السعودية - الرياض
معلمة خبرة
لجميع المراحل والمواد إبتدائي متوسط ثانوي جامعةبالشهر أوالساعة
السعودية - جميع المناطق
خطااااااااابة
لدي موظفات وعوائل محافظة لا اكلم الرجال والله ولي التوفيق.أم بدر
           
           
إضافة رد
 
أدوات الموضوع انواع عرض الموضوع
قديم 14-01-1430 هـ, 03:45 مساءً   #1
قهوة بالكراميل

عضوة جديدة
 
الصورة الرمزية قهوة بالكراميل
 
تاريخ التسجيل: 11-11-1429 هـ
المشاركات: 79


Unhappy ولدي وانسداد الأنف :( ساعدوه وساعدوني (أم جديدة)

السلام عليكم ورحمة الله وبركاته

أخواتي ساعدوني الله يرضى عليكم

ولدي عمره شهر ونص تعرض للفحة هواء وصار عنده احتقان بالحلق ... طبعاً ترتفع حرارته وصوته مبحوح ياقلب أمه ... ومعه كحة وانسداد في الأنف ... وهذي أكبر مشكلة ... أحياناً وهو نايم أصحى على صوته وهو يشهق شهقات محبوسة يحاول ياخذ نفس ... من ناحية الأنف مسدود تماماً ومن ناحية ثانية الكحة ماتطلع بسهولة بسبب البلغم (والله قلبي يتقطع) ... لدرجة صاير يطلع من فمه شوية زبَد أبيض ... يعني لعاب وفيه فقاقيع صغيرة ...

بالله عليكم كيف أريّحه على الأقل من انسداد الأنف ... أخذته لاستشاري أطفال وكتب له مسكن وعلاج للحلق وبخاخ للأنف لكنه مانفع ... لأنه نفس قطرة الملح لكنه بخاخ ... وقطرة الملح من قبل ما نفعت ولا الشفاطة ... لأن المخاط -الله يعزكم- بعيد ماتوصله ... وأحياناً يكون الانسداد زي احتقان الأنف عند الكبار ... يعني شي ماله حل إلا التنفس من الفم

تكفون عطوني حل لانسداد الأنف ... والله قلبي يتقطع عليه كل ماشفته مختنق ... لا يرتاح بنومه ولا يرضع براحة ... والله مافي يدي إلا أبكي معه كل شوي

ساعدوني الله يرضى عليكم



على كل حال بكتب لكم الأشياء اللي سويتها ... بعدين أنسخ لكم الخبرات والأفكار والتجارب اللي انذكرت في الردود ...

بالنسبة لولدي كان وضعه صعب جداً خاصة مع الحرارة ... لكن من فضل الله تعالى الحرارة خفت كثير ... وبقت مشكلة انسداد الأنف + الكحة والبلغم ...

كنت ألح على زوجي نروح طبيب ثاني أو يجيب علاج ثاني من الصيدلية بس ما رضى ... واتصل بأحد قرايبه استشاري أطفال ... وقال لنا اكتفوا بقطرة الموية والملح للأنف ... والكحة لا تستخدمون لها علاج لأنها تساعد على تنظيف الصدر من البلغم ولازم تتحملونها شوي مهما كانت متعبة ... وساعدوا الولد بأنكم تقلبونه على بطنه مع التربيت على الظهر حتى ينزل البلغم من الصدر ... وقال لنا إن الموضوع عادي وبسيط بإذن الله ومعظم الأطفال مرضى حالياً بسبب فيروسات في الجو ... وإنه خلال أسبوع إلى أسبوعين بالكثير راح يتحسن كثير بإذن الله ...

أنا لي يومين ألاحظ تحسن على ولدي الحمد لله ... وراح أذكر لكم الأشياء اللي سويتها:

1. بخاخ الملح باستمرار في الأنف.
2. أعواد قطن أغمسها في زيت زيتون وأحاول أسحب بها الانسداد اللي في الأنف وفي نفس الوقت أرطب بها داخل الأنف عشان يعطس ولدي ويطلع الانسداد ... بس لاحظت إن المسح بزيت الزيتون خفّف الإفرازات وبالتالي قلّ الانسداد والاختناق (الله يسعدك ويوفقك يا عمة ملوكي وكل من شارك ونصح).
3. حبة مرة بحجم حبة القهوة ... صبيت عليها نصف فنجال موية مغلية ... وصرت أقطر بفمه مرتين أو ثلاث مرات باليوم ... قطرة وحدة أو قطرتين لا أكثر ... لأن سنّه ماتتحمل الأدوية القوية.
4. صرت أرفع راسه وأكتافه وقت النوم على مخدة بحيث يكون أعلى من جسمه (الله يسعدك ويوفقك برضو ياعمة ملوكي وكل من نصحني نفس النصيحة).
5. وهي مهمة جداً ... خلطت زيت زيتون مع فازلين وصرت أدهن بطنه وظهره وصدره وحلقه ... كل يوم مرتين على الأقل ... مرة في النهار ومرة قبل النوم ... وألفّه بلفّة دافية وألحّفه وأحطه بسريره.
6. لاحظت إنه أول ما ينام يبدا يلهث وتتسارع أنفاسه (يحلم أحلام مزعجة) ... وهالشي يزيد من الانسداد والحشرجة لأنه يحرّك الانسداد اللي في الأنف ... لكن لما يتنفس بهدوء ومن غير انفعال يكون تنفسه سهل ومن غير صوت حتى ... فصرت إذا حطيته بسريره أحط يدي على صدره وأقرأ عليه آية الكرسي (من قرأها قبل النوم يكون معه ملك يحرسه من الشياطين) ... والحمد لله صار ينام بهدوء ساعتين متواصلة اللهم لك الحمد ...

هذي تجربتي ... والحين بنزل لكم التجارب والاقتراحات اللي ذكروها الأخوات الله يسعدهم:

*.*.*.*.*.*

* ادهنه اذا جاء وقت النوم بزيت السمسم صدره وظهره وبطنه والفه وادفيه زين والحمدلله خف كثيير لكن انتي ولدك معه حرارة مايصلح له التدهين لانه يزيد من ارتفاع الحرارة اول ابحثي عن علاج لخفض حرارته لانها اصعب شي...

* إذا كان معه بلغم عطيه 7 حبات رشااااااااد +تمر رطب معبوط باليل والظهر بصراحة ممتاز للبلغم

* شوفي حطي زيت زيتون بفنجال وجيبي عود اذان وغمسيه الزيت ودخليه بخشمه
وخلي يعاطس وسويه كذا مره وبتشوفين وش بيطلع منه,,,وبيرتاح مجربته مع بنتي,,,
والحراره,,,داومي عليه بالتحميلات ممتااااااااااازه ومايشوف شر
وبالنسبه تقولين يطلع من فمه زبد اسدحيه على بطنه وطققي ظهره شوي شوي تقريبا اجلسي ربع ساعه مثلا طقي دقيقه وبعدين امسحي ظهره دقيقه وان شاء الله بتشوفينه يطلع البلغم
وعليك برقيته وتعويذه صباحا ومسااااااااااء


* والله اعرف وحده يوم يصير مع عيالها كذا ماتتحمل تشوفهم كذا
وتشفط لهم بفمها والله العظيم
وطبعا يرتاحوا بعدها


* عند الصيدليه شفاط لتنظيف انف الرضع سهل الاستخدام ومريح

* قطعي بصل وخلي قريب منو يخلي التنفس احسن بكثبرررررر === طبعا هذا مو كلامي كلام الدكتور
قطري من حليبك بخشمو


* غيرت الدكتور ورحت لدكتور ثاني شفطلها اللي في انفها وقال اللي انه وحدة من فتحات الانف مسدودة تماما والحمدلله ارتاحت اذا انت من جدة قولي لي عشان ادلك على الدكتور ..

* نقط اتروفين للخشم حقت الاطفال اطلبيها من الصيدليه وعلميه بعمر البيبي واذا تناسبه اشتريها باسرع وقت (لي تحفظ على هذي القطرة بصراحة)

* انا ولدى كان عنده زكام وبعدين جبت له كبسولات تسمى فلونيز ضعي ما بداخلها على بفته تبعه و***** الله تسلك انفه وهناك ايضا زيت يسمى زيت الرياح موجود في السعوديه خذى نقطه بسيطه وضعيها على انفه بيسلك على طولللللللللللللللللل

* يمكن طريقة استخدامج للبخاخ غلط..بعد ما اتسوين له البخاخ ..حطيه على بطنه عشان ينزل اللي في خشمه..والله يعافي ولدج ..بعمر ولدي ..ونفس الحالة ..بس انا ما عطاني الدكتور بخاخ ...عطاني قطرة للخشم ..وقطرة اتروفين للرضع ..وقالي استخدم الاتروفين عند الضرورة مب دايما

* الصراحة قطرة الملح جدا ممتازة النقط مو البخاخ اسدحيه وحطي النقط بعدين جلسيه شوي عشان اللي بالخشم ينزل يمكن انتي ماتسوين الطريقه هذي

* جيبي سميرا<<حبه سوداء>>واطحنيها زين وصبي عليها زيت سم سم ورجيها قوه,,,
بعدين حطيها بقطارة الانف ونقطي بخشمهاااا,,,
وهو كان عنده الجيوب الانفيه تسمعين شخاره وهو نايم وتحسين انه بينكتم,,,
وارفعي راسه اذا جاء ينام,,,


* نصيحه لوجه الله اختي ,,,ياداوي ولدك عند الدكتور او استخدمي الخلطه,,,لاتلخبطين عليه,,,
لانك ماتدرين وش يصير يمكن مايناسب قطره طبيه مع الزيت او السميرااا
انا عارفه انك تبين ولدك يطيب بس اصبري عليه وان شاء الله بترتاحين


* ادهنى صدره بزيت حبه البركه وضهره رائع للبرد والكحه وقد اوصانا بها رسول الله لقوله انه شفاء من كل داء الا الموت وهى حبه البركه واصبري عليه الاطفال بطول معهم النزلات لمناعتهم الضعيفه وربنا يشفيه ويخليه

* انا بعطيك الحل من ضمن تجاربي مدام عمره شهر ونصف اعطيه فنيستيل ممتاز للرضع وللانسداد الانف وحطيه في الرضاعة اذا كانت ماترضى تاخذ الدواء (الاستشاري حذرنا من الأدوية في السن الصغيرة يابنات)

* البنت الحين لها شهر مر علي الموضوع وطابت وباقي انسداد انفها كنت افتح كثير خشمها في القطره واحيانا ادخل عود اذن علي الخفيف اجر الي داخل بس اذا حبيتي تسويها سويها بحرص وانتبهي او كلينكس و الفها من فوق وادخلها خشمها وبعدين اشفطه في الشفاط لكن انا قللت من هذه الحركه لاني حسيت فتحت انفها كبرت اشوي هيك حاسه

* اذا نام خليه مرتفع او نوميه على جنب علشان مايتسكر خشمه وهو نايم ويرتاح بنومته ومايشوف شر

* ما ادري جربت بخار الماء لأنه عيالي كلهم يجليلهم ضيق تنفس و اول شي ينصحني الدكتور هو بخار المويه( افتح المويه الحاره لما يصير الحمام بخار و اقفل المويه و ادخل انا و طفلي عشرة دقايق صباح و ليل ) طبعا انتبهي لما تخرجي لا تعرضينه لهواء بارد

* انتي قلتي انه تعرض للهواء علاج ولدك ان شاء الله من الله ثم التدهين
جيبي لك ( ودتسه ) (ودكه ) (الشحم او اليه الخروف تذوب وتصير دهن ) جيبيها وحميها وجيبي وليدك وعند الدفايه ادلجي ظهرة وبطنه ورجوله ولبسيه زين ولفيه وخليه ينوم ويعرق واذا عرق ان شاء الله معناها طلع البرد ويفضل تكررينها 3 ليالي
واذا ما تقدرين على الودتسه جيبي زيتت زيتون +شوي كمون +شوي زنجبيل حميه ودهنيه بنفس الطريقه واهم شي انك تلفينه زين بالبطانيه عشان يعرق .
واذا ان الهواء لافحه من راسه صبي زيت زيتون دافي عليه من كل الجوانب ولفيه بيطلع البرد ان شاء الله
معلومه (( ما تدهنين رجوله وراسه مع بعض خطر يا اما انك تدهنين الراس بس او الرجول بس ,, وما يتدهن الطفل وهو فيه حراره )


* حبيبتي انا كنت اقطر زيت زيتون وبعدين اخذ كلينكس والفه صغير مرره وادخله دااااااااااخل خشم بنتي شوي الا بنتي تعطس ويطلع اللي بخشمها بس سويها مرتين واكثر على كل فتحه وهالطريقه امي الله يحفظها هي اللي قالت لي عليها و***** الله بيرتاح

* احط وين انفها اشوي فيكس شوية مع زيت زيتون وحطي وين انفه ووين صدر وقاعة رجوله وبيدفا وبيتحسن
وبعدين لازم ينشفط صح انا كنت استخدم نفس الشفاطة ومافي فايدة لين ماخدامتي الحمد الله عندها عيال واتعرف تشفط بشفاطة ثانية اللي هي مالت القطرة يعطون بالصيدليات وهي اتحط بفمها وتشفط بس مايوصل فمها عقب اتحطه بالكلينكس واتسوي هالطريقة وترتاح بنتي وكل اشوي لازم قطور ماء وملح


* عليكي بالاشياء الدافي يعني انتبهي لا تكون حاره على الطفل وحاولي تعطيه بالملعقه احسن مثل اليناسون الكراويه
حطي شوية فازلين في يدك وهو نايم عظمة الانف من فوق ادهنيه بشوية فازيلن واعملي لها مساج خفيف وخليه ينام على بطنه وشوف الوسخ الي ينزل من الانف
وجهزي زيت زيتون الوزير وحطي فيه حبة بركه وشوية وزعفران وكل يوم ادهنيه بالليل وكوفليه طبعا الاشياء الي حبة البركه خليه بالزيت لا تنزليه


* أهم شي رأس الطفل خليه مرفوع مايصير مستقيم مع الجسم
بللي قطنة بموية ودخليها بوسط خشمه لين أخر شي يعني نظفي الخشم مره بعدين جيبي قطرة الموية والملح وقطري بكل أنف
وكذلك دهني جسمه بزيت سمسم معه شوي عصير ليمون وعطية نقطتين بفمة من عصير الليمون
أذا مافاد لازم تسوين له بخار تلقينه على طوول يرتااح وينام عن تجربه والله
وبنات أنتبهوووا تعطون أطفالكم قبل سنة أي قطرة غير قطرة الموية والملح لانه أغلبية الأطفال مايتحملونها وتسبب لهم أرتفاع بضغط بالدم


* مثل حالة ولدي بس انا من شفته تعبان وما يستفيد على ادوية المستشفى ادهن صدره بفكس اطفال كثير يرتاح عليه والحمد الله الحين صار احسن بكثير

* وحده كانت تقول لي اذا انسد خشم ولدك
غرقي راسه بزيت زيتون وخصوصا المنطقه اللينه في راسه يسمونها ( يافوخ )
وانه بيطلع الي مضايقه


*.*.*.*.*.*




أستودع الله الذي لا تضيع ودائعه ديني وولديّ ووالديّ وزوجي ونفسي وأحبابي وكل مارزقني ربي
أعيذ ولديّ بكلمات الله التامة من كل شيطان وهامة ومن كل عين لامة
قهوة بالكراميل غير متواجد حالياً رد مع اقتباس إرسال الموضوع إلى الفيس بوك إرسال الموضوع إلى تويتر




14-01-1430 هـ, 04:23 مساءً
#2
تقريبا نفس الحالة ولدي عمره ثلاثة اشهر ومعه كحة وبلغم واذا نام ينقطع نفسه لان خشمه منسد وديته للمستشفى لكن بدون فائدة ماغير اوكسجين وقطرة الملح صرت ادهنه اذا جاء وقت النوم بزيت السمسم صدره وظهره وبطنه والفه وادفيه زين والحمدلله خف كثيير لكن انتي ولدك معه حرارة مايصلح له التدهين لانه يزيد من ارتفاع الحرارة اول ابحثي عن علاج لخفض حرارته لانها اصعب شي ... الله يشفي لك ولدك ويعافيه يارب


رد مع اقتباس
شيبه مرتزه غير متواجد حالياً  



14-01-1430 هـ, 04:29 مساءً
#3
إذا كان معه بلغم عطيه 7 حبات رشااااااااد +تمر رطب معبوط باليل والظهر بصراحة ممتاز للبلغم
والله يشفيه ويخليه لك إ ن شاء الله ياااارب


رد مع اقتباس
@@حلا القصيم@@ غير متواجد حالياً  



14-01-1430 هـ, 04:33 مساءً
#4
شيبة مرتزة
حلا القصيم

الله يسعدكم ويوفقكم يارب ويخلي لكم أولادكم

يعني مافي حل سريع لموضوع انسداد الأنف ... هذا هو جنبي يتنفس بمنتهى الصعوبة وما أدري كيف أريحه
هالموضوع شاغلني أكثر من موضوع الحرارة ... لأن الحرارة تنزل شوي الحمد لله مع خافض الحرارة ... لكن هالانسداد ما خلاه يرتاح لا بنوم ولا برضاعة ولا بشي

والله قلبي يتقطع عليه!!!


رد مع اقتباس
قهوة بالكراميل غير متواجد حالياً  



14-01-1430 هـ, 04:41 مساءً
#5
هلا اختي ان شاء الله مايشوف شر

يعني تحسين انه فيه حاجه جوا خشمه,,,

شوفي حطي زيت زيتون بفنجال وجيبي عود اذان وغمسيه الزيت ودخليه بخشمه
وخلي يعاطس وسويه كذا مره وبتشوفين وش بيطلع منه,,,وبيرتاح مجربته مع بنتي,,,

والحراره,,,داومي عليه بالتحميلات ممتااااااااااازه ومايشوف شر
وبالنسبه تقولين يطلع من فمه زبد اسدحيه على بطنه وطققي ظهره شوي شوي تقريبا اجلسي ربع ساعه مثلا طقي دقيقه وبعدين امسحي ظهره دقيقه وان شاء الله بتشوفينه يطلع البلغم

وعليك برقيته وتعويذه صباحا ومسااااااااااء


رد مع اقتباس
**عمة ملوووكي** غير متواجد حالياً  



14-01-1430 هـ, 08:43 مساءً
#8

والله اعرف وحده يوم يصير مع عيالها كذا ماتتحمل تشوفهم كذا
وتشفط لهم بفمها والله العظيم
وطبعا يرتاحوا بعدها

الله يشفي لك صغيرتك


توقيع


رد مع اقتباس
الوردة الصفراء@ غير متواجد حالياً  



14-01-1430 هـ, 08:52 مساءً
#9
المشاركة الأصلية كتبت بواسطة **عمة ملوووكي** مشاهدة المشاركة
هلا اختي ان شاء الله مايشوف شر

يعني تحسين انه فيه حاجه جوا خشمه,,,

شوفي حطي زيت زيتون بفنجال وجيبي عود اذان وغمسيه الزيت ودخليه بخشمه
وخلي يعاطس وسويه كذا مره وبتشوفين وش بيطلع منه,,,وبيرتاح مجربته مع بنتي,,,

والحراره,,,داومي عليه بالتحميلات ممتااااااااااازه ومايشوف شر
وبالنسبه تقولين يطلع من فمه زبد اسدحيه على بطنه وطققي ظهره شوي شوي تقريبا اجلسي ربع ساعه مثلا طقي دقيقه وبعدين امسحي ظهره دقيقه وان شاء الله بتشوفينه يطلع البلغم

وعليك برقيته وتعويذه صباحا ومسااااااااااء

الله يسعدك حبيبتي

بإذن الله بحاول أسوي اللي قلتي عليه إن تجرأت ... مشكلتي أخاف أسوي أي شي ... أخاف إنه يتألم
والله الكل مستغرب مني ... عمري ماكنت بهالضعف

أما الأذكار فأنا والله أورد عليه من يوم كان ببطني ... الله يحفظه من كل شر ويحفظ لكم كلكم أولادكم يارب


رد مع اقتباس
قهوة بالكراميل غير متواجد حالياً  



14-01-1430 هـ, 08:55 مساءً
#10
المشاركة الأصلية كتبت بواسطة طوق أحمر مشاهدة المشاركة
للرفع
الله يرفع قدرك دنيا وآخرة حبيبتي


رد مع اقتباس
قهوة بالكراميل غير متواجد حالياً  



إضافة رد

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة
الانتقال السريع


الساعة الآن 07:56 .