شلونكم يابنات
اليوم حبيت اوريكم طريقتي في عمل دجاج في قاعته بالخضروات
اول شي نسلق الدجاج في ماء وملح مع بهارات صحيحه ومكعب ماجي
في الوقت اللي بتنضج فيه الدجاجه نجهز الخضروات
نفرم بصلتين متوسطتين في الحجم
نقطع جزره مكعبات صغيره
نقطع حبتين كوسه مكعبات
وعلبه مشروم مقطع شرايح
ونقطع حبتين باذنجان مكعبات
فلفل اخضر بارد الى شرايح طوليه
ونهرس 4 حبات ثوم مع فلفل اخضر حار واحد
بعد ماخلصنا تقطيع الخضروات نجهز عيش ابيض مشخول عادي بس يكون نص سلق
ناخذ الخضروات ونحمرها في زيت الزيتون ويفضل عند التحمير ان نحمر الاشياء اللي تاخذ وقت اطول لحد ما تنضج في البدايه يعني اول شي الجزر نقلبه في الزيت لحد ما يتحمر شوي بعدين نضيف البصل وهكذا لحد ما تخلص الخضروات
وآخر شي نضيف الثوم
ثم نحضر البهارات
بعد ماقلبنا الثوم مع الخضروات نضيف مكعب ماجي
نص ملعقه صغيره فلفل اسود
نص ملعقه صغيره ملح
3 ملاعق طعام صلصة الصويا
نضيفهم ونقلب الخليط ويترك لمدة عشر دقائق حتى تلين الخضار
بعدين نضيف قطع الدجاج
وخمس ملاعق طعام جبن سائل
نقلب شوي ونسكر على النار عشان لا يحترق الجبن
نجهز الجدر ونحط فيه طبقه من العيش
بعدين نحط الدجاج مع الخضروات بهذا الشكل
ونضيف عليه باقي العيش
ونحط على الوجه ملعقتين من السمن
ويترك على نار هادئه من 20 الى 30 دقيقه
ثم يقدم
والف صحه على قلوبكم
لاتنسوني من دعائكم وردودكم
