نبض جنيني توقف ادعولي انا خايفه من عملية التظيف

السلام عليكم ورحمة الله وبركاته أخواتي في الله

انا عضوة جديده
وهحكيلكم حكايتي من اول زواجي ويارب متزهقوش مني

انا بقالي متزوجه سنه واربعة أشهر في اول زواجي مكنتش مهتميه بموضوع الحمل اوي مع ان اهلي وقرايبي وصحابي كان كلامهم تقيل عليا اول مايقولولي ايه مفيش حاجه في السكه,,,, لالالا شكلك حامل بس مخبية....ربنا يرزقك ... ووووو وانا كنت قدامهم بضحك بس بيني وبين نفسي بدأت أقلق علي 8 شهور بعد زواجي روحت عملت تحاليل انا وزوجي الحمد لله كله تمام بس برده محصلشي حمل

رحت لدكتورة تانيه قليتلي انا هكشف علي عنق الرحم عشان اتاكد ان مفيهوش اي التهابات او قرحه لان في دكاترة كتير بتنسي الموضوع ده ويتاخر الحمل وهم مش عارفين

وفعلا طلع عندي قرحه والحمد لله الدكتورة عملتلي كي وعالجتها شهر وحملت بعدها يعني بعد مكملت سنة زواج بالظبط
بس حمل ضعيف لم يستمر الا 4 ايام من تاخر الدورة ونزل ومزعلتش بصراحه حسيت انها بشارة خير وفرحت اوي

المهم برده عدا شهر محملتش زعلت وخفت وقلت انا عارفه ان الاستغفار بيفرج الهموم وقريت قصص علي كده كتير
فنويت اني الشهر يونيو كله ان شا ء الله استغفر ربنا مع استحضار النيه واحاول علي قد مقدر اصلي ركعتين قيام وبصراحه الدكتوره كانت كتبتلي علي منشطات فاخذتها بس مسيبتش الاستغفار والدعاء

وفعلا ربنا كرمني وفرحت اوي لما الدورة اتاخرت عليا 5 ايام وعرفت اني حامل وزوجي كمان فرح اوي لما اتاكدنا انه حمل قوي وحمدت ربنا جدا جدا جدا
بس للاسف استغفاري قل وياريته ما قل

الاسبوع الثالت تابعت مع الدكتورة وكله تمام .... الاسبوع الخامس تمام اوي النبض ظاهر وفرحت ....الاسبوع السابع اتصدمت :( الحمد لله علي كل حاجه

النبض توقف ولازم ننزله
مصدقتش(("مع العلم اني كنت بحلم بقالي تلات ايام قبل توقف النبض ان حملي مش هيكمل" ))سبحان الله
المهم رحت دكتورة تانيه برده نفس الحكايه لا برده مصدقتش عملت دوبلر برده مفيش نبض
كل اللي قلته اللهم اجرني في مصيبتي واخلفني خيرا منها

بس اللي تعلمته من اللي حصلي ان فعلا الاستغفار كنز احنا ناسيينه اوي وكمان لو ربنا كرمنا باللي نفسنا فيه منبطلشي استغفار انا الحمد لله هستغفر ربنا ان شاء الله في كل الاحوال

دلوقتي مش زعلانه الحمد لله بس قرفانه وخايفه عارفين ليه؟اولا قرفانه عشان بقالي 10 أيام الدكتورة كانت مدياهوملي مهله عشان البيبي ينزل مش راضي نينزل شربت قرفه وبنط حبل ولا نزل مني ولا نقطة دم واحده وخايفه اوي من العمليه

ادعولي بجد انا معلش طولت عليكم بس محتاجه مشاركتكم معاياوتعطوني شوية تفاؤل

ويارب ارزق كل محرومة بالذرية الصالحه حسنة الخلقه والخلق يارب