برنامجي البسيط اعطى بشرتي نظاره واختفت النقاط السوداء ..اهداء لكم قبل العيد

السلام عليكم 
كيف الحال حبايبي 
اول مره افيدكم بشي دايما اسألكم حمسوني 
هذا البرنامج والله عن تجربه رووووعه اعطى بشرتي حياه ونظارة ماني مصدقه نفسي ماشاءالله 
والله والله كنت اروح للمشاغل الكبيره واسوي تنظيف وماسك بخمس ميه ريال والنتيجه كم يوم وترجع بشرتي زي ماكانت واخر مره ماحسيت فرق اساسا 
هذا تنظيف وتغذيه للبشره و
هذا برنامجي رووعه بس مع رمضان تركته بس ان شاءالله برجعله من الليله ابي اتزين قبل العيد 
هي سهله وغير مكلفه ابدا  
تنبيه *
نوع بشرتي عاديه تميل للجفاف مع الاهمال كانت شاحبه الى حد ماء وانفي دهني وفيه نقط سوداء

نتائج البرنامج ((((((المفروض اني اكتبها اخر شي بس عشان تتحمسون معاي بكتبها لكم الحين))))))
1-اهم شي بالنسبه لي اختفت النقاط السوداء اللي بالانف كانت مسببه لي احراج 
2-خفت القشور اللي بالبشره اللي تكون من كثرت المكياج 
3-بشرتي اتوحد لونها وصار فيها حيويه كل مااعدي من عند المرايه اذكر الله 
4-اعطتني لون مورد ونظاره لبشرتي واحسها صحيه الحمدلله 
5-صارت بشرتي مشدوده وطبعا هذا تأثير مكعبات الثلج 
6-شفايفي صارت نااااعمه وطريه وماعادت تنشف وتتشقق مثل اول

...........................
راح اكتب اللي نسويه بالترتيب : يوميا وبعدين اسبوعيا وبعدين شهريا 
        *****************************************
البرنامج اليومي :
1.لمن تصحين من النوم بعد نمرر على الوجه ثلجه مويا ورد يشد البشره ويوردها 
2.وقبل النوم تنظفين الوجه بحليب اللي متعودة عليه انا احب حق جونسون روووعه وكمان غارنيه حلوو
3.وماسك يومي عباره عن (2 ملعقه صغيره زبادي+2 ملعقه صغيره شوفان مطحون + 1 ملعقه صغيره ماء ورد +1ملعقه صغيره عسل)
اذا شفتيها ثقيله زودي ماء ورد
طريقة استخدامه اغسلي وجهك بماء دافي شوي وحطي الماسك حتى على شفايفك وبعد ربع ساعه اغسليه ومرري ثلجه مويا ورد 
لمن تحطين الماسك افضل استرخي ووقتي جوالك ربع ساعه واذكري الله فيها
4.طبعا ماننسى الترطيب بعد الماسك بااي مرطب بشره مااظن تفرق انا استخدم اولاي واذا زوجي مو فيه 3 نقاط بس زيت لوز مسحه خفيفه ولشفايفي فازلين بالصبار 
         ****************************************
 البرنامج الاسبوعي
صنفره من مره بالاسبوع  على حسب حاجتك و حتى الشفايف لها نصيب من السنفره طبعا معروف ماينفع كل يوم صنفره قبل النوم ننضف الوجه بالحليب كفايه 
طبعا نستخدم صنفرة كاب اغسلي وجهك بماء دافي وحطي الصنفره خمس دقايق وصنفري برؤوس اصابعك واغسلي الصنفره وحطي الخلطة اليوميه واتبعي خطواتك اليوميه 

ملاحظة : بالاسبوع حق البرنامج الشهري راح تستغنين عن الصنفره وتكتفين بالصنفره اللي مع البخار 
        ***************************************
البرنامج الشهري :وهنا مربط الفرس 
خطوات البخار (قبل كل شي حظري الماسك نفس الماسك اليومي وحطيه بالثلاجه )
1. البسي ربطه او بندانه على شعرك ونظفي وجهك بالقطنه كويس بالحليب (انا استخدم منظف جونسون او غارنيه كلهم جيدين )
2. اغسلي وجهك بمويا دافيه مايله للحراره وحطي سنفره كاب وخليها من ثلاث الى خمس دقايق وابدائي بصنفرة وجهك برؤوس اصابعك بحركه دائريه وركزي على اماكن الدهون 
3. اغسلي وجهك من الصنفره وجففيه بالطبطبه وجيبي الماسك من الثلاجه 
4. عرضي وجهك للبخار ووقتي جوالك لمده 10 دقايق وحطي شرشف على راسك بحيث يتركز البخار على وجهك بس لاتكوني قريبه مره راح يحرق وجهك وخصوصا اذا كان قدر افضل جهاز البخار امن اكثر 
5 . بعد ماتخلصى البخار تااخذي الخلطه اللي جهزتيها من قبل وافرديها على وجهك من 10 الى 15 دقيقه 
6. اغسلي وجهك بما دافي عشان تزول الخلطه وبعدها مرري ثلجه ماء ورد على بشرتك   
7. وارطب بشرتي بنقطتين الى 3 نقاط بس حاجه بسيطه بزيت لوز وللشفايف فازلين بالصبار بالنسبه لي افضل شي
ونعيماااا


دعواتكم لي ربي يشفيني ويشفي اخوي ويصلح اخواني ويصيرون بارين في امي مسكينه تعبت من عنادهم 
واذا عندكم افكار او اضافات تخلي البرنامج نتايجه افضل لا تستحون لاني خبرتي محدودة و راح انبسط فيكم نفيد ونستفيد وترا هاذا كله تجميع من راسي ماني خبيرة تجميل