فضفضة لا اكثر

السلام عليكم ورحمة الله وبركاته

والصلاة والسلام على نبينا محمد وعلى آله وصحبه وسلم أجمعين

راح اعتبركم امهاتي واخواتي وراح اقول لكم عن اللي في قلبي واعتبروها مجرد فضفضة لا أكثر

انا بنت توني صغيرة ادرس بالثانوي .. الله ما رزقني بأخوات أكبر مني او اصغر مني بسنة او سنتين

ولما رزقني بأخت توها صغيرة وعمرها سنتين واخواني الباقي كلهم اولاد .. وانا صغيرة بصف السادس

صارت لي مشكلة تقدرون تقولون انها كانت سبب عقدتي وانا لي بنت خالية قدي واحنا من كنا صغار

كنا مع بعض لي يومكم هذا ولله الحمد .. يوم من الايام واحد خسيس وحقير اتصل على رقمها وهي ردت

وعرف انها بنت ف صار دايما يتصل لها وهي كانت تحاول تتخلص منه بأي طريقة حاولت معاه بالتهديد انها

تخبر امها واهلها وما كانت ترد عليه ولكن كان يصر على ان يتصل لها وهي كانت خايفة تقول حق امها لانها

ما كانت قريبة منها كثير وخافت ان تفهمها غلط وخصوصا ان احنا كنا صف سادس وما كنا نعرف نتصرف .. ويوم

من الايام هذا الولد عرف ان لها بنت خالة اللي هي انا ومدري شلون طلع رقمي وقام يتصل لي انا الثانية

انا كنت خايفة كثير وبحكم اني بعد ما كنت قريبة من امي واخواني كلهم صغار وانا اكبر وحدة وكنت صغيرة كنت

خايفة اني اقول حق امي .. ويوم من الايام بنت خالتي كانت تكلم صديقتها بالتلفون واخوها الكبير شافها وقال

لأمها انتبهي ترى بنتك اتكلم ولد وفهمونا غلط وبعدين خالتي نادتها اللي هي امها وقالت لها اخوك يقول كذا وكذا

الكلام هذا صح ؟ قالت لها لا انا مالي بهالسوالف وانتي تعرفيني وانا تربيتك ومن هالكلام ذا .. وبعدها خالتي قالت

لها خلاص اوك انا صدقتك ولكن لا يجي يوم ويقص عليك ولد ابليس ويكلمك وقالت لها ان شاء الله .. وفي نفس

الاسبوع اهلنا تجمعو في بيتنا ف رحنا احنا فوق في غرفتي عشان نجلس مع بعضنا ونتسلى وما شفنا الا هالولد

يدق عليها وهي ما كانت ترد عليه وفي تلفونها كان في حركة تسويها اذا حد يتصل لك يطلع لك مشغول ف هي

قالت هذا احسن حل عشان يوقف اتصالات .. وسبحان الله امها كانت تحت واتصلت لها وكانت دايما تشوفه مشغول

لكن هو ما كان مشغول هي سوت ذيك الحركة عشان الولد ما يمللها ويتصل لها لكن خالتي فهمت غلط كانت

مفكرة ان تلفونها مشغول على اساس انها تكلم ذي الولد لكن الله يشهد علينا ان حنا ما كنا نكلمه ولا شي ..

ركبت الغرفة فوق وقالت لها هاتي تلفونك ابي افتشه وبعدين قالت من هذا قلنا لها ما نعرفه قالت قولي لأمك

ولا انا راح اقول لها راح اعطيك فرصة يومين انا قلت لها ان شاء الله .. بنت خالتي كانت خايفة ان الولد يتصل وبعدين

امها اتصدق ظنونها وتمت تبكي .. انا كنت ابي اقول لامي بس كنت خايفة ومترددة ومرو هاليومين وما خبرتها وكنا

في بيت جدتي ولما رجعنا البيت امي قالت لي هاتي تلفونك قلت لها ليش ونظراتها كانت مو طبيعية وفيها غضب

تمت تصرخ علي لان خالتي خبرتها عن السالفة والله يعلم ايش قالت لها .. بس لما رجعنا البيت امي تمت تصرخ

علي ايش لك بهالسوالف وليش كذا وانا خلاص ما راح اعطيك تلفون وانا حزتها ما كنت فاهمة شي ولا كنت فاهمة

ان امي فاهمتني غلط وكنت صغيرة ماعرف اتصرف .. ف قلت ليش امي سوت فيني كذا وانا ما سويت شي غلط

حرمتني من اشياء بدون سبب ف صرت اخاف منها وكانت حياتي بين المدرسة وارجع البيت انام لي المغرب اقوم

وانام وهذا هو الموال كانت ايامي كئيبة افكر ليش امي حرمتني من اشياء هي من حقي بدون سبب .. وهذا شي

خلاني ابتعد عن امي اكثر واكثر واكثر صرت اخاف منها واتردد اذا اقول لها شي وماحب اكلمها عن أي شي في حياتي

هي الحمدلله ما قصرت علي في شي من الناحية المادية واي شي ابيه تجيبه لي لكن انا كنت محتاجة عاطفة

ما كان عندي اللي افضفض له او اشكي له همي .. كانت اتصير مشاكل معي ماعرف الجأ لمن .. تصدقوني لو اقول

لكم ان في حياتي كلها عمري ما فتحت موضوع او تناقشت في موضوع مع امي !!! .. ما احس بالراحة واحس بالخوف

والتردد .. مع ان من قلبي كنت اتمنى اني اكون قريبة لها مثل باقي البنات .. ولا مرة جتني وكلمتني في موضوع

او حاولت اتناقشني في موضوع ودايما اتحط في بالها اني صغيرة ولي الحين مع اني في المرحلة الثانوية .. انا مو

حابة ان هالعلاقة تستمر مع امي .. احاول كثير اني اتقرب منها لكن مو قادرة هالمشكلة اللي صارت لي قبل سببت

لي عقدة .. صح يمكن تقولون ان ماله داعي ومن هالكلام لكن والله لو تعيشون اللي عشته كان ما بتلوموني ..

اتذكر جتني ايام صرت فيها انطوائية لمدة 4 شهور ماحب اختلط بالناس ولا احب اكلم احد ولا لي احد وكنت دايما

اجلس بغرفتي ابكي ومحد يدري عني .. كنت اقضي 3 اسابيع من غير لا اروح مكان بس حياتي بين المدرسة

والبيت .. واذا طلعت اطلع بالغصب من امي لكن كنت دايما اجلس بعيدة عن جمعة البنات واروح المكان اللي مافيه

احد وافكر .. مع ان بنات اهلي اغلبيتهم كانو في سني لكن كنت اكره اشوف احد او اكلم احد وطول يومي ساكتة

لولا رحمة الله كان الله يعلم بحالي والحمدلله ان حالي تحسن احسن من قبل بكثير وكانت العصبية ملازمتني في كل

مكان ما استحمل احد يكلمني او يقول لي أي شي ودايما مكشرة ماحب اضحك .. واتذكر ايام كنت لما اشوف

ام تحضن بنتها او ان يضحكون مع بعض او ان اعرف انهم قراب من بعض كنت اشوف الموقف وابكي .. حتى لو

مسلسل او فلم او أي شي مجرد اشوف هالموقف كنت ابكي .. كنت محتاجة لحنان امي وحضنها لانها من زمان

ما حسستني بهالشي ولا زلت افقد هالشي .. ولا مرة سألتني ايش اخبارك او ايش يصير معاك من مشاكل

هي دايما على بالها انا الحمدلله مرتاحة والدليل انها دايما تنتقدني واتقول لي انتي ما تشتغلين بالبيت وماتسوين

شي مع ان هي تشتغل وعندنا خدامة وانا ارجع البيت الساعة 3 وارجع هلكانة وتعبانة اريح ساعة وبعدين ابتدي

ادرس ويروح وقتي كله بالدراسة .. كانت دايما اتقول لي انتي لا شايلة مسؤولية ولا شايلة هم شي لكن لو تدري

باللي داخلي كان ما قالت هذا الكلام .. احاول اتقرب منها بس احس بالخوف اتجاها والسبب الرئيسي هالمشكلة

كنت اقول ان انا ما سويت شي وحرمتني من اشياء وانا مالي ذنب ولما كبرت فسرت السالفة وعرفت اني

مظلومة والسالفة اللي كانت ببالها كلها خطأ بخطأ لكن الحين ما ينفع اقول لها شي بعد كل هالسنوات .. وادري

بتقولون ليه انتي عندك جوال وكنتي طفلة احب اقولكم ان انا بحرينية وساكنة بالبحرين ومجتمعنا منفتح واكيد

انتو تعرفون هالشي .. هذا اللي كنت ابي اقوله لكم واتمنى ان ردودكم تريحني ما تنتقدني اعتبروها مجرد

فضفضة لا اكثر .

دمتم بخير ان شاء الله