كوبونات الراقية تسجيل الدخول

الفـــــرس

بالكيراتين تحولت من مجرمة حرب بحق شعري إلى حمامة سلام... شكراً للراقية أحب أمي

العناية بالشعر •

السلام عليكم ورحمة الله وبركاته
أخواتي في المنتدى ... أولا اعتذر لأني مسجلة من فترة وهذه أول مرة اطرح موضوع
والله للأسف ماعندي وقت يكفي للمشاركة لكن متابعة مواضيعكم وردودكم وأتواصل مع الأخوات في المنتدى
حبيت أفيدكم بتجربتي ألي غيرت قوام شعري وريحتني من معاناة يومية ... واشكر سيدات كان لهم فضل بعد الله عز وجل عليا

وعشان تكون عندكم صورة واضحة عن شعري لابد أعطيكم فكرة موجزة عنه >>> جينا للفضايح

شعري من صغري ماشاءالله كان (كان فعل ماضي) غزير ويطول لكن للأسف جاف جدا برغم أنه بالاستشوار عادي وناعم
لكن بدون الاستشوار كان يحرجني جدا لدرجة اطلع من الحمام على الاستشوار عدل بدون لف ولا دوران >>> منعاً للإحراج :23:

لأنه كان ينفش بسبب أن الشعرة رقيقة وأنا ما اهتم بيه نهائي لأني صرت ما اقتنع إطلاقا بحكاية الزيوت والخلطات ..طبعا بعد تجارب مضنية وأليمة..مافي شي تتخيلوه قرأته أو سمعت عنه ما جربته كل شي تتخيلوه وما تتخيلوه >>> الين وصلت لقناعة انه مافي شي ممكن يغير شعري وأصير اطلع من الحمام حلو ويهفهف >>> هذه كنت احلم بيها بدون استشوار :44:

استخدمت زمااااان فرد ويلا بعد نصيحة كوافيرة وكان عمري 13 سنة الله يهديها ما فكرت اني كنت صغيرة واحتاج علاج لشعري ..المهم دمر شعري طبعاً وبعدها قالو في فرد مائي بالفيتامين وجربته كان عمري 15 سنة وطبعا كأنك يا أبو زيد ما غزيت >>> عدمت شعري أكثر وأكثر وكانو أهلي يطاوعوني لأني ألح عليهم

وبعدها على سن 18 بديت في موال الصبغات والميش وألوان الخصل يوم عودي وبعد بكم شهر بروغندي وبعدو شكولاته وخصل ألوان وتايجر وشوي نحاسي وعسلي ووو...هلم جرى .....الين أعلنت وفاته على يد إهمالي ههههههه:icon28:هههههههه

وبعدها توقفت عن استخدام أي صبغة وعملت فيها مصلحة عشان ودي اعمل صلح مع شعري ويبطل يزعل ويهيج لما اطلع أو بالبيت ويصير مؤدب راكد :unsure:

استخدمت زيوت مع إني مش مقتنعة بيها لأنها ما تغير بنية الشعرة نفسها وأساسا إلي برى جزء ميت من الشعره ...هذه قناعة ممكن غيري مو مثلي ...المهم عملتها عشان أصالحو وأراضيه وبلعت حبوب زيت كبد الحوت وفيتامينات للشعر من كذا شركة وعملت جلسات علاج في مركز صحي طبي تجميلي كبير في جدة ... وانبولات من هنا وبرى....طبعا كم سنة على أمل انه يتعدل..ووووو وضاعت فلوسك ياصابر(هذا مثل حجازي) ... مافي نتيجة كل مرة كانت خيبة محبطة وتوقفت عن استخدام كل شي لسنتين أو أكثر

إلى قبل فترة صرت اقرأ في الانترنت عن الكيراتين وصرت وأخواتي نتشاور ونبحث عنه وجمعنا كل مواضيعه ألي في هذا المنتدى ومنتديات أخرى عشان ودنا بالنتيجة العلاجية بدون ما نستمر في اغتيال شعرنا :06:

ووصلت في النت بالصدفة ببنت حلال في منتدى تاني وراسلتها واشتريت منها globalkeratin... جزاها الله خير كانت أمينة معايا ووصلتني المجموعة بدون تأخير كاملة وكانت تقولي في وحده عندنا هنا في الشرقية تعملو وأنا أدل الناس عليها ...ولأني في جدة طبعا من المحال اطلع للشرقية اعمل كيراتين .... لو أقول لأهلي بيقولو ...>>> عنك لاعملتي

المهم رجعت أدور في النت على وحده تعملو في جدة وتكون بنت حلال وشاطرة في شغلها وسعرها معقول...ما لقيت تخيلو والله اتصلت بكل الأرقام ألي وصلتني ولقيتها اغلبها ما يردون أو تطلب مبلغ كبير مع أن المنتج معايا مشتريته
الين يوم دخلت المنتدى هنا في عالم حواء كالعادة أتصفح المواضيع وكنت أول مرة أفكر اني أراسل الأخت أحب أمي جزاها الله خير ألي منزله مواضيع وكلام عنو كثير فقلت أسألها إذا تعرف وحده في جدة ترسلي رقمها

وكانت المفاجئة لما أتكلمت مع أحب أمي ... أنها هي نفس السيدة ألي كانت البنت ألي باعتني الكيراتين تتكلم عنها وتشكر فيها وفعلا زي ما قالت لي سيدة قمة في الذوق واللطف والأخلاق وحب الخير مش تصنع لا والله فعلا ألي يكلمها بيعرف حقيقة معدنها وبالصدفة قالت أنه في أخصائية من الشرقية بتجي لـ جدة لمدة كم يوم >>>> عاد أنا طرت ما صدقت قلت لها خلاص اوكي ونسقنا سوى عشان ألاقي لي موعد >>> أضمن موقع من الإعراب :7_5_131:
واللطيف في الموضوع أننا ونحنا بنتكلم اكتشفت أن مدرستي أيام الثانوية قريبة الأخت الفاضلة أحب أمي ...وهذا شجعني أكثر أني أروح واخذ معايا ألي حابين يعملو كيراتين من اخواتي...لآني وثقت خلاص وعرفت مع مين أنا بتعامل ...واستقبلونا بترحيب قرايبها جزاهم الله خير مع انه كان عندهم عزى ...بس فعلا ذوق بكل مافي في الكلمة من معنى وأعطتني رقم الأخصائية نجلاء ماشاءالله أخت ما تتخير في تعاملها الطيب عن الأخت أحب أمي

استقبلتنا نجلاء بابتسامه وترحيب كأنها تعرفنا وبتمزح وتتكلم ببساطة وتشرح لنا عن الكيراتين وشافت شعورنا >>> رفعت معنوياتي قالت بعد الكيراتين بتروح النفشة لان شعوركم كيرلي عربي عادي مش مجعدة لكن معدومة >>> طبعا ما قلت لها إني ما اعتني بيه نهائي وهاريتو استشوار 24 ساعة على مدى 7 ايام في الاسبوع واني أمارس كل الجرائم الممكنة الوحشية من أكثر من سنتين ما استخدم أي شي احتجاجاً انه مافي شي بيفيد :024: ( قمة الإحباط ألي يوصلك للتمرد) الشي الوحيد ألي كنت اعملو .. اشتري شامبو وبلسم من كرستاس عشان ضميري ما يأنبني كثير

وبدأنا المعركة وطبعا كنت أنا أول وحده في عائلتي >>> وكانو أخواتي يقولو عني كبش الفدا :2thmup:

بس الله يرضى عليها الاخصائية طمنتني وقالت لا تقلقي أنتي بتعملي العلاج يعني بتفيدي شعرك وسمينا بالله وبدأنا غسلت شعري وكانت هي خايفة على الميك أب الخفيف ألي كنت حاطته لا يخرب من الموية وتقول أنا أزيدك جمال مش الخبطك وفعلا ماشاءالله خلصت مني ومن اثنين من قريباتي وطبعا اخذ وقت وجهد منها تعبت بجد معانا تخيلو من قبل 6 المساء الى 11.30 بالليل وهي تشتغل فينا ......لدرجة انحرجنا نكمل كلنا لما شفنا الحرمة مسكينة تعبت وهي واقفة على رجلها من وقت وصلنا الين طلعنا تشتغل على شعورنا بضمير وتحسب الوقت للمواد ألي تحطها بشعرنا من كثر حرصها على شعرنا ...وهذا كلو وهي تمزح ومبتسمة ماشاءالله عليها وبصراحة هاودتنا في الأسعار ... والله ألي طلبته منا مو تكلفة جيتها مسافرة من الشرقية لنا في جدة ... ولا حق تعبها ... لكن ألي يتكلم معاهم بيعرف أنهم حريصين على العميلة حرصهم على نفسهم لدرجة جابية لنا التحذيرات برشور مكتوب فيه أش لازم نعمل الأيام الثلاثة قبل نغسل شعورنا وفعلا أسعارهم معقولة جدا يادوب حق جهدهم .. والله خجلت أفاصلهم لأني حسيت بالتعب تخيلو غسيل شعر ووضع المادة وسشوار وسيراميك ..بجد يستحقوا أكثر يكفي التعامل الراقي والطيب والاهتمام

وكنا ناوين نكمل تاني يوم البقية مننا لكن للأسف خالي أتوفى الله يرحمو فما قدرنا نروح واتصلت اعتذر منها ...>>> الحق ينقال والله اتصلت أحب امي تعزينا وتتابع معانا وتقولي لازم تعملو السيراميك وما ارتاحت إلا لمن عرفت أننا قدرنا نعمل سيراميك واطمأنت

وغسلنا شعرنا الخميس الماضي بالليل في البيت وكانت الصدمة >>>>>> :32:

ماشاءالله لاقوة إلابالله الله يبارك لنا ...شعور تلمع بعضنا سايحة والبعض مبروم خفيف بشكل رائع كل وحده حسب طبيعة شعرها لكن كلنا ما يبغالنا استشوار الحمدلله لان الشعر طري ومافي نفشة

والحمدلله أخيراً ارتحت وصرت اطلع من الحمام بعد الشور واثقة يوم غسلته أتسمرت قدام المراية وقت مش قادرة استوعب ...انه هذا ما شاءالله شعري :27:

بجد جزاها الله خير الاخت احب امي على المعلومات ألي فادتنا بيها وعلى أساسها أقدمت على خطوة الكيراتين و إن شاءالله استمر عليها كل كم شهر عشان أحافظ على بنية شعري وقوامه وطلاوته

أدعو لي ربنا يديم فضلو عليا ويحبب خلقه فينا ويحبب لقلوبنا خلقه... لأنه بجد سهل تلاقي ناس تتعاملي معاهم لكن قلة جدا ألي يعاملوك بحب وخوف من الله وحرص عليكي وهما أساسا ما يعرفوكي
100
8K

يلزم عليك تسجيل الدخول أولًا لكتابة تعليق.

تسجيل دخول

أم سماهر
أم سماهر •
الحمد لله الذي بنعمتة تتم الصالحات

مبروك عليك هذا التغير وان شاء الله من حسن الى احسن

اما الاخوات اللي ساعدوك فالله يفرج همهم زي ما فرجوا همك
الفـــــرس
الفـــــرس •

اهلا اختي ام سماهر

الله يبارك فيكِ وفي عمرك

شكرا لدعوتك الحلوة ....ممنونة لكِ

والله يجعل كل أمنياتك تتحقق وكل حياتك مثل ما تتمني وأحسن

دمتي بخير وشكرا لمرورك العاطر
أم أحمـــد
أم أحمـــد •
الفرس الفرس الفرس ..
أولاً .. نورتي المنتدى بموضوعك الشيــــــــــق ...
ثانياً .. انا مو مستوعبة اللي قاعدة اقراه .. ليه !!
لاني صارلي شهر ادور في الشرقية وحدة شاطرة وثقــــــــــــة ...
وسبحااااااااااان الله موضوعك جاء في وقته ... :)
على البركـــــــــــة النتيجة الحلوة ...
وما في اروع من هالاحساس .. الشعر مرتب طووول الوقت :)
ربي يهنيكم ... ويسلم اللي اشتغلوا على شعوركم ...
بالله التفاااااااصيل والارقام وكل شي ممكن ينفعني .. هنا او عالخاص .. اللي يريحك ...
ومشكـــــــــــــــــورة مقدماً يا عسل يا ام شعر ناعم وحلو ;)
ود..*
ود..* •
وضحي لي ايش يعني الكيراتين وشلون طلع شعرك بعده <<موفاهمه شيء
كدلك
كدلك •
ماشاء الله الله يدوم عليك

بس سؤال اختي كم كلفك شغل يد احب امي وطول شعرك لوين ؟:)