معاكم أم يعرب .. هذي أول مشاركة لي في هذا القسم...
وأتمنى انه ينال على اعجابكم
جبت لكم كاري بالطريقة الهندية ..
وعلى فكرة كل حد يقدر يسويه ومقاديره متوفرة بمعظم الوقت وموجودة بالمحلات الكبيرة
والطريقة سهلة كثير
أولا انا بذكر المقادير لكل دجاجة
مقادير النقع :
كوب ونص روب
مبشور بصلة ( يمكن الاستغناء عنها )
2 م ك (زنجبيل مع ثوم مدقوق يفضل الطازج )
2 م ك صويا صوص
2 م ك خل
2 م ك دغوص
2 م ك معجون طماطم
1 م ك صلصة تايلندية ( ممكن الاستغناء عنها )
1 م ك كاتشب
1 م ص فلفل بودر (انا اضيف الفلفل الأحمر المجروش )
1 م ص ملح
1 م ص بهار مخلوط
عصير ليمونتين
صبغة حمرة حسب رغبتكم موجودة باللولو صوب الحلويات
مقادير الطبخ :
فص ثوم
شوية حبوب خردل (ممكن الاستغناء عنه)
حبات من (القرنفل + الهيل + حطب قرفة + فلفل أسود )
أوراق الكاري
2 قرن فلفل حار
بقدونس للتزيين
شوية زيت للقلي
** من عندي في أخر طبخة ضفت علبة كريمة
الطريقة :
اقطع الدجاجة وانظفها زين من الجلد ثم أضيف لها البصل المبشور والثوم والزنجبيل
ثم أخلط جميع (مقادير النقع ) بالمضرب اليدوي .. كالآتي
ثم نضيف الصبغة ... اللون بيكون كذا
ثم أضيف قطع الدجاج
وأقل شي اخليهم بالثلاجة نص ساعة وطبعا كل ما طالت المدة كل ما يكون الطبق ألذ
انا اذا بغيت اسويها للغدا اخليه بالثلاجة من الصبح ، واذا للعشا اخليه من الظهر
عند البدء بالطبخ .. نجهز مقادير القلي
أجيب الصفرية وأحط شوية زيت للقلي
وأقلي فص الثوم مع حبات من (القرنفل + الهيل + حطب قرفة + فلفل أسود ) مع أوراق الكاري مع 2 قرن فلفل حار مع حبوب الخردل
أخليه يتحمر شوية ..
أضيف قطع الدجاج بالتدريج وأقلبه ببطء
أول ما اشوفه يغلي .. أخلى النار على الدرجة المتوسطة واغطي الصفرية .. هو يحتاج بين 40 لـ 60 دقيقة
انا في اخر مرة ضفت الكريمة وخليته ينطبخ 10 دقايق لين ما يغلظ الكاري وطلع واااااااااااااااااااااااو
لما يجهز غرفوه وزينوه بالبقدونس وتقدموه مع الرز للغدا أو الخبز للعشا
وصحتين وعافية على قلوووووووبكم