واليوم جيبتلكم طبخه من طبخات بابا المبتكره الله يطولي في عمره ويديه الصحه والعافيه وراحه البال على كل شي علمني هو ..
وطبقي اليوم جديد ولذيذ وسهل ومافي دربكه وقربعه في المطبخ ونزلته في المنتدى قبل 3 سنوات بس للأسف ضاعت الصور والحمدالله ربي سهلها من عنده وصورته لعيونكم الحلوه...
في البدايه لازم أحمسكم وأشهيكم وأوريكم الطبق علشان تتحمسو وتسو زيه وأن شاء الله يعجبكم..
المقادير:
المويه والدجاجه وزيت وسمنه و خضارمقطعه مربعات كبيره(بطاطس,بصل,فلفل رومي,جزر,طماطم)بهارات كبيره,بهارات مطحونه,كزبره خضراء مفرومه ناعم ,بهارات مطحونه(فلفل أسود,كمون,زعفران,صبغة زعفران,ملح,ماجي ,أبزار مجمع ,) 3 كاسات رز بسمتي ,ثوم مدقوق وممكن تستغني عن الماجي والسمنه ويصير أكل صحي .
أستخدمت قدر المنتو حق ستي الله يرحمها ماما لطشته من ستي وأنا لطشته من ماما لأنو صغير ومحندق ومافي زيه أبداً عبيت القدر مويه وحطيت شويه زيت .
الأبازير الصحيحه ليمون ناشف وقرفه وقرنفل وهيل ونخليها على النار ألين لما تغلي.
.حطيت كل البهارات المطحونه,ثوم المدقوق مع السمنه في زبديه .
خلهم مزبوط بالملعقه.
بزرت الدجاجه بالبهارات.
بزرت الخضار مزبوط مع شويه زيت.
حطيت الدجاج المبزر في الطبقه الأولى من تحت لقدر المنتو ونغطي الطبقه ونخليها تتبخر لمده 20 دقيقه.
دهنت الطبقات برشة زيت علشان يطرى البخار وممكن ماتحطي زيت بالمره في الطبخه وما يأثر أبداً في الطعم .
ملاحظه :
أول شي نحط طبقه الدجاج ونخليها تتبخر ألين لما تستوي وبعدين نحط طبقه الخضار فوقه لانو الخضار تستوي بسرعه ولو حطينها في نفس الوقت مع الدجاج حتنهري عليكي.
يتبع
بعد مارصيت الخضار وغطيت القدر ألين لما يستوي الدجاحه وخليتها تستوي على البخار لمده 10 دقايق ألين لما تستوي تقريباً .
كدا شكل الدجاجه وهي بتتيخر الله يحميها علشان العين رشيت الكزبره الخضراء على وجه الخضار.
هنا قدحت الزيت وحمص الرز شويه زي بابا علشان تقعد واقفه وما يتكسر الرز على قوله لو تمسكيها تنط من يدك لأخر الغرفه من كتر ماهيا شايفه نفسها ومستويه وواقفه.
طفيت الرز بمرقه المبخر وممكن تزيدي ملح لو كان الملح ناقص وغطيت القدر ووطيت النار ألين لمايستوي الرزعلى قول بابا هدي على رزك علشان يستوي مزبوط .
حطيت الدجاجه والخضار في صينيه وحمرتها في الفرن أحبها ناشفة ومقرمشة ومحمرة ممكن ماتحمريها زي ماتحبي.
كدا شكل الصينه بعد ماحمرتها من فوق في الفرن.
وهنا شكل السفرة.
وهنا صحن التقديم لمبخربابا من تقديم لولاتو كبسة الدجاج بالبخار وممكن تستبدلي باللحم لاو السمك أو الجمبري على حسب ماتحبي ويتوفر عندك.
وبالعافيه..
وهذه طبخة بابا المفضله وأحب أهدي ماما وبابا شكري وأمتناني على كل ألي قدموه ليا من حب وحنان وعطف و تعليم في كل شي في حياتي .
الله يخليهم ليا ويحفظهم من كل شر.
وأدعولي ربي يخليهم ليا ويطولنا في عمرهم ويديهم الصحه والعافيه وراحه البال ويرجع يلم شملنا من جديد على خير يارب بعد غربتي.