أخيراً زاد وزني وكبرت أردافي وخدودي وصرت "بالصراحة أحلى"التجربة أهداء لكل نحيفة يائسة

علاج السمنة والنحافة



السلام عليكم ورحمة الله وبركاته





صباح / مساء الخير عليكم يا غاليات :26:








بناء على الطلب الكثير والرسائل اللي كانت توصلني على الخاص عن تجربتي لزيادة وزني ..






ولأني من النوع اللي مايحب يبخل على أحد بالإفادة وسبحان الله أي وحدة تفيد أختها في الله وتساعدها ربي يبارك لها في حياتها يعني شغل النحاسه ماراح يفيد أحد إلا بالحسد والحقد :)




ومثل ما وعدتكم هذا الموضوع وإن شاء الله تستفيدون منه





/





اللي عندها عزيمة وحابه تزيد وزنها تقرأ الموضوع لآخره نقطه نقطه :)


واللي يائسه ومحبطة وتحسن أنها مستحيل تسمن برضو تتفضل معانا وتقرأ الموضوع لآخره :icon18:



/




طبعا مثل ما أنتم شايفين أنا مسجلة بالمنتدى من 2006


يعني من ذيك السنة وأنا أحاول وأحاول أزيد وزني بلا فائدة جربت خلطات كثيره ومنها خلطه حلم دون تفسير واشتريت خلطه من تاجره بالمنتدى وميسجور وبوردة جيفيرال ..الخ



ولا زدت ربع كيلو 4سنوات وانا احاااااااول


وعمري ماتخيلت بيجي يوم وانزل تجربتي !!




والحين ماشاء الله لا قوة إلا بالله ولله الحمد والفضل والمنة زدت بكم شهر بس ماشاء الله لا قوة إلا بالله :icon28:



بقول لكم السبب والسر !





أول شي أحبكم أقول لكم أنا من النوع النحيف جداً ومن خلقني ربي وانا نحيفة عمري مامتنت + النحف فينا وراثة والسمنة شي معدوم



أكرهه الأكل حييييييل وعندي استعداد أقعد كم يوم بدون ماكل شي عادي وكان صعب علي اكمل وجبه باليوم



وبنفس الوقت أنا من النوع اللي صعب صعب صعب تزيد وزنها بسهوله ..




/




والحين وقبل كل شيء وقبل ماتبدون أي برنامج أحب أقولكم أهم نقطة واللي هي السر في زيادة وزني



هي محي الأفكار السلبية .. والإحباط واليأس




مو تجي وحدة تبدأ البرنامج وتاكل وتسوي خلطات وتعب نفسها



وتقول أنا مستحيل أسمن


أنا نحفي وراثة


أنا آكل و آكل وما زيد ولا كيلو


أنا ماقدر اكل .. انا بس نايمة



وأنا و أنا وأنا ..!!!




ولا تبدأ تجرب خلطة وتقول خليني اجرب ونشوف اخرتها ..!!



طيب وبعدين ؟! شنو راح تسفيدين لما تحبطين نفسك ؟!



صدقيني دام هذا تفكيرك ماراح تسمنين لو تفطرين كل يوم مفطح


لأن العقل الباطن يأثر عليك وعلى النفسية واحنا كلنا نعرف دور النفسية بالوزن سواء زيادة أو نقصان !


جربي وشوفي كيف من النفسية راح يتعدل مزاجك بالأكل




ولا تجي وحدة تقول أنا أبي أزيد بحبوب ماقدر آكل ومستحيل اقدر اكل 3 وجبات ماحب الأكل


السمنة الطبيعية الصحية تجي بالأكل وبس أما الحبوب وغيرها ضرر وصدقيني بعدها تردين لوزنك السابق والتعب كله بيروح وترجعين لنفس الموال من جديد


مع الأكل المعدة تتوسع وتصير الشهيه مفتوحه للأبد



والبعض من البنات تشتري خلطة أو تسويها بالبيت .. وما تاكل وجبات زي الناس وتعمد ع الخلطة بس وبالأخير تجي تقول تعبت من الخلطات وماني قادرة ازيد كيلو !!!!


سبحان الله !!!



/




مثل ماقلنا ..بداية وقبل كل شي انسي هالأفكار السلبية وابدئي برمجي نفسك بكلمات إيجابية


أنا بسمن .. أنا بآكل .. أنا بوصل لهدفي وبسهولة .. أنا بصير حلوة



خليك متفائلة منطلقة :)




وصدقوني مافيه شيء صعب أبداً أبداً أبداً





أنا زدت 10 كيلو ماشاء الله لاقوة إلا بالله بثلاث شهور تقريباً




يمكن البعض يشوف 10 كيلو بـ 3 شهور قليلة جداً .. لكن بالنسبة لي أنجاز عظيم خصوصا أني ما عتمدت لا على حبوب ولا فواتح شهيه ( باستثناء الفيتامينات )


وهذا أحسن شيء عشان الزيادة ماتروح بعدين لماتتركين الحبوب وتضل الزيادة ثابته بإذن الله





وهالـ 10 كيلو غيرتني كثييييييييير وين كنت وكيف صرت الحمدلله الحمدلله :icon28:





كل وحدة فيكم تجلس وتتخيل كيف لما تزيد كيف بيكون شكلها كيف بيكون مدح الناس لها


كيف بتكون الملابس عليها حلوة :rolleyes:..



لأن مثل ما انتم عارفين النحيفة مهما لبست مايطلع عليها شي حلو :(


وكيف راح تبرز ملامح الأنوثة بجسمها وكيف وكيف ..الخ



/




مثل ماقلت لكم برنامجي معتمدة على زيادة الأكل تدريجيا وعلى بعض الخلطات الطبيعية


وكنت كل فتره اجرب خلطه يعني انوع بين الخلطات لأني من النوع الملول ماحب استمر على اكله فتره طويله وبنفس الوقت اجرب كل الخلطات واشوف أي وحده تزيد الوزن أكثر


ملاحظه مهمه : أنا ماقول جربوا كل الخلطات والأكلات بوقت واحد
أنا بس حطيت أكثر من نوع عشان الكل ياخذ اللي يناسبه
لاتجي وحده كيف ناكل كل هذا !!!




/



يتبع ..
720
561K

يلزم عليك تسجيل الدخول أولًا لكتابة تعليق.

تسجيل دخول

مرآة روح
مرآة روح
/




اول شيء استخدمت



عصير المانجا بالحليب المبخر ( حليب الشاي .. بوني / وادي فاطمة / أبوقوس )


+ كنت اسف معاه ملعقين حب العزيز مطحون ( من عند العطار )



ماشاء الله زاد وزني عليه كنت اشربه مره او مرتين باليوم


احط ربع الكاس حليب والباقي عصير مانجا يكون طازج الثقيل وانا كنت استخدم المراعي



فعلاً يزيد الوزن ولذيذ ومتوفر وسهل وكان بالبداية عبارة عن خلطة ولما تعودت ع الطعم وادمنته صار بالنسبة لي عصير عادي أشربه مع أو بعد الوجبات



/



ولأني كنت بدون أي معالم أنثويه :09:وكنت مهتمه جدا اني ابرزها وبنفس الوقت تحلو بشرتي



استخدمت خلطه لوحدة قرأتها في منتدى ثاني وزدت عليها شغله عشان تكون فايدتها أكبر




الخلطة هي :



حليب الصويا


سيريلاك


وأنا زدت عليها حليب الحوامل والمرضعات




شفتوا حتى حليب الحوامل ماخليته بحاله هههههههه :icon20: ومن كثر ماروح الصيدليات وادور عن شي يزيد الوزن ويفيد بنفس الوقت طحت على هالحليب وهو أفضل من حليب أنشور وفيه سعرات أعلى بعد



وصورته لكم اسمه بريميم كير ..سعره 45 ريال







ماشاء الله لاقوة إلا بالله سمنت عليها كثييييير وبرزت الملامح الأنثوية بشكل


خصوصا الخدود والأرداف ولكن الصدر برز بشكل بسيط




الطريقة :



اصب الحليب بالكوب بعدين اضيف عليه من 6 إلى 8 ملاعق صغيرة سيريلاك وملعقتين صغار من الحليب ويكون قوامه متماسك ..



لاتشربين أكثر من كاس ونص باليوم


أنا كنت أخذه مرتين باليوم بالبداية كل مرة ثلاث أرباع الكاس حليب أما الحين كاس واحد باليوم

وتقريبا هذي أكثر خلطه استمريت عليها وزدت عليها أكثر




حليب الصويا تلاقونه بالسوبر ماركات الكبيرة أنا اشتريه من هايبر بنده



وبرضو صورته لكم







/





الخلطة الثالثة وهي من إختراعي



سميد


ودانيت




الطريقة :


اغلي السميد بالماء لما يستوي ويصير مثل المهلبية


واخلط معاه الدانيت واحيانا اضيف سكر


واحيانا مايكون عندي دانيت اضيف نسكويك واحيانا نوتيلا لكن الأغلب دانيت



هذا هو الدانيت وأكيد الكل يعرفه





ومايحتاج اقول لكم كيف السميد يزيد الوزن



استخدميها مرة باليوم تراها مثل الحلى يعني مو حلبه وخرابيط يعني شي لذيذ وبلا دلع انت وياها ههههههه :lick1:



/




والخلطة هذي أنا ماستخدمتها أو بالأصح استخدمتها فترة أسبوع لأني ماكان عندي وقت وكنت اجرب الخلطات السابقات بنفس الوقت ماني صحبه مع التمر


لكن عملتها لوحدة من صديقاتي وكانت تاكل منها باليوم بإستمرار وزادت عليها تبارك الرحمن وفرررحت حييييييييييل



والخلطة هي كالتالي وبرضو من ابتكاري :



تمر معجون – ماش مطحون – حب العزيز مطحون - مكسرات مشكلة مطحونه – سمن بلدي


تعجن مع بعض وتشكل على شكل كرات وتغطى بالسمسم وتؤكل منها أقل شي 5 كرات باليوم



/



طبعا أنا كتبت لكم أكثر من خلطه وكلهم مجرباااااات حبيت أنوع لكم عشان كل وحدة تاخذ الخلطة اللي تناسبها ومايبقى لكم حجة :biggthump
مرآة روح
مرآة روح
/




أما بالنسبة للفيتامينات فهي جي آر سكس (GRsix)




ممتازة جدا جدا وتعتبر فاتح شهيه وهذا مكتوب بالنشرة


"مكمل غذائي أساسي للأشخاص المرهقين والعاديين على حد سواء وفاتح للشهية "



مكوناتها :



غذاء ملكات النحل


خلاصة الخميرة


زيت جنين القمح الطازج


زيت بذرة القرطم (العصفر)


خلاصة الجنسنج


بيوفلافونيدات طبيعية




وبعد صورتها لكم






تاخذين منها حبه وحدة باليوم أنا كنت أخذها بالوقت اللي احس اني مالي خلق اكل عشان تفتح شهيتي


الحبة كبيرة تخررررررع أول ماشفتها بغيت أدوخ هههههه :icon20:




/



واللي كان ودها بالمفتقه أو خلطات العسل



أنا لقيت خلطه عسل بالمكسرات


رووووووعه



عبارة عن :


عسل – غذاء ملكات النحل – لوز – صنوبر – غبار الطلع – فستق – بندق – جوز


بزر مشمش – جوز الهند – حبة البركة – كراوية – بزر الفجل – فستق سوداني



تخيلو كل هذا بعلبة وحدة وهذا شكلها وسعرها 30 ريال



هذي صورتها وشوفو كيف المسكرات مش مطحونه ناعم







طبعا عيب عليكم تعدون هذي خلطة ( يعني اقصد ماتجي وحدة تقول بعتمد عليها وبس ولاتقول صعب اخذ خلطتين )



تراها هي تسمن وتزيد الوزن واضح من مكوناتها مايحتاج اقول


خذي منها الكمية اللي تبين مثل كل ماجيتي تشربين كاس ماي خذي منها ملعقة وهكذا او ملعقة باليوم ومتى ماحبيتي ممكن ع الريق يعني لاتضغطين على نفسك وتفكرين وتقولين كل هذا باكله !!




/



أخيراً بذكر لكم أكلات تزيد الوزن وفيها كميات عاليه من السعرات الحرارية :



( أنا رحت السوبر ماركت وشريت كل اللي ابيه وصفيته عندي بالغرفة بشكل مرتب ومغري وكل شوي آكل لي شغله :icon18: )




- فطائر لوزين الوحدة فيها 280 سعره



- بسكويت دايجستف المغطى بالشوكولاته الحبه الوحدة فيها 85 سعره



- أندومي أنا اشتري اللي بالأكواب عشان اسهل واسرع ومايكون لي حجة بالعجز تقريبا فيه 300 سعره



- كروسان سفن دايز



- شيبسات منوعه



-كب كيك محشي



- آيس كريم أرش عليها مكسرات وهرشي عشان تزيد السعرات



-الاكلات المثلجة مثل الناجيت – الهوت دوق – برجر – بطاطا



- بطاطا مسلوقة : تهرس مع زبدة جبن موزاريلا مايونيز وملح = فيها حولي 600 سعره


<<< هذي تكبر الأرداف حيييييييل




/




بالبداية كان الأكل بالنسبة لي صعب اتعب وامل و ازهق :icon33: اضغط على نفسي صرت أجزأ الوجبة لـ مرتين




الصبح مثلا أفطر كرواسان لوزين بالزعتر مع كاس شاي حليب


بعدها بساعة أخذ كرواسان ثاني مع نص كوب عصير مانجا



الغداء


مثلا أشرب الشوربة


بعدها بفترة آكل الرز أو المكرونه



العشاء


أقلي بطاطا ناجيت برجر واكل براحتي شوي شوي



المهم مايخلص اليوم إلا أنا ماكله الثلاث وجبات



العصر أكل خلطه من الخلطات والمغرب أكل وجبة خفيفة مثل سيفن دايز مع عصير أو شيبس أو شوكولاته




بعدها ولله الحمد صرت آكل الثلاث وجبات بدون ماقسمهم إلا في بعض الحالات أكون مو مشتهيه



أفطر 2 لوزين مع عصير طازج وبعدها بشوي اشرب شاي أو نعناع



قبل الظهر آكل شيبس وقطعة شوكولاته



الغداء آكل من الموجود و أختمها بكاس لبن



العصر آكل أندومي


أو اسوي البطاطا المسلوقه



المغرب قهوة وحلويات على حسب المزاج ( ركزوا على الدايجستف والسفن دايز )



العشاء اخليه شوي متأخر قبل النوم وعاده يكون مقليات



( أما بالنسبة للخلطات مالها وقت معين ممكن العصر ممكن بالليل ممكن الظهر )



لازم لازم 3 وجبات الأساسية + وجبتين إضافيتين ..




لما أطلع من البيت أحط بشنطتي آكل كاني مفجوعه هههههههه:42: عشان بالسيارة اتسلى


لو قطعة بسكويت المهم اكل عشان تتوسع المعدة
مرآة روح
مرآة روح
نصائح :



-اشربي ماء بكميات كثيرة واخلطي معه ماء ورد ( يعطي نظارة للوجه )



- ابتعدي عن المشروبات الغازية وبدليها بالعصائر الطبيعية فهي أكثر سعرات وأكثر فائدة



-اهتمي بترطيب جسمك في الفترة اللي تزيد وزنك فيها تجنبا لظهور الخطوط البيضاء (السترش مارك)


وأفضل كريم للترطيب العميق كريم زبدة الكاكاو ( شركة فازلين أو بالمرز ) يعني مو نعدل شي ونخرب شي




- بالوقت اللي تهتمين فيه بجسمك أهمتي فيه ببشرتك استخدمي مغلي البقدونس


اغلي البقدونس واحفظيه بالثلاجة وكل يوم امسحي فيه وجهك يعطي نظارة عشان تطلعين أحلى و أحلى





/





* هذي تجربتي وخبرة سنوات للجري وراء الزيادة ومتأكدة بعون الله كل وحدة بتقرأ الموضوع وتفهمه عدل وتنفذه بتودع النحافة بفترة قريبة إن شاء الله




/




يلا يا معشر النحيفات انطلقووووا وشدوا الهمة مابقى على الإجازة الا فترة بسيطة وتعرفون الاجازة موسم حفلات وزيارات ..الخ



عشان تكونين " بالصراحة أحلى "



أحلى وانت مربربه مو هييييييكل


أحلى وأنت تمشين وانت واثقة من نفسك واللبس عليك حلو



:icon28:




يلا أبي اشوف الحماس بكل نحيفة أبي كل وحدة تشيل الافكار السلبيه



أعلنيها حملـــــــة تغيير


كلكم بصوت عالي " بالصراحة أحلى " :2thmup:




انطلقوا وانا معااااااااكم بعون الله :)






والله تعبت وانا انزل الموضوع لاتحرموني من صادق دعواتكم في ظهر الغيب فأنا بأمس الحاجة لها




ويارب بالقريب العاجل أشوف كل نحيفة تحط تجربتها هنا وتقول انا سمنت وصرت حلوة :)



أحبكم في الله :26:


:heart:
اريج المدينه
اريج المدينه
بارك الله فيك ومتعك بالعافيه ومشكوره على الخلطات
برأة طفلة
برأة طفلة
مشكورة ياعسسسسسسل


عجبتني خلطة الدانيت والسميد


ان شاء الله اجربها