انا مكلمه الشيخ قبل اسبوعين ورد على بنفسه ان شاء الله تشابه اسماء

لااله الاالله
اللهم صلى وسلم على نبينا محمد واله وصحبه

اللهم اغفر لنورة ووالديها وجميع المسلمين والمسلمات
ووفقها في دينها ودنياها ..
ورزقها واهلها من حيث لم تحتسب

قصتي مامر عليها شهرين
كان عندنا مادة مرة كثيرة مرجع كبير جدا وحصلت لي ظروف ما قدرت ادرس من المرجع فقرات الملخص وهو يحوي الاشياء المهمة وكثثير من زميلاتي قرأو الملخص لأن المرجع تضيعين وسطه

بعد ما خلصت استودعت ربي ما حفظته ودعيت ونمت
وجا بكرة الامتحان
والله العظيم يابنات اني ما لقيت سؤال واحد من الملخص
كله من بين السطور وكل ما اقرا سؤال احس راسي يدور ولا شي من اللي قرأته جا ولا شي

الفت من راسي اجابات مالها اي داعي كلها غلط في غلط
وحطيت راسي في الطاولة وقعدت اصييح كل الوقت وافكر في الملحق

واسمع مضى نصف الزمن . تذكرت اني داعية ربي انجح ويزيد معدلي .. من اول السنة وانا ادعي هالدعاء مستحيل ربي يردني

وقعدت ادعي في القاعة اني انجح بدعاء الحاجة .. الناس تحل وانا ابكي وادعي .. لأن ما عندي اي شي اكتبه او اسويه

المفاجأة وقت النتايج .. كنت واثقة اني ماراح انجح واقول في نفسي ان شاء الله لخير
وانا في الطريق كلمتني صديقتي اني نااااجحة في كل المواد
بغيت انجن طيب شلووون؟!!!
ورحت بنفسي اشوف إلا المادة ناجحة فيها ومعظم الناس رسوووب
ومعدلي زايد بنسبة 2,%

والله العظيم ان هذا بفضل الدعاء فقط الدعاء ولا شي ثاني
لا مذاكرتي ولا اجوبتي ولا اي شي




---
والشكر لصاحبة الموضوع .. ربي يجعل ذلك في ميزان حسناتك

عندي قصة قديمة لها كم سنة

بنات انا ما كنت اصلي .. ربي لا يعيدها من ايام
دراستي اتاخرت فيها سنين .. لا زواج .. احس مافي توفيق في اي شي في حياتي اي شي يمشي عكس ما اريد ..

ويوم قرات عن الاستغفار والدعاء لتحقيق الاماني - لاحظو ما كنت اصلي-
فقلت ليه ما استغفر .. ابليس وهو ابليس يوم دعا ربه ((انظرني الى يوم يبعثون)) ربي استجاب له

بدات بالاستغفاروكنت متحمسة من تجارب البنات ..استغفر في اليوم مئات المرات .. تدرون في الاول ما تحقق الشي اللي ابي .. بس حصل شي لو اجلس عمري كله احمد ربي ما وفيت
(صرت اصلي) رغم اني من سنين اجاهد نفسي وما اقدر استمر
واستمريت في الدعاء والاستغفار صرت استغفر احيانا الف مرة واكثر
وبدا التوفيق يهل علي من كل مكان
واصلت دراستي اللي كانت متوقفة سنوات والحين انا في السنة الاخيرة

جاني اكثر من خاطب صح .. كلهم رفضتهم بس انا على ثقة انه بيجيني شخص بالصفات اللي ابي وواثقة في كرم ربي

تعالجت من حب ا لشباب اللي كان له سنييين معذبني ومشوهني

ربي وفقني لقيام الليل .. صح مو كل يوم بس وربي صرت احس في وجهي نور

والله لو اقارن حياتي قبل وبعد .. كانها حياة شخص ثااني مو حياتي اللي كنت اعيشها
وكل هذا بفضل الاستغفار والدعاء ..


بنات اوصيكم بالاستغفار
والله هو المفتاح ... وربي بتشوفين بعيونك امنياتك تتحقق واحدة ورى الثانية
غير ذنبك اللي يغفر ورضا ربك وش تبين اكثر؟

استغفر الله العظيم واتوب اليه لي ولكل من مر هنا