رجعت لكم بعد غيبة 6 شهور..

السلام عليكم ورحمة الله وبركاته..

قبل أكتب موضوعي أتمنى من الله العلي القدير أن يرزق كل وحدة فيكم بالذرية الصالحة وتطلعون كلكم من هالمنتدى..
وأشكر الاخت العلياء جدا والاخت shoshah وكل البنات اللي واسوني وطمنوني لما كنت خايفة يكون حملي خارج الرحم نسيت اسمائهم برجع لموضوعي اللي كتبته بشعبان وأشوفهم..

أنا من 3 سنوات حملت وكان خارج الرحم بالأنبوب الايمن وشالوا الانبوب.. وجلست سنتين ونص ماحملت وبشهر شعبان الماضي تأخرت علي الدورة وماحللت لأني تعبت من التحليل ويطلع دائما خط واحد!! و بعد تأخر الدورة بيومين نزل علي دم بني وصرت أتحرك كثير على بالي إنها الدورة وأبيها تنزل واستمر لمدة 3 أيام بعدين جبت اختبار الحمل وحللت وطلع خطين وخط الحمل كان غاااااامق وصرخت بالحمام -باسم الله- من الفرحة وعلطول توضيت وصليت ركعتين شكر لله.. ورحت العصر بنفس اليوم للمستشفى وحللوني وصار حمل لكن الدكتورة قالت بما إنه سبق لك حمل خارج الرحم احتمال يتكرر وخفت وكشفت ومابين بالسونار اللي عندها بالعيادة وقالت اصبري لين السبوع الجاي عشان يكبر الحمل!!و عشت ليلتين من الخوف والروعة وماصبرت ورحت لهم لين قالوا بنحولك على قسم الأشعة لان الجهاز دقيق مرة!! ويالتهم حولوني علطول وماروعوني والجهاز اللي بعيادة الدكتورة تعبان ومايبين إلا الحمل بالشهر الثاني وفوق!!
يوم أخذت الإشاعة ب- 500- ريال لقت الكيس داخل الرحم الحمد لله..
ومن بعدها معد دخلت لا هالمنتدى ولا منتدى الحمل ولا موقع حواء .. صار ينزل معي دم وعطوني مثبتات لين خلصت الشهر الثالث والحمد لله معد صار ينزل دم وفرحت إني دخلت الرابع لكن كانت تنزل معي افرازات من بداية الحمل وافرازات كثيرة وبالشهر الرابع تحولت لإلتهابات وصار يجي معها حكة وكلما قلت للدكتورة او الدكتور (أنا أراجع عند دكتور استشاري ودكتورة اخصائية بنفس المسشفى) كلما قلت لهم عندي افرازات زالتهابات كانوا يقولون لي: خودي بالك الالتهابات حتسبب ولادة مبكرة!!! طيب أنا وش اسوي؟؟ وش العلاج؟؟ كنت أبيهم يصرفون لي غسول او مضاد حيوي او عصار او تحاميل مثل باقي المستشفيات!! وصرفت لي تحميلة وحدة اسمها جاينودكتارين!! خفت يومين ورجعت الافرازات!! وش بتسوي التحميلة الوحدة؟؟ ليش ماصرفت لي ست سبع مثل الناس وإلا تبيني أراجعهم كل اربع او خمس ايام عشان فلوس الكشفية؟؟!! حسبي الله عليها وعلى الدكتور!!!

يوم انتصفت بالشهر الرابع صار ينزل مع الافرازات موية ورحت أراجع الدكتور وقلت له على الموية وقال افرازات وكشف بالسونار وقال وضع الجنين كويس. وبعدها باسبوع يعني قبل أدخل الشهر الخامس باسبوع رحت ثانية للمستشفى بس دخلت على الدكتورة وقلت لها على الموية وقالت: حديكي تحميلة وإزا خفت فهي افرازات وإزا ماخفتشي فهي لاقدر الله موية الجنين!! وكشفت بالسونار وقالت كويس.. وبعد ماجلست على الكرسي صرفت لي حبوب باسكوبان وقالت إذا حسيت بشي يدفع من تحت كليهم وإذا ماخف تعالي للطواري وناديني!!!!!!! أنا ماأدري عن شي! ولا أدري وش يعني دفع؟؟ توني بكر!!! هي تقصد الطلق!! وأنا ماسألتها ليش تتوقعين ممكن يصير فيه دفع بهالوقت ولا اهتميت؟؟ وبعدها بخمس أيام بديت أفكر في كلامها وخفت ورحت لمستوصف فيه اخصائية سورية وبعد ماكشفت انهبلت وقالت مافيه موية!! الجنين حوله موية قليييييييلة 2 من 10 بسرعة روحي للمستشفى!! ورحت لمستشفى حكومي ونوموني وصاروا يعطوني مضاد حيوي بالوريد عشان الالتهابات وتحاميل مهبلية وقالي الدكتور مافيه علاج لتوقف المويات لكن احنا نعطيك المضاد والتحاميل عشان تعالج الالتهابات وكله بيد رب العالمين!! صرت راقدة على ظهري حوالي شهرين.. وأثناء تنويمي بالمستشفى اتصلت على نفس الدكتور اللي حضرته استشاري وسألته عن ربط الرحم. قلت: هل ينفع معي ربط الرحم وانا معي مويات؟؟ قال: طبعا ينفع وحيخفف نزول المية كتييييير!! وسألت أخصائية بالمستشفى اللي انا متنومة فيه وقالت: ماينفع! من هالدكتور اللي يلعب عليك ويقول ينفع الربط حسبي الله عليه؟؟ واتصلت على الدكتور محمد البقنة كان رقمه مخزن بجوالي وقالي: لو كنت مسويه ربط مسبقا ونزلت معك موية لازم تفكين الربط!! ماينفع الربط ابدا مع المويات ولا مع النزيف!!
وماأقول إلا حسبي الله على هالدكتور وعلى المستشفى كله. وراح اقولكم اسم هالدكتور واسم المستشفى اللي يعمل فيه!!!
وبنهاية الشهر السادس جاني الطلق وانفتح الرحم 6سم لأن الموية قليلة ومعد صارت تكفي الجنين!! وقرر لي الدكتور قيصرية لأن وضع الجنين مقعدي مايقدر يفر راسه لتحت لان الموية قليلة!!!

وأنا أشم البنج قعدت أبكي وأقول بنفسي مدري بيموت الجنين عقب هالتعب اللي شفته أو أنا اللي بموت وأخليه ويربيه أحد غيري؟؟!!!
لين مانادتني الممرضة باسمي وصحيت حسبتهم يختبرون قوة البنج عشان يبدون بالعملية لكني حسيت بوجع الجرح وقلت لها خلاص؟ قالت: خلاص العملية. الحمد لله
وسألتها: وش جبت قالت بنت. قلت: كويسة ؟ وكنت خايفة تقول ماتت!! وقالت إن شاءالله كويس في الحضانة!!

الثلاث أيام الاولى مااهتميت ولهيت مع تعب العملية والجرح ومارحت أشوفها بالحضانة إلا خامس يوم لما كتبوا لي خروج! شفتها صغيرة مررررررررة وبالعناية المركزة وعليها الليات والأكسجين وقعدت أصيح عليها وأنا مافيني حيل من هالجرح!!!!
ولي اليوم 16 من ولدت


والحمد لله في الاول والاخر وفي الظاهر وفي الباطن
والحمد لله على كل حال
يارب إذا كان لبنتي خير في هالدنيا اللهم اشفها وانبتها نباتا حسنا وأحييها حياة طيبة.. وإن كان الموت خير لها فاجعلها طيرا من طيور الجنة وشفيعة لي ولوالدها..

كتبت موضوعي عشان تستفيدون منه وإذا دعيتوا يابنات لاتقولون : يارب ترزقني بالحمل أو جعلي ماأشوف الدورة هالشهر.. ادعوا (بالذرية الصالحة المعافاة)



بنات ادعوا لي وأنا ماراح أنساكم من صالح دعائي... تمنيت أكون طاهرة عشان أصلي الليل وأدعي لها بسجودي..