انا................2×1

السلام عليكم ورحمه الله وبركاته

احب اشكركم اخواتي الطيبات على هذا المنتدى الطيب

وفعلا اللي شجعني اني اشارك بالمنتدى هذي الروح الاخويه بين العضوات

بارك الله فيها وثبتها على طاعته ومحبته

واتمنى انكم تقبلوني معاكم اخت كبير او صغيرة لكم

لكن اللي يضايقني ان اول موضوع راح اشارككم فيه بالمنتدى هو هذا الموضوع الحزين الخاص فيني :(

اتمنى اللي تقرى موضوعي تدعيلي بالشفاء واللي تقدر تساعدني بكون ممتنه لها طووووول عمري وبدعي لها من كل قلبي وفي سجودي وفي حجي ان شاءالله

اخواتي انا مثل ماكتبت بالعنوان

انا انسانه 2×1

يعني انا وزني وزن شخصين..ويعانون من السمنه بعد :icon33:

وزني 145 وطولي 160 او اقل .......يعني كل واحد وزنه 72 وشوي



بدايه مشكلتي من الصغر،حالي حال اغلب السمينات مشكلة السمنة عندهم من الطفوله

وواللي يشوفني يحسبني بعمر المراهقات وانا كنت لسه طفله...

وليما كبرت ووصلت المراهقة الكل يحسبني كبيره وبعمر المتزوجات(20 وطالع)

واانا الحين عمري 27 والكل يحسبني ام عيال .ويمكن جدة بعض

والرياض والقصيم :(

انكت انا ووجهي .....بس والله قلبي يدمع دم

لان عيوني خلالالالالالالالالالالالالالالالالالالاص ملت من الدموع والبكي

صدقوني يابنات ما اعرف ارتب افكاري ولا احدد نقاطي

الكلام يطلع من قلبي وايدي هي اللي تكتبه

انا اساسا ولدت في بيئة اكلها مو صحي ابدا

ولكن انا السمينة بين العايله

صحيح ان العايلة اوزانهم مش نموذجيه لكن سمنتهم خفيفة

لكن انا كنت اسسسسسسسسمن وحدة

وليما يقولون لي سوي ريجيم.ما القى من يساعدني

يعني بالغدا هم ياكلون مجاببيس وعيوش وانا الله يكرم النعمه ويديمها آكل سلاطه او مشويات

وياريت اذا ضعفت القى تشجيع.؟؟؟ لأ


ما يبان بعيونهم شي .....ودايم يقولون استمري انتي وراكي درب طويل

(هذا قبل لا اوصل للوزن الحالي...زيعني كنت بالثمانينات والتسعينات)

المهم ماعندي قريبات اجتمع فيهم دايم واعيش حالي حال البنات

ودايم امي تحطني في موضع مقارنه مع غيري

شوفي فلانه جسمها.....شوفي فلانه خست

طيب وهي ما تشوفهم في جمعاتهم وطلعاتهم ولعبهم ووناستهم

امي الله يهداها ويحفظها ما تشوف اللي انا اشوفه من عمايل البنات

والله ثم والله انهم مدلعين نفسهم آخر تدليع

وانا الحمدلله ماني محرومه من شي ....بالعكس يمكن حالي احسن منهم

لكن انا دايم بوجهي كلمه: عيب.....ما عندنا هالكلام..اذا تزوجتي اعملي اللي تبغينه

وهذا انا طحت بكبدهم والبنات هم اللي تزجوا

والله ان هالبنات قبل لا يعرسون وقبل لا ينخطبون لاعبين بالدنيا لعب

صالونات ومن هالسوالف...وبعضهم يروحون لمحلات فساتين الاعراس ويعملون حالهم عرايس....وهات ياضحك ووناسه

وانا لو اقول لهم اني بسوي حالي عروس وبروح للمشاغل...اتوقع راح يذبحوني
ويقولون وش هالبراعه

وانا اذا تطورت...عملت بالصالون تسريحه(اغير عن السشوار)

وهما حف(والعياذ بالله) ومكياج اشكال والوان وكل اللي يخطر ببالهم يسوونه

حتى المساج......وانا لو اجيب طاري هالكلمه جان رحت اعدام

انا جالسه بين شباب واختين ..وما عندي قرايب حيل اللي نمون عليهم بالزيارات

والبنات اللي تتكلم عنهم امي ماشاءالله جماعه كبيره ووحدة تشجع الثانيه ووحدة تعمل رجيم مع الثانيه..ولبس ومكياج وطلعات وحفلات


وانا وخواتي الله يرحم الحال

صدقوني تعبت

اشوف اللي بعمري تزوجوا .واللي عندنا من الاطفال 3 او 4 الله يهنيهم
وانا فقدت الامل بالزواج

مات الدافع اني انحف عشان اتزوج

البنات اللي بعمري كانوا قبل الزواج وحتى بعده يعملون كل شي نفسهم فيه وانا لأ

حتى ليما اروح حفلات زواج ما ألبس نفس لبسهم

تخيلوا مره من المرات رحت عرس وكنت لابسه فستان اسود ثقيل ومن نفس الخام بالطو كم طويل وحاطة ايشارب كنوع من الموديل...كأني رايحه جنازة:icon33:

والبنات اللي بعمري.....لابسين المزلط والعاري والشك والحركات

والله مو عارفه شقول

واللي زاد نفسيتي تعب السنتين الاخيرتين

كنت عامله رجيم وداخله نادي وخسيــــــــــت بشكل ملفت......والكل يمدح فيني

لكن الظاهر والله العالم انها عين وجتني.....صرت مفجوعه على الاكل ووقفت الرجيم والنادي


وتعب السنتين ضيعته ب5 شهور (حتى هذي اللحظه)

وصل وزني الى ماهو عليه

وكرهت عمري

والملابس اللي بالدولاب مو قياسي مع اني فصلتها قريب


لاحظوا الكلمه البايخه......فصلتها ما شريتها


لان عمري مافكرت اشتري من السوق .....عارفه الاحراج والقهر اللي راح يواجهني

والله لو اقول لكم المواقف اللي تصير لي كنتوا ترحمون حالي

تخيلوا مره من المرات عملت حادث بسيارتي وكنت اتكلم مع الشرطي

وهو يقول لي: شوفي يا خاله والله انك بمقام امي

:icon33: :icon33:


حراااااااااااااام عليك

والله هو اذا 30 سنه عمره شويه

ويقول لي اني بمقام امه

ليش؟؟؟؟؟؟؟؟؟؟؟؟


والله من بعد هالكلمه غيبت فيني الدنيا وما صرت احس باللي يدور حولي ولا اسمع وش يقول الشرطي

وياما ياما مواقف العن من هذي.......هذا بسيط ولا شي مقابل المواقف الثانيه

واللي تجي من الاهل وهذا اللي يقطع القلب

تخيلوا وحده من الحريم تقول حق امي عن بنت من بنات العيله توها بدت تسمن

تقول المره: حسافه والله على فلانه يضيع جمالها مع السمنه خليها تخف احسن لها

ما ادري هي تتعمد تسمعني هالكلام

او انها مو مهتمه فيني ولا هو حسافه علي اضيع بين هالشحوم

وصدقوني كرهت نفسي وكرهت الناس

وكرهت المناسبات

قبل كننت البس واتكشخ حق العيد لان الحمدلله عندي ذوق والكل يمدح فيه ...لكن الحين البس جلابيه ....كأني عجوز ام 6236 سنه
تخيلوا......في بنت بعمري تعيد بجلابيه؟؟؟


واحنا اساسا اسرة متشددة شوي وما عندي صداقات....والبنات اللي اتعرف عليهم بالدوام يحسبوني متزوجة ويسألون كم عندي من العيال

من شافوا كرشتي وردوفي ما ينلامون


صدقوني حالتي النفسيه بالحظيظ.....وما يخفف هالتوتر الا الاكل

آآآآكل مثل المجنونه....وما احس بلذة الاكل.....حشى والله اني ما اتطعم الاكل

لكن احسن براحه اذا كليت مثل الهايشه

تخيلوا ان ساعات آآآآآكل 5 كاكاوات بيوم واحد وبلحظه وحدة.....من سنيكرز وتوكس وآرو وفليك الخ الخ

وساعات آكل بدل الوجبه وجبتين بالغدا

كرهت عمري ومو عارفه شسوي؟؟؟

ساعدوني


جربت انواع الرجيمات والدكاترة....لكن ما عندي ارادة وشجاعه اني استمر واكمل

صرت ضاعفه خلال مسيرة حياتي الى الآن مابين 20 الى 30 كيلو في الرجيم الواحد

بس ارجعهم دبل الدبلات

واللي خلاني اكتب مشكلتي اني بديت اعاني آآآآلام فظيعه أسفل الظهر والخواصر


وكل همي اني خايفه انشل واهلي يبحلون فيهي هذا خوفي

صرت ما اقدر امشي خطوتين...لازم اجلس

واذا رحت مع خواتي للسوق...البياعين يحسبوني ام البنات ويجيبون لي كرسي اجلس فيه

:(




وعلى فكرة.........

اقاربي يقولون لي انتي وجهك حلو وجسمك قمه بالانوثه لو تشيلين جبال الشحم واللحم


وكل من يمدح خصري...يقولون لو تضعفين خصرك راح يصير مأساااااااااة من حلاته

لكن انا لاحياة لمن تنادى

احس ان الاحساس مات عندي

ماعاد يهني شي ولا اهتم لاي شي


والله يابنات ما ادري وش قاعده اقول ....ادري اني ازعجتكم بمشكلتي

لكن عندي امل انكم تساعدوني او على الاقل دعوه صاااااادقه تطلع من قلب وحدة منكم ان ربي يخفف علي بالصحه والعافيه

اتمنى يا بنات انكم تدعون لي


وآسفه مرة ثانيه على القرقه الزايدة



:(

والسلام عليكم ورحمة الله