جدولي الاسبوعي: من شعر خشن و جاف الى شعر ناعم و لماع

السلام عليكم خواتي...

شلونكم؟؟ و شلون الكشيش اليوم؟؟ ان شاء الله بعدها تحت السيطرة ؟؟ خخخ

ما راح اطول عليكم...

انا صار لي فترة ليست بطويلة <---- متعوب عليها هالجملة ترى...:o امشي على جدول لشعري الخشن و الجاف جدا جدا جدا جدااااااااااااااااااااا و المجعد.. في محاولات مستميتة لتهجيده و تنعيمه بحيث اني اقدر استغنى عن الفرد الكيميائي (التمليس) و السشوار اللي اصلا ما اطيق استخدمه بالمرة لانه هو السبب الرئيسي لزيادة جفاف الشعر...

المهم..

اول شيء بنات ابيكم تجيبون ورقة و قلم و تحضرون الاتي:

الخلطة الاولى للزيوت: زيت زيتون + زيت التاج (او اي زيت شعر يناسب نوعية شعركم) + بذور القطونا و طبعا تنقع البذور في الزيت لمدة ليلتين على التوالي قبل اول استخدام..

الخلطة الثانية للزيوت: زيت عافية (او اي زيت طبخ) + قطرات من زيت القرفة + (و انا زدت عليهم من عندي: زيت التاج + زيت الزيوت المنقوع فيه بذور القطونا و هذي الخطوة اختيارية للي يحبها بس انا استفدت منها واايد)

الخلطة الثالثة للشامبو: يفضل شامبو فركتيز الاخضر الخاص بفرد الشعر و تلميعه + صفار بيضة + ملعقتين عسل + شوية ماي + زيت الزيتون المنقوع فيه بذور القطونا بس ملعقة وحدة منه فقط ..

الخلطة الرابعة (تنفع للبلسم اللي بعد الشامبو و لحمام الزيت ايضا): تجيبين العلبة و تحطين فيها ملعقة زيت لوز + ملعقة زيت خروع + ملعقتين عسل + ملعقة من زيت الزيتون المنقوع فيه بذور القطونا...

الخلطة الخامسة: سيروم فروكتيز الخاص بفرد الشعر و تلميعه + بذور القطونا..

طبعا لاحظتوا يا بنات انه بذور القطونا اساس كل خلطاتي للشعر.. لان كان لها اثر كبير في تغيير شعري للافضل و الاستغناء عن التمليس و المعالجات الكيميائية بشكل نهائي..

الخطوة السادسة: فيتامينات هير فيت للشعر و هذي تنوخذ يوميا..

الجدول..

السبت: خلطة الزيوت الاولى... تنحط على الشعر لمدة لا تقل عن اربع ساعات و كلما زادت المدة كلما كانت النتيجة احسن ... بعدها يغسل الشعر بخلطة الشامبو مع ترك الشامبو على الشعر لمدة لا تقل عن 3 دقايق و بعدها يغسل و توضع خلطة حمام الزيت او البلسم لمدة لا تقل عن ربع ساعة... بعدها يغسل الشعر و بعد الانتهاء ينشف الشعر جيدا بالفوطة و توضع مسحات من الزيت على الشعر مثل السيروم.. و ممكن تحطين سيروم فروكتيز في حالة حبيتي تسشورين شعرج بعد الحمام و ممكن ينحط للريحة فقط (بدون سشوار) لان له رائحة جميلة نفاذة جدا.. و يعطي الشعر نعومة.. بس لا تكثرين منه لانه يلبد الشعر.. يلف الشعر او يربط للخلف باحكام مع لبس ربطة او شيلة على الشعر لمدة لا تقل عن خمس ساعات او مثلا طول الليل.. و بعدها ان شاء الله تجدين ما يسرك و يفرح قلبج :D

الاحد: استراحة

الاثنين: خلطة الزيوت الثانية مع اتباع نفس التعليمات الواردة ليوم السبت بحذافيرها حتى بعد الحمام..

الثلاثاء: استراحة

الاربعاء: نفس يوم السبت بالضبط..

الخميس و الجمعة استراحة..

و ينعاد الجدول الاسبوع اللي بعده نفس الشيء ..

ملاحظات عامة:

* هذا الجدول لذوات الشعر الجاااف جدا جدا جدا <----- عشان ما حد يستغرب كميات الزيوت المستخدمة..
خاصة لان التجعيدات في الشعر و الخشونة لا تختفي الا بالقضاء على الجفاف تماما.. لان اثبتت الدراسات انه التجعيدات في الشعر تزيد كلما كان الشعر جااااف و كلما قل الجفاف كلما انفردت الشعرة اكثر و صارت انعم..

* بالنسبة لمسح الزيت على الشعر بعد الحمام.. يختلف من واحدة لاخرى على حسب جفاف الشعر.. يعني اللي شعرها جاف جدا زي حلاتي و تحس انه يمتص الزيوت امتصاص يفضل لو تقسم شعرها عدة اقسام و تمسح على كل قسم مسحة او حسب حاجة شعرها و بعدين تمشطه و تلمه.. و اللي شعرها مو جاف وايد ممكن تلتزم بمسحة واحدة فقط على الشعر كامل..

* بالنسبة لتغطية الشعر او ربطه او لفه.. طبعا اهم شيء انه الشعر يكون منشف عدل بالفوطة.. يعني مو ينقط ماي لانه بتصير فيه ريحة.. و اللي ما تحب تربطه او تلبس عليه شيله.. ممكن تخلي الفوطة على راسها لحد ما تتاكد انه نشف و بعدين تستبدلها بشيلة او ربطة او ممكن تستخدم الفوطة اللي تنربط على الراس مع مراعاة فتحها كل ساعة و تمشيط الشعر لتاكيد فرده و ترجع تلبسها..

* سيروم فروكتيز.. هو لوحدة روعة لنوعية شعرنا.. بس مع البذور احلى.. و ممكن تحطينه بعد ما تمسحين الشعر بالزيت مسحة وحدة بس لا غيررررر (لكل انواع الجفاف في الشعر سواء شديد او متوسط او خفيف)... يطلع الشعر روعة ..

* في يوم الاستراحة.. يفضل وضع مسحات خفيفة من زيت الزيتون المنقوع فيه البذور على الشعر الناشف و هالطريقة روعة انها تنعم الشعر اكثر و تعطيه لمعة و تبين لونه.. و يفضل عمل هذي الخطوة في الصباح بعد الاستيقاظ من النوم..

* اهم ملاحظة و هي انه هالخلطات كلها تنعم الشعر كثيرررررر و تعطيه ملمس يجنن.. لمعة رائعة.. تحسين فيه صحة ... و عن شعري تفرده فرد كاامل من قدام لحد نص الشعر.. بس من ورا لا .. بس خفت التجعيدات كثير و صار شكلها احلى فيها لمعة و ملفلفة بشكل حلو.. استغنيت عن الجل و هالخرابيط بالمرة..

* اخر و اهم ملاحظة.. هالله هالله في الاستمرار يا بنات... لانه ممكن تتغير طبيعة شعركم بالمرة.. و يخف الجفاف و معاه تخف التجعيدات و ينفرد شعركم بطريقة اسرع..

* هذا الجدول اجتهاد شخصي بحت.. و تم اعتماده بعد عدة تجارب شخصية في شعري الكريم :) .. يعني انا كنت فار التجارب فيه خخخ .. فيمكن يناسب وحدة و يمكن ما يناسب وحدة ثانية.. في هذي الحالة انصح كل الخوات انهم يتبعون الطريقة اللي يرتاحون عليها و اللي تناسبهم اكثر سواء من ناحية نوعية الزيوت او طريقة العناية اليومية ...

هذا و تقبلوا كل حبي و تقديري...

و الله يعطي كل وحدة فينا الشعر اللي تتمناه...:)

ما ابي منكم يا بنات الا الدعوات لي بتفريج همي و كشف غمي ..

و اي استفسار انا حاااضرة...