بسم الله الرحمن الرحيم
السلام عليكم ورحمه الله وبركاته
مدري وش أقول وكيف ابدأ بس حبيت اطرح لكم قصتي مع زوجي لاني مقدر اقولها لأحد ولا ابي احد يعرف اسرارنا واللي شجعني بطرح قصتي هو ان هذا المنتدى افتراضي ولا احد يعرف احد .
انا متزوجة لي سنة وشهرين تقريبا عمري 24 وزوجي عمره 26 وهو من قبيلة ثانية .
قصة زواجنا , انه كنا يوم معزومين على زواج لواحد من زملاء ابوية . وحضرنا لان الدعوة لابوية وعائلته , في الزواج تعرفنا على ناس طيبين وكلموا امي فيني اني مخطوبة والا لا قالت امي لا المهم اخذوا ارقامنا وبعد حوالي اسبوع اتصلوا وقالو بيجونا وجو وكلمو امي فيني وقالو باقي الموضوع عند الرجال وجو الرجال يخطبون من ابوي وبعد كذا سألنا عليه والناس كلها تمدحه في حيهم وفي مقر عمله المهم وافقنا عليه . والولد طلب النظرة الشرعية ووافقنا وجاء وشافني , في يوم النظرة الشرعية سألني عن التخصص في الجامعة وجاوبته وبعدين قالي شي غريب مرة قال " تعرفين تصلين الاستخارة " قلت ايه وبعد كذا مشيت . المهم ابوي يقول يوم جو الرجال ماشين قلت للولد في اذنه تعرف تصلي الاستخارة يقول الولد ابتسم وقال اكيد اكيد
وتم القبول مني ومنه . وهو للامانة شاب كل الصفات ( الظاهرة فيه ) زينة شاب متعلم وظيفته حلوة ويصلي لكنه مو ملتزم ووسيم ماشاء الله عليه وعيبه انه يدخن .

نجي للمهم بعد عقد القران ماكان بيني وبينه أي اتصالات " بسببه هو " لانه رافض هالشي يقول ( ما احب المجاملات والتصنع) على التلفون . وكان يزورنا كل شهرين مرة ويجلس خمس دقايق ويفز كان كلامه معي رسمي ماتقولون زوجته شرعا . ومرة جبتله الشاي سألني انتي سويتيه والا الخدامة ( تلعثمت وقلت انا ) قال انا احب الصدق لو الخدامة سوته ما راح ازعل . واذا جاء يخرج يعطيني فلوس وانا ارفض ( لاني ببيت اهلي) واهلي مو مقصرين علي . لكنه كان يجبرني اخذها .
تمت الامور على خير وتزوجنا , وفي ليلة الدخلة كانت تصرفاته حلوة بالذات يوم قالي توضي وقام هو يتوضأ وانا توضيت معه وبعد كذا صار يقول دعاء ( انا كنت مستغربة لانه ماهو مطوع ) .
شهر العسل اول يومين في فندق وبعدها وداني مكة واخذنا عمرة وبعدها رجعنا بيتنا وكملنا باقي شهر العسل في البيت لا طلعات ولاخرجات ولا حدايق ولا مطاعم ولاشي ( وجهه في وجهي 24 ساعة ) إذا بغينا شي طلب بالجوال توصيل للبيت .

انا زهقت ومليت بس كنت اقول في نفسي ممكن عشان شهر العسل بس اثاري الادمي كل حياته كذا طلع بيتوتي وما يحب يطلع الا لضرورة و قصوى بعد .
الحين حياتنا كلها في البيت صاك علي صكة واذا خرجنا يا اما يوديني يا عند اهلي او اهله والتمشيات في الشهر مرة نخرج ( نتمشى في البر) والسوق إذا بغيته ما يوديني الا وانا اتشحد فيه اسبوع عشان يوديني صرت اشك انه بخيل لكن طلع ظني مو بمكانه لانه إذا رحنا السوق ( بعد الف كلفة ) يشتري لي أي شي ابغاه ويقول اخذي اللي تبغينه الحين ترى منتي طالعة سوق مرة ثانية وتلاقوني اشتري بالهبل تقولون مسافرة وانا من طبعي احب اسأل البياع عن السعر مرة سألت وزعل قال انتي بتدفعين شي من جيبك . يعني إذا فيه شي غالي وقلت له ابيه شراه لي بدون تردد . بالنسبة للملابس يقول إذا وصلنا البيت وما اعجبتك علقيها في الدولاب انسي ارجعها يعني ممكن يكون المقاس واسع او طويل الله يعيني بس .

* في بداية زواجنا كان يقولي اللي في بيتنا وبينا محد يعرفه ولا تكلميني عن اهلك ولا اكلمك عن اهلي كل واحد يبر اهله على كيفه
( انا احب اهلك ) بس لا تقولي لي اخبارهم ويقول انه يحب الخصوصية في بيته وانه ما يحب المقارنات .
* في ثاني شهر من زواجنا جاب ذبيحة وقال حطيها في اكياس وراح غرفة النوم انا على بالي بينام وانا اشتغل في المطبخ رحت ودخلت غرفة النوم لقيته يسوي العادة السرية انا انصدمت وقلت وش تسوي ما رد وقال صكري الباب وصكرته ورحت اكمل شغلي وبعدين ناقشته في الموضوع قال انه يرتاح اكثر . وانا مو مقصرة عليه .من هالناحية . الان لنا اكثر من سنة متزوجين وهو يسويها وصار كل يوم يتروش إذا ناقشته زيادة يزعل ولا يبغاني اكلمه في الموضوع
* حياتنا صارت روتين ممل هو ما عنده غير دوامه وبعد الدوام يجلس على النت ويحب المباريات . على النت يجلس بالساعات كنت اشك فيه واذا جلست معه الاقيه يكتب في المنتديات ولا هو يمي ويحب يتصفح الجرايد كل يوم ويحب يقرا كتب الكترونية بدون تحديد اجتماعية وثقافية وشعر وادب ودين وسياسة ما خلى شي . واذا طفش منها جلس يلعب بالالعاب ويحب البالتوك برضه .
دايم يقولي خليك رسمية مع زوجات اخواني (ممكن لانهم حقين مظاهر وساكنين بفلل وكل صيف يسافرون يخاف اني اتأثر فيهم ) إذا سألته ليه قال هم حريم كبار وانتي بعدك صغيرة .
* علاقته مع اهلي رسمية مرة لكن إذا جونا اكرمهم وضيفهم بس احس انه ما يحب امي لان مرة امي جتنا وقالت الصالة حلوة بس لو تحطون الشي الفلاني هو وقتها رد على امي وقال ما اظن احد شكى عليك يا ام فلان ( اصلا هو ينادي امي ام فلان وينادي ابوي ابو فلان ما يقول عمي ) . وبعد ما راحت امي قال امك مثل امي بس نبهيها لاتدخل في حياتنا .وقفل على الموضوع .
* إذا وصلني لاهلي حطني ومشى واذا جاء ياخذني دق بالجوال وقال انزلي . اما إذا رحنا لاهله يطلع معايه يسلم على امه واخواته ثم يمشي واذا جاء ياخذني طلع وسلم على راس امه ثم نمشي .( الصدق اهله طيبين وفي حالهم )
* مرة طلبته نروح البحر قال ليه حزينة "البحر ما يروح له الا المحازين "
*اوقات يحرجني إذا تكلمت وانا اكل يقول لا تتكلمين وفي فمك اكل .
* في موضوع الحمل كلمته ان ما ودك تصير ابو قال بعد خمس سنوات ان شاء الله ومن بعدها صار( يحرص علي وانا اخذ الحبوب)
وامي كل ما شافتني والا كلمتني قالت فيك شي اقول لا في الاخير قلتها ( هو ما يبي الحين ) قالتلي مايربط الرجال بالحرمة الا العيال لا تخليه بكيفه قولي انك تحبين الاطفال وصرت اقوله وهو يقول 2014 ان شاء الله .
* مرة كنت اتفرج على برنامج وناداني لغرفة النوم حبيت اتغلى عليه قلت له " تعال تابع معي البرنامج " راح جلس على
الاب توب وطنش وبعدين راح ينام في غرفة ثانية خفت انه ينام وهو زعلان ( واخذ اثم ) فقلت له ليه تنام هنا قال ( هنا اريح ) قلت انت زعلان مني قال لا والله نامي حبيبتي اصلا مافي شي يزعل قلت طيب تعال نام في غرفة النوم قال ( لا مرتاح هنا ) قلت انام معك حلف ( والله ما تجين روحي نامي وصحيني لصلاة الفجر ) وذيك الليلة ما نمت من القهر .
* اوقات يتكلم كلام بدوي اقوله انت فيك بداوة يقول بغيتي تسبيني مدحديني .
* يفهم في امور الحريم احسن مني وبعض الاحيان يعلمني , يعني اوقات الدورة ينبهني لا اخذ شي بارد او حار صرت اشك ان له علاقات سابقة لانه وسيم مرة واذا خرجنا الناس تبصبص فيه بس حيرني معاه إذا طلبته الجوال اعطانياه وما الاقي شي .
* قبل فترة بسيطة اكتشفت انه يعرف يطبخ وهو اللي قالي قال اجلسي انا بسوي العشاء بس لا تفرحين هذي حسب مزاجي وبعد ما سواه وبدينا ناكل كان العشاء مرة حلو فقلت له طبخك حلو قال ادري ما يحتاج تمدحين , انحرجت مرة . لكني رديتها في اليوم الثاني بعد الغداء قالي يعطيك العافية غداك حلو قلت ادري ما يحتاج تمدح فجلس يضحك .
* مرة تناقشنا وقلت له في الشرع الزوجة مو ملزومة تخدم زوجها بالطبخ والغسيل قال صادقة بس لا تنسين ان الله حلل اربع وممكن وحدة من الاربع تصير ملزومة قهرني قهر .
* مرة كنت جالسة معاه وكنت ابغاه يمدحني فتكلمت عن الجمال وسألته الجمال مهم والا لا قال الجمال مهم بس الاخلاق اهم زعلت وقلت ليه انا ماعندي اخلاق قال اثاريك تقصدين نفسك انا اتكلم بشكل عام .
* الحين انا وياه متزاعلين لنا اربع ايام والسبب ان اختي اهدتني خلاط كهربائي انا على نيتي جيت وريته الخلاط زعل وسوى قضية وقال رديه لاختك قلت مقدر هذي هدية اخذ الخلاط وحطه بالزبالة وراح رماها ويوم جاء لقاني ابكي قال نسيت اجيب كلينكس وبعدين خرج وراح جاب خلاط وقال إذا اختك اهدتك عطر او ساعة ماراح ازعل لكن شي في البيت لا والحين مطنش ولا فكر يراضيني ويقول من زعل من غير امه وابوه طال حزنه .
* اوقات اقول انه قاسي الاقيه حساس ورومانسي واوقات اقول انه بخيل الاقي يده سخية وكريم واوقات احسه طفل واوقات احسه شايب واوقات اشوفه فرحاان ولا يعلمني واوقات اشوفه حزين ولا يعلمني .اللي اعرفه انه غريب .

اعذروني طولت عليكم بس والله اني مقهورة وودي اعيش وانبسط واحمل واخرج واتمشى مثل العالم والناس .
ارجوا من الجميع الصلاة على النبي " اللهم صلي وسلم على محمد ".