120 ريال وللاسف بعد اسبوعين لقيتة في طريق الخرج تعرفون بكم 35 ريال والللللللللللله قهر صحيح هو اسباني لكن في النهاية سيراميك محد عارف من وين مصنعة
بالنسبة لجدة لديكم اعتقد كيلو 9 بطريق مكة ارخص مكان اما الرياض فية طريق الخرج ونصيحتي ان تقومو بزيارة الى المحلات الفخمة لمعرفة ماهو الجديد وطريقة التركيب الجديدة ثم تذهبن الى هذة الاماكن ستجدن كميات مهيلة من الافكار والالوان والخامات والكلام نفسة عن البورسلان اختاري ما يناسب ميزانيتك ولا يغرونك بقولة يتحمل كذلك لديك الخزف السعودي عندة تشكيلات حلوة وعن تجربة رهيب كنة الايطالي
المطابخ برضة سيراميك واحسن الانواع المعتق لانة موضة ولا يعكس لمعة تجهر العين بس في الحمامات والمطبخ ابتعدى عن الكريزي كت اي المعرج والمطعج لانة مع الوقت يلم اوساخ وما احنا ناقصين..
-اما الرخام فافضل مكان طريق الخرج كذلك عندك الملحم والاجيال وعدة اماكن كثيرة تتراوح حسب انواع الرخام وحسب مقاساتها اذا كانت استلندر اي تجي مقصوصة من بلدها وعاة تكون 30*30 او 30*60 او 60*60 او تكون الواح كبيرة ويسمونه اوبن بوك وهذي غالية ولكن تريحك من ناحية الالوان لانك لو شريتي استاندر ستضطرين لتفحص كل صندوق لاخراج البلاطات التي لونها شاذ من المجموعة
ونصيحة لاخواتي ابتعدوا عن رسمات الرخام والسيراميك في الوسط لانها ستعقدكم عند الفرش وبالذات للسجاد واذا اردتم وضع بوردر يجب ان توزعون الفرش الاول حتى تعرفون مقاس البوردر بالظبط والا وجدتم مشكلة في هذا الامر
-الرخام يتشرب اللون بعضه بسرعه وبعضه ببطء والطريقة الصحيحه انك تاخذين عينه من المصنع وتحطين عليه مويه وتشوفين بعد فترة ان كان بقع او لا انا عن تجربه بقع عندي نوع ابيض اسمه كرستال صار كني كابه شاي بالصاله وهنالك انواع بامكانك استخدامها وهي الروزا سعرها معقول واهم شي في الرخام انه ما يتعرض بكثرة للماء يعني لا تسوين فيها نظيفه مجرد يمسح بقماش ناشف فقط يوميا او مبلول قليلا اسبوعيا لان كثرة المسح تذهب اللمعه واحرصي على عدم تعريضه لاي مواد صناعيه
اما بالنسبه لاستخدامه في الجدران لابد ان يكون السماكه 1 سم والارضيات 2 سم اما الدرج 3 سم
وفي حال استخدمت الرخام القطع الكبيره اي ما يسمى الاوبن بوك او قمت بعمل رسمات بالووتر جت يجب ان تقومي بتوزيع الفرش والسجاد على المخطط وتعطيه لمن سيصمم لك الرسمات او الووتر جت اولا حتى لا تذهب سدى عندما تفرشين بيتك وهذا ما يحدث في كثير من البيوت للاسف



-أدعولنا نسيت أقولك غلا الروح ترى الأسعار عندنا متفاوتة فيه سيراميك شفته يوصل الواحدة 150 ريال بس أنا فرفرت كثير كثير ألين ما لقيت المناسب وبسعر مناسب وساعدني أنه جا التبليط عندي على اخر السنة الميلادية وكانت كل محلات البلاط الكبيرة عاملة تخفيضات يعني السيراميك اللي مشترياه ب25 ريال كان قبل شهر بس ب45 ريال واللي 35 كان ب55 ريال بس حظنا حلو أنه رخص
انصحكم تشوفوا وكلاء سيراميك رأس الخيمة عندكم لإنه بصراحة أسعارهم حلوة وبلاطهم يجنن ويحاكون البلاط الإيطالي بس المطابخ ما عجبتيني عندهم والأرضيات نفس شكل الإيطالي بس أسعارهم شويه كانت فوق الميزانية عندي فما أخذتها منهم ولا اسعارهم أرخص من الرخام طبعا 45 فما فوق



-اشوف البورسلان أحسن من السيراميك ويعطي فخامة وكمان السيراميك فيع عيب لو نخدش وتكسر جزء بتبان طبقة الفخار البنية اللي تحت وتشوه الأرضية بس البورسلان أقوى و يكون طبقته بيضه وماتبان
أنا كل أرضيات أخذتها بورسلان
ماعدا الحوش أخذته تراكوتا
أختاري الوان فاتحة بيج واصفر فاتح وخشبي يعني روحي خذي ليك لفة ولفتين على المحلات ولاتشتري على طول لإنه في اشياء تعجبك من أول نظرة بس بعدين تغيري رأيك وخذي عينات.


-بالنسبه لارضيه المطبخ طبعا افضل شي وبلا منازع البورسلان المطفي او المعتق عشان ما يزحلق وكمان عملي اكثر من السيراميك واحلى ما فيه ان مافي فراغات بين الحبات ومافي ترويبه اللي لونها
دايما يتغير وتتوسخ.


-أرضية ألمطبخ : الأفضل بورسلان اسباني مطفي.


- سبب تكسر البلاطات مو عيب في التركوتا ..لا...عيب المبلط لانه اكيد ترك فراغات تحت البلاطة وهذا هو سبب الكسر......
لازم تحرصوا بعين قوية على المبلطين انهم مايتركوا فراغات تحت البلاط لا في الجدران ولا الارضيه مو خذني جيتك بلط وامشي.. لا... شدوا عليهم لان بعضهم الغش في دمهم والعياذ بالله
صح كلام رتووش البلاط إذا تركت فراغات تحته لم تمتلئ بخلطة الإسمنت يتكسر بسهولة اي كان نوعه وسمكه



-بالنسبة للرخام : أنا زيك ما احب الروزا والواحه ايش رأيك في الكريم مارفل روعة بصراحة وما يعلى عليه وإذا حاجة ارخص عندك البرلاتينوالإيطالي اعتقد سعره 150 ريال والكريم مارفل 250 ريال
ودي تروحين لطريق الخرج بتلاقيين كل انواع الرخام ومحلاته هناك بس روحي بدري من العصر لانهم ما يفتحون بعد صلات العشاء وبتشوفين الي ما شفتيه في التخصصي تراني انبهرت يوم رح,
وبالنسبه للكريم مارفييل تراه انواع يعني كله فرنسي لكن من عيوبه انه حساس جدا على الرطوبه يمتصها بسرعه ويبقع
بعدين ولو رحتي للملحم الي في طريق الخرج عند 4مستويات من( الكريم مارفييل) تختلف وفقا للمعان ودرجة المساميه وامتصاص الرطوبه وكل وحده بسعر يبداء من 250 للمتر للبلاط الى 350 ايضا للبلاط وليس الالواح اما الالواح فحدث ولا حرج شي لا يوصف جمالا وسعرا
ولكن مهندسنا يقول ان فيه رخام اسمه( بوتشينو )ايطالي افضل في المواصفات من (المارفيل) واقل قابليه للكسر بعد التركيب لقلة المساميه فيه ورحت شفته عند (دار مار)
ايضا في طريق الخرج تحسين انه ذوق وراقي وارخص من( المارفيل) لان متره ب240 ريال للبلاط وفيه منه الواح
ولما سالت عنه في المحلات مره مدحوه وقالو ان سبب ارتفاع سعر( المارفيل) ماهولزيادة جوده بقدر ما هو مسالة عرض وطلب واقبال من الناس عليه وليش نخفض سعره دام فيه اقبال عليه !!!الي قلو ها الكلام عندهم النوعين المارفييل والبوتشينو ولا وده اننا ناخذ الا مارفييل اربح له.


- بالنسبة للدرج اشوف احسن شيء لها الرخام ويتحمل
بالنسبة للرخام انا اشوف انه احسن منه على الأطلاق هو الأيطالي وطبعا في اشكال والوان كثيرة منه بس حسب اختياركم والقطع الكبيرة الألواح ( اوبن بوك ) تناسب المساحات الواسعة واذا كانت المساحة صغيرة او متوسطة اشوف البلاط انسب طبعا الألواح اسعارها اغلى من البلاط
وهناك من يفضل نوع يسمى الروزا ( برتغالي ) يجي فيه على خربزي وهذا برضه سعرالحلو منه غالي
بالنسبة للأرخص في الرخام أظنه السعودي والعماني والمصري والتركي ( بس الجرانيت السعودي غالي جدا )
انا اشوف الأرخص والجودة هو التركي



-انواع الخامات للمنزل تختلف فمثلا الصوالين والصالات الرئيسية رخام او بورسلان او سيراميك معتق حسب المقدرة المالية للشخص
غرف الاطفال والمعيشة والنوم الرئيسية يفضل الباركية لانه صحي اكثر من الموكيت ودافي في الشتاء افضل من السيراميك وكذلك للمكتب
الالوان المناسبة لغرفة النوم الرئيسية هي الخربزي المعتق او البيج المصفر المعتق او التفاحي والازرق الفاتح والموف وكلها معتقة ولا نستطيع
ان نحدد لون بعينة لان هذا راجع للذوق الشخصي ولكن ابتعدي عن الالوان الغامقة او الاحمر بدرجاتة لانه مثير للاعصاب
الاخت ابداع : انتشر في الاونة الاخيرة التعتيق وهو جميل ويعطي احساس بالفخامة اما الالوان فتتحدد حسب المفروشات ومساحة الغرف فالغرف
الصغيره يفضل لها الوان فاتحه اما الكبيره فيمكنك استخدام الوان غامقه او فاتحه

لا يوجد لنا فرع بالدمام ولكن يمكنك زيارتنا بالرياض ونقوم بعمل ما ترغبين بة وارساله لك بالدمام
بريدنا الالكتروني هو :sarvozeah@naseej.com والتلفون هو 4704721 (مقابلة مع صاحبة مركز سارفوزية)


-المارفيل هو نوع من انوع الرخام ( فرنسي ) يسمى الكريم مارفيل
مشكورة



-انتي أثرتي موضوع من اهم المواضيع اللي يحتاج لها الواحد في منزله ومن خلال مقارنات قمت بها شخصيا تاكدت انه كل نوع منهم يصلح لمنطقة معينة
الرخام :- انواعه لاحصر لها ويمكن التلاعب فيه بسهولة من الموردين
يركب في المجالس الدرج ممكن في غرفة النوم الرئيسية
طبعا ملاحظة الأخت بأنه لونه يصسر باهت صحيح لكن هذا لرخام معين مثل الرخام العماني مع ان ألوانه من أروع الألوان
لكن بعد فترة يعمل حفر ويبهت وممكن تشوفينه على الواقع في مسرح شاطئ الراحة بأبوظبي
طبعا علشان توصلين لرخام جيد وبسعر مناسب خذي الرخام التركي وحاليا في نوع اسمه (ببتشينو)
وطبعا الاسباني والايطالي افضل وافضل مثل (الكريما مارفل)
في النهاية ماأنصح من خلال الاستشارات والخبرة بتركيب الجرانيت داخل المنزل وبامكانج تظيفين لمسة جمالية
راقية على المساحات الواسعة منه باضافة رسومات ليزر .

الجرانيت :- يعتبر أفضل شيء وبدون منازع لمدخل الفله والدرج الخارجي ويتحمل تقلبات درجات الحراره
ولايتشرب السوائل علشان شذي يستخدمونه في المطابخ بجوار المغسله والفرن لكن مايعطي فخامة الرخام
( معناته كل شيء له مكان معين)
أخيرا بالنسبة للخشب أو الباركيه طبعا أنا أنصح بالفينل لأنه طبي وراقي وفيه كل درجات الخشب
وممكن تركبينه في أي مكان (غرف النوم ، الممرات ، حتى الصالة الرئيسية ) وموجود في محلات كاربت لاند في الامارات ...انتهى


- بديتوجبل الشمس سؤالك طبعا عن بلاط الجدران انا افضل لحمامات لغرف النوم البلاط اللامع و المطفي بلمعة بسيييطة بس مو معتق.. وحمامات الضيوف الرسميه تكون مطفيه تماما او معتتقه افخم
اما الارضيات ماينفعلها اللامع ابدا لان كل نقطة مويه عليه لو نشفت و ما تمسحت تعمل اثر بس يتمسح يروح.... وهذه غلطتي في حمام الصاله مع انه حلو بس متعبني <<<< لكل جواد كبوة



-البورسلان الصيني بالنسبه لي ماجربته انا شريت الاسباني لاني بصراحه اخاف من الصيني بالرغم انهم يقولون ان البورسلان الصيني ان نوعيته جيده ويتحمل
وغرف النوم ليه ماتبلطينها سيراميك خشبي انا صلحت في المقلط سيراميك خشبي من عند المدى روعه وندمت اني ماحطيت منه في غرف النوم وغرف نومنا حطيتها بورسلان اسباني هو روعه بس يالله خيرها بغيرها والنوع الخشن وش قصدك ملمسه خشن او انه مطفي لان الي شريته مطفي بس مو خشن لان الخشن يمسك الوسخ حتى لوانه غالي.


-البورسلان مجربين الأسباني ونصيحة ابعدي عن الخشن يجمع الوسخ واللي يلمع لأنه يزحلق الأولاد فيه بحري والتفاحي والبنات الوردي رائع والمنتدى مليان أفكار للبنات تحير من روعتها.

-وسيراميك الحمامات الله يكرمك من نجم اباحسين صحيح غالي شويه بس ماتلاقين تشكيلته في مكان ثاني.والمطابخ من عند المنى.


-غرف النوم عندي موكيت ... الموكيت افضل لغرف النوم لعدة اسباب اهمها امتصاص البرودة والصوت وشكلها افخم بالموكيت حتى ارفى الفنادق والفيلل الفخمه غرف نومها موكيت وهذا واضح في المجلات.
بالنسبة للرخام انا اشوف انه احسن منه على الأطلاق هو الأيطالي وطبعا في اشكال والوان كثيرة منه بس حسب اختياركم والقطع الكبيرة الألواح ( اوبن بوك ) تناسب المساحات الواسعة واذا كانت المساحة صغيرة او متوسطة اشوف البلاط انسب طبعا الألواح اسعارها اغلى من البلاط
وهناك من يفضل نوع يسمى الروزا ( برتغالي ) يجي فيه على خربزي وهذا برضه سعرالحلو منه غالي
بالنسبة للأرخص في الرخام أظنه السعودي والعماني والمصري والتركي ( بس الجرانيت السعودي غالي جدا )
انا اشوف الأرخص والجودة هو التركي
المارفيل هو نوع من انوع الرخام ( فرنسي ) يسمى الكريم مارفيل



-انا شايفه سيراميك عند البيدق بالتخصصي الوااح مو قطع حجمه كبيييييييير كنه باركيه ونصيحه للي تقدر تخلي غرفه النوم الرئيسيه باركيه، مامنعني عنها الا الميزانيه ماتسمح ولا كانت امنيتي بصراحه


-المهم حنا طبعاً جالسين نلف على البلاط وكان نفسي بالحجر القدسي لأني شفته عند أوربت ودخت عليه وهو جداً صلب وقوي ومايتأثر بأي شيء ينكب عليه وهذا بالضبط هو اللي أعجبني فيه
حتى إني ماخليت شيء ماجربت عليه من حكحكة بالمفاتيح إلى إني عصرت عليه ليمون وماشاء الله مثبت جدارته
بس طبعاً الزين القوي لازم يكون غالي
هو طبعاً كذا نوع وانظف نوع اسمه A51 ويجي بيج وعروقه بني فاتح على ذهبي
والنوع اللي بعده اسمه A31 ويجي أغمق درجة وعروقه برضه بني فاتح لكن على رمادي شوي
بس الآن صرفت النظر عنه لأني لفيت على محلات الحجر اليوم الصباح وكلهم ما عندهم أصلاً نوعية نظيفه ( يعني عندهم بس حق جدار خارجي مو شيء نظيف ومجلي حق داخل البيت )
بس لقيته عند حجر الشرق وعند محل في شارع الروضه اسمه الرخام الأنيق بس يظل سعره غالي ب 330 ريال بعد المراعاة والمكاسر
بس أعجبني البوتيشيني عند تراكو لكن قريبتي توها بيتها جديد وماخذة من عنده وتقول انكب عليه عصير الليمون وما راحت البقعة.



-بالنسبة للبلاط أنا أقول لك اختاري اللي تختارين بس أهم شيء ابعدي عن الجرانيت
الجرانيت ثبت علمياً إنه يصدر اشعاعات في البيت وحنا موناقصنا كفاية علينا الإشعاعات اللي طالعة من الأجهزة الألكترونية <<< مو كأني قلبت مريم نور ؟؟
اسمعي عزيزتي انا بقول لك مميزات وعيوب كل نوع من أنواع البلاط وأنت براحتك اختاري
طبعاً أصح شيء ممكن تحطينه هو الخشب لأنه يمتص جميع أنواع الإشعاعات الضارة الموجودة في المنزل والناتجة من الأجهزة الكهربائية المختلفة وكمان الناتجة من المجالات المغناطيسية للأجهزة اللاسلكية في البيت مثل الريموتات بجميع أنواعها وشبكات الانترنت اللاسلكية عشان كذا دائماً ينصحون بالخشب في غرف النوم وفي المكاتب
عيبه طبعاً : إنه لازم له صيااااااااااااااانة أكثر من أي نوعية بلاط ثانية ولابد من اختيار نوعية كويسة ومعالجة حتى تضمنين إنه ما يجيب حشرات وطبعاً معروف إنه النوعيات الكويسة منه غالية وأغلى من الرخام حتى بس فيه نوعيات وسط منه
الرخام والحجر الطبيعي
كلاهما ميزته في إنهما كونهم طبيعيين إنهم مثل الخشب يمتصون الأشعة الضارة في المنزل لكن درجة امتصاص الخشب أقوى شيء ثم الرخام والحجر تختلف درجة امتصاصهم بحسب نوعية الرخام أو الحجر نفسه فبعض الأنواع تمتص الأشعة أكثر من الثانية بس لا أحد يسألني أي الأنواع أشد امتصاصاً
عيوبهم : طبعاً هم بحاجة لصيانة دورية ولكن أقل من الخشب الرخام والحجر الملع يحتاجون للجلي الدوري والذي يختلف حسب النوعية والمكان ... كمان فيه عيب كبير فيهم إنهم ما يتحملون الحمضيات مثل عصائر البرتقال والليمون وبعض المشروبات مثل القهوة وأي بقعة لو ما لحقتي عليها بالموية والفيري جلست معاك طوال عمركمرات تروح مع الجلي ومرات لأ
طبعاً الحجر الغير مجلي تجي منه أنواع أقوى من الرخام وأقوى من الحجر المجلي وأنا عن نفسي جربت على قطعة حجر غير مجلي عصير الليمون وعصير الفيمتو وتركتهم فترة ويوم مسحتهم مابقى أي أثر وهذا أحد أهم الأسباب اللي يجعل الناس تستخدمه في خارج المنزل
البورسلان : أقل امتصاصاً فبالتالي أقل من الخشب والرخام والحجر من الناحية الصحية لكنه يمتاز بأنه شدييييييييد التحمل فيحتاج لأقل قدر من الصيانة فينفع في الأماكن (اللي عليها كرف ) كمان بعضه يجي مقصوص قص ليزر فيركب مثل الرخام والحجر بدون أن تظهر الترويبة ويجي طبعاً أشكال وألوان لامع ومطفي ونص لمعة ومنه على شكل خشب ومنه على شكل رخام ومنه على شكل حجر كمان
السيراميك: وهو أقل الجميع امتصاصاً وأقل من البورسلان في التحمل لأنه عند الخدش يظهر اللون البني المحمر اللي أسفل طبقة اللون العلوية بعكس البورسلان اللي كله لون واحد فحتى لو تم خدشة فلن يظهر لك سوى نفس لون السطح
هذي المعلومات اللي عندي والناتجة عن 3 سنوات من البحث والتقصي عسى ربي ينفعكم فيها وتستفيدون منها.


-ارخص رخام كريم مارفيل متره ب250 ريلل سعودي,وارخص رخام في السوق اسمه سسيلي وهذا الي ينحط صف تحت في لسفل السور عادة علشان ما تتقشع وتتقشر البويه من الرطوبه او الاوساخ ,وكذلك اسفل سور الحجر حتى ما يمتص رطوبه ودهون من الشارع ويحافظ على لونه بدون تصبغاتوهذا متره ب60ريال
واختي ابي افيدك بالنسبه للارضيات (البار كيه)اي الخشبيه
لان يبتي الحالي كله باركيه ما عدى المجلس والمطبخ
اولا حددي الهدف من وضعه
اذا كان النظافه مع المحافظه على درجه من العزل للارضيه يعني ادفى من السيراميك شتاءبكثير
وما فيه وجه مقارنه , وما يتعب الاطفال ببرودته
فعليك بالباركيه الحقيقي( بالخشب )لان فيه باركيه من m.d.f يعني خشب مصنع ومضغوط
وهذا مهوب ذاك الزود والناس يحكمون على الباركيه ظلما بانه مافيه فرق بينه وبين السيراميك وما يعزل ووووو
وعلى العموم فيه وكيل جيد للبار كيه الزين اسمه( باقر للارضيات) نهايه شارع التخصصي باتجاه الجنوب ولهم فروع في جميع انحاء العالم واذا تحبين ارسلل لك رقمهم على الخاص تامرين امر
انا اخذت من عنده من 5 سنوات وما شاء الله ما تغير بس هو يبي له تنظيف على الجاف
مهوب زي السيراميك مايخالف بالماء

يتبع...


نبضة صادقة غير متواجد حالياً رد مع اقتباس

قديم 07-11-1431 هـ, 09:33 صباحاً   #7
نبضة صادقة

محررة
 
الصورة الرمزية نبضة صادقة
 
تاريخ التسجيل: 16-05-1425 هـ
المشاركات: 1,705


النوافذ و الأبواب و الدرابزين:


-بالسبة للشبابيك تاتي بعد اللياسة طبعا اغلى محل ومجرب هو غرناطة وعندك كذلك المانكو اختاري الشبابيك الالمنيوم اللي بلون الخشيب يزيد سعرها شوي بس شكلها اروع واذا كان بيتك ستايل ريفي او مكسيكي تمشي معة مرة ولازم تكون الشبابيك عازلة للصوت والحرارةوتكون عبارة عن شريحتين زجاج بينهما منطقة مفرغة من الهواء
وفية ناس سوو في الصناعية بس السعر قريب والجودة ما عندك احد امتلت بيوتهم غبار
بعد ذلك الابواب فية اماكن كثيرة ومناجر كويسة ممكن تسوين عندهم ابواب حلوة ودرابزين جميل اذا كنتي بتسوين الدرابزين خشب والابواب شغلها كويس في الصناعية وكذلك الدواليب حقت غرف الملابس
نسيت اقولك الشبابيك اذا بتحطين فيها شتر كهربائي لازم تقولين للكهربائي وتنسقين بينة وبين شركة الالمنيومحتى يسوي تمديداتة
زنصيحة لجميع الاخوات ايااااااااااااااااااااااااكم ان تضعون التشطيب على المقاول لانه سيختار اردا الانواع ليوفر اكبر قدر من النقود وانتم عارفين نوعية مقاولينا من نوع اهبش وانحش ما يهمهم المواطن ابد.
-بالنسبة للابواب بحرها واسع ولكن اقدر افيدك بكذا نوع :
اولا الارخص ويكون عبارة عن عوارض بالعرض من الخشب السويدي مغطاة بقشرة ابلاكاش وهذة تتراوح من 300-450 للباب مع الكيلون والمفصلات وننصح بها لمن يريدون ابواب ملونة او بيضاء
ثانيا نفس الطريقة ولكن القشرة تكون من خشب السنديان وهي تتراوح من 700-1000 حسب المنجرة مع الكيلون والمفصلات طبعا هذي الاسعار للباب الاستاندر وهو من 90-110 عرض ومن 200-220 طول لانه كل ما تغير مقاس الباب زاد السعر
بعد ذلك تجي الابواب الغالية وهي التي تكون سولد اي عبارة عن قطهة خشب وهذة تستعمل للابواب التي فيها حفلر ورسمية مرة لان سعرها مرة غالي من 3000-5000 للباب اربما اكثر
وبالنسبة للباب الخارجي للفيلا الاامن ان يكون باب مو حديد لان الحرامية قصوا الحديد لكن فية ابواب عبارة عن حديد قوي مغطى بقشرة خشب رائع الشكل



- بالنسبه لشبك الحراميه احسه يبيخ المنظر الشتر احلى بكثير.
-اختاروا نوعيه ممتازة للشبابيك يكون عزلها تام من الامطار والغبار وافضل شركة على الاطلاق بالمملكة شركة وينتك (( ترى عن تجربة ومو دعاية ((


-الأبواب : عندك خيارات عدة سنديان أو ماجنو افريقي للأبواب المداخل
والسويدي ( لو تختاريه للداخلي ) لازم يكون النوع الممتاز منه ومن غير عقد ولا زم تشترطي وتشوفيها بنفسك
وإذا عندك ميزانية ممكن تخليها سنديان أو ماجنو.



-الدربزين : ممكن خشب أو حديد مشغول أو استنسل استيل مع زجاج يعني انتي وذوقك أو حتى زجاج مع حديد مشغول أو زجاج مع خشب.


-ونصيحه للي بتصلح الدرابزين زجاج واستيل لان وحده منهم حاطته في بيتها وتذمه تقول يبي له نظاااافه على طول اي شيء يبان فيه


-ولا تنسون تخلون الكهربائي يمدد لجرس انذار الحريق مهم وللأنتر فون ويكون بكاميرا
واما هواية الحمام الاحسن تكون بالسقف اشيك وانظف وفرقها عن العاديه 400 ريال.


-بالنسبة للنوافذ تراها غالية شوفي اللي كتبته في الصفحة السابقة ترى ما تتجاوز لو كانت المنيوم نوع طيب وكويس 350 وهذا لو دبل جلاس اما العادي يكون 250 نحن هنا حنتعامل مع شركة اسمها السعد والقطاع حيكون سرايا وزجاج مفرد 250 للمتر واظن بيرخص كمان شويه
شركة السعد عنوانها بجنب المانع على نفس الخط اللي فيها شركة الزاهد للتراكتورات على طريق مكة اظن قبل الهلال الأحمر السعودي.



-المتسوقون هذا عنده أبواب ودرابزين صح ؟ صحيح ذكرتيني فيه مدري شلون راح عن بالي هذا أهل زوجي كانوا مسويين عنده باب مدخلهم كان مرة حلو شغله بس مررررة غالي
أظنه بطريق المدينة بس فوق يعني إن كانك رايحة لمركز الحارثي يجيك على اليسار.


-الشبابيك خليها عاكس زي ماقلتي وخليها بالطول لا تصغريها انا احب الشبابيك الطويله احسها تشرح المكان وطبعا البلاك اوت لابد منه في الليل
سر الالم ...الابواب السادة حلوة ومريحه في المسح بس تناسب الشقق اكثر... انا سويتها بالملحق
اما الفلل تكون فيها شي بسيط يحليها ويفخمها مو لازم حفر كثير ونقش وخرابيط
الجالس ينحط زجاج مع الخشب والا لا؟؟ مافهمت ايش هو الجالس
بس لو تقصدي ان الابواب الخشب ممكن يتعملها زجاج ايوه ممكن ليش لا
انا عملت ابواب المطبخ خشب مع مربعات زجاج مقسى وبعضها مربعات مرايا تعطي شكل فخم وذوووق
المداخل انا احب الخشب بس انه مع مرور الوقت ينعدم من الشمس والرطوبه
في حديد صلب شفته عند شركة المتسوقون قبل لا ينقلوا منعندنا ((الشركات العدله كلها نقلت الله يسامحهم))
شكله حلو وكانه خشب وقوي جداا ... ترى هذه الابواب غيرابواب الامان .. الامان محل ثاني
ريت يا اختي قمرا توضحين النقطه هذي.



- بالنسبه لشركة وينتك اللي سوتلنا الشبابيك سعر الزجاج ارخص من سعر البي في سي
يعني كلفتنا هذه الاربع اكثر مما لو كان شباك واحد كبيييييييير لان الغلا في البي في سي مو الزجاج
اسالي لوكان الالومنيوم نفس الشي فالافضل تخليه شباك واحد كبير ارخص.


ــ من مواصفات الفلل الراقية:التشطيبات قد تكلف مبالغ طائلة حسب الطلبات واضرب لك مثل فقط هناك ابواب للفيلا الداخلية قد تكون تكلفتها كبيرة جداً وقد يصل المتر الى اكثر من 2500 ريال من شركة رزوم ، وقس على ذلك الرخام واعمال الجبس والدهانات والابواب والالمنيوم والدربزين ، والمغاسل وغيرها ، فأسعارها تتفاوت بشكل كبير .
-هذاموقع (المساكن لأبواب الفيبر قلاص) فيه كاتلوج لأبواب الفيبر قلاص (المقاومة للحريق) و بأشكال جميلة للغاية:

http://www.masakin.com.sa/
-بنات لقيت موقع نوافذ وينتك اللي تكلمت عنه رتوش

http://www.winteksa.com/



-وبالنسبه لدرابزين الدرج انا لفيت التخصصي كلله مالقيت اروع من الجربوع عنده صبغ الدرابزين شئئئئ فخم كلن يقدر يسوي درابزين بس الكلام على الاكساء.


-شفتي الابواب اللي على بيوت النااس ومنتشره تجيك حديد مشغول وخلفه شفاف كأنه زجاج هذا اسمه لكسان يجي منه الواان ونقشاات وهو ضد الكسر.


-بالنسبه للشبابيك مهندسنا يمدح لنا شركتين للشبابيك الاولى غرناطه والثانيه لادا للالمنيوم ، وانا زرتهم ممتازيين وهم التب في مجال الشبابيك خصوصا غرناطه لانه ضمانه5 سنوات، و لانه يعطي حلول مبتكره للشبابيك مثلا غرف الاطفال يحط شبابيكه بمفتاح للناحيه الامنيه - تقدريين تقفلينه اذا بغيتي تطلعين مثلا وغيره وغيره
وحل مشكله الشبابيك الطويله انك تحطين شتر بالكنترول للصباح وباليل اذا كانت الزجاج عاكس والاضائه هاديه بالغرفه فيكفيك ستاره شيفون
وانتي جربي اول خلي يطالع الشباك من الشارع ويرد لك بالخبر اليقين والا ما لك الا ستاره بلا ك اوت الله يجيب هالمرحله على خير



يتبـــــــــــــــــــــــع...


نبضة صادقة غير متواجد حالياً رد مع اقتباس

قديم 07-11-1431 هـ, 09:43 صباحاً   #8
نبضة صادقة

محررة
 
الصورة الرمزية نبضة صادقة
 
تاريخ التسجيل: 16-05-1425 هـ
المشاركات: 1,705


تركيب الأدوات الصحية:


-والتسريحه انا مكبره المغسله اللي في مدخل الغرفه وحاطه على جنبينها دواليب طويله عشان اخزن فيها اغراضي كلها من مكياج وكريمات وزيوت واستشوار ولفافات شعر واما الاكسسوارات بخليها على التسريحه اللي بحطها في غرفة النوم ولا راح اتكلف فيها.


- أم عموري ياعسل الخلاطات كروم اسمها LCM اتوقع صيني بس نوع ممتاااز وبعض الصناعات الصينيه تحسنت و صارت تضاهي الماركات العالميه ...اخذناها صيني وقلنا هذه من الاشياء الي ممكن تتغير بعدين وقتها اعلانا افلاسنا هههههههههه
الاسعار ما افتكرها والله ودورت على الفاتورة ((الفواتير كلها حطيناها في ملف كبير)) بس مالقيت غير حق البوديه وسعره 150 ....اتوقع الخلاطات حق المغاسل 90 ريال بس مو متأكدة
قربت على السنتين وماشاء الله كانها جديدة من مسحة وحدة تلمع اخذت نوع كروم مطفي مره حلو ونوع لامع.



-والمغاسل بصلحها دواليب خشب عشان استفيد من الدواليب اقل مافيها اخزن فوط المسح والمطهرات فيها عشان اقرب لي ولا اتعب اشيل ادوات التنظيف من محل في محل.


-نسيت اقولك الجاكوزي انا اشتريته من اليوبي حق شخصين يعني جلستين ومخدتين ، وفيه اكثر من شغله ،يعني بخار ..رشاشات مساج للظهر ..رشاشات مساج للاقدام....وتلفون وراديو ومني عارفه ايش يعني كثير شغلات هذا غير الجاكوزي وطبعا له باب شفاف ينقفل واضاءة وسعره 12700 ريال ........تصدقي بالله ما استخدمت الجاكوزي غير مرتين من يوم سكنت يمكن البخار اشغله اوقات بس والله مو ذاك الاحتياج وابشرك قبل اسبوع الكهرباء انفصلت عنه وصار دش وبس حتى مافي لمبه بالنسبه للمراوش المربعه لها اغطيه بلاستيكيه تنباع في محلات الصحيه ومو شرط يكون مقفول من فوق.


-بالنسبه للاولاد مافضل ينحط لهم بانيو خوفا من الغرق لاسمح الله
لان حمام اولادي ماصلحت لهم بانيو خوفا من ذلك بس حمامنا الرئيسي وكان نفسي بجاكوزي بس وحده قالت لي انه يبي له عنايه ونظافه لان فتحات المويه فيه تصدي ومايستاهل سعره ووو فصرفت نظر وقلت التنقع احسن
اما المروش فاحنا بنحط لنا وللأولاد بس مو المغلق كاملا لا بنصلح يابالطوب الزجاجي او الزجاج المعشق احلى وارتب واميز ويكون غير مغلق وشو له الكتمه الله لايكتمنا.


-بالنسبة للمراوش المقفلة أحسها حلوة كثير عشان ما تعمل طرطشة للماء وإذا خايفة من الخنقة ممكن تخليها شوي كبيرة وخذيها بلاستيك قوي احسن من الزجاج وفيه اشكال للأطفال تجي فيها رسومات حلوة ملونة وتشرح الصدر أنا كنت ناوية اشتريها للأولاد بس المشكلة عندي انه بيقفل على نص النافذة ( انتبهوا لهذه النقطة وقت البناء ) فخليته مروش عادي




الصباغة:

-بالنسبه للدهان الصراحة انا مالي في التعتيق بس ما يمنع هذا اني اعطيك رأيي غرف الطعام اشوف يناسبها اللون العودي لو انها كبيرة ....وهذا اللون متخصصلغرف للطعام لانه يفتح الشهية.... لو الغرفة واسعه حيكون رائع ويعطي فخامةوفي اللون النبيتي(( مابين العودي والفوشي)) كمان هذا رائعوممكن تدهني جدار واحد بس غامق اللي فيه الشفنيره والباقي اوف وايتاما الصالون انا اشوف احلى لون هو الاوف وايت القشدي يعطي رقي للصالون وسمعت ان في اشكال طالعة جديدة لدهان الجدران والتعتيق.


-الله يسعدكم يابنات والله أخجلتوني أنا بس حبيت أفيد وعلى ماقالوا زكاة العلم نشره
بالنسبة للألوان المناسبة لكل مكان في البيت هو فعلاً سؤال يتكرر كثير بين كل فترة وفترة في هذا المنتدى ومنتديات ثانية كثير
بس اكيد إنك لاحظتي إنه ماقد حصل إن أحد جاوب جواب شافي وشامل إلا إن وحدة مثلاً تقول أنا اخترت كذا وكذا عارفة ليش ؟
لأنه بكل بساطة في عالم الألوان مافي شيء اسمه هذا اللون دائماً يصلح وهذا اللون دائماً مايصلح
مثلاً الجدار البيج حطيه سادة في شقة ومع فرش عادي صار جداً عادي صح ؟
لكن إذا حطيتيه في مكان واسع وأضفتي بعض الديكورات ودخلتي عليه بعض الألوان الراقية أصبح جداً كلاس صح ؟

طيب أنا بقول لك على الطريقة اللي ساعدتني أنا باختياراتي لألوان بيتي وهي طريقة سبق إني قرأت عنها واقتنعت فيها ونفذتها

يقول لك امسكي مجلات ديكور مختلفة وبستايلات مختلفة واجلسي وانت رايقة ومروقة اتفرجي على المجلات وضعي إشارة عند كل صورة تعجبك وبعدين اتركي المجلات فترة كم يوم
ارجعي مرة ثانية ومرة ثانية سوي نفس الحركة وبتلاقين إن اختياراتك تغيرت
وكل ما كررت العملية هذي بيتضح لك إيش الألوان اللي بتريحك أنت وتعجبك أنت

كمان فادني موقع Better Homes & Gardins لأنه فيه نصائح حلوة وفيه اختبارات للشخصية تحدد لك أنسب الألوان والديكورات المناسبة لبيتك تفضلي الرابط

هذا لتحديد اللون المناسب لشخصيتك:

Quiz: What's Your Color Personality?

http://www.bhg.com/bhg/quiz.jhtml?qu...ref=cat3430016
وهذا لتحديد الديكور المناسب لشخصيتك:

What's Your Decorating Personality?

http://www.bhg.com/bhg/quiz.jhtml?qu...ref=cat3430016


وفي هذه الصفحة تجدين بقية إختباراتهم مثل ألوان الغرفة المناسبة لشخصية طفلك وستايل غرفة النوم المناسب لشخصيتك والكثير من الاختبارات الأخرى المفيدة أنا بصراحة أعشق هذاك الموقع

House & Home Quizzes

http://www.bhg.com/bhg/category.jhtm...ks_Quizzes.xml


أنا عن تأثير الألوان من ناحية نفسية فالكل يعلم أن الألوان الحارة ( الأحمر والبرتقالي ومشتقاتها ) تزيد من نسبة الأدرينالين مما يجعل الشخص أكثر نشاطاً وعصبية
<< هذا السبب خلاني أصرف نظر عن صبغ غرفة نومي باللون العودي مو ناقصني زوجي يجلس يعصب علي كل شوي هههههه بس برضه بحط إن شاء الله بعض اللمسات منه لأني أموت على اللون العودي ومشتقاته

يقولون كمان إن اللون الأحمر والعودي ومشتقاتهم مثاليين لغرف السفرة الرسمية لأنها تعطي فخامة وتفتح من الشهية أيضاً << هذي المعلومة خلتني ما أحطه نهائي في البانتري اللي عندنا في دورنا مو ناقصني سمنة

الأخضر كمان مناسب لغرف السفرة لكن أبداً مو على الطاولة يعني بالجدار أو الستارة أو السقف أوكي لكن المفرش أو الصحون أو الكاسات أبددددداً يقولون نفسياً وبدون شعورالواحد يشوف الأخضر على الأكل يتذكر العفن الغريب ليش طيب ما يتذكر الخضار ماني عارفة ؟؟؟؟

اللونين الأزرق السماوي والزهر الفاتح رائعين لتهدئة الأعصاب بعض السجون في أميركا أضافت اللون الزهر في ديكورها لتهدئة المساجين ويقولون إن التجربة كانت ناجحة !!
لكن من الخطأ إن الغرفة كاملة تكون زهر أو أزرق سماوي بعدين تسبب الإكتئاب فمن الصحي إضافة لون حيوي معهم وأنسب شيء إضافة اللون الأخضر الهاديء

وحدة قريبتي دارسة ديكور وطبعاً دارسة تأثير الألوان فاختارت لغرفة نوم ولدها اللونين الأخضر والأزرق لأنهم أنسب شيء للولد وقالت إنها لو جابت بنت راح تخلي غرفة بنتها زهر وأخضر لأن أهم شيء عندها الناحية النفسية للطفل وهي مقتنعة إن أي لونين ممكن المهندس الشاطر يحطهم بطريقة حلوة ومدروسة

اللون الأصفر جداً رائع لتنشيط الوظائف العقلية فهو أنسب شيء لو كان عندك غرفة للمذاكرة أو مكتبة أو على أقل تقدير في ركن الدراسة من غرفتهم أضيفي بعض اللمسات من اللون الأصفر . لكن حذاري من الإكثار من هذا اللون في غرفة النوم لأنه يجعل الأطفال متوترين طوال الوقت.



- -بالنسبه للتعتيق اذا كان بلون واحد وفاتح يفضل ان يشمل الغرفة كلها واذا كان لديك في الغرفة بنوهات جبس بامكانك استخدام لون افتح او اغمق كذلك
لوكان لديك برواز جبس بارتفاع 90 سم بامكانك استخدام لون غامق تحت وفاتح بالاعلى واذا احببت الفكرة ولم يوجد لديك برواز غطي منطقة التقاء اللونين
بشريط من ورق الجدران كذلك اذا احببت عمل حائط مختلف يمكنك ذلك ولكن يجب ان يكون الحائط معتق بلون وباقي الحيطان معتفة كذلك باللونالاخر ويجب
ان تكون البؤرة الارتكازية للغرفة في هذا الحائط او مقابلة لة مثلا اذا كانت ؤرة الغرفة الارتكازية مدفأة او مكتبة او مكتبة تلفزيون او مراة بكونسول يجب
ان يكون اللون الغامق على هذة الجدار او مقابل لهاوليس على يمينه او شماله
بالنسبة لالوان غرف الطعام المتعارف علية ان تكون من درجات العنابي او الطوبي والخمري لان هذة الالوان تفتح الشهية
وتساعد على الهضم واذا كنت لا تحبين ان تدهني كامل الجدار بامكانك اضافتة كما سبق في البانوهات او تحت البوردر او في حائط واحد فقط. . (مقابلة مع صاحبة مركز سارفوزية).




تركيب الانارات و أفياش الكرباء:

-اما اختيار اطارات السبوت لايت فتعتمد على ستايل البيت ومفروشاتة مثلا :
اذا كان البيت يعتمد الطلاء الابيض العادي فاختار الاطار الابيض العادي
اما لو كان البيت يعتمد التعتيق والستايل الكلاسيك فاحسن شي له هو الاطار البرونز المعتق طبعا انا اتكلم عن طلاء الاسقف
وهناك عدة انواع من السبوت لايت واختاري النوع المتحرك لانه يعطيك مجال ان توجهي الاضاءة الى شئ معين تريدين ان تبرزيه مثل لوحةفي السقف او ديزاين معين
وارغب ان انبه على نقطة بالنسبة للتحكم في الاضاءة اطلبي من الكهربائي ان لا تكون جميع الاسبوتات بمفتاح واحد بل ان تكون بالتناوب اي هناك مفتاح لنصف الاسبوتات بالتناوب اي عندما تولعين واحد بس وتكونين محتاجة اضاءة خفيفة ينور بالطريقة وحدة اية ووحدة لا لان بعض الكهربائيين اهبل يوم تقولين لة نص الاضاءة يقوم يشبك لك كل ضلعين من الغرفة سواء وهذي غلطة رهيبة
كذلك احرصي على ان يكون ترانس السبوت من نوع ممتاز واعتقد ان احسن نوع فيليبس لان الترانس( وهو الجهاز الداخلي للسبوت) الردئ يحمى بسرعة ويحرق اللمبة هذا غير انه يصدر صوت مزعج اما اللمبة اعتقد احسن نوع النمساوي واسمة اويستر وارخص مكان لهذي الاشياء هو طريق الامير عبد المحسن بن عبد العزيز بالملز (طريق الامير عبد الله سابقا) ترى الفرق يستاهل لانهم يبيعون بالجملة وارخص من التخصصي بنسبة 40 بالمئة


-ما فهمت أيش تقصدين بالتناوب ؟؟

أما مشكلة الترانس ( المحول على ما أظن ) فيمكن شراء اسبوت بدون محول

ولتخفيف الإضاءة يمكن استخدام الديمر

طيب اختي ايش رايك في مفاتيح بيركر ؟ وايش أفضل ماركات السبوت ؟؟ وما هو بديل الفلورسنت ( لمبات القلم ) الذي يعطي إضاءة كافية ؟؟؟


اخي d-did مفاتيح بيركر رائعة وتتحمل كثير وفيها خيارات متعددة يعني فية العادي ابو 8 ريال وفية الغالي ابو 100 ريال وانا استعملها من 13 سنة وتحملها قوي وهي المانية وتعيش اكثر من غيرها اما افضل انواع السبوت فهي جميعها متشابهة تقريبا الاعتماد على اللمبة هي اهم شئ وتكون هيلوجين ماركة اويستر اما الديمر فلا افضلة الا لغرف النوم اما الصوالين والقعدات افضل ان تعتمد على اضاءة في السقف مع اباجورات او اباليك حائطية ممكن يكتفى بها اذا اردنا جو رومانسي لانها احلى من الديمر (الديمر و نوع من الافياش يركب ويشبك على بعض او كل السبوتات او اللمبات ويكون يتحرك يمين ويسار لتخفيف او زيادة الاضاءة)
اما لمبات الفلورانس القلم فهي ابشع اختراع للاضاءة في نظري لان اضاءتها بيضاء مصطنعة تعطي احساس بالبرودة والبهتات للاثاث والاشخاص نفسهم والان بديلها هو ان تعتمد الاسبوت والاباجورات والاباليك وهذي اضاءة كافية
انا بيتي كلة مافية اقلام اللهم المطبخ وضعت لة لمبات بيضاء شكلها مدور جميل بس علشان الشغالات اما باقي البيت فلا انصح بها
اما التناوب اقصد بة ان : لنفرض ان لديك غرفة مربعة في كل ضلع 6 سبوت اي مجموع 24 سبوت تطلب من الكهربائي ان يشبك كل 12 مع بعض يعني يكون عندك مفتاحين حين تفتح واحد منهم تكون في كل ضلع 3 سبوتات منورة ولا تكون متجاورة يعني الاولى تشتغل والثانية طافية والثالثة تشتغل والرابعة طافية والخامسة تشتغل والسادسة طافية



-بالنسبة للسبوت الكبير قصدك اللي كبير مرة اللي ينحط في المطبخ ولا المقاس العادي لإنه في كبير وعادي وصغير مرة اللي ينحط داخل التجاويف الجدارية ( النيش )
السبوتات حق الغرف في نوعين نوع لمبه عادي ونوع هالوجين، الهالوجين صرفه للكهرباء اقل من العادي ،الهالوجين حلو لما يتسلط على لوحة او جداريات يبرز جمالها
انا جمعت السبوتات مابين العادي والهالوجين في كل الغرف على حسب الاحتياج
بالنسبه لاطاراتها في الصوالين الرئيسيه اشتريت الاطار الواحد يجمع الذهبي الرااايق مع لون ابلاتيني
وبالنسبه للصالات وغرف النوم فضلت الاطار الابيض احسه اروق ومناسب للمكان وما تحسي ان السقف مبقع بالعكس يصير اهدأ بالذات ان لون السقف عندي برضه اوف وايت
المطبخ طبعا اسبوتات كبيره واستخدمت اللمبات الاقتصادية يعني صفرا بس ما تصرف كهرباء



راح الكثير .. و بقي القليل.. الله يقدرني أكمل


نبضة صادقة غير متواجد حالياً رد مع اقتباس

قديم 07-11-1431 هـ, 09:52 صباحاً   #9
نبضة صادقة

محررة
 
الصورة الرمزية نبضة صادقة
 
تاريخ التسجيل: 16-05-1425 هـ
المشاركات: 1,705


التعامل مع عيوب البناء:


-بالنسبه للعامود من المهم معرفة موقعة وحجمة ولكن عموما هنالك قانونان للتعامل مع العيوب اما بالتمويه مثل ان تدمجية في مكتبة او تقومي
بعمل ديكور مكتبة خشبية يكون هو من خلالها او بالاظهار كان تقومي بالرسم علية او تغطيتة بحجر بشكل جمالي او بتلبيسة بورق حائط او اذا كان في صالة
تقومي بعمل كنبة تدور حوالية كما هو النظام في اللوبي بالفنادق عموما لدي العديد من الصور ولكن للان لم اعرف طريقة ارفاق الصور بالرد
نعم لان المساحة صغيره ولو صبغت كل منطقة لون معنى كذا حددتيها للعين وبينتي انها صغيرة ولكن توحيد اللون يعطي احساس
ان الاماكن الصغيرة اكبر قليلا واذا رغبت اضافة لون اخر بامكانك استخدام لون للاسفل للمنطقة كلها على ارتفاع 90
سم ثم لون افتح للاعلى وتغطية منطقة الالتقاء ببوردر من ورق الجدران او الخشب او الجبس (مقابلة مع صاحبة مركز سارفوزية)




الواجهات:

الاخوات اللي مايعرفون البروفايل ترى هو كذا عباره عن عجينه لونها مثلا ابيض بس مو ابيض الناصع لا وفيه منها الوان بس محدوده وماعجبتني الوانه المهم هو عجينه تنحط على الجدار وتتواسى وتمخش ومن مميزاته انه مايتأثر بالعوامل الخارجيه ويعمر وممكن لو مليتوا من لونه تضربونه لون ثاني اما مساوئه انه ماينشال الا بالدريل وبصعوبه ينشال
اما الحجر خصوصا النوعيه اللي إن شاء الله بنحطها هو بالمسامير يثبتونه ومتى ماخرب شيء منه شلنا الخربان وبدلناه بغيره جديد ومن حسناته ايضا انه يشكل عازل عن الحراره والبروده وممكن نبدع في ديكوره واللي عجبني فيه ان فيه انواع منه لونه ابيض ناصع اللي احب لاني ماحب البيوت الملونه وخصوصا اللي لونها كريمي مدري وش عجبهم في هاللون يقولون يتحمل الوسخ ؟
ومن عيوب الحجر انه غالي بس مو اغلى من الرخام طبعا وفي نوعيات منه تجمع تراب وخصوصا جونا معروف بالاتربه الدائمه بس احنا اخترنا اللي مايشيل تراب ولا عناكب والله ييسرها علينا وعليكم.


- من مواصفات الفلل الراقية:الواجهات حجر كريم من اجود الأنواع المتر 135 ريال للمتر من شركات متخصصة ، او رخام حسب الطلب ، او بويات بروفايل . التحديد صعب لإن الخيارات متعددة ومتنوعة وهناك فارق كبير بين بعض الأسعار ، فلو يحدد من يطلب النواع والطلبات ونعطيه السعر التقريبي للتكلفة .


- البروفايل تكسيه خارجيه نوع من الدهانات( الشبيه بالمعجون بعدين يمررون عليه لوح زي المشط علشان يتخطط)
ماليه الشوارع يعني اغلب الفلل حاطين منها ميزتها انها عمليه جدا وتتحمل الظروف الجويه عندنا
وتراه سماكات فيه الي 3 ملم وفيه الي 5ملم ويفرق السعر الرخيص 22 ريال للمتر اما جوتن الغالي منه ياصل 29 ريالللمتر
لكن ترى فيه شي جديد الي هو التعتيق بالمعجون الخفيف جدا يبان من قريب كانه بويه ساده هو الدارج هالحين لكنه اغلى لقيته متره ب60 ريال عند الدهانات العربيه



الفناء الخاجي و الحديقة:

- ومنطقة الكراج خليتها تراكوتا سادة بنفس اللون اللي في الحوش ومنطقة الزراعة بعدين افكر اعملها حجار طبيعية وزرع وجلسة مسقوفة.


- مسبح +جاكوزي ((حق الحدائق طبعا ))...جلسة حلوة حول المسبح مكان للشوي
الجزء المزروع خليه بشكل تلال ..... ممرات فيها اضاءة ارضية ......مكان للالعاب كرة سلة مثلا وتنس وطائرة يعني متعة للاولاد والمراجيح للصغار
يتنسيق حلو اتخيل انه بتطلع روعه وجنة في الارض
ممكن تعملي بيت شعر فيها ..........الحدائق جدا ممتعة وبالذات لو كانت مرتبه.



-أنا المساحة الخارجية حول الـ 900 متر عشان كذا مترددين بنشوف الأرضيات الداخلية كم راح تكلف وبعدها نقرر
الارضيات الخارجيه عندك ما ودك تشوفيين الخرسانه المختومه تراها اوفر للي مساحات حوشهم 200 متر فما فوق
لانه بدون ترويب وما فيه مجال تتكسر واشكالها حلوه
اسمهم : البنعلي للخرسانه المطبوعه
موقعهم: الدمام- الرياض
ارقامهم:في الرياض 4766026___4764022
اما ارقامهم في الدمام 038300541________038338587
ما عندهم مشكله ينفذون في اي موقع
وبالعكس ما تزلق انا شفت ناس اعرفهم حاطينها ارضيه لهم والحوش
فيه مسبح والمويه معبيه المكان من الاطفال ومع ذلك ما تزلق
اذا انتي من الرياض بتشوفينه مسويه عند بوابه مركز المملكه
وهي تاخذ اي تصميم واي لون يعني فيه على شكل حجر وفيه على شكل بلاط
والوان ويسوون لك تصميم للممرات
سعرهم 80 ريال للمتر راكب في حوشك
بس يشترطون الحد الادنى 200 م


-العشب الصناعي هو اسمه (الثيل )الامريكي وهذا مايطول بس يمتد وهوكان غالي المتر ب500بس هذا اول الحين رخص طبعا هذا احسن للحوش لونه حلو احلى من العادي وما يتاثر بالحراره
انا شفت بيت اختي حاطين منه بس الصراحه يطلع عليه حشرات مقزز شكله مثل دودة القز بس حجم xxxlهههههه والله يوم شفتها خفت بس يمكن لها مبيد وتروح

والثيل العادي الي يطول ويتشبك ببعض حتى انه يتاثر بالحراره ويصفر وممكن انه يخترق الجدران اهلي دخل على خزان المويه
وسلامتكم (حشى صار شعر)
الصراحه فرحت اني قدرت افيدكم لو بمعلومه من اول احاول بس معلوماتي ميح بالبناء يالله نتعلم



يتبـــــــــــــــــــــع


نبضة صادقة غير متواجد حالياً رد مع اقتباس

قديم 07-11-1431 هـ, 09:54 صباحاً   #10
نبضة صادقة

محررة
 
الصورة الرمزية نبضة صادقة
 
تاريخ التسجيل: 16-05-1425 هـ
المشاركات: 1,705


ملاحظات هامة:

-و هي أن هناك من الأشخاص من يأكل المال الحرام و كأنه يشرب ماء... الوازع الديني ضعيف لديه
هذا إذا ما كان معدوم... لا يوجد لديهم ضمير يؤنبهم على سرقة الناس و أكل أموالهم بغير و جه حق..
يعني و أنت في أي مرحلة من مراحل البناء قد تصادفين أشخاص (يأكلون من تحت لتحت) و أنتِ (يا
غافل لك الله..
في بيت أهلي بعد ما حسب معلم اللياسة (أو معلم البوية) حساب عمل اليد أعطى أخوي الورقة عشان
يشوف الحساب راجع أخوي الحساب وجد الحساب صح، لكنه عارف ألاعيب مثل هذي النفوس اللي ما
تبالي من اين تاكل (نسأل الله السلامة)...
راح بنفسه و متر البيت متر متر و اكتشف أنه زاد أمتر من عنده، ما أدري كأنه قال أنه حسب
الأمتاراللي زادها المعلم طلعت قيمتها فوق الألفين ريال!! (ما أقولكم تحت لتحت)
عدل أخوي المكتوب في الورقة و اعطاها العامل (طبعاً المعلم ما قدر يقول شيء) و أخوي اكتفى
بالتعديل عشان يوريه أنه واعي و ليس مغفل.
لكن فيه نقطة أريد أنبه عليها أي خطأ تكتشفيه من الخطأ الدخول مع العمال في نقاش حاد أو مشاجرات
قد تؤدي لطردهم.
و تخسري عامل ورى عامل و شغلك يتوقف و صاحب الضمير المنتظر قد لا تجديه بسهولة فريحي
بالك ..
أهم شيء يحس العامل أن صاحب البيت صاحي مو نايم.


نبضة صادقة غير متواجد حالياً رد مع اقتباس

إضافة رد







أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة
الانتقال السريع


الساعة الآن 04:42 .


شات عالم حواء
تابعونا على Google+
تابعونا على instagram
تابعونا على twitter
تابعونا على Facebook