:: السلام عليكم ورحمة الله وبركاتــة ::
حياكم الله أخياتــي الغاليــات ..مثل ما وعدتكم إنــي راح أنزل لكم قصتي ومعاناتي :44:ها أنــا وفيت بوعدي .. ونزلت القصه وراح تكون ع اجزاء ..لان فيه صعوبه علي انزلها بوقت واحد..
فـــــــلا تنسونــــــــي من صالح دعواتكم.. ان ربي يشفيني ويعافيني..ومرضى المسلمـــين
..إليكــــــــم القصــــه ...
+++++++++++++++++++++++++++++++++++++
في ذاك اليوم ..كان كل شي مختلف..كنت ساعه أحس أن المعاناة ستكتب لها النهايه,وساعه احس بشعور غريب(قلق.خوف.توتر)أحاسيس متضاربه ومشاعر غريبه...كنت داخليآ أحس بشد وجذب ساعه أعزم أمري وأقول (ياحياة سعيدة..أو موتة شهيدة)ياأعيش نحيفه ورشيقه وجسمي حلو زي كل البنات اللي بعمري،والا الموت ارحم.تعبت نفسيآ من سمنتي،،طفولتي ماعشتها مثل باقي الأطفال،وأيام شبابي تعب ودوخه وارهاق وأمراض ومراجعات كله بسبب الوزن الزايد،،والعمر قدامي من بيقبل فيني وانا بها الشكل،وكيف أبجيب اطفال وأنا بدون زواج وأطفال مريضه ودايم دايخه..وساعات أقول"يابنت المسأله مسألة حياة وموت.ولاتغامرين بحياتك عشان شكليات ورشاقه.ياما ناس وناس مثلي وأسمن عايشين ومبسوطين ومتزوجين وعندهم أولاد وبنات وعايشين في سبات ونبات..
شهر كامل وأنا أستخير.. أمي تستخير..أختي أم مؤيد تستخير..أخوي فارس يستخير..مكالمات,مشاورات..ألين جاء اليوم الموعود..وتوكلنا على الله وقررنا نسافر الرياض عشان نروح لمركز الحبيب الطبي بس نشاور ونشوف وش يقولون؟ .وش ينصحون فيه؟.وش الأفضل بالنسبه لحالتي؟ صليت ركعتين ودعيت ربي ييسر لي الخير وين ماكان..وجاني الصوت الحنون(ندو...)يالله أخوك ينتظرنا في السيارة.. امي نادت اومانادت انا قام قلبي يخفق وبديت أرجف وصرت أتنفس بعمق..فتحت غرفتي أخذت عبايتي وأنا أستغفر لبست عبايتي ونزلت الدرج ركبت السيارة..كان في السيارة الجو متوتر الكل ساكت وفي راسه يدور ألف وألف سؤال,كنت أتأمل الشوارع والسيارات ماكنت اشوفها لاشوارع ولاسيارات..كانت كأنها أشياء غريبه وأول مره أشوفها كنت بالضبط اتمثل المثل اللي يقول(مع الناس ولا كني مع الناس).3ساعات ونص عشتها بكل ثوانيها وبكل تفاصيلها.وفي لحظة صمت تنحنح فارس وكاني ذيك اللحظه سمعت صوت وحش من الخوف.لأني كنت ساااااااااااارحه بأفكاري.قال يالله انزلوا .. نزلنا وكانت ام مؤيد بإستقبالنا ..كانوا يسولفون ويضحكون وانا سرحانه بالتلفزيون اللي قدامي ..وكانوا يعلقون علي قالوا ترى الدعوى كلها إستشاره لا أقل ولا أكثر ..لا تعبين نفسك في تفكير سلبي .. فعلآ كنت محتاجه احد يقولي مثل هالكلام وينقذني من التفكير .. مع اني كنت مقتنعه تمامآ من هالخطوه وانا صاحبة الفكره والى ذيك اللحظات وانا مقتنننعه تماما لكن كان مجرد شعور اجهل خفاياه.. وبديت اندمج معهم بالسواليف ونسيت او تناسيت اللي شاغل تفكيري ..وقبل لايطلع فارس قال :: ندى ترى موعدنا بكرى الساعه 3 العصر..خليكم جاهزين ..قالت ام مؤيد انا بروح معكم وامي تجلس تعب عليها ..وكانت اعلق عليها :: قالت تعب عليها ولا تتهربين من تجهيز فطورنا ؟؟ قال فارس وانت ما تفكرين الا ببطنك يالدووبا .. ضحكوا كلهم وأبتسمت ابتسامه باهته :: وكانت كلمته مثل الشاحن اللي اشعل الحماس فيني من جديد ..ودفعني للتخلص من عقدتي الاولــى والاخيــره ..
وكان وقت أذان المغرب ..ألتمينا ع السفره وبوقت الآذان دعيت ربي ييسر لي .. وافطرنا وام مؤيد كانت تقولي ندو ترى مصلحه الحلى هذا عشانك.. وهذا العصير اللي تحبين ..
(إغراءات بس بيني وبينكم ما كثرت حلى اكلت قطعتين بس )..
:::: ويوم الثلاثــاء الساعه ثنتين ونص الظهر :::
تجهزت واخذت عبايتي وشنطتي وطلعنا من البيت بإتجاه مركز الحبيب الطبي..دخلنا جلسنا بالانتظار ..شوي نادوا ع اسمي .. دخلنا وكانت دكتوره ..حكيت لها وضعي وشافت وزني وقالت لي :: انت مايناسبك الا الجراحه لأن سمنتك زايده وماراح يفيد معها شفط الدهون او أجهزة نحت الجسم ...
بصراحــه.. لا تسألوني كيف كان شعوري وقتها كنت محبطـــه ع الاخـــر .. حسيت ان كل اللي خططت له تلاشى وتحطممممممم..
انتبهت ع صوت الدكتوره يوم قالت لي :: انا راح احولك ع دكتور جرَاح متخصص وعنده خبره في مجال جراحة السمنه..هو راح يدلك ع المناسب لك ولوزنك..
عطتنا ورقه تحويل..وطلعنا من عندها ..وخبرونا ان الدكتور مسافر وإجازته غير محدده بوقت .. وحطينا رقمنا عندهم إذا جاء الدكتور يدقون علينا ..
ورجعنا لبيت ام مؤيد .. وجلسنا نتناقش في موضوع الجراحه ..وانهم متخوفين منها ..ومن هالحكي .. وقلنا ننتظر الين يجي الدكتور ونشوف ..
بعد يومين رجعنا للخبر..
كنت يوميا ادق ع المستشفى استفسر اذا الدكتور جاء او لا .. وكانت الاجابه وحده ( لا لسى الدكتور في اجازه مفتوحــه)..
جلست ع هالحاله اسبوعين الين وصلت لمرحلة اليأس وما عاد دقيت عليهم ولاحظت ان اهلي الظاهر نسوا الموضوع ..
خلاص وصلت لمرحلة من القهر صرت آ’كل اي شي حتى لو ما احبه ومايعجبني بس خلاص احس اني مع القهر احط حرتي بالأكــل ..
وكان الجو طفششششش فأقترحنا ع فارس يطلعنا بعد صلاة التراويح ع الكورنيش نغير جو.. وطلعنا وأول ما جلسنا دق جوال فارس ..
فــارس :: نعم ... وعليكم السلام ..هــلا ومرحبا .. الحمد لله .. ايوه ..اها.. حلو ..خلاص متى بيكون .. لالا بكرى مايناسبني .. طيب فيه إمكانيه بعد يومين ..لأ، انا خارج الرياض ..(( انا يوم جاب طاري الرياض فز قلبي وحاولت افهم وش السالفه حسيت ان اللي داق المستشفى ))...
أنهى المكالمه ..وألتفت لي :: جاك يامهنا ماتمنى ..هاه هذا دكتورك وصل وعندك موعد الاثنين الساعه 8ونص .. أحمدي ربك انا عندي شغل في الرياض ..ومره وحده نروح لموعدك..
خـــلاص انا حسيت اني أبموت من الفرحــــه .. ومن الفرحه عزمتهم في مطعم هندي (( خخخخ أهتمامات الدببه ))..
وحجزنــا للرياض ع الساعــه 4 العصر ...
وعلى ما وصلنا وريحنا وافطرنا .. طبعآ هم اللي افطروا أنا كان الفطور عندي زي التراب الله لايغيرها نعمه. كنت شااايله هم انهم يقولون لي نفس الكلام الاول مالك حل الا عند الطبيب الفلاني..ومن ها المماطلات اللي مليتها واحبطتني..المهم توكلنا على الله وركبنا سيارتنا..وانطلقنا على بركة الله ..
10دقايق كانت هي المسافه الفاصله بيننا وبين اليوم الموعود..جلسنا في صاله الانتظار..تأملت في عيون الموجودات,كنت اشوف فيها ترقب, وملل.وتعب,وحده تحاول تقطع ساعات الانتظار باللعب في جوالها,والثانيه اخذت اقرب جريده وجلست تتصفحها بدون تركيز(اجزم لو اسالها وش قرت بتقول مااذكر ولاحرف).واللي حطت حرتها بعيالها تهاوشهم وتجبرهم على االالتصاق بالكرسي,اما انا فاكتفيت بالمراقبه(حشى رادار)
(ندى ........ال........)فزيت طولي من الكرسي وطلعت مباشره مع اختي والممرضه,ويقابلني فارس في السيب,دخلت الممرضه ودخلنا وراها للغرفه,,كان الدكتور جالس بكل ثقه خلف مكتبه :: ولسان حاله,أهلا بالفأر الجديد(لأنه يرى ان المراجعين لعيادته فئران تجارب).......وأنا ياغافلين لكم الله,
تفضلي يااخت ندى,واشرحي لي وضعك.جلست احكي له عن معاناتي وكان ساااكت ويسمع باهتمام,وبعد ماانتهى كلامي قال وبكل ثقه وبالفم المليان,معاناتك آن لها ان تنتهي وستكتب في دفتر النسيان,ومع تقدم الطب ماعاد صار فيه شي مستحيل,ومثل هالعمليات ناجحه ودارجه وانتشرت بشكل كبير خصوصآفي كندا والدول المتقدمه,واللي مثل حالتك افضل حل لمشكلتهم جراحة (السليف)اللي هي قص طولي للمعده..وانها احسن من حزام المعده لانها راح تكون طول العمر ومايحتاج تظويق ولا شي ,..وجلس تقريبآ عشر دقايق يرسمها لنا ع الورق ويشرحها بالتفصيل الممل.طريقتها ونتائجها وحتى مضاعفتها,لكنه هون مضاعفاتها وانه شي واحد ويتم اكتشافه ثاني يوم من العمليه اللي هو (التسريب),وعلاجه بسيط جدآ..الله يسامحه صور لنا العمليه انها ابسط حتى من عملية اللوز,انها بسيطه ونسبة نجاحها عاليه,ومن اليوم الخامس بالكثير وانت تمارسين حياتك الطبيعيه..انا ماصدقت هالخبر السعيد معقوله الفاصل بيني وبين تحقيق اغلى امنيه هي خمس ايام وشرطة مشرط؟؟ بغيت اقول له ابنسدح الحين ع السرير وسوها لي مايحتاج نفكر ونقرر........بس اني قلت اركدي يابنت الناس
قال ابعطيكم فرصه تفكرون على راحتكم ومتى ماقررتوا وارتحتوا للعمليه معكم رقم العياده اتصلوا في الموظفه وسجلوا موعد.......بغيت اتهور واقول له ابنسدح الحين ع السرير وسوها لي مايحتاج نفكر ونقرر........بس اني قلت اركدي يابنت الناس,لايجيك الحين من فارس كف يعدل راسك..سلم فارس ع الدكتور وتشكر منه وقال بيننا وبينك اتصال باذن الله
وصلنا للبيت قلت لاختي الغاليه ام مؤيد جيبي اللي في فريزرك كله لاسمنه بعد اليوم اباكل كل اللي قدامي..(لايضر ندى مابلعت بعد اليوم) بس ان كلمه تسريب عملت فيني عمايلها. وكل ماجيت افرح واتفائل خير يقرصني قلبي.وتناقشت مع اهلي وقلت لهم اني ماارتحت لكلمة التسريب وخايفه منها .. قال فارس لا ان شاء الله هو قال التسريب مايحصل الا في حالات نادره ولو حصل عادي يكتشف من ثاني يوم ويتعدل ويصير الوضع تمام..وطمنوني بهالكلمتين ونسيت خوفي ..وخلاص اتفقنا بيناتنا ع السليف ..استخرنا اكثر من مره ..والحمدلله ارتحنا لهالعمليه..ودق فارس ع الدكتور :: واتفق معاه واخذنا موعد قبل نرجع للخبر ..وبعد يومين كنا في العياده قلنا للدكتور عن قرارنا وانا ناوين ع السليف ..قال :: اهنيكم على هالخطوه وراح تحل مشكلتك بإذن الله وراح تودعين السمنه للابد..وقاله فارس :: يادكتور العيد باقي عليه اسبوع بتكون تعبانه ولا لا..قال لالالا بالعكس في الدول الغربيه يجلسون في المستشفى 24ساعه بس عندنا يتدلعون شوي يجلسون من 48ساعه الى 72ساعه..وبعدها الوضع تماااام..قال فارس اذا راح تتعب نأجلها لبعد العيد مافيه مشكله ..قال ابدآ ما فيه اي مشكله ..واقنعنا ان مافيه اي إشكاليه ..توكلنا ع الله..
طبعآ عملت كل التحاليل المطلوبه وأخترنا المستشفى اللي راح نعمل العمليه فيه.. مستشــفى المملـــكه..والعمليه راح تكون بعد 5 ايام .. عطانا اوراق التنويم وقال هذي تصلحونها في المملكه وموعد مع طبيب التخدير قبل العمليه بيوم ..واوراق كثيره وأهـــم شي طبعآ بالنسبه لــه ( طريقة الدفع) وراح تكون كــاش ..
المهم طلعنا من عنده وأنــا في قمة التنــاقض بين الفرح والتوتــر والخوف من المجهوول ..بس الحمد لله ما دام الواحد مستخير ومرتاح مايهم اي مشاعر ثانيه .. وان الخوف والتوتر شي طبيعي ..طبعآ هذي كلمات هداني فيها فارس..آآآآه منك يافارس ياكبر قلبك انت عزي وسندي انت من بقى لي في هالدنيا بعد الوالد الله يرحمه..اللي ماحسيت بحنانه وحتى ماشفته الا بالصور ((لانــه متوفي وأنا عمري سنه ونص وكان تعبان قبل وفاته..الله يغفر له ويرحمه وموتى المسلمين))
تعريف بالعائله::
((فارس اخوي الوحيد متزوج وعنده ولد و بنت..واختي ام مؤيد هذي الكبيره عندها ولدين وبنت ..وانا طبعآ آخر العنقود ..))
فارس قرر يرجع للخبر عشان بيخلص اشغاله في العمل ..وقررنا نجلس عند ام مؤيــد انا وامي ونستعد للعيد..وخصوصا العمليه بعد 5ايام ف تعب نروح للخبر ثم نرجع..
وطوووول الخمس ايام كانت في المجمعات نتجهز للعيد وطبعآ كنت اودع ((ايفانز )) خلاص بصير رشيقه وماراح اجي لك مره ثانيه ..وماأنســـى انه جاني هووس عجيب ع الوجبات السريعه ..طووول الايام :: ماكدونالــدز..هارديــز..هرفـــي.. هذا غير ..باسكن روبنز .. وهاجن داز ..والتشوكلت و السينبون اللي لازم مع الفطور ..والبيبسي حجم السوبر مع الوجبات...
المهم ::اني خربتها ع الاخــــــــــــر ..واكلت كل اللي نفسي فيه ..وقبل العمليه بيوم رحنا للمملكه وسوينا الفحوصات وقابلنا طبيب التخدير ..وخلاص قالو لي لازم من الساعه تسع بس سوائل واصوم من الساعه 12 في الليل ..وان عمليتي راح تكون الساعه 8 الصبح ..
رجعت من المستشفى الساعه 10 في الليل وكانوا مجهزين العشاء::
مكرونــة بالباشميل..شوربة الدجاج بالكريمه..صينية البطاطس..وسنبوسه نوعين ..وبيتزا..وبيبسي .
تعذييييييييييب كل اللي احبه مسوينه وانا ما اقدر آآكل والله قهر .. بس قلت الحمد لله كلها 5 ايام بالكثير واصير آكل اللي ابي وبــدون وزن زائـــد وهذا الاهم ...
واخذت لي صحن شوربه وشربتها وانا اتلذذ بطعمها ..يم يم..تسلم يدييييييييييينك يا أم مؤيـــد ع هالطبخ ..
وقمت جهزت شنطتي وحطيت لي الاغراض اللي احتاجهم لمدة 3ايام ..وجهزت لي ملابس عشان الصباح اتحمم قبل اروح للمستشفى ..ورحت لفراشي أحاول انام وكانت الساعه12ونص وحاولت وحاولت وحاولت انام وماقدرت كنت افكر وش راح يصير لي بكرى وكيف وكيف ..ومن هالأفكار ..وبعد محاولات عنييييييييييييفه لمدة ساعه بدأ النوم يداعب جفووني ..ورحت في نوم عميييق ...وع الساعه 5ونص الفجر دق منبه الجوال وصحيت من اول دقه ..وقمت وتوضيت وصليت الفجر وقريت اذكار الصباح ودعيت ربي ان ييسر العمليه ويجعلها من اهون واسهل العمليات ويحفظني ويستر علي وما يصير اي مضاعفات بالعمليه ..وقمت واخذت لي دوش دافي ينشطني ويهدي أعصابي ..وطلعت ولبست وجففت شعري وجهزت عبايتي ..وقاموا امي وام مؤيـــد وتجهزوا ..ودق علينا فارس قال انه ينتظرنا في السياره ..طلعنا وركبنا لاتسألوني عن شعوري في ذيك اللحظات ..لاني اعجز اوصفه لكم ..بس الاكيد الاكيد انه
مزيــج من الخوف والتـــــوتــــر.....
طووووول الوقت سااااااااااااكته وانا كذا طبعي اذا اهتميت وزملت من اي شي ألزم الصمت ..دخلنا المستشفى اول ما حطيت رجلي في المدخل حسيت بطني يعورني وقلبي يرقص قدامي
وحسيت ان اهل الرياض كلهم يسمعوون دقات قلبي ..
دخلنا ودلونا ع الغرفه ..حطيت شنطتي داخل الدولاب ..وجلست ع السرير::
شوي ودخلت ممرضه لبنانيه:: صباح الخيرات ندى ,,كيفك؟
وانا كنت في عالم ثااااااااني وسرحاااااااااااانه::هزيت راسي بمعنى الحمدلله..
قالت :: انا اسمي رشــا ..وانا المسؤلــه عنك ..طوول ما انت موجوده هنا ..وإذا احتجتي اي شي اطلبي ..اوكي حبيبتي ..
هزيت راسي ببلاهه..ولسان حالي يقول لها ((لا يكـثـــر ))..
قالت :: يالله ياندى قومي جهزي نفسك وألبسي الروب وشيلي كل ملابسك..والبسي القبعه ع شعرك ..وإذا تبغين دورة المياه..
قمت وجهزت نفسي ولبست ..وطلعت وجلست ع السرير ..وجت رشا وجابت لي زي الشرابات ألبسهم ( عشان الجلطه)..المهم..شوي ودخلوا سرير العمليات ..وانسدحت ع السرير
ولحفت عمري وغطيت وجهي بالشرشف ..وقبل اطلع ..ودعت امي وفارس وام مؤيــد :: يالله دعواتكم استودعكم الله ..وطلعوني للعمليــــــــــــــــــــــــات .........
انتظروووووووني .....:39:
miss nadoo @miss_nadoo
عضوة نشيطة
هذا الموضوع مغلق.
[حلاا الدنيا]
•
حمسسستينى انتظر الباقي
زوووف
•
حمستيني يا ندوووو
يالله كملي لا تتاخرين علينا
على فكره عندي سؤال
انتي رايحه بالاول للرياض وش كان ببالك عمليه
يعني مو جراحة سمنه واضطربتي من كلام الدكتوره طيب وش كان ببالك بتقولك غير العمليه ؟؟
يالله كملي لا تتاخرين علينا
على فكره عندي سؤال
انتي رايحه بالاول للرياض وش كان ببالك عمليه
يعني مو جراحة سمنه واضطربتي من كلام الدكتوره طيب وش كان ببالك بتقولك غير العمليه ؟؟
بيلســان
•
بصــراحه تحمست وعشت تفــاصيل القصه معك...
مع اني مو من الفئه السمينه..
لكن انتظر بقيه القصه...لاتتأخري علينا...
مع اني مو من الفئه السمينه..
لكن انتظر بقيه القصه...لاتتأخري علينا...
زوووف :
حمستيني يا ندوووو يالله كملي لا تتاخرين علينا على فكره عندي سؤال انتي رايحه بالاول للرياض وش كان ببالك عمليه يعني مو جراحة سمنه واضطربتي من كلام الدكتوره طيب وش كان ببالك بتقولك غير العمليه ؟؟حمستيني يا ندوووو يالله كملي لا تتاخرين علينا على فكره عندي سؤال انتي رايحه بالاول...
شوقتيني اعرف شو صار معك.. لا تتأخري علينا:time:
الصفحة الأخيرة