مشكلتي الغريبة مع الزواج ..نداء عاجل لكل حكيمة تساعدني الله يسعدكم / تم الرد

السسـلام عليكم ورحمة الله


صراحة أنا مالي بالمقدمات ..ولكن ما أقدر أقول إلا الله يفرج هم كل مهمومة هنا خصوصا حنا يالسعوديات ما لنا مخرج إلى الحياة الطبيعية إلا بالزواج ..وكل متعة بالحياة تؤجل إلى الزواج ..فالله يكون بعوننا ويأجرنا ويفرج هم كل مهمومة ويعجل بزواج كل عزباء قولوا امين

يا أخواتي أنا مشكلتي مع الزواج مشكلة ..بالبداية أحب أقولكم اشياء عن نفسي والله ما أحب مدح النفس لكن راح أقولكم عشان تصيرون بالصورة وتعطوني الرأي الصايب
أنا انسانة حسب كلام اللي حولي أني جميلة ومثقفة جدا ومحاورة ممتعة وشخصية قوية والأطفال يحبوني كثير الحمدلله بشكل ما تتصورنه لأني على طبيعتي

من يوم أنا بالمتوسط وأنا أنخطب من أحسن العوائل رغم والله أني ما أطلع ولا أروح ولا أجي لكن الله كريم
و لكن أنا كنت أرفض لأني رافضة فكرة الزواج بذاك الوقت
وعلى هالحال إلى ما دخلت الكلية وبديت أتقبل فكرة الزواج وأنه ضرورة وسنة الحياة
لكن مع تقبلي لفكرة الزواج طلع عندي حلم أني أتزوج أجنبي أوروبي وكره لكل رجل عربي
والله يا بنات أدري راح تقولون مو كل يدينك سوا وأن فيه سعوديين وعرب ينحطون على الجرح يبرى
أدري بكل هالشئ وفاهمة .. أن فيه رومانسيين وطيبين والله أدري ...لكن أنا عندي حلم ورغبة قوية جدا أني أتزوج أوروبي
انجليزتي جدا ممتازة والكل يذهل أن الاكسنت عندي مثالية .. أنا يا بنات أكره شكل الرجل العربي أكره لون بشرته أكره كلام الحب باللغة العربية يعني أحس لو تزوجت ما راح أتحمل راح أتطلق ..يعني نفسيا أكره رجال العرب وخصوصا السعوديين ..رجاء الله يخليكم افهموا هالنقطة جيدا يعني مصيبة أتزوج واحد ما أنا متقبلة شكله ولون بشرته
أنا ما أقدر أشيل هالفكرة من رأسي والله يا بنات ما أقدر اقاوم رغبتي هذا حلمي بالحياة تعرفون معنى حلمي بالحياة ؟؟ امانة يا بنات خلوكم مكاني وتفهموا وضعي
مع العلم أني قبيلية وهذا شئ راح يعقد الموضوع لكن ما عندي مشكلة أقف بوجه العالم كله ,وأخسر أهلي ويصير اللي يصير عشان أتزوج أجنبي
أدري راح تقولون غبيه وما تستحي وأنانية لكن هذا حلمي بالحياة يعني نمبر ون بأحلامي افهموني وأدري راح تقولون فكري بالعيال لكن والله هذا اللي يخليني أرغب بالزواج أكثر أبي عيالي يصيرون نتيجة اجتماع ثقافتين

يا بنات وش الحل أنا أبي أوروبي ..؟ كيف الطريقة ؟ وكلها سنتين راح أتخرج وأعتمد على نفسي

المهم يا بنات أبي أحد يعلمني كيف أتزوج أوروبي ؟ وأبي نصايحكم كأني أختكم
ورجاء لا تتكروون الكلام اللي قلته عن العيال وعن الاختلاف وكل هالأمور

أبي كل حكيمة تعطيني رايها وإن شاء الله ما تقصرون

الله يسعدكم ومشكورن مقدما


المعرف سلف من صديقتي الله يسعدها ويزوجها عاجلا غير أجل

أولا أشكر كل من رد علي وحده وحده والله يسعدكم يا بنات ومثل ما قلت قبل ردك يعبر عن نوع ثقافتك و مدى حضارتك
ما راح أغلط عليكن لأني ببساطة متفهمة أن عندنا نفسيات مريضة بشكل ..فما أقول إلا الحمدلله يارب أنك عافيتني مما أبلتيتهن فيه ..يعني بصراحة ما أدري كيف أفهم هالثلة المريضة ..يعني تبونا ننزل لمستوى البزارين ونشرح لكم كلام واضح بالاساس ؟؟

عموما ههههه لا إله إلا الله يا عزيزاتي أنا ما قلت أني فلته زماني ..وما قلت أني أحس بالعظمة والكبر ..متى قلت هالشئ الله يسامحكن؟ لأن نفوسكن تشعر بالنقص والدونية حسيتن أني أتعالى عليكن ..عموما الله يهديكن
أأنا ما قلت صفاتي وأني أتقن الإنجليزية إلا عشان تصيرون بالصورة صح ..لأن ممكن تجي تساؤلات كيف تتفاهمون
؟ بس هذا السبب

عموما أشكركم جميعا والله حتى اللي ردن بردود مسيئة أسأل الله لكن أن يفرج همومكن ويسعدكن ولا يريكن مكروه

وبالنسبة لكلامي عن السعوديات ما سبيت أنا ..قلت بس ما أقدر أهضمهم ..وهذه حقيقة طباعنا وأحاديثنا مختلفة
وطبعا ما أعمم أبدا ..لي صديقات بالكلية كثيرات الله يسعدهن لكن بشكل عام جوي مو نفس جو السعوديات
وهذا الشئ ما يزعل
وبالعكس والله العظيم أرى أن السعوديات يستحقن لقب ملكات الكون بجدارة لأننا ولله الحمد مو نفس أي بنات بالعالم
عفيفات وشريفات ومن أصول عريقة وجميلات ومثقفات ومتعلمات ..فالله يسهل علينا ويخرجنا من سجننا الكبير

بنات بالنسبة لأهلي أنتم ما تدرون وش عشت أنا ..ولا تدرون حجم المعاناة اللي شفتها ..والله العظيم لو أقولكم وش اللي عشته كان قلتوا أنتي مؤلفة سيناريو رائعة ..وهذا لا يمكن يصير بالواقع ..لكن الحمدلله على كل حال
وأنا صادقة أهلي هم أمي وأبوي وهم مو دائمين لي ..وأخواني مصيبتهم مصيبة أنانيين وكلن همه متعته الشخصية

يعني لازم اشوف حياتي ..أنا عندي بعد نظر وما أبي الحياة ترميني عليهم الله لا يقوله والله لا يحيجني ولا يحيجكم لأحد

وبالنسبة لتفضيلي للأوروبي أنا قلت لكم أفضله لعقليته ولشكله ..هي مسألة اذواق يا عزيزاتي ليش ما أنتم راضين تفهمون هالنقطة ..؟
وأنا عندي أمل وطموح أني ألقى حل ..عندكم
وما زالت أطممح

وحولي الفتن والمغريات بشكل ما تتصورنه لكن بفضل الله أنا صامدة وثابته والله يثبتنني يا رب ادعو لي