زوجي ووظيفتي

السلام عليكم ورحمة الله
اخواتي عندي موضوع حارق اعصابي ياليت تشورون علي وتدعون لي
انا متخرجه من ستة عشر سنه وجاني تعيين بعد طول انتظار من ثلاث سنين وانا اعشق شي اسمه تدريس
ودرست في مدارس خاصه وتعاقد لكن الله المستعان لما جتني الوظيفه الرسميه للاسف زوجي وقف في طريقي ومنعني منعا باتا لانها في قرية تبعد 200 ك
وطول هالثلاث سنوات وانا اخذ اجازات و استثنائيه بدون راتب واحاول فيه لعل وعسى لكن للاسف رافض
انا اقوله اسكن هناك وعيالي انقل مدارسهم عندي وهو يكون معانا ويداوم من هناك يعني هو الي يسافر يوميا او ياخذ اجازه مو انا لاني مااتخيل نفسي اداوم يوميا اربعة مية كيلو وعيالي ماعندهم احد وفكرة الشغاله مرفوضه
وكمان حنا ساكنين عند والديه كبار في السن ماعندهم الا ولدهم اقوله كلنا نسكن هناك حتى والديه ونهاية الاسبوع نجي الين يجي نقل
لانه من سابع المستحيلات يسمحلي اسكن لحالي او مع معلمات يعتبره عيب وتضييع للامانه
المهم الحين عطوني شوركم والله تعبت ومن الناحيه الماديه فعلا محتاجين راتب زوجي متوسط ولله الحمد يدوب يكفي النفقه اما الكماليات صعبه عليه
والله اني استخرت كثير ومازلت متعلقه بهالوظيفه ويعلم الله نيتي مو بس الماده لكن هدفي علم ينتفع به واعلم الناس الخير
واختلط بالناس والله مللت من الوحده ساكنه بعيد عن اهلي ومالنا علاقه باحد والله في السنه كلها تعدين خرجاتي على الاصابع والحمدلله على كل حال
فالوظيفه بالنسبه لي شي كبير يكفي كل صباح اختلط بالناس وتتحسن نفسيتي ويصير عندي خير اتصدق واهدي واجيب لي الي ابغاه
ادعووووولي واعطوني رايكم كيف اقنعه مع العلم انه مايبغى يتناقش ابدا افتح الموضوع يزعل مباشره ويطلع