بمبونة @bmbon_1

عضوة جديدة

ولدي والضمور العضلي ( مرض الدين ) وتجربتي مع ام ناصر بالذيبية بالتفصيل الممل

السلام عليكم ورحمة الله وبركاته

حبيباتي انا نزلت قبل كذا موضوع عن حالة ولدي هنا

طفلي وعجز الاطباء ...

قريت عن الضمور كنت حاسة انه هو ودورنا على دكتور ممتاز وعن طريق وحدة من صديقاتي عرفت دكتور تامر رزق مصري بمستشفى الحبيب بالرياض فرع التخصصي

حجزنا ورحنا الموعد فحص كويسسس وقال احتمال ضمور عضلي درجة ثانية وعطانا تحليل ب 4000 :eek:

وقال اذا هو ماله الا علاج طبيعي انزلوا احجزوا وحجزنا وبعدها قلت لزوجي دام بس علاج طبيعي حرام فلوسنا تروح عليهم فيه ارخص

وبعد جهيد جهيد ومعاناة شهور لقينا واسطة بالمدينة الطبية ودخلناه طبعا قدمنا ع التخصصي قبله ورفضنا

حجزنا موعد مع الاستشاري عبدالعزيز آل صمان استشاري اعصاب اطفال وقال نفسسسس الكلام وطلب نفس التحليل

وقال ماله علاج الا طبيعي والتحليل مطول ما يطلع الا بعد شهرين :(

كنت خايفة من سالفة الكوي واقول الطب اولى يوم شفت الطب ماعنده ما عند جدتي قلت مالي الا الطب الشعبي ولا يأس مع الحياة نبذل الاسباب والله كريم

مع ان اول ما شخصه دكتور تامر رجعت البيت سويت مناحة :(

بس بعدها عرفت ان البكاء والاعتراض ع القدر مايفيد .. قويت علاقتي بربي ودعيت ودعيت ودعيت يارب نور لي طريقي ودلني على سبب شفاء ولدي طلعت كل الي بقلبي والحمدلله ارتحنا وعزمنا نسير على ام ناصر ..

طبعا واجهتنا مشاكل في الوصف حق الذيبية كثير قالوا عند الحفر ( حفر الباطن )

بس صارت تبعد عن الرس 53 كيلو ..

مشينا من الرياض الظهر ووصلنا للرس ع المغرب ع اساس اذا جت الساعه 12 بالليل رحت انا وزوجي للذيبية نكون على 1 وصلنا ونمسك الدور من بدري

طبعا الوسواس اشتغل والقولون والحالة صعبة آخرتها اتفقنا نتعشى ونمشي لان ماجانا نوم :(

وطلعنا من الرس الساعه 10 ونص وحددنا طريق الذيبية من برنامج خرائط قوقل باللجوال وانطلقنا ..

طبعا تطلعون من الرس ع القرين وتتعدون القرين وبتجيكم بعدها الدليمية تتعدونها و بعدها الذيبية تمشون سيده ان ماخاب ظني لحد ما تشوفون اللوح الي تدلكم على محكمة الذيبية او أسألوا احد عنها لانها ماتظهر بالبرنامج و أبد اذا وصلتوا عند باب المحكمة وكان على يمينكم تشوفون بيت ام ناصر قدام ع اليسار منقطع عن الخط شوي وتشوفون اصلا السيارات مستقبلتكم واقفين ..

وقفنا سيارتنا 11 ونص وقبلنا 11 سيارة نزلنا وتقهوينا الناس اغلبهم نايمين بعدها نام زوجي انا عندي فوبيا من البر ركبت السيارة وشغلت نورها وجلست ادعي ربي لحد الساعه 3 و28 دقيقة شغلت ام ناصر نور الغرفة هي صغيرة تشوفونها على يمينكم .. وفتحت الباب وأشرت لواحد وفتح هالواحد البوابة ودخلت السيارات جوا يكون فيه زي الدوار مسويته هي بشبك ومايشيل اكثر من سيارة يعني مايكون فيه زحمة والرجال واقف عند الباب ينظم الدخول وفيه بعد حرمة واقفة تساعده و بدأو الناس يدخلون عليها يوم جت الساعه 4 ونص وماشاء الله تبارك الرحمن ما كان قبلي الا سيارة وحدة يعني ب ساعه وحدة عالجت 10 سيارات وبعضهم عوائل ينزل كذا شخص بالدور ومايطولون السيارة الوحدة ان طولت عشردقايق بعضهم خمس دقايق وبعضهم دقيقتين بس ماشاء الله ..
سكرت ع الساعه 4 ونص عشان اقامة الصلاة والمسجد جوا الحوش حقها وبعد الصلاة رجعت فتحته والي قبلي ما امداها تدخل الا هي طالعه :)

وجا دوري دخلت عليها (( الناس قايلين نفسها خايسة )) ياويلكم من الظلم والافتراء الا حبيبة ويوم دخلت مدت يدها وسلمت علي وتضحك ولدي وتلاعبه ..
كشفت عليه بسرعه اول ماقلت لها ضعيف ونفسه ضعيف قالت وريني ظهره وظهر ولدي بارز مرة قالت وش قالوا لكم المستشفى قلت ضمور وقالوا ماله علاج قالت يعقبون :biggrin2:
هذا مرض الدين و له علاج هو الكوي تبين كوي والا علاج ثاني بس الكوي اسرع
شاورت زوجي وحنا من اول متفقين ع الكوي ان طلبته وسخنت هالاسياخ ع الدافور هلا هلا وقلبي يرقع :(

وقامت قالت اول نكوي الظهر وبعدها الصدر وججابت خطاط وبدت تلمس فقراته وتنقط عليها وبعدها في لمح البصر لطشت ولدي 15 لطشة ولم ترمش عيني :biggrin2:

ماشاء الله تبارك الله لا حول ولا قوة الا بالله يدها خفيفة بارك الله لها ورزقها ووفقها..

طبعا بكى ولدي وطلع ريحة مع الكوي استودعه الله مع الكوي وابكي اكيد وابوه يحاول محاولات بائسة يلهيه شوي

وقلبناه ع الصدر وبسرعه بعد عطتنا عشر كويات توزعت حول الحلمة و ع الحفرة الي باسفل القفص الصدري وبين الحلمتين اما حقات الظهر 11 على طول العمود و2 تحت الكتف بقليل و2 ع الحوض من الخلف ..

قالت ماله الا الكوي وب 40 يوم ان شاء الله يتحسن وعطتنا ورقة الحمية وقالت تعالوا بعد هالاربعين حسيت ولدي نفاس :biggrin2:
طبعا عطيته بس تمرة لانه يحبها وقررت اخليه ع الحليب بس الاربعين يوم الجاية لانها قالت بطاطس وموز وبرتقال ممنوعة وهذا اكل ولدي الدايم مايحب غيره :(
طبعا حممته اول يوم وان شاء الله كل يوم بموية بس عشان اغسل العرق عن الحروق وعشان تخف الحكة شوي ..

طبعا طلعنا منها الساعه 5 وثلث وهو يبكي يالله سكت وكنت مجهزة رضاعته و مجوعته طلعنا من عندها والحمدلله ما امدانا نطلع من البوابة الا هو نايم فديته :(

وصلنا للرس صحصح ويطالع فينا حاقد :biggrin2:

و وصتني على تحميلة اول ما اطلع احطها بس الصيدليات وقتها مسكرة فعشان كذا اشتروا تحاميل من بدري زوجي ماجابها الا 7 انتم اشتروها من قبل وخلوها بثلاجة مكانكم الي نايمين فيه او مكان بارد عشان لا تميع :)

حطيت له التحميلة والحمدلله لا جاه حرارة ولا غيره يارب لك الحمد ويتقلب عاادي ويلعب ماحس فيها ماشاء الله تبارك الله

تونا أول يوم بس متفاااااااااائلة ان ربي جعلها سبب للشفاء وهو بيده الشفاء لا غيره :)

وحلفت انها ماتاخذ ريال جزاها الله خير الجزاء

الحين جا دوري أسألكم

الكويات _ احط عليها خواجوا عادي والا لا ومرهم حروق احط والا لا ؟؟ وتلتهب والا عادي اذا قشرت
التحسن _ متى بديتوا تلاحظونه لاني كل شوي التفت من فرحتي فيه ودي يقوم يمشي اليوم :(
وهل اذا تقشرت الكوية تتعبه والا لا ؟؟

دعواتكم بنات ربي يشفيه وافرح فيه انا وابوه لا تنسوني من دعواتكم ما نقلت هالكلام الا لوجه الله ناوية اساعد كل ام محتارة مثلي ..

وبنات اذا فيه استفسار او شي نسيت اقوله لا ترسلون خاص ما اقدر ارد عشان توي مشاركاتي ماتسمح لي بالرسايل الخاصة :)

81K

يلزم عليك تسجيل الدخول أولًا لكتابة تعليق.

تسجيل دخول

ام المستقبل* • 10 سنوات

ماعندي علم
الله يحفظة ويشفيه ويخليه لك يارب

Ram Al harbi • 10 سنوات

الله يشفيه لك يارب
فعلا ام ناصر الكل يمدحها الله يجزاها خيره

ان شاءالله البنات يفيدونك

أم النونو@@ • 10 سنوات

ياعمري انتي عشت معك جو وكأني اشوف لاني عشت نفس الاحداث و كويت ولدي عند ام ناصر بعد

لاتحطين لاخوا جوا ولاشي يمكن اي شي تحطينه ينقض الحميه انتبهي

الحروق من نفسها تطيب وتتقشر مع الوقت ماراح توجعه اللهم انتبهي لاتلزق بالملابس او تحتك بالحفاظه

الحفايظ اشتري بيبي جوي كلوت اسهل لك واسهل لولدك واسفطيها من ورا لاتجي الكويات وتوجعه ياقلبي هو

والتحسن ماراح يكون بذاك السرعه

يعني كويت ولدي وعمره سنه و٩ شهور ومشى وعمره سنتين وشهرين

لكن راح تلاحظين سرعه تحسنه بالتنفس والبلع والسعابيل والامور ذي

اكلمك من تجربتي مع ولدي وان شالله ولدك يتحسن اسرع،

الله يشفيه ويخليه لك يارب

relaxjuhani • 10 سنوات

ياقلبي اسال الله العظيم رب العرش الكريم ان يشفي ولدك

افضل شي للحروق كريم ميبو وبس
احترق صدر ولدي قبل فتره وكنت مااحط له غير كريم ميبو والحمدالله طاب حرقه بسرعه وراح اثره

rzan99 • 10 سنوات

ما شاء الله تبارك الله

الله يشفيه ويخليه لك ويفرح قلبك

اختي لا تروشيه كل شويه عشان الجرح ينشف ويتقشر لانه اذا جاته رطوبه يطول على مايطيب الا اذا ان الحرمة نصحتك بالترويش كل شوي