صباح ومساء المسرات لكل العضوات
هذي أول مشاركة لي في قسم الأطباق
مكرونة بالبشاميل ... ويارب تعجبكم
ومن جد ماكنت معزمة أنزل طبق بس بديت أسوي الغدا وجوالي جنبي
فقلت خليني أصور وطلع معي هذا الموضوع
أولا :: المكرونة
تجيبين مكرونة حجمها صغير وتسلقينها في مرقة دجاج إذا عندك أو ماء وملح وزيت
ومن خلال تجربتي الطويلة مع صواني المكرونة بالبشاميل باعتبارها وجبة مفضلة عند زوجي
لاحظت انها تكون ألذ كلما كانت المكرونة حباتها صغيرة
وبعدين ( تشخلينها ) يعني تصفينها وهذي أيضا خطوة مهمة لنجاح المكرونة
ثانيا :: الحشوة
المقادير
دجاجة مسلوقة ومنزوعة العظم ومقطعة
بصلتين مفرومة
حبة فلفل أخضر بارد مقطعة صغير أو وسط أو نصف حبة
مقدار كأس بقدونس مفروم
زيت ـ ملح ـ كمون ـ فلفل أسود ـ كزبرة ناشفة
تسخنين الزيت ثم تقلين البصل حتى يذبل
ثم تضيفين الفلفل الأخضر وتقلبينه مع البصل حتى يذبل
وتضيفين البهارات وتقلبينها مع البصل والفلفل
تضيفين الدجاج وتستمرين في التقليب
ثم تضيفن البقدونس وتقلبين الحشوة مع بعض
وأخيرا تضيفين للحشوة الملح ونصف كأس ماء مغلي تقريبا
وتتركينها على حرارة متوسطة حتى تتسبك مع بعض
ثالثا :: الـــــــــبـــــــــــــشـــــــــــــامـــــــيــــــــــــل
طبعا طريقة البشاميل معروفة
لكن الطريقة اللي اعتمدتها في كل أطباقي تعتمد على الجبنة السايلة كمكون أساسي
وبصراحة حبيتها وأكيد لو جربتيها راح تعجبك مع المكرونة والمسقعة وأي شيء فيه بشاميل
المهم هذي الطريقة
المكونات الأساسية بالإضافة للماء
تضعين في الخلاط كأس حليب سايل
وخمس ملاعق كبيرة دقيق
وأربع ملاعق كبيرة جبنة سايلة
وكأس ماء
وملح حسب الرغبة
وتضربين المكونات في الخلاط لمدة خمس دقائق تقريبا عشان يعطيها قوام مرة حلو
ثم تسكبين الخليط في قدر على حرارة متوسطة أو خفيفة وبتلاحظين لها رغوة
وتستمرين في التحريك
وإذا حابة تصير خفيفة أضيفي ماء مغلي وخليه تطول على الفرن مع التحريك المستمر
حتى تضمني نضجها تماما
لأنه من الأخطاء في تحضير البشاميل وضعها على حرارة مرتفعة
فتحترق بسرعة وما تنضج فتسبب انتفاخ وتطبل المعدة
وأنا أفضلها خفيفة وفيه من يحبها ثقيلة على حسب
أخيرا :: تضعين المكرونة في صبنية طبعا طبقة مكرونة ثم الحشوة ثم طبقة ثانية مكرونة ثم الباشميل
ترشين هلى الوجه جبنة كرفت مبشورة وتحمرينها من فوق وتحت عشان تتماسك
وهذي النتيجة النهائية
أتمنى تكون أعجبتكم وأدري إن المكرونة بالبشاميل مشهورة وما فيها شي جديد
لكن يا رب تلاقون في موضوعي شي يستحق اهتمامكم
استفدت من البشاميل مو دايم يضبط معي